LUKAS 4
4
Yesus Ara Hwalek Mok Sam Sunubyaawok Yuba
(Mat. 4:1-11; Mrk. 1:12-13)
1Wera Yesus ara, Imik Neyung Geisinya adya boro loboknya bera, alda Yordan mekek abaĘľ ara yanggok dara, Imik Neyung Geisinya adya hwalek sam mok bo byuk. 2Dara, alda anyegeinira liga empat puluh sum anaso ulumok dara, Iblis adya sunubyaawok. Alda anyagan ulumok salek era, yokaĘľ-yokaĘľ denaĘľ ara hyak gobdo orokokanya, ban salek seleb danggiga balamok dara, alda gwaneng ok ubok.
3Wera danyek Iblis adya alak lebokja, ”Anda Imik Neyung me ulumen dara, wera ban girik enyek roti gwanenga dalom helom,” hyok. 4#Ul. 8:3Bok, Yesus adya Iblis ak lebokaʾ ara, ”Momnya dobokaʾ ara,
Nim embengaʾ ulumakaʾ ara, roti gwaneng adyok embengaʾ unggulumak,”
hyok.
5Dara, alda Yesus ak bobookanya, yok senenggom imik olok bo welebookanya, hyak wene sab-sab enyek, mandewal henggonggom, alak yok-yok mok soko an nidyaʾ ara amawok. 6Anya Iblis ara Yesus ak, ”Nidyaʾ migib unaʾ ab, senenggomaʾ dub unaʾ gebman ab dara, nidyaʾ ara seleb nak lenyok. Dara ban nidyaʾ ululanya nenera, nadya benyek eleganamna senewanenya bek eleganamna anasa, anak eleganenggen. 7Anasa, anda nak koma lumugoka gibnemen dara, ban nidyaʾ ara anjaʾ yokaʾ danamla,” hyok. 8#Ul. 6:13Bok, Yesus adya Iblis ak saaboka lebokaʾ ara, ”Momnya dobokaʾ ulumlaʾ ara,
Anja Wenelesilnya Imik Neyung bek ok giblemenekanya, alsamba ok unululom,
wenyaboka momnya dobok,” hyok.
9Dara onoʾ alda Yesus ak eboka boboknya nera, Yerusalem heikek bo byuukanya, Imik Neyung gibnaʾ e erumaʾ dubuk, hyak imik bo sekel dil biniboka, alak lebokja, ”Anda aldib Imik Neyung me dara, an nong anyek, anyaganyebaʾ ara sakdo boublingdalom. 10#Mzm. 91:11Nera an momnya dobokaʾ ulumla sok,
Ansamba dara, Imik Neyung ara alja lero nang ek, anak arawagenokaĘľ aboka oruganesil.
11 #
Mzm. 91:12
Dara, anja yan era girik ek ob lumugagelyek aboka dara, lero nang edya soruk yangab salawanenjak,”
hyok. 12#Ul. 6:16Wenyek Yesus adya alak lebokaʾ ara, ”Imik Neyung yub ulumlaʾ ara,
Anda anjaʾ Wenelesilnya Imik Neyung bek ara sunulyamenggom, hyak mem, alamla,”
hyok.
13Wera Iblis ara alja ban nidyaĘľ sunulyamanaĘľ ara seleb unubdakok dara, alda Yesus ak ab gokoka byuukanya, pewalya sum donok senewoka diri ubok.
Yesus Ara OnoĘľ Galilea Moka Yok Yuba
(Mat. 4:12-17; Mrk. 1:14-15)
14Wera Geisinya bedya migib gebman, Yesus ara Galilea sokok sam saaboka yok. Dara alsamba leboka lelemek yub era, ban mok soko heik era nidyaĘľ oboka lelewok. 15Dara ban salek era, Yesus ara Yahudi nim edya yuba don ek sam nim ek yuba lero yabalesuk dara, nimi nidyaĘľ alak gigilemek.
