YOHANA 5

Yesu yahonia omundu hetubango

1Inyuma we yaka Yesu yatsia Yerusalemu khwisabo lia Bayahudi. 2Ne ha Yerusalemu yaho hasilibwa siamakondi lialiho litubango elialangwa mu Luheburania Bethsaida ne liali namahindu karano. 3Omukanda kwabandu abalwaye bali nibakonangamwo, ababofu, abalema, nende abanyela. [Balindil'langa amaatsi katubuukhe, 4sichila om'malaika wo Mwami yalinji okhwikha mwitubango isi lusi atubuule amaatsi. Omulwaye oba naranga okhwikhamwo, amaatsi nikatubuukhile, yahonanga obulwaye bwosi obuba nibwamuhamba.]#5:4 Amahandiko kandi amakhulu sikali nebiasia bia 3b nende 4 tawe. 5Habwene yaho yaliho omundu owali niyalwala emihika amakhumi kataru namunane. 6Olwa Yesu yamulola nakon'ne namanya walwala amatukhu amenji, namureeba, “Wenyanga obe omulamu?” 7Naye omulwaye nakalusia mbu, “Omwami, sindi nende omundu owokhuura mwitubango nyinga amaatsi katubuukhanga tawe, nebutswa nyinga ise nzitsanga, oundi aranganga okhwikhamwo nase nisili.”

8Yesu namubool'la, “Sinjila wetukhe esirili sisio otsie.” 9Nonoho omundu uyo yahona nabukula esirili sisie niyetuukha natsia.

Litukhu yilio liali lie Sabato. 10Kho Abayahudi nibabool'la uyo owali nahonibwe, “Leelo nelitukhu lie Sabato, nomusilo khu Malako kefwe okhwetukha esirili sisio.”#Neh. 13:19; Yer. 17:21 11Nebutswa naye yabakalusia, “Oumbonisie yali okhumbool'la, wetukhe esirili sisio otsie.” 12Nabo nibamureeba, “Omundu tsana okhubooleye mbu wetukhe esirili ochende, niwina?” 13Nebutswa owali nahonibwe, siyali namumanyile tawe, sichila Yesu yali nakoreye mubandu khulwo omukanda omukali.

14Olwe inyuma Yesu yamunyoola mu Hekalu, namubool'la, “Lola, uhonibwe, orakhakhola tsimbi khandi, khase obubi obukali bwakhakhukwila.”

15Omundu uyo yatsia nabool'la Abayahudi mbu, “Yaali Yesu oumbonisie.” 16Kho Abayahudi nibakhupia Yesu esibi sichila yakhola yako mwitukhu lie Sabato. 17Nebutswa Yesu yabakalusia, “Papa wanje asikholanga emilimo, ne nase khandi ngwan'ne okhukhola emilimo.” 18Khusifune sieling'ana yili Abayahudi baruna okhusila okhwira Yesu sichila yononisie Esabato, khandi alanganga Nyasaye Samwanawe, nambwo yekholanga okhuhelana nende Nyasaye.

Obunyali bwo Mwana wa Nyasaye

19Yesu yabakalusia nababool'la, “Mubool'langa tooto, omwana sianyala okhukhola ling'ana khububwe ndirali elialolanga Papa uwe nakhola tawe. Yako aka Papa akholanga niko ako Mwana naye akholanga. 20Okhuba Papa wayanza Omwana, ne wamumanyia siesindu siosi esiakholanga omwene. Yakhamumanyie ebindu ebikali ebiyomba yibi ne mwesi mwakhachenye. 21Okhuba singa obwa Samwana asimukusia abafu nabahelesia obulamu, nimbwo Omwana naye ahaananga obulamu khu yabo abaayanzile okhuha. 22Okhuba Papa siakhalachilanga omundu wosi esiina tawe. Nebutswa uheye Omwana obukhalachi bwosi obwe siina, 23mbu bosi bahelesie Omwana oluyali singa bahelesianga Papa. Orahelesianga Omwana oluyali siahelesianga Papa owamuruma oluyali tawe.

