MATIUS 14
14
Yohanes Pembaptis Be Somogok Yuba
(Mrk. 6:14-29; Luk. 9:7-9)
1Ban salek enyek, Galilea sokok dubnya Herodes bedya Yesus adya unulamla an yuba kebok. 2Anasa leboka, Herodes bedya alja wa wenaʾ dub nang ek, ”Ban benera Yohanes Pembaptis bek seleb embengaʾ suboka ulumla! Anadya wera alda yokaʾ-yokaʾ senenggomaʾ migib ununaʾ unuro yabalamla,” hyok.
3 #
Luk. 3:19-20
Nera men dara, Herodes bedya Yohanes bera henga gouboka gasa ek sam beiblulum aboka orugosuk. Herodes bedya Yohanes bek unumokaʾ damok ara, alja weis Pilipus dubnya bedya gel Herodias gemba leboka henga goumok. 4#Im. 18:16, 20:21Wera Yohanes bedya Herodes bek men danyek lemokaʾ ara, ”Anda Herodias gera dobnenggunulam, mem!” hyok. 5Herodes bedya dara, Yohanes bera dib obnamna senemok bok, nimi nidyaʾ adya dara, Yohanes bera Imik Neyung adya ununumnaʾ lenya senelemekaʾ ak lok ganya bomokaʾ anasa, loboka heng ok goumok.
6Wera onoʾ yok sum enyek, Herodes bera al beiyimek sum bekoka masa youmok dara, Herodias gedya gelma edya nimi longol yeilimekaʾ hnoum, bera sunugoka seblemok. Gelma enedya bera pero seblemokaʾ anasa, Herodes bedya ganya era hyak eiya dabok. 7Anasa wera, Herodes bedya ban gelma enyek an, laga okoka, ”Wera, bera pero seblelamaʾ anasa, anja bonaʾ enyek eleganeso senemenaʾ ara, nidyaʾ hyak gigiwoka eleganenggen,” hyok. 8Wera gelma en aljaʾ genong gedya wenemokaʾ adya Herodes bek ara, ”Nara Yohanes Pembaptis bedya huk enyek, gwanenga yangawoka beilinaʾ ak beiyiboka wen eleganenelemaʾ anasa molowan,” hyok.
9Gelma enedya wenyaboka molowok yub enyek, Herodes be kebok dara, alja ganya angoo senewoka soloma dabok. Bok nimi hnoum ab laga yokaĘľ nidyaĘľ molowamenaĘľ ara hyak eleganenggen amoknya nenesa leboka, wera Yohanes bedya huk era or dakoka bo yanok aboka orugosuk. 10Wera nimi henga gouboka gasa beillisin ek sam biniboka Yohanes bedya huka garamek. 11Wera Yohanes bedya huk era garawoka, gwanenga yangawoka beilinaĘľ ak beiyiboka bo byik dara, bera seblemok gelma ak elegel byik dara, gelma enedya eilinggek bo elegel byuk. 12Seleb dara, Yohanes bedya yuba doro diriga ban nang era, Yohanes be nonga dol yeiniboka soko lokek. Dara onoĘľ sikda Yesus ak Yohanes bera Herodes bedya seleb ya nganga dako aboka nekel byik.
Nimi Denga YubaĘľ Lambadya Nang Ek DenaĘľ Deb Elegosuk Yuba
(Mrk. 6:30-44; Luk. 9:10-17; Yoh. 6:1-14)
13Wera Yesus ara Yohanes be seleb obong an yuba kebok dara, al ulumokaĘľ ak ara loboka, albeyok mek ekla bunaĘľ bukoka salyaĘľ gakdenaĘľ ak sam byuk. Bok nimi nauba ulumek nim edya, Yesus unuwal an yuba kebek dara, sikja heikek ulumekaĘľ ak sam ara loboka, Yesus bilimokaĘľ ak sam dobol byik. 14Wera Yesus ara mek ekla bunaĘľ ak ab uboka, sokok yingginiboka nimi mandebnaĘľ enyek an kemelemok dara, angoo hyak yadyek senewousuk. Dara onoĘľ, sik ganggan pik hnon neikdo balameknya nera hwebsuk.
