LUKAS 21

You Gel Gek Sunuwoka Lebok Yuba

(Mrk. 12:41-44)

1Dara, Yesus hogung eiriyiboka keemok enyek, Imik Neyung ek ab dub nang edya, rupiah Imik Neyung amba aboka doronglemekaʾ ak eibsuk. 2Dara onoʾ bonaʾ garan yougel gek hnon, mek girik rupiah penya ok doronggomokaʾ ak eibuk. 3Anasa Yesus adya lebokaʾ ara, ”Ugunuk dib lebsin. Nimi yok nanga nidyaʾ ara, mek so doronggomak bok, ban gel genyek danyek hyak nauba doronggamla. 4Anasa nimi nauba, sikjinya nauba ulumlaʾ ak ab bok loboka darasam doronggak bok, ban gel genera alda bonaʾ garan gel bok, al denaʾ denesonya nenyek babya, hyak nidyaʾ gobdo elegamla,” hyok.

Yesus Adya Imik Neyung E Luknamla Hyok Yuba

(Mat. 24:1-2; Mrk. 13:1-2)

5Hnon nang era, Imik Neyung e anyek perob lagasa girik edya denewoka son damba hnon, Imik Neyung amba beillilemek bonaʾ edya denewoka son danyek pewek aboka, sikda yuba salamek. Danyek Yesus adya sikenek lebsukaʾ ara, 6”Ugunda banyan eiblumaʾ denewoka sorob girik danara, eimik era hnonok sibin anaba anyagan goʾ denewoka ubdabnenggunumla salek hnon yanamla,” hyok.

Igina Kweboka Nauba Obdanamak Yuba

(Mat. 24:3-14; Mrk. 13:3-13)

7Dara anyagan nang edya Yesus ak, ”Neklesilimnya o, ban nidyaʾ wenyalalamaʾ ara hwer salek ek unuwanamla do? Ban unuwanamlyaʾ amba dara, hek beknaʾ ek men unuwanamla salek aboka laga ubnamla do?” aboka heibek. 8Anasa Yesus adya dara, ”Ugunuk bobnenewoka sondaʾ amba nauba malya ubsijek anasa, keeboka ulululum. Nimi nauba eimik era, nadya si sibuka yeijikanya, Alda nara an yan! anya, Wera soko dengan salek era seleb oka dal, henesak bok, ugunda dib senewoka dilinaʾ ara hyak mem. 9Ugunja nimi doluwoka nauba oldalamak an yuba kebnelum dara, ugunda lok ganya bonaʾ ara mem. Ban nidyaʾ ara men unuwanamla. Bok wera nera soko sidyaʾ daknamla salek era anyek unuwanamla bok, nenyek sidyaʾanya gomaʾ,” hyok.

10Dara onoʾ Yesus ara lebokja, ”Yok mok soko nim edya, onoʾ yok soko nim eb, mala weboka obdanamak dara, yok senenggom dubnya bedya, onoʾ yok senenggom dubnya beb, mala boboka obdanarak. 11Mok soko me nidyaʾ senenggom sogoumaʾ dorogoka, senenggom gwaneng okaʾ lanawoka, senenggom neiknaʾ damok lanawanamla. Imik sam ara hyak malyaʾ nongaʾ lok so ab okna maka dangalamlaʾ ab laga danamla.”

12”Bok ban nidyaʾ anam unuwanggumlya salek era, yok nang edya ugunuk heng gouboka saboka obnesak. Ugunda Yahudi nim edya yuba don e pik ab hnon, henga gouboka yana lelewanasaakanya, henga gouboka gasa ek hnon doronggoka beibnesak. Ugunda nadya yuba donaʾ nimi dibaʾ ululumaʾ anasa leboka, ugunuk mok soko dub nang eb yok-yok senenggom nang edyaʾ saramek henga geregoka bol giriklemnesak. 13Ban unuwanamla salek enyek, ugunda Imik Neyung adyaʾ perob lero yanggan yuba sikenek leb eleganaluma wera an danamla an. 14#Luk. 12:11-12Ugunda mala dobdangoka blebdanamna amba dara, anyek-anyek yuba sabnamna senewoka ganya daldom-daldom henggunumna senewoka orowek ganya hwiblulum. 15Ugunjaʾ isaʾ nang edya, ugunuk malya nenewoka obneboka, ugunja lebnemun yub era sondaʾ amba lebak senen dalyek aboka, nadya ugunuk sabnemun yub eb, ella dangan geremseng eb eleganesin. 16Ugunuk ara, ugunjaʾ genonga neyung adya hnon, ugunja weisab edya hnon, ugunjaʾ meneng ek nim edya hnon, ugunjaʾ hem yab edya hnon, obsululum aboka yuba dil binisak. Ugun nong ara hnonda sikja obnesak. 17Ugunda nadya yuba donaʾ nang dibaʾ ulumunaʾ anasa leboka, nimi nidyaʾ ugunuk lek senelemnesak. 18Bok ban unuwanasakaʾ anaba, ugunja hong doka hnonok sibin anaba mekaʾ gwenewoka denghenggunumla. 19Ugunda ganya kaboka siklewoka ulumunaʾ adya, wera ugunja nong unaʾ blebdanalum,” hyok.

