YOHANA 11

Okhufwa khwa Lasaro

1Omundu oweliira mbu Lasaro owamenyanga Betsania, yali okhulwala. Betsania liali litaala lianga Mariamu nende Maritsa, omwana wabwe.#Lk. 10:38-39 2Mariamu niye owatsana owatsukha amafura khubilenje bio Mwami namweya nende liswi lilie, owambotso wabwe Lasaro yali nalwala.#Yoh. 12:3 3Ababotso nyene yabo baruma ling'ana khu Yesu nibaboola, “Omwami, lola, owawayanza alwala.”

4Nyinga Yesu yakahul'la, naboola, “Obulwaye yibwo sibuli obwokhufwa tawe, nebutswa buli khulwo bukhongo bwa Nyasaye mbu Omwana wa Nyasaye afumibwe khulwa bwo.”

5Ne Yesu yali niyayanza Maritsa nende awabwe nyene nende mbotso we Lasaro. 6Nyinga yahulila mbu Lasaro yali nalwala, yakona aha yali nali amatukhu kandi kabili. 7Olwe inyuma nabool'la abechi baabe, “Chende khukalukhe Ebuyahudi.” 8Abechi nibamubool'la, “Omwibaali Abayahudi bali nibenyanga okhukhulasa namachina; nawe wenyanga okhukalukhayo khandi?” 9Yesu nababool'la, “Omubasu sikuli netsisaa likhumi natsibili? Omundu ochenda m'mubasu siyakhesirala tawe, sichila alolanga obulafu bwesibala yisi. 10Ne naba nachenda mubutukhu ne yesiraala sichila obulafu sibuli muye tawe.” 11Yesu yababool'la yaka; ma nameeta okhuboola, “Lasaro, omulina wefwe, akonanga tsindoolo; nebutswa ndatsia okhumubuusia mundoolo tsitsie.” 12Abechi nibamubool'la, “Omwami, naba nakonanga, nahone.” 13Nebutswa Yesu yali nabooyenje akokhufwa khukhwe khwene, nebutswa bakaala abooye akokhukona tsindoolo. 14Nilwo olwa Yesu yabaribul'la kol'lani, “Lasaro ufwiye. 15Ne khulwe inywe, nyanzile sichila sindabeyeho tawe, khe mutoole okhusubila. Chende khutsie khuye.” 16Kho Tomasi, olangwanga Mukhwana, nabool'la abechi basie, “Nefwe chende khutsie, khufwe halala n'naye.”

Yesu niye okhusimukukha khandi niye obulamu

17Nyinga Yesu yoola yo yanyoola mbu Lasaro yali nakon'ne musilindwa amatukhu kane. 18Betsania hali ahembi nende Yerusalemu oluchendo oluhela ahembi etsikilomita tsitaru. 19Abayahudi abenji nibetsa khu Mariamu nende Maritsa, okhubahotselesia khulwa okhufwa khwomusiani wabwe. 20Nyinga Maritsa yahul'la Yesu yetsanga, yarula natsia okhumwakan'na, ne Mariamu nasikhaye munzu. 21Maritsa nabool'la Yesu, “Omwami, olaba niwabeye hano, khane mbotswa siyafiye tawe. 22Ne kata luno manyile, eliosabanga khu Nyasaye, Nyasaye yakhakhuha.” 23Yesu namubool'la, “Mbotso uwo alasimukukha khandi.” 24Maritsa namubool'la, “Ndamanya yakhasimukukhe mwitukhu liesihesi.” 25Yesu namubool'la, “Ise nise okhusimukukha, khandi nise obulamu. Uyo osubilanga khu ise, kata naba nafwa, yakhabe nobulamu; 26naye oli mwoyo ne niyasubiye siyakhafwe kata nahati tawe. Ibe osubilanga yako?” 27Maritsa namubool'la, “Yee Omwami, subiye niwe Masihi, Omwana wa Nyasaye, naye niye owitsanga musibala.”

Yesu nalakaya amasika

28Nyinga Maritsa yali nabooye yako, yatsia nalanga omwana wabwe, Mariamu masilisi, namubool'la “Omwibaali ali hano, akhulanganga.” 29Nyinga Mariamu yahul'la yaka yasinjila bwangu natsia okhumwakan'na. 30Yesu yali nasili okhwinjila mwitaala ne naba asili habwene yaho aha Maritsa yamwakan'na. 31Ma abandu abali mbalinji n'naye munzu, nibamulemianga omwoyo olwa balola Mariamu nasinjila bwangu narula esioba bamulonda. Bakaalanga mbu atsitsanga enasilindwa okhwekhuula.