15Sin dangal yabok dara, alja yuba doro diriga ban nang edya Yesus ak yeiniboka, ”Neyung o, seleb sin dangoka onoʾ anyagan ara salyaʾ gakdenaʾ ak anasa, nimi danara biniboka denaʾ eboka dekdowanokaʾ aboka, binilum aboka orugesilom,” hyek. 16Yesus adya sikenek ara, ”Sikda binggunumak bok, alda ugunja sikenek denaʾ eboka eleganesulum,” hyok. 17Wenyek Yesus alja yuba doro diriga ban nang edya alak, ”Nuk anyagan ara roti gwanenga lambadya uboka hadyaʾ penya ok ulumla!” hyek. 18Dara Yesus adya, ”Wera an nera nak an bo yoululum” hyok. 19Wera Yesus adya nimi nauba ulumek nim ek, ”Holaʾ eilib buklulum,” hyok. Dara Yesus adya lambadya roti gwaneng eb, penya hadyaʾ eb dara, imik keeboka, Imik Neyung ak perob aboka giboka molowok. Seleb molobgogowok dara, roti gwaneng era Yesus adya soboka alja yuba doro diriga ban nang ek, nimi nidyaʾ ak boknelum aboka elegosuk. 20Wera nimi nidyaʾ ara, hyak muna bukoka jek. Seleb deregoka boklomeknya nera, gwaneng oulyang obadya boklomekaʾ ak neikaʾ mamagemek. 21Anyagan bukoka delemek nimi mandebnaʾ era, gelewa ab mek mab eb dara, eininaʾ orok bok, alda nauba nang okaʾ anyek, denga yubaʾ lambadya nang delemek.
Mek Dub Pik Yan Ingi Yibuk Yuba
(Mrk. 6:45-52; Yoh. 6:16-21)
22Seleb debgogowek sab-sab, Yesus ara alja yuba doro diriga ban nang ek, ugunda mek ekla bunaĘľ welewoka men balalulum aboka orugosuk dara, alda gwaneng deb elegosuk nimi mandebnaĘľ era, ugunja heikek sam balalulum aboka orugosuk. 23Wera nimi nidyaĘľ ara, sikja heikek sam seleb byik dara, Yesus ara albeyok, heng uboka molowoununaĘľ aboka, meinik sam welewok. Wera inil yabok bok anyek, Yesus ara meinik sam alak ok ulumok. 24Bok, mek ekla bunaĘľ anyek hyak mek hnoumung balamok. Dara mek ekla bunaĘľ ara, kaboĘľ yalamlaĘľ ak sam uruma beiyimokaĘľ adyaĘľ wera kaboĘľ adya luknobom-erebom abgiga balamok.
25Gweleknek yangman salek enyek, Yesus ara alja yuba doro diriga ban nang ek, mek dub pik yan ingibgiga yalamok. 26Wera Yesus ara mek dub pik yan ingibgiga yalamokaʾ ak eibek dara, alja yuba doro diriga ban nang era lok anasa, ”Bisaʾ anyaʾ!” aboka ngoluklemek. 27Bok Yesus adya danyek, ”Nara Yesus ak anasa, ugunda ganya gwelelek hululum. Ugunda lok ganya bonenggom, mem!” hyok. 28Dara onoʾ Petrus bedya Yesus ak, ”Wei, anda aldib Yesus ak yalamen dara, nababya anak an mek eilib pik yan ingibgiga younunaʾ aboka, or oruganelom,” hyok. 29Wenyek Yesus adya Petrus bek, ”Wera, or yalom,” hyok. Dara Petrus bera mek ekla bunaʾ ak ab mek dubuk sekel yingginiboka Yesus ak sam yan ingi byuk. 30Bok Petrus bera mek eilib pik bokjok, kaboʾ ak kemelemok enyek, alda loka dabookanya, al nonga meka si dununaʾ aboka ul yabok dara, ”Wenelesilimnya o, men arawanelom!” aboka lel yabok. 31Dara Yesus adya men soruka dorogoka Petrus bek dobsalawoka, lebokja, ”Petrus o, anda mek dib senelelamnya bek ululam. Anda hekasa dib senenaʾ loboka ganya daldom-daldom alam do?” hyok. 32Wera onoʾ sik penya dara, mek ekla bunaʾ dubuk sam onsok welewoka bukdek dara, mek ara namenaʾ dok. 33Dara Yesus adya yuba doro diriga ban nang edya, Yesus ak giblemek. Anya lebekaʾ ara, ”Wenelesilimnya o, anda aldib Imik Neyung bedya me ululam!” hyek.
Genesaret Sam NeiknaĘľ Nimi Hwebsuk Yuba
(Mrk. 6:53-56)
34Wera mek ekla bunaĘľ dub pik buka balameknya nera, mek gek sam Genesaret sokok sam bul byik. 35Wera mok enyek an nim era, Yesus nong ak yokaĘľ eibek dara, onoĘľ yok nim ek wera Yesus nunjaĘľ sokok sam yal aboka yuba beibik dara, nimi neiklemek nimi nidyaĘľ ara, Yesus ak bo yek. 36Anya sikja, neyung o, nun dam nang anja akleng ek sam mekaĘľ bebegananjab dara, merewanamab aboka Yesus ak molowek. Dara, nimi neiklemek nimi nidyaĘľ ara, Yesus adya akleng ek bebegemek dara, sikda merewek.
Currently Selected:
MATIUS 14: LAINLC
Highlight
Share
Copy
Want to have your highlights saved across all your devices? Sign up or sign in