Yesus Ara Nazaret Heikik Ab Yakek Yuba
(Mat. 13:53-58; Mrk. 6:1-6)
16Dara, alda al beiyiboka nemok heikek, Nazaret heik biniboka, alda sob ulumok sok, Sabat mem sum era, Yahudi nim edya yuba don ek wekoka, yub einiwoununaĘľ aboka sekemok. 17Dara, ununumnaĘľ lenya Yesaya buku ek doboka alak elegemek dara, alda buku gelebookanya, alda ban yub en wenyaro momnya dobokaĘľ digum anyek ara,
18 #
Yes. 61:1-2
”Wenelesilnya bedyaʾ Geisinya ara nak ulunel. Wera anasa, alda nak seleb sekiyiwanyokaʾ ara, perob lero yanggan yub era, bonaʾ garan nim ek alja lelelulaʾ aboka, alda nak seleb orowek doboka sekiyinyok.
19Nara igin yakaʾ kwellilisak nim ek siksamba yuba irigoka sablulaʾ aboka hnon, heng lum nim ek henga gwelegiyiwosululaʾ aboka hnon, igina ulumna nim ek, jakmanaʾ gebsununaʾ aboka hnon, anya Wenelesilnya bedya alja nimi blebnesil sum enyek, sumen unuwanesil aboka wenyalasululaʾ aboka hnon, nara an bokol yeilinyokaʾ,”
ara Yesaya yub ek eiyiboka einiwok.
20Wera seleb dara, buku siklewoka Imik Neyung e wa wenaʾ amba wa bomoknya bek saaboka elegok dara, alda bukuk. Dara, nimi nidyaʾ Imik Neyung ek an bukumek nim edya heng mandebnaʾ era alak keeboka ngeklumek. 21Dara Yesus ara sikenek an wenyaboka nek einiwousuk, ”An Yesaya yuba momnya dobokaʾ damok ara, sumen ugunuk an keblum dara, wera seleb gigiwal,” hyok.
22Anya nimi nidyaʾ ara alak pe lelemla senemeekanya, alja lero balamok yub enyek hyak perobja senewoka, ganya salya ura lelelanya senemek. Anasa sikja lelemekaʾ ara, ”Benera Yusuf bedya me bok lelelaba,” abdangdo yabalamek.
23Dara, alda sikenek, ”Ugunda nak ban bol nenenaʾ yub enyek wenyhenenulumaʾ ara, ’Wei, hwelesilimnya o, an damnya hweldalalom. Nidyaʾ yokaʾ-yokaʾ hyak lok soʾ anyek, Kapernaum heikek seleb unululumaʾ kelemoubaʾ ara, wera anyek anjaʾ meneng mok ok an, anyeganyebaʾ unululom henenulumaʾ anyaʾ,” hyok. 24#Yoh. 4:44Anya onoʾ hnon wenhyokaʾ ara, ”Nara ugunuk hyak dib lebnesin, Nimi ben hnon ununumnaʾ lelelanya bera, aljaʾ meneng heik nim edya dara, nunja moknya benyaʾ senenggulumak. 25#1Raj. 17:1Anya onoʾ nara ugunuk hnon wenyhenesin, dara ban wenyhenenanya nera hyak aldib. Ununumnaʾ lelemoknya Elia ulumok salek era, gibnaʾ winilya uboka walaʾ hnabbadya moka yangganaʾ lomok dara, mok enyeganera senenggom gwaneng okaʾ enyek lanamookanya, ban salek era nenyabo somogomek geleb era, Israeli sokok ara nauba ulumek. 26#1Raj. 17:8-16Bok, Elia bek dara, sik ulumek gelewa en, gela hnon amba oruganggumok bok, alda Sidon sokok Sarfat heikek ulumok gel gek hnonok, alsamba bilom aboka orugomok. 27#2Raj. 5:1-14Anya onoʾ ununumnaʾ lenya Elisa ulumok salek eneba, Israel sam ara nimi nauba bokaʾ ak gororomaʾ delesuk nimi hnon bok, sikda hnonok sibin anaba bokaʾ donaʾ orok bok, alda Siria nanga Naaman bek hnonok bokaʾ domok,” wenyaboka neksuk.
28Ban wenyaboka lebokaĘľ anyek, Yahudi nim edya yuba don ek an yuba longomek nim era kebek dara, hyak yu ganya bobek. 29Dara sikda sekoka, Yesus ak walawoka heik gokgobok sam bo yakal byiikanya, mok soko dinibmanaĘľ ak gweren sam yakdo boublingganob senewoka, yakdo dorogol byik. 30Bok Yesus ara sik hnoum walawoka gabdo beiyiboka byuk.
