YOHANES 9

Yesus Ara Heng Lumnya Hwebok Yuba

1Dara, Yesus ara pikek sam yabalemookanya, naubenya bok beiyimek salek ebaʾ ara henga luma yeilimoknya bek hnon eiyimok. 2Dara, Yesus yuba doro diriga ban nang edya Yesus ak, ”Neyung neklesilimnya o, ban nenera hekasa anam beibek salek ebaʾ moruwoka henga lum ubmoruwok do? Nera damok ara alja malya unaʾ edya gom, aljaʾ genonga neyung adya sikja malya unaʾ edya ubok gom?” aboka heibek. 3Dara Yesus adya, ”Anam beiyimek salek ebaʾ henga lum ubmoruwoka alja malya ulumokaʾ amba, aljaʾ genong aljaʾ neyung adya malya ulurek amba gomaʾ. Alda Imik Neyung migib adya welemlaʾ laga dalya enyek nim eibnokaʾ aboka ubok. 4Gunaʾ yanamla salek era wa webnamenggom anasa, yubyek dilinaʾ ubla salek ok, na bokol yeilinyoknya bedya wa era yeiriwoka welemnemab. 5#Mat. 5:14; Yoh. 8:12Bok, nak anam sokok ulumna salek enera, nara soko amba dilinaʾ ulumna,” hyok.

6Yesus adya wenyaboka lebgogomok dara, gamalaʾ sokok solowoka, gamalaʾ ak an soruk adya sokok ninim-ninim amokaʾ seleb dara, henga lumnya bek alja heng ek sam ngikikookanya, 7alak lebokja, ”Siloam mek gwanek anja hogung enyek mek elegeldal bilom,” hyok. (Siloam ara nunja yub era orugomoknya ulumla alamla). Henga lumnya bera bilimookanya, seleb mek elekdok dara, on pik saaboka heng eibgiga yalamok.

8Bok, henga lumnya bedya e ok berem nim eb, al bulumokaʾ sobaʾ eillilimek nim eb dadya, ”Pikek sam sobaʾ yokaʾ-yokaʾ mololdo bulumlaʾ eillilimabnya bera alan gom?” alamek. 9Dara, hnon nim edya dara, ”Bera alan,” alamek. Bok, onoʾ hnon nim edya lelemekja, ”Yok nang bok, henga luma yoknya bedya hogung eneso ulumlaʾ adya,” alamek bok, henga luma yeilimoknya bedya lebokja, ”Nara mololdo bulusinya bera alan merewan an,” hyok. 10”Dara, hekaʾ hunggelaʾ adya anja heng era luma dengaboka onsok eikaʾ merewalam do?” aboka heibek. 11Dara alja lebokja, ”Yesus aboka si silimaknya bedya, soko anyek bena meewoka, nadyaʾ heng ek ngiknelekanya, Siloam mek gwanek hwildal bilom aboka orugunel dara, nara Siloam mek gwanek hwil bilibman dara, nadya henga lum ara dengaboka merewan,” hyok. 12”Dara, bera hanyagar do?” aboka heibek bok, alja dara, ”Nab elgom,” hyok.

13Dara, bera doboka bobek dara, Yahudi dub nang ek bo byik. 14Yesus adya sokok gamalaʾ solowoka bena niniwoka henga lumnya bedya henga gwelegoka hwemok sum era, Yahudi nang Sabat mem sum ek hwemok. 15Wera onoʾ Yahudi nang edya, ”Anda hekaʾ hulamaʾ adya anja heng ara merewoka kemelelam do?” aboka heimek. Dara, alja lebokja, ”Ben hnonja ben anyek gamalaʾ ablaboka niniwoka nadyaʾ heng ek an nininelekanya, mek elegeldal bilom aboka oruganel enyek, mek elekdan dara, merewoka eiyimna,” hyok.

16Dara, Parisi nang hnon nang edya lelemekja, ”Sabat mem sum bok alda wa welemlaʾ anasa, alda Imik Neyung ak ab yanggubok,” alamek. Bok, hnon nang edya danyek, ”Malya unaʾanya bedya anaso loksoʾ anyek beknaʾ dibaʾ unuwanamsoʾ gomaʾ,” aboka nauba lelemeekanya, sik moumen gangganaʾ lololdalemek. 17Dara, onoʾ heng luma yeilimoknya bek saaboka lebekja, ”Anja henga seleb hwebgelaʾ anasa, anja dara, hekaʾ alak lebnelam do?” hyek. Dara, alja lebokaʾ ara, ”Alda ununumnaʾ lenaʾanya ulumla,” hyok.

