OKHUCHIAKA 22

Nyasaye alaka Aburahamu okhumuhaana Isaka singa omusango

1Inyuma wamatukhu nalebe Nyasaye yateema Aburahamu, yamulanga, “Aburahamu!” Ne Aburahamu nakalusia, “Ndi hano.”#Heb. 11:17-19

2Nyasaye naboola, “Bukula omwanawo omutelwa Isaka, owa wayanza okhusila, otsie musibala sia Moria, khusikulu esianakhumanyie, omuhaane singa omusango khu ise.”#2 Aketsi. 3:1

3Omukamba okwalondakhwo, nikusili m'mabwebwe, Aburahamu yarenya tsikhwi khulwomusango, nara emisiko khusikhili yiye, ma nabukula Isaka nende abakholi babili. Nibachiaka oluchendo okhutsia habundu ha Nyasaye yali namubooleye. 4Khwitukhu liakhataru Aburahamu yalola habundu tsana nasili ehale. 5Ma nabool'la abakholi babe, “Musikale hano nende epunda, ne nase nende omubuukha khutsie okhwekayakaya Nyasaye, ma khukalukhe.”

6Aburahamu natuukha Isaka tsikhwi, ne ye omwene nachinga om'bano nende elianda liokhuhambia omul'lo. Olwa bali nibatsitsanga, 7Isaka naboola mbu, “Papa!”

Naye nakalusia mbu, “Yee, omwana wanje.”

Isaka nareeba, “Ndolanga noli nende amanda komul'lo ma nende tsikhwi, ne likondi liomusango lilihena?”

8Aburahamu nakalusia, “Nyasaye omwene yeetsa okhuhaana.” Ma bombi babili nibatsilil'la noluchendo halala.

9Olwa boola habundu aha Nyasaye yali namubooleye, Aburahamu yombokha olusambwa ma naloosiakhwo tsikhwi. Naboha omwanawe ma namura khulusambwa, khutsikhwi ikulu.#Yako. 2:21 10Ma nabukula om'bano okwokhumwira. 11Nebutswa om'malaika wo MWAMI nalanga okhurula mwikulu, “Aburahamu, Aburahamu!”

Naye nakalusia, “Yee, ndi hano.”

12Nyasaye namubool'la, “Orasaalisia omubukhawo tawe, kata oramukhol'lakhwo ling'ana liosi tawe. Bulano manyile mbu oriitsanga Nyasaye, sichila siunyimile omwanawo tawe.”

13Aburahamu nasukhana ne nalola likondi nilihan'nde tsinzika musitsakha. Natsia nalibukula ma nalihaana singa omusango omusambe musilenje siomwanawe. 14Aburahamu nakulikha habundu yaho eliira mbu, “OMWAMI nahaane.” Ne okhwola leelo abandu baboolanga, “Khusikulu sio MWAMI, ye nahaane.”

15Om'malaika wo MWAMI yalanga Aburahamu olwakhabili okhurula mwikulu, 16naboola mbu, “OMWAMI aboolanga, ‘Ndesuhanga khuliira lianje omwene mbu ndakhakhuhe ikhabi sichila ukhol'le kano ma siunyimile omwanawo omutelwa tawe.#Heb. 6:13-14 17Khusubisinjia mbu ndakhenjihie olwibulo lulwo singa tsinyininyini tsiokhwikulu, nohomba singa omuyekhe okwokhuluchinga lweinyanza. Olwibulolwo lulileka abasuku balwo.#Heb. 11:12 18Tsimbia tsiosi tsiakhaareebe okhutsilaamila tsikhabi singa namiiye abolwibulolwo tsikhabi, sichila wali okhuhul'la amalako kanje.’ ”#Ebikh. 3:25 19Aburahamu nakalukha khubakholibe, ma nibatsia bosi Berisheba, ewa Aburahamu yamenya.

Tsinzibulo tsia Nahori

20Inyuma wamang'ana yako Aburahamu yahul'la mbu Milika mukha Nahori omwana wabwe wayibula abaanamunane, 21Usi omwana wokhuranga, Busi omwana wabwe, Kemueli samwana Aramu, 22Kesedi, Haso, Pilidashi, Yidilafi, nende Betsweli. 23Betsweli niye owali samwana Rebeka. Yaba nibo abaana munane aba Milika yebul'la Nahori, omwana wanga Aburahamu. 24Reuma omukhasi wa Nahori yali niyabikha naye niyebula Teba, Gahamu, Tahashi, nende Maaka.

Currently Selected:

OKHUCHIAKA 22: EBAIBO

Highlight

Copy