Yerusalem Heika Golowoka Denghenemla Hyok Yuba

(Mat. 24:15-21; Mrk. 13:14-19)

20”Yerusalem heik anyek, yin bonaʾ nang we waraganamakaʾ eibnelum dara, wera heik era doluwoka obnemeijaʾ adya ubnamla. 21-22#Hos. 9:7Imik Neyung yuba bukuk sam momnya dobokaʾ nidyaʾ ara, gigiwolulaʾ aboka, ban salek dara, malya unaʾ deknaʾ lunuwoka obnesil sum ek anasa, ban unuwanamak sum era, Yudea mok ulumeija nim era, meinik doknel binok. Nauba heikek sam ulumeija nim era, heik enyek an ara loboka yok ak binok. Alda beiyek ulumnemak nim era, ek sam saaboka yangganaʾ ara mem. 23Ban sum era, nimi gela me bomlya gel geb, me moma dinilyamlya gel geb dara, hyak nauba igina ubnesil. Imik Neyung adya yu ganya bolomlakanya, ban soko enera nauba obnesilaʾ anasa, yokaʾ-yokaʾ malya danamlakanya, hyak lok so danamla. 24Nim ara hnonda yin adya hyakaʾ obnesak, hnon nim era, henga geregoka yok sokok sam bo binisak. Yahudi gom nim edya Yerusalem heik ara, yan ingib sabdibigimeija ara, Imik Neyung adya unubdaknamak amlya sum era, gigiwanamla,” hyok.

Nimi Dibaʾ Me Yanamla Yuba

(Mat. 24:29-31; Mrk. 13:24-27)

25 # Yes. 13:10; Yeh. 32:7; Yl. 2:31; Why. 6:12-13 ”Eimik era, heng ek, walaʾ ak, guraʾ ak dara, yok so ubnamla. Sokok anara, nimi soko nimi nidyaʾ soko eilim-eilim aboka mek una uu aboka obnebnesil. 26Imik sam ulumlaʾ duka nidyaʾ migib ara soro-warab abmenegoka ubnamlaʾ anasa, nimi hnon sokok anyagan unuwanamlaʾ nidyaʾ ak hyak lok anasa somok lobnemak. 27#Dan. 7:13; Why. 1:7Ban unuwanamla sum enyek, nimi dibaʾ me ara imik sam debaʾ gangganek pik, alja migib eb, senenggom nong senedyaʾ ab dadya, uboka yanamla. 28Ban nenyek nidyaʾ unul yabalyaʾ eibmun dara, ugunda mek anam blebnesil ak anasa, ugunda sekoka hogunga eiriyiwanalum,” hyok.

Ara Gal Ak Ab Nim Unaʾ Damok Ulumla Yuba

(Mat. 24:32-35; Mrk. 13:28-31)

29Dara onoʾ Yesus ara ban sununaʾ enyek sikenek sunuwoka lebsukaʾ ara, ”Ugunda ara gal ab yok gal nidyaʾ ab danyek, pe kendululum. 30Meklaʾ urubya anyek burul yabanaʾ eibna dara, lelelumja, wera doka moubnamla li yenewanamla alalum. 31Anasonya neikek, yokaʾ-yokaʾ nidyaʾ anyek lanawanamlaʾ eibnelum dara, wera Imik Neyung adya wenelemnesil salek era, wera yanabla senewanalum.

32Ugunda pe ella danalum! Ban wene salek nimi nidyaʾ ara, somoganggumeija salek ara unuwanamla. 33Im ab soko ab dara, denghenelabok, nadya yub era sob-sobaʾ or ulmoublemnamla,” hyok.

Pe Diri Ulumnelum Aboka Lebok Yuba

34”Ugunda nimi dibaʾ me yanamla sum era, ugunda masa nauba youboka deregoka, serema salalesil meka salyaʾ deregoka, sumen yanamlaʾ ara ugunda elgom anasa, ugunuk nong unaʾ enesa ganya seiniro ulumunukanya, wene salek yalyek anasa, pe kemero uldalalulum. 35Ban sum era, nimi soko nanga nidyaʾ ak henga weboka youbnesinaʾ anasoʾ ak gelelenga yanamla. 36Ugunda yokaʾ-yokaʾ eimik nimi dibaʾ me yanamla sum unuwanamlaʾ ak ab goboka binobaʾ aboka hnon, nimi dibnaʾ me saramek seknobaʾ aboka hnon, wenyek heng uboka molowoka pe diri uldalalulum,” hyok.

37 # Luk. 19:47 Yesus ara yubyek era, Imik Neyung ek sam yuba lel eleklesinaʾ ara, inimnek era, Zaitun meinik heikek sam anyagan mabnunaʾ aboka balamok. 38Dara lika nidyaʾ sum seleb gwelegan dara, nimi nauba Yesus adya neklesuk yub enyek kelenobaʾ aboka yalamek.

Currently Selected:

LUKAS 21: LAINLC

Highlight

Copy