18Bok henga luma yeilimoknya bek, alda men danyek aldib luma yeilimok bok, wen era henga gwelegal aboka dib senenaʾ loboka, henga lumnya aljaʾ genong neyung ak yorurum aboka lebekja, 19”Ban ara aldib ugunja henga luma umokaʾ ak beibdum me nera alan de? Dara onoʾ Hekasa wenyek dara, henga gwelegal do?” aboka heibsik. 20Dara, henga lumnya bedya alja genonga neyung adya lebdekja, ”Aldib beiyinum sum enyek henga luma dookanya, alda nunja me yokaʾ,” herek. 21-22Bok Yahudi nang edya, nimi nidyaʾ ak lebekja, ”Kristus ara nimi blebsinaʾ dubnya al yabija nim era yuba donaʾ lobnamak,” hyekaʾ anyek, lok ganya borekaʾ anasa, sik nang penya edya lebdekja, ”Hekaʾ humlaʾ adya henga gwelegalaʾ ara numba elgom onoʾ heknedya umla ek meremlaʾ ara nunda elgom anasa, alda seleb nauba nebokaʾ anasa, nara ban adya henga luma denganel henelulaʾ aboka alak heiblulum.” 23Yahudi nang edya malya nenewanasab aboka lebekaʾ anyek lok anasa, aljaʾ genonga neyung adya, ”Alda seleb nauba newokaʾ anasa, alak heiblulum,” herek.

24Dara, onoʾ henga luma yeilimoknya bek yalom aboka youbomek dara, ”Ban ununggelnya benyek malya unaʾanya ulumla, ella ulumabaʾ anasa, henga luma denganggelaʾ anyek, anadya unel aboka Imik Neyung si ok giblom,” hyek. 25Wera, henga lumnya bedya sikenek lebsukaʾ ara, ”Nak hwenelnya bera, alda malya unaʾanya gom, perobnya gom ara, nara elgom. Hnonok ella ubnaʾ ara, youmaʾ dara henga luma ulunyok bok, sum enyek merewanaʾ ok ella ubna,” hyok. 26Bok, onoʾ Yahudi nang edya saaboka heibekaʾ ara, ”Hekaʾ anak unuwagel do? Onoʾ anja dara, hekaʾ huboka henga gwelegoka eiyilam do?” aboka heibek. 27Dara, sikenek lebsukaʾ, ”Nara ugunuk seleb saaboka li penya neksin bok anasa, ugunda alja diriga ban nanga danobaʾ aboka lelelum gom? Hekasa sobaʾ saaboka heilinulum do?” aboka lebok.

28Dara, henga luma umok bok meremoknya bek waboka lebekja, ”Anak danyek Yesus bedya yuba donya bok, nunda Musa bedya yuba don nang ulumab. 29Nunda Musa benyek Imik Neyung yub adya alak yuba salamokaʾ ella ulumab bok, anja lelelamnya bera hanyagarab yokaʾ anaba numba elgom ulumab,” hyek. 30Alda wenhyokaʾ ara, ”Wera loka dabnel! Nak seleb henga lum sirikaʾ nong bok hwebnel enyek gwelegoka eibnabok, ugunda al yok pik elgom ululumaʾ anasa, loka dabnel. 31Imik Neyung ara malya unaʾ nim edya molonaʾ kenggulusil bok, alda pe uboka alja senelamlaʾ ok unulumak nim enyek sikja molonaʾ kelesil. 32Youmaʾ ek moruwoka wene salek enera, me beillilamna sum ek ab henga luma unanya bera, nim adya heng gwelegiyimek anaʾ ara kenggulumak. 33Nak hwebnelnya bera, Imik Neyung ak ab yanggumso dara, alda yokaʾ-yokaʾ unuwanggunumso,” hyok. 34Dara, Yahudi nang edya alak lebekja, ”Anda hyak beiyik ab beibjeknya bok anasa, anja nuk neklesilimaʾ de? bilom,” aboka yakek.

35Yesus ara alja henga lumnya bok hwemoknya bera, Yahudi nang edya alak yakekaʾ kebok dara, alak eiyiboka lebokja, ”Anda nimi dibaʾ me nek dib senelelam gom orok gom?” aboka heibok. 36Bok onoʾ hwemoknya bedya Yesus ak lebokja, ”Wenelesilimnya o, nera heknya ek lelam do? Nara alak dib senewonunaʾ aboka neknelom,” hyok. 37Dara Yesus adya lebokja, ”Bera al anab neikaʾ wen an yuba salarum an, seleb heng eiyilam an,” hyok. 38Dara, henga luma bok meremoknya bedya, ”Wenelesilimnya o, nara dib senewan,” wenyaboka Yesus ak koma lumugoka gimok. 39Dara, Yesus adya, ”Nara sokok an yeilimsaʾ ara, pe yana lelewoka unululanya nenyek, henga lumnya nenyek, henga gwelegoka eillilimnemak bok, heng eikaʾanya nera luma yalalulaʾ aboka yeilimsa,” hyok.

40Hnon neikaʾ ulumek Parisi nang edya ban lebokaʾ kebek dara sikja, ”Dara, ban wenyalalamaʾ anasa, numbabya heng ubsuk de?” hyek. 41Yesus ara sikenek, ”Ugunda henga lum dibaʾ ulusom dara, ugunuk ara malya unaʾ nang henggunusisinya. Bok, heng larawoka eillilimab alalumaʾ adya, malya unaʾ lomok anam ululum,” hyok.

Currently Selected:

YOHANES 9: LAINLC

Highlight

Copy