OKHUCHIAKA 12

Omulango kwa Nyasaye khu Aburamu

1OMWAMI yabool'la Aburamu mbu, “Rula musibala sienywe, khubekho baabo, nende hango ha papawo, ma otsie musibala esianakhumanyie.#Ebikh. 7:2-3; Heb. 11:8 2Ndikhuhelesia abetsukhulu abenji abakhabe oluyia olukhongo. Ndikhulaamila ikhabi, nende okhukaliyia eliira lilio ne wakhabe omunakhabi.

3Ndakhahaane ikhabi khuyabo abakhulaamila ikhabi,

nebutswa ndakhalaame yabo abalikhulaama.

Ne okhubir'ra mu ibe ndakhalaamile tsinzibulo tsiosi ikhabi.”#Gal. 3:8

4Olwa Aburamu yali nemihika amakhumi kane nakataru yarula Harani, singa OMWAMI yali niyamubool'la, ne Loti yatsia halala n'naye. 5Aburamu yabukula Sarai omukhasiwe, nende Loti omwana womwana wabwe, nende emianduchiosi echiabali nibanyoola Harani, ma nende abakholi babwe bosi. Nibachiaka oluchendo lwokhutsia musibala sia Kanaani.

Olwaboola Kanaani, 6Aburamu yachenda okhwola olwa yoola habundu hatsienukhu halangwa Shekemu, khumusaala kwa More. Mumatukhu yako Abakanaani bali nibasimenyele musibala yisio. 7OMWAMI nalolekha khu Aburamu namubool'la mbu, “Sino nisio esibala esianambelesie olwibulo lulwo.” Ma Aburamu niyombokhela OMWAMI owali namulolekheye olusambwa.#Ebikh. 7:5; Gal. 3:16 8Yamala narulayo natsia khulubeka lwebukwe lwa Betseli musibala siebikulu ma nakhomayo liheemalie hakari wa Betseli elubeka wemasaba, nende Ai elubeka lwebukwe. Niyombokhaho olusambwa ma niyekayakayilaho OMWAMI. 9Yamala natsilil'la noluchendo nahengele olubeka lwenandete.

Aburamu musibala sie Misiri

10Ne yaliho inzala musibala sia Kanaani, ma Aburamu narula natsia Emisiri okhumenyakhwoyo sichila inzala yali ingali okhusila. 11Olwayali nali ahembi okhwinjila Emisiri, yabool'la omukhasiwe Sarai mbu, “Ibe oli omukhasi welikondo lilahi. 12Olwa Abaamisiri nabakhulole, nabasubile mbu oli omukhasi wanje ne nabanzire, nawe nabakhulekhe. 13Nobabool'le oli mbotswa ne sinabanzire tawe khandi nabandende bulahi khulweibe.”#Okhuch. 20:2; 26:7 14Olwa yenjila Emisiri, Abaamisiri balola omukhasiwe nali owelikondo lilahi. 15Balala khubemeli bomuruchi we Misiri bamulola ma nibabool'la omuruchi obwayali nelikondo lilahi, kho yamala nahilwa munyumba yomuruchi. 16Khulwaye omuruchi yalinda Aburamu bulahi, namuhelesia amakondi, tsimbusi, tsing'ombe, etsipunda, abarumwa nende tsingamia.

17OMWAMI yakhupia omuruchi esibi halala nende abeinyumbaye, khulwokhubukula Sarai. Yabaleer'ra obulwaye obubi obwabukhan'ne. 18Omuruchi yamala nalanga Aburamu namureeba mbu, “Nisina esiaukholeye yisi?” Busina oraimbool'la nomukhasiwo? 19Busina niumbool'la nomukhaana wenywe ma nikachila nimubukula okhuba omukhasi wanje? Omukhasiwo ngwoyu, mubukule orule otsie. 20Omuruchi nalaka abandube, ma nibahinia Aburamu musibala yisio, halala nende omukhasiwe nende biosi ebia yali n'nabio.

Currently Selected:

OKHUCHIAKA 12: EBAIBO

Highlight

Copy