MARKUS 15

Yesus Ara Pilatus Bek Bo Byik Yuba

(Mat. 27:1-2, 11-14; Luk. 23:1-5; Yoh. 18:28-38)

1Hyak lugunaʾ nong dara, yuba wa gakaʾ dub nang eb, Yahudi dub nang eb, yuba neksin nang eb, yuba yana lelesin nanga nidyaʾ, ban nang dara, unuwanamab aboka yuba seleb sabek. Dara, sikda Yesus ak henga geregoka bo balameknya nera, Pilatus bek bo elegel byik. 2Dara Pilatus bera Yesus ak, ”Anda Yahudi nimi dubnya ululam de?” wenyaboka heibuk. Wenyek Yesus ara, ”Alan, anja leblam an,” hyok. 3Wenyek yuba wa gakaʾ dub nang era, alak sondaʾ amba malya unulamla aboka, yokaʾ-yokaʾ nauba yana kiboka lelemek. 4Anasa Pilatus bera Yesus ak hnon, ”Anak yokaʾ-yokaʾ nauba yana kiboka lelenjaknya nera eiyilam de? Anasa anda, nera aldib, nera orok, aro lebnenggunusom de?” aboka heibuk. 5Bok Yesus ara, anam hyak mekaʾ yuba doro sanaʾ orok anasa, Pilatus beneba alda hekasa do senewok.

Yesus Ara Gal Ak Oboka Glabnemab Hyek Yuba

(Mat. 27:15-26; Luk. 23:13-25; Yoh. 18:39–19:16)

6Wera Yahudi nim edya perob sum yenewana dara, nimi nauba yok nim edya yuba saboka, benyek henga lobnesilim aboka molowan dara, henga geregoka beiyimna nang era lobol lolosuk. Dara ban anaso ununanya nera, sobaʾ unulusuk. 7Wera ban salek era, nimi heika doluwoka oldalamek sum enyek, nim omekaʾ anasa, be hnonda Barabas beb, onoʾ yok nang eb henga geregoka beiyimek. 8Anasa nimi nauba longol yeiniboka, unulusilimaʾ sunuwoka, be hnon nunsamba henga lob lobsilom aboka molowek. 9-10Yuba wa gakaʾ dub nang danera, hman ganya boboka, Yesus ara doboka elegel bilimekaʾ ella umokaʾ anasa, Pilatus bedya nimi nauba longomek nim ek, ”Wera Yahudi dubnya benyek, ugunsamba henga lob lobnesin de?” wenyaboka heibsuk. 11Bok yuba wa gakaʾ dub nang era, yok nim ek wenewoka Pilatus bek nunsamba dara, Barabas benyek henga lob lobnelam henelum aboka orugeisik.

12Wenyek Pilatus bera nimi nauba longomek nim ek, ”Ugunja Barabas benyek, nunsamba henga lob lobsilom hulum dara, Yahudi nimi dubnya alalumnya bek dara, hekaʾ hubnamna do?” aboka heibsuk. 13Dara sikda, ”Alda bera, oboka gal ak glabnok,” aboka yeiriwoka lelemek. 14Wenyek Pilatus bera sikenek, ”Bok alda hekaʾ ak meknewok do?” aboka heibsuk. Bok nimi nauba longomek nim era, ”Alda bera, oboka gal ak glabnok,” aboka onoʾ nauba yeiriwoka lelemek. 15Anasa, Pilatus bera nimi ganya hekiyiwosunun senewoka, alda Barabas benyek siksamba henga lob lobsuk. Bok Yesus bek dara, legebnaʾ adya legeb-legeba obeekanya, oboka gal ak glabnelum aboka doboka elegousuk.