32Mariamu olwa yoola ha Yesu yali nali, namulola nakwa hasi habilenje bibie, namubool'la, “Omwami, olaba niwabeye hano, khane mbotswa siyafwiye tawe.” 33Olwa Yesu yamulola niyekhuulanga, yabelela ma naba nesihenda mwoyo. 34Ma nabareeba, “Nihena aha mwabeye okhumuyabila?” Nibamubool'la, “Omwami, yitsa olole.” 35Yesu nalakaya amasika. 36Khe Abayahudi nibaboola mbu, “Lolekhwo singa obwa yamuyanza.” 37Nebutswa abandi mubo nibaboola, “Omundu uyu yali okhufunula tsimoni tsiababofu. Siyakhekaliye okhufwa khwa Lasaro?”

Lasaro yasimukusibwa

38Ma Yesu yabelela mumwoyokwe khandi niyoola khusilindwa. Ne esilindwa tsana siali mulwangaywa nisiekal'lwa nelichina. 39Yesu yababool'la, “Hinie lichina yilio.” Maritsa, owa mbotsowe yali nafwiye, namubool'la, “Omwami, luno ahunyanga, sichila leelo namatukhu kane okhurula nafwa.” 40Yesu namubool'la, “Sikhubooleye mbu Noba nosubila wakhalola obukhongo bwa Nyasaye?” 41Ma nibahinia lichina, Yesu nachinga tsimoni tsitsie ikulu, naboola, “Papa, mboolanga khuibe embwo sichila ibe umbul'langa. 42Ndamanya mbu ibe umbul'langa khasotso, nebutswa mbooye yaka khulwabandu yaba abasinjiye yaha kho basubile mbu niwe owaruma.” 43Olwa yali niyakhaboola yaka, nalanga nende omwoyo omukali, mbu “Lasaro, rula esioba!” 44Lasaro tsana narula esioba, nabohelwe ebilenje nende amakhono, nende tsingubo etsiayali nayabiywe n'natsio; ne kata m'moni mumwe nimubohelwe nesitambaya. Yesu nababool'la, “Mumuboholole atsie.”

Obusiemani bwokhwira Yesu

(Mat. 26:1-5; Mk. 14:1-2; Lk. 22:1-2)

45Abenji khu Bayahudi abali okhwitsa khu Mariamu, nibalola aka Yesu yakhola bamusubila. 46Nebutswa abandi khubo nibatsia khu Bafarisayi nibababool'la amang'ana ka Yesu yali nakhol'le. 47Abesaalisi abakhongo nende Abafarisayi nibabunjelesia esiina, nibaboola “Khukhole mbwena? Okhuba omundu uno akholanga akamangalimwa amenji. 48Nikhuba nikhumulekha butswa mbwo, abandu bosi nabamusubile; ma Abaroma baleetsa okhwononia Ehekalu yefwe nende olwibulo lwefwe.”

49Ne oundi khubo owalangwa Kayafa owali Omwesaalisi Omukhongo omuhika kwene yikwo yababool'la mbu, “Simumanyile ling'ana liosi tawe. 50Kho kata simwitsulila singa obwa buli obulahi omundu mulala afwile abandu bosi, musilenje sioluyia lwosi okhutiba?” 51Ne siyaboola yako khululwe tawe; nebutswa olwa yali Omwesaalisi Omukhongo owomuhika kwene yikwo yali naroobanga mbu Yesu yakhafwila Abayahudi bosi. 52Ne sikali khulwo olwibulo yilwo lwonyene tawe, nebutswa abunjelesie halala abaana ba Nyasaye abali nibasalana.

53Ma okhurula khwitukhu yilio balomba emise obwa banyala okhumwira.

54Kho Yesu siyachenda habulafu mu Bayahudi khandi tawe, ne yarulaho natsia musibala esiali ahembi nende esitsiimi, mwitaala elilangwa Efuraimu, namenyayo halala nende abechi yabo.

55Ne Epasaka ya Bayahudi yali ahembi ne abenji nibarula musibala okhutsia Yerusalemu Epasaka nesili okhwola mbu besiiye. 56Kho nibamuruna Yesu, nibabool'lana abene khubene nibasinjiye mu Hekalu, mbu “Mupaalanga mbwena? Siyetsa okhwitsa khwisabo?” 57Ne abesaalisi abakhongo nende Abafarisayi bali nibalachile mbu omundu wosi naba namanya ahaali, abuule ma bamufumile.

Currently Selected:

YOHANA 11: EBAIBO

Highlight

Copy