Yesus Ara Kapernaum Heik Yuba Don Ek Ulumok Yuba
(Mrk. 1:21-28)
31Dara, onoĘľ Yesus ara Galilea sokok Kapernaum heikek biniboka, Sabat mem sum era, yuba nekoka lelemok. 32#Mat. 7:28-29Wera alja lero neklesukaĘľ ara, hyak migibaĘľ gebman pe lelemokaĘľ anasa, sikda alja neklesukaĘľ anyek hyak salye ura lelelanya senewoka kero bulumek.
33Dara, ban Yahudi nim edya yuba don ek ara, nimi ben hnon bisaʾ wekemoknya bek hnon ulumok. Dara, benera alda hyak nauba ebngalogoka lemok, 34Wei, anda Yesus Nazaretnya o, anab nub dara, hekaʾ ak ulumla do? Anda nuk orok nenewoka dengeiyiwosununaʾ aboka yeililam de? Nara anda benyaʾ senewoka ella ulunggenaʾ ara, ”Anda Imik Neyung bedyaʾ geisa ululamnya bek eiyinggen,” hyok. 35Bok Yesus ara alak waboka lebokaʾ ara, ”Yuba sanaʾ gelegamenekanya, alak ab lo yibilom!” Wera danyek, ban bisaʾ era, gologomoknya bek soob salawoka yok nimi saramek an bobokaʾ seleb dara, wekemoknya bek ab gobookanya, hnon ol nebnaʾ lomok. 36Dara, nimi nidyaʾ ara ganya loka daboka, sik moumen lebdangdo balamekaʾ ara, ”Alja salamla yub era hyak lokja! Dara alda senenggomaʾ uboka, migibaʾ gebman ab dadya, yu bisaʾ gong ek, goboka bululum aboka oruklesil dara, goboka yabalemak anasa, hyak lokja,” aboka lelemek. 37Wenyek, alja an unulamla an yub era mok soko enyek an heik me nera nidyaʾ oboka lelewok.
Yesus Ara Simon AljaĘľ Soumun Ge Hwebok Yuba
(Mat. 8:14-17; Mrk. 1:29-34)
38Ban seleb dara, Yesus ara Yahudi nim edya yuba don ek lobok dara, Simon bedya ek bilimok. Wera, Simon al soumun gera poba neiknaĘľ neiklamla aboka, yok nim edya Yesus ak nek elegemek. 39Wera Yesus ara gen malamok ekla ak biniboka, poba neiknaĘľ ara yakoka hwemok. Wera wene salek poba neiknaĘľ ara denghyok dara, Simon aljaĘľ soumun gera bukoka siksamba denaĘľ youb einimok.
40Wera sin dangoka henga wekel bok salek era, nimi yok-yok neiknaʾ salalemoknya nera, alak bo yalamek. Dara alja soruka sik eilib yok-yok diyiboka, sikenek hwelesuk. 41Dara bisaʾ gong dara, nimi weklesik nimek ab goboka balameekanya lero goblemekja, ”Anda Imik Neyung bedya me ululam,” wenyabgiga goblemek. Anya ban bisa gong era, sikda Yesus ara Kristus, nimi blebsinaʾ dubnya ulumokaʾ ella ulumekaʾ anasa, Yesus adya sikenek hyak gorogoka mem aboka lebookanya, yuba hnon sanaʾ lobganokaʾ aboka, yuba garawok.
Yesus Ara Yok-Yok Heikek Neklemok Yuba
(Mrk. 1:35-39)
42Wera yubyek so dok dara, Yesus ara munaʾ ak olok, or pe gakdenaʾ ak byuk. Bok, nimi nauba alak elemeekanya, alda seleb eiyimek dara, alda sikenek lo bisilyek aboka, lo binggunusilim aboka lebek. 43Bok alda sikenek lebokja, ”Nara Imik Neyung adya ban nenesa unuwolul aboka sokok sam bokol yeilinyok anasa, Imik Neyung wenesin heik yub, perob lero yanggan yub era, yok heik pik anaba nidyaʾ lero yabalamnamna bar,” hyok. 44Dara, alda Yudea sokok Yahudi nim edya yuba don e pik nidyaʾ ara Imik Neyung yuba leb elekdo yabalesuk.
Currently Selected:
LUKAS 4: LAINLC
Highlight
Share
Copy
Want to have your highlights saved across all your devices? Sign up or sign in