24“Mubool'langa tooto, uyo ohulilanga amang'ana kanje, nasubila khuye owaruma, ali nobulamu oburahwa. Sialikhalachilwa esiina tawe, nebutswa wamala okhurula mubafu wainjila mubulamu. 25Mubool'langa tooto, inyinga yitsanga, ne yamala okhubaho, nyinga abafu balihulila omwoyo kwo Mwana wa Nyasaye; nabo abalihulila balisimukukha. 26Okhuba singa Papa ali niye mwene obulamu nimbwo yaha Omwana okhuba obuchiachilo bwobulamu. 27Wamuhelesia obunyali okhukhalaka esiina, sichila no Mwana wo Mundu. 28Murachenya khuyaka; sichila esaa yitsanga eya abandu bosi abali mubilindwa balihulila omwoyo kukwe, 29ne balirula mwo: abali okhukhola amalahi bakhatsie mukhusimukukha khwo bulamu; ne abali okhukhola obubi nabo bakhatsie mukhusimukukha khwo khukhalachilwa khwesiina.#Dan. 12:2

Yabo ababoolanga akatooto khu Yesu

30“Ise sinyala okhukhola ling'ana liosi khubunyali obwanje omwene tawe; Singa obwa mbulilanga okhurula khu Nyasaye nimbwo khalakanga; ne okhukhalaka khwanje nokhulunji, sichila sirunanga obulalilo bwanje tawe, habula obulalilo obwe uyo owaruma. 31Nimba nindekobokhela omwene, obukobokheli bwanje sibunyala okhuba obwatooto tawe. 32Aliho oundi niye oungobokhelanga, ma nase ndamanya obukobokheli bubwe obwa yangobokhelanga nobwatooto. 33Inywe mwarumila Yohana abarumwa, naye yali okhukobokhela akatooto.#Yoh. 1:19-27; 3:27-30 34Ise simbuchil'langa obukobokheli oburula khubandu tawe, nebutswa mboolanga yaka mutoole okhuhona. 35Yohana yali singa etaya eyatukhanga, neywe mwahuchil'la okhusangala mukhukhosia khukhwe hatututu. 36Nebutswa ise obukobokheli obwandi n'nabwo nobukhongo okhuyomba obwa Yohana; emilimo chiene yichio echie ise kholanga, echia Papa yamba khole, chikobokhelanga nichimanyia mbu Papa yaruma. 37Khandi Papa owaruma niye okobokhelanga akobuloli bubwe khwise. Inywe simwahulila omwoyo kukwe amatukhu kosi nohomba simwalola likondo lilie mumatukhu kosi tawe.#Mat. 3:17; Mk. 1:11; Lk. 3:22 38Ne amang'ana kaake sikamenyanga mwinywe tawe, sichila simusubilanga owayaruma tawe. 39Murunilisianga Amahandiko, sichila mukalanga mukene yako namunyoole obulamu oburahwa. Ne yaka namahandiko akakobokhelanga ise! 40Ne nilwo olwa musuulanga okhwitsa khwise munyoole obulamu.

41“Ise simbuchil'langa oluyali lwobukhongo okhurula khubandu tawe. 42Nebutswa manyile muli abandu bambila sina, khandi manyile mbu simuli nobuyanzi khu Nyasaye mumioyo chienywe tawe. 43Ise ndetsa mubunyali bwa Papa wanje, ne simwaimbuchil'la tawe, nebutswa oundi naba niyakhetse muliira lilie, omwene uyo mwakhamuhuchil'le. 44Muyanzanga okhunyoola oluyali okhurula khwinywe abene khubene, nebutswa simutemanga okhunyoola oluyali okhurula khu uyo ouli niye Nyasaye yenyene tawe; kho mwakhasubila mbwena? 45Murakaala en'no ndimuyaala imbeli wa Papa tawe. Musa owe inywe mwabiikhamwo okhunaaya khwenywe niye olimuyaala. 46Kalaba mwasubila Musa, khane mwasubila ise; sichila yahandika amang'ana khu ise. 47Khe nimuba nimurasubila amahandiko kaake, mwakhasubila mbwena amang'ana kanje?”

Currently Selected:

YOHANA 5: EBAIBO

Highlight

Copy