YOHANA 21

Yesu yalolekha khubechi bane nabataru

1Inyuma we yako Yesu yalolekha khandi khubechi baabe khunyanza ya Tiberia. Kekhola singa mbu: 2Simoni Petero, na Tomasi oweliira lindi Mukhwana nende Netsaneli okhurula Kana lia Galilaya, nende abaana ba Sebedayo nende abechi ba Yesu bandi babili bali bosi halala. 3Simoni Petero nabool'la abasie: “Nzie okhuluba.” Nibamubool'la, “Nefwe khulatsia halala n'nawe.” Nibatsia, nibaniina muliaro; ne obutukhu yibwo sibaluba esindu tawe.#Lk. 5:5 4Nyinga bwali nibwakhasia, Yesu yasinjila khuluchinga; nebutswa abechi sibamanya mbu ni Yesu tawe. 5Kho Yesu nabareeba mbu, “Abasiani, musili okhulubakhwo esindu siosi?” Nibamukalusia nabo, “Kata ndala tawe.” 6Nababool'la mbu, “Fuube likoko lienywe enamukhono musaatsa kweliaro, ne mulalubakhwo.” Kho nibafuuba mbwo, ne sibanyala okhulikhwesa tawe sichila bali nibatil'le tsisutse tsinyinji.#Lk. 5:6

7Ma omwechi undi ula owa Yesu yayanza nabool'la Petero mbu, “No Mwami!” Olwa Simoni Petero yahulila mbu no Mwami, yebiikha ekanzo yiye, (sichila yali nali esiehechenye,) niyekhupa mumatsi. 8Abechi bandi baniina khuluchinga muliaro nibakhulula likoko lietsisutse. Sibali ehale nende oluchinga tawe; lwali oluchendo oluhela etsimiita emia ndala. 9Nyinga boola khuluchinga, balola amanda komulilo, ne tsisutse nitsisianikhiywe khuko, nende emikati khandi. 10Yesu nababool'la, “Lere khutsisutse tsiamwakhaluba luno.”

11Simoni Petero naniina muliaro, ma nakhwesa likoko okhuleera khuluchinga nditsuye mwo tsisutse tsingali emia ndala nende amakhumi karano natsitaru, ne kata olwa tsiali tsinyinji mbwo, likoko siliakhalikha tawe. 12Yesu nababool'la, “Hambe Mulie.” Ne siyaliho kata mulala khubechi baabe yabo owateema okhumureeba, “Niwe wina?” tawe. Bali nibamanyile mbu no Mwami. 13Yesu niyetsa, nabukula omukaati, nabaha, khandi tsisutse mbwo. 14Yilwo nilwo olwakhataru Yesu nalolekha khubechi baabe inyuma wokhusimukukha.

Yesu nende Petero

15Nyinga bamala okhulia, Yesu yabool'la Simoni, “Simoni Petero, omwana wa Yona, wainyanza okhuyomba abandi yaba?” Namukalusia “Yee, Omwami; ibe wamanya mbu ise ndakhuyanza.” Yesu namubool'la, “Waaye ebimeme biamakondi kanje.”

16Yesu namubool'la khandi olwakhabili, “Simoni, omwana wa Yona, wainyanza?” Namukalusia, “Yee, Omwami; ibe wamanya mbu ndakhuyanza.” Yesu namubool'la, “Waaye amakondi kanje.” 17Yesu namubool'la olwakhataru, “Simoni, omwana wa Yona, Wainyanza?” Petero nabeelela, sichila umurebele esiakhataru, “Wainyanza?” Namukalusia, “Omwami, ibe wamanya amang'ana kosi, umanyile mbu ndakhuyanza.” Yesu namubool'la, “Waaye amakondi kanje. 18Khubool'langa tooto, olwa wali nosili omubuukha, walinji okhweboha, notsia hosi aha wenyele; nebutswa nyinga olisakhula, olilambisia amakhono kaako ma omundu undi alikhuboha, nakhuhila ahorenyele tawe.” 19Yaka yaboola, okhumanyia okhufwa khwa Petero nafumia Nyasaye mukhwo. Ma Yesu namubool'la, “Nonda.”

Yesu yal'loma khumwechi owayayanza

20Petero yasukhana, nalola omwechi wa Yesu yali niyayanza namulondanga, naye niye owali okhwesetamia ahembi khu Yesu khubiokhulia biamukolooba namubool'la, “Omwami, niwina owanokhusiemane?” 21Nyinga Petero yamulola nareeba Yesu, “Omwami, omundu uyu naye akhole sina?” 22Yesu namukalusia, “Nindakhenya alinde ndaluhe ndetse, nako kali sina khuibe? Ibe nonda.”

23Kho ling'ana yili lialanda khubalondi ba Yesu mbu Omwechi uyo sialifwa tawe. Nebutswa Yesu siyali namubooleye siyakhafwe tawe, nebutswa, “Nimba ninyenya alinde ndaluhe ndetse kali sina khuibe?”

24Omwene uyu niye omwechi watsana okobokhelanga amang'ana kano, khandi niye owakahandika, nefwe khwamanya obukobokheli bubwe nobwatooto.

Okhumalila

25Ne biliho ebindu bindi ebinji ebia Yesu yali okhukhola, bilala ebiakhahandichilwe silala silala, ngalanga khane kata esibala siene siakhaleemele ahebitapu biatsana biakhabiikhilwe, nibiakhahandichilwe.

Currently Selected:

YOHANA 21: EBAIBO

Highlight

Copy