OKHUCHIAKA 17

Es'sebo nesilolelo sieindakano

1Olwa Aburamu yali nemihika amakhumi karano nakane nende chirano nachine OMWAMI yamulolekhela, namubool'la mbu, “Nise Nyasaye Wokhunyala Biosi. Umbul'le ma okholenje amalunji buli khasotso. 2Ndakhalombe indakano n'nawe ma ndakhenjihie tsinzibulo tsitsio.” 3Aburamu niyenama hasi obweni bubwe nibwola khwiloba ma Nyasaye namubool'la mbu, 4“Nombanga indakano yino n'nawe: khusubisinjia mbu wakhabe omwibuli wetsimbia tsinyinji. 5Eliira lilio sinalibetsenje khandi Aburamu tawe, nebutswa Aburahamu, sichila khukholanga okhuba omwibuli web'bala ebinji.#Rom. 4:17 6Ndakhakhuhelesie tsinzibulo tsinyinji ne balala khubo bakhabe abaruchi. Wakhabe nende tsinzibulo tsinyinji etsiakhabe tsinzibulo tsinyinji.

7“Ndakhareho lisubisio lianje khuibe nende abetsinzibulo tsitsio tsiamatukhu keimbeli singa indakano erakhahwe tawe. Ndakhabe Nyasayewo khandi Nyasaye wolwibulo lulwo.#Lk. 1:55 8Ndakhakhuhelesie ibe nende abolwibulo lulwo esibala sino esiomenyangamwo singa omucheni. Esibala siosi esia Kanaani siakhabe esiolwibulo lulwo inziayo, nase ndakhabe Nyasaye wabwe.”#Ebikh. 7:5

9Nyasaye nabool'la Aburahamu mbu, “Nawe ohuchiil'le okhulinda indakano yanje, ibe omwene nende olwibulo lulwo olwakheetse, mutsinzibulo tsiabwe tsiosi. 10Ibe nende olwibulolwosi okhwola muhuchil'le okhuseba omusaatsa wosi oli muinywe.#Ebikh. 7:8; Rom. 4:11 11Okhurula n'nondi namusebwenje likhoba lielifunga lienywe. Sino nasibe esilolelo sieindakano hakari wenywe n'nase. 12Buli omwana omusiani owibulwa niyakhoola amatukhu munane, nali mwitaala lilio, kata abe nali omusumba nohomba omurende nasebwenje. 13Buli omusiani nasebwenje khulwo okhumanyia mbu indakano yanje neyeinziayo. 14Omusaatsa wosi ouli omusinde ourasebwa tawe, siyakhabalwe singa mulala khubandu banje tawe, sichila siyalonda indakano yanje tawe.”

15Nyasaye nabool'la Aburahamu mbu, “Sinolanjenje omukhasiwo Sarai khandi tawe, okhurula n'nondi eliira lilie nalibetsenje Sara. Namulamile tsikhabi ne nakhuhelesie omwana omusiani okhubir'ra muye. 16Namulamile ikhabi ma yakhabe nyina tsinzibulo tsiosi, ne abaruchi babandu balirula mulwibulo lulwe.”

17Aburahamu yenama hasi ma nachaka natsekha olwa yapaala, “Omundu yakhanyoola omwana nali nende emihika emia ndala? Ne Sara yakhabelekha omwana nali nemihika amakhumi karano nakane?” 18Nareeba Nyasaye mbu, “Busina khuralekha Ishimaeli alabukule emiandu chianje?”

19Nyasaye naboola mbu, “Tawe, omukhasiwo Sara nakhwibul'le omwana omusiani ne nomukulikhe Isaka. Ndakhatinyilisie indakano yanje n'naye khandi nende olwibulolwe inziayo. 20Mbuliye obureebi bubwo khu Ishimaeli, khe namulamile tsikhabi ma ndakhamuhe abaana abenji nende olwibulo olwinji okhusila. Yakhabe samwana abakhulundu likhumi nababili, ne ndakhamukhole oluyia olukali. 21Nebutswa ndakhakufuhasie indakano yanje no mwanawo Isaka owa Sara aliibula inyinga singa ino mumuhika kwitsa.” 22Olwa Nyasaye yamala okhul'loma khu Aburahamu, yamulekha natsia.

23Khwitukhu liene yilio Aburahamu yalonda aka Nyasaye yamulaka, ma naseba omusianiwe Ishimaeli nende abasaatsa bandi bosi abali mwitaala lilie, nibalimwo abasumba abebul'lwa hango hahe nende abayali niyakula namapesa. 24Aburahamu yali nende emihika amakhumi karano nakane nachirano nachine olwa yasebwa, 25ne omwanawe Ishimaeli yali nemihika likhumi nachitaru olwa yasebwa. 26Bosi basebwa litukhu elala, 27halala nende abasumba ba Aburahamu bosi.

Currently Selected:

OKHUCHIAKA 17: EBAIBO

Highlight

Copy