YOHANES 21
21
Yesus Ara Tiberias Mek Gwan Gemek Sam Yok Yuba
1Wera onoʾ, Yesus ara alak diriga ban nang ek sam, Tiberias mek gwan gemek sam sikenek saaboka aabdok. Alja unuwok yub era ban: 2Simon Petrus beb, Thomas benesa yok si nera Didimus aboka silimeknya beb, Galilea sokok Kana heikek abnya Natanael beb, Zebedeus bedya mabo penya, onoʾ yok diriga ban nang yok penya nang eb, mamagoka ulumek. 3#Luk. 5:5Simon Petrus bedya yok nang ek, ”Nara ikan el binimna,” hyok dara, onoʾ yok nang edya, ”Wera nunda neikaʾ unuwanamab,” hyek. Dara wera, sikda bindiwoka mek ekla bunaʾ ak bukumek dara, inimnek pik moruwoka elemekaʾ anaba, hadyaʾ hyak mekaʾ sibin anaba yokaʾ-yokaʾ hnon dorowanggumek.
4Dara, gwelek sirigoka henga dorogol yabok dara, Yesus ara mek gwan gem berem sekemok bok, alak diriga ban nang edya mek dubuk sam ab dara, nera Yesus ak sekemla senewoka ella ubnenggumek. 5Dara, Yesus adya sikenek, ”Najabo yab o, hadyaʾ hnon dolum gom?” aboka heibsuk dara, sikja, ”Hnon doldonaʾ orok,” hyek. 6#Luk. 5:6Wera, Yesus adya, ”Ugunda hadyaʾ dobnelum aboka, ugunja hadyaʾ oumaʾ akleng anyek, mek ekla bunaʾ sirik ek sam bobogolulum,” hyok. Dara, unuwanalum amok sok unumek dara, hadyaʾ oumaʾ akleng ara hadyaʾ nauba adya deknewoka lang-lang alamok adya jabnamenggoma dangamok.
7Wera danyek, Yesus adya hyak wanaʾ nauba ulumokaʾ alja yuba doro diriga bannya bedya Petrus bek, ”Ban ara Wenelesilnya benyaʾ,” hyok. Petrus bedya, ”Ban ara Wenelesilnya bera an,” yuba kemok dara, men gwirimok akleng era onoʾ ongobgogobok dara, mekek yoruwoka mek gemek bilimok. 8Dara, yok diriga ban nang era, or ok gem berem wera ok berem ulumekaʾ anasa, hadyaʾ deknemok aklenga gliboka mek ekla bunaʾ pik eimik gokgiga bilimek. 9Wera, sikda mek gemek sam seleb yeilimek dara, Yesus ara orowek uka sekoka hadyaʾ hnon uk ak dab loboka, roti gwaneng uk dubuk weremokaʾ ak eiyimek.
10Dara Yesus adya, ”Wera ugunja wen doblum hadyaʾ era hnon anyagan wen bo yoululum,” hyok. 11Wera, Simon Petrus bera mek ekla bunaʾ eilib welewoka, ikan akleng gliboka gemek bo beil yok. Nidyaʾ hadyaʾ ok deknero lomokaʾ adya, hadyaʾ nidyaʾ hiboka dara, denga hnab badya anaso ulumok bok, hadyaʾ oumaʾ akleng era hnon mekaʾ denewanggumok. 12Dara Yesus adya, ”Wera yeiniboka del yabalelulum,” hyok. Wera sikda nidyaʾ ara al banara Yesus ulumla senemekjok, sikja hnon anda heknya do aboka asaʾ ganya boboka, ben hnonok anaba heibnenggumek. 13Dara, Yesus ara yeindeboka roti gwanenga doboka soboka sikenek elegesuukanya, hadyaʾ anaba neik so unusuk. 14Wera Yesus seleb somogomokjok embengaʾ suboka bukok dara, nen unumoknya nera li winilinya, Yesus adya alak diriga ban nang ek al nonga laga amasuk.
Yesus Ab Petrus Beb Sabdarek Yuba
15Wera, sikda nidyaʾ seleb debgogomek dara, Yesus adya Simon Petrus bek, ”Wei, anda Yohanes mamnