YOHANA 9

Yesu ahonia omundu owebulwa nali omubofu

1Olwa Yesu yali nachendanga, yalola omundu owebulwa nali omubofu. 2Abechi baabe nibamureeba, “Omwibaali, niwina owakhola tsimbi; nomundu uyu nohomba nabebuli baabe nikachila niyebulwa nali omubofu?” 3Yesu nabakalusia, “Uyo ye siyakhola tsimbi noho kata abebuli baabe; nebutswa yebulwa omubofu kho emilimo chia Nyasaye chimanyikhe habulafu muye. 4Kakhuhel'le khukhole emilimochie uyo owaaruma olwa kusili m'basu; obutukhu bwitsanga olwa omundu aranyala okhukhola emilimo. 5Olwa sili musibala ndi obulafu bwesibala.”#Mat. 5:14; Yoh. 8:12

6Olwa yamala okhuboola yako, yafutsa amare hasi, nalonga litohi namare tsana ma nabakha litohi tsana khu tsimoni tsitsie. 7Namubool'la, “Tsia wesaabe m'moni mwitubango lia Siloamu,” (Esifune sieliira yili sibetsanga “Okhurumwa.”) Kho yatsia, niyesaaba m'moni mwe ma niyetsa nalolanga. 8Kho abaluyia baabe nende yabo abamulola khwo khale nasabanga, nibareba, “Uyo siali niye owamenya mekhala nasabanga?” 9Abandi nibaboola, “Niye,” ne abandi nibaboola, “Mba, nebutswa afwana siaye.” Naye naboola, “Nise owatsana.” 10Nibamureeba, “Otooye mbwena okhufunulwa tsimoni tsitsio?” 11Nabakalusia, “Omundu olangwa Yesu alongele litoyi niyambakha khutsimoni tsianje ma niyambool'la, ‘Tsia khu Siloamu wesaabe m'moni.’ Ma olwa nziye okhwesaaba mal'le nindoola okhuhenga.” 12Nibamureeba, “Ali hena?” Naye naboola, “Simanyile tawe.”

Abafarisayi barunilisia okhuhonibwa khwomubofu

13Nibamuhila omubofu tsana khu Bafarisayi. 14Liali litukhu lie Sabato olwa Yesu yalonga litohi, nafunula tsimoni tsiomubofu. 15Khe Abafarisayi bamureba khandi singa obwatooye okhuhenga. Nababool'la, “Yali okhubakha litohi khutsimoni tsianje, nindesaaba, ma luno ndolanga.” 16Abalala khu Bafarisayi nibaboola, “Omundu uyu siyarula khu Nyasaye tawe, sichila siahetsanga litukhu lie Sabato oluyali tawe.” Ne abandi nibaboola, “Omundu wetsimbi yakhanyala mbwena okhukhola akamangalimwa singa yaka?” Ma abene nibahingana khukene yako. 17Kho Abafarisayi nibareba owabeyenge omubofu tsana, “Oboolanga mbwena khuye olwa afunuye tsimoni tsitsio?” Naye nababool'la, “Nomuroobi.”

18Ne abakhongo ba Bayahudi yabo sibasubila amang'ana kaake mbu yali omubofu ma luno utooye okhulola tawe, okhwola olwa balanga abebuli baabe 19nibabareba, “Uno no mwana wenywe owamuboolanga mbu yebulwa nali omubofu? Khe luno anyal'le mbwena okhulola?” 20Abebuli baabe nibakalusia, nibaboola mbu, “Khumanyile uyu no mwana wefwe, khandi yebulwa nali omubofu. 21Ne singa atooye okhulola luno, sikhumanyile khwo tawe. Kata sikhumanyilekhwo owali okhufunula tsimoni tsitsie tawe. Mumureebe omwene, akhali mwana, alaboola amang'ana kaake omwene.” 22Abebuli baabe baboola yako sichila bali nibariye abakhongo ba Bayahudi, sichila abakhongo ba Bayahudi bali bamal'le okhulomba omuse, mbu omundu naba namweyama khwo mbu Yesu ni Masihi, akhungwe okhurula musinakoki. 23Niko akachila abebuli yabo nibaboola, “Akhali mwana; mumureebe omwene.”

24Kho, nibamulanga olwakhabili omundu owali omubofu uyo, nibamureeba, “Oboole akatooto imbeli wa Nyasaye. Ifwe khumanyile omundu uyo nowetsimbi.” 25Kho nabakalusia, “Simanyile naba nali owetsimbi tawe. Ling'ana elala eliamanyile lili mbu: Ndabeyenje omubofu, ne luno ndolanga.” 26Nibamureeba, “Akhukholeye sina? Akhufunuuye mbwena tsimoni tsitsio?” 27Nabakalusia, “Olwa mubooleye, simuhuliye tawe, mwenya mubool'le olwakhabili busina?” 28Khe nibamukokonyela, nibaboola, “Ibe niwe oli omwechi uwe, ifwe khuli abechi ba Musa. 29Khwamanya Nyasaye yabool'lana nende Musa, ne omundu uyo, sikhumumanyile aha yarula tawe.” 30Omundu tsana nabakalusia, “Khe nakokhuchenyakhwo obwa muramumanyile aha yarula, nebutswa ufuunuye tsimoni tsianje. 31Ne khwamanya Nyasaye siahul'langa aboni, nebutswa omundu naba nali omwekayakayi wa Nyasaye nakholanga obulalilo bubwe, omwene uyo Nyasaye amuhulilanga. 32Okhurulana mukhuchiaka khwesibala, kasili okhuhul'lwa khwo mbu omundu wafuunulakhwo tsimoni tsiomundu owebulwa omubofu. 33Omundu uyo alaba nararula khu Nyasaye khane siyakhanyal'le okhukhola esindu tawe.”

34Nibamubool'la, “Ibe owebulwa nokhusibwa mutsimbi nawe wakhanyala okhwibaal'la ifwe?” Nibamukhunga okhurula musinakoki.

Obubofu bwomumwoyo

35Yesu naye yahul'la singa bali nibamufubile esioba; yatsia namunyoola, ma namureeba, “Usubiye mu Mwana wo Mundu?” 36Naye namukalusia, “Ne niye wina, Omwami, ma subile muye?” 37Yesu nakalusia namubool'la “Umal'le okhumulola, khandi niye ol'lomanga n'nawe.” 38Kho naboola, “Omwami, subiye.” Ma namwekayakaya. 39Kho Yesu naboola, “Ise ndetsa musibala sino okhukhalaka esiina, kho ababofu balole, ne abalolanga bakwe ababofu.” 40Abafarisayi abali mbali halala n'naye bahul'la yaka, nibamureeba, “Nefwe khandi khuli ababofu noho?” 41Yesu nabakalusia, “Mulaba nimuli ababofu, khane simuli netsimbi; nebutswa luno olwa muboolanga, ‘Khulolanga’ tsimbi tsienywe khe tsiamenya.”

Currently Selected:

YOHANA 9: EBAIBO

Highlight

Copy