Yin Bon Nang Edya Yesus Ak Derelemek Yuba

(Mat. 27:27-31; Yoh. 19:2-3)

16Dara Yesus ara yin bonaʾ nang edya doboka bo balameknya nera, mok soko dubnya bedyaʾ ek bo byik. Anya, yin bonaʾ nanga nidyaʾ ara, mamaganalum aboka wenyabdangamek. 17Dara, sikja Yesus ak mouk dok bokaʾ akleng ongoyiwoka, gal si henga gwanewoka Yesus adya huk ak gwaragiyiwek. 18Anya, sikda Yesus ak nauba sondaʾ amba giboka lelemekaʾ ara, ”Yahudi nimi dubnya o, perob aboka gibjab,” alamek. 19Sikda Yesus adyaʾ huk ak gamaʾ adya saboka oboka, gamalaʾ nauba solob gouluwoka, onoʾ sene alak nauba oumuwoka giblemek. 20Wera nauba sene seleb wenyabgogowek dara, mouk dok bokaʾ akleng ongiyimekaʾ ara gwiriwoka, aljaʾ yokaʾ akleng ongiyiwek. Dara wera, oboka glabnobaʾ aboka, doboka bo gobek.

Yesus Ara Oboka Glabek Yuba

(Mat. 27:32-44; Luk. 23:26-43; Yoh. 19:17-27)

21Wera obnobaʾ aboka pikek bo bek dara, nimi be hnon, Aleksander beb, Ufus beb dadya sikjaʾ neyung, Kirene mokek abnya, Simon benyek, mek heikek abaʾ ara nauba heikek yanggokaʾ anyek, dukaʾ lolowoka, Yesus ak oboka glabnemek gal ek bobnelam aboka orugek. 22Dara, Yesus ara bo balameknya nera, mok soko meina, si ara Golgota, nunja yub edya dara, ”Huk yanggol mein,” alamekaʾ ak sam bo byik. 23Wera anyagan bo byikek ab dara, anggur mek ab, sik mek ab meemekaʾ anyek, Yesus ak elegek bok, dogom hyok. 24Anya Yesus ara oboka gal ak seleb glabek. Dara, alja aklenga gwiriwoka domekaʾ anyek, heknyek dobnamla do aboka, yina bomdewoka ulumek.

25Yesus ara lugunaʾ henga ikil yalamla jam sembilan anyek, oboka gal ak glabek. 26Dara, anasa omab anaʾ dibaʾ ara, ”Yahudi dubnya an e,” aboka momnya doboka elegek. 27Wera Yesus oboka glabekaʾ ak ara, yu hwam nang, nimi penya oboka neikaʾ glabsik. Dara, be hnonda sirikek sam, onoʾ yoknya bera waneng ek sam uboka glabek. 28Ban unuweknya nera, yuba bukuk sam men lero momnya dobokaʾ ara, ”Alda hiboka malya unaʾ nim aboka einiwanamak,” hyoknya nenyek gigiwolulaʾ aboka ubek. 29Dara Yesus oboka glabamek pik an yaban nim edya, huka gwakdewoka, derewoka walamekaʾ ara, ”Anda Imik Neyung e golowoka beibnyekanya, nadya dara, lika winilyok sobnamna alalumnya o, 30anda oboka glabanjak gal ak anyeb, merero beiyiboka sokok yinggimenekanya blebdalom!” wenyaboka walamek. 31Anasonya nera, onoʾ yuba wa gakaʾ dub nang eb, yuba neksin nang eb danaba, Yesus ak nauba derewoka walamek. Anya sik moumen, ”Nimi yok nim era nauba merellilisuk bok, al damnya dara, merebdamenggom! 32Alda Israeli nimi dubnya, nimi blebsinaʾ dubnya bera, nunda alak eiyiboka dib senewanamab anasa, glabnaʾ gal ak abaʾ ara, sokok yinggulul,” aboka derelemek. Anya onoʾ ban penya oboka glasik nang edyaʾ anaba, alak derewoka walerek.

Yesus Ara Somogok Yuba

(Mat. 27:45-56; Luk. 23:44-49; Yoh. 19:28-30)

33Dara yubyek dukdukanek jam duabelas soʾ enyek, mok soko nidyaʾ ara inibmorumokaʾ ara, jam tiga anaso sinik dok. 34Wera ban salek era, Yesus ara naubaʾ bii aboka, ”Eloi, Eloi, lama sabakhtani?” wenyaboka bii alamok. Nunja yub edya dara, ”Nadyaʾ Imik Neyung o, nadyaʾ Imik Neyung o, anda hekasa nak lo yibinelem do?” alamok. 35Dara anyagan hnon seklemek nim edya, Yesus adya an wenyaboka lel yabokaʾ anyek kebek dara, ”Wera alda Elia be youblamlaʾ anyek keblulum!” hyek. 36Wenyek nimi be hnon yeiriwoka, gal esaʾ do yeindeboka, yu anggur mek ek hwiboka, gal benggenaʾ ak lomowoka, Yesus adyaʾ sik enegel yabookanya, ”Elia bedya yeiniboka blebnamla gom, orokaʾ ara eibnemab anasa, or loboka diri ubnemab,” aboka lebok.

37Dara, Yesus ara ebngalagoka lelemokaʾ ara, dubhina dakoka somogok.

38Ban salek era, Imik Neyung e lomok sam wiknelemek boksom akleng era, imik ab ara, sokok sam nidyaʾ gweldegok. 39Dara, yin bonaʾ dubnya anyagan we seklemokaʾ ara, Yesus ara an unura somogokaʾ ak okoka eibuk dara, alja lebokaʾ ara, ”Aldib, ban benera alda Imik Neyung bedya me ulumo!” wenyaboka lebok. 40Dra ono al neikek ara, gelewa wene nim mok ab sekoka, nidyaʾ an unulumokaʾ ara kemelemek. Wera gelewa gong dara, hnonda Maria Magdalena, hnonda mek Yakobus, Yoses eilin Maria, hnonda Salome ge hnon ulumek. 41Yesus ara Galilea sokok anam ulumok dara, sikda Yesus ab neikaʾ ulumeekanya, aralamek gelewa. Dara onoʾ anyaganara, Yesus ab neikaʾ Yerusalem heikek ab yeilimek gelewa gong, yok nimi hnoum ulumek.

Yesus Ara Beʾ Dakoka Dibek Yuba

(Mat. 27:57-61; Luk. 23:50-56; Yoh. 19:38-42)

42Dara mok soko ara, seleb sin dangoka iniwonunaʾ ubuk salek, anya ban sum era, mem sum gibnemab senewoka memero ulumek sum. 43Wera anasa, Arematea mok ebnya, Yusuf bera, alda yuba yana lelesin nang wa wenya perobnya ulumookanya, Imik Neyung adya wenelemnesilaʾ ara, eibnunaʾ aboka diri ulumok. Dara, alda asaʾ ganya boboka Pilatus bek, Yesus adya beʾ dakoka dibnamna aboka molol byuk. 44Wera Pilatus bera Yesus ara seleb somogamla an yuba kebok dara, loka dabok. Anasa, Pilatus bera yin bonaʾ dubnya bek yalom aboka, Yesus ara seleb somogamla gom aboka heibuk. 45Dara, Pilatus bera yin bonaʾ dubnya bedya Yesus ara aldib seleb somogamla hyokaʾ ak kebok dara, Yusuf bek, ”Yesus adya beʾ era, or dakoka dibnelam,” hyok. 46Dara, Yusuf bera nimi keboka dilin boksoma perobaʾ anyek dekok dara, Yesus adya beʾ dakoka nimi ken akleng edya kebok. Dara, Yesus nong ara keboka mok soko mein lomok girika hokomekaʾ ak sam doronggoka dibuk. Seleb dibuk dara, girik adya demegoka pika leboka seregok. 47Ban unu dililemek salek era, Maria Magdalena geb, Yoses eilin Maria geb dara, anyagan dibukaʾ ak ara eibdek.

Currently Selected:

MARKUS 15: LAINLC

Highlight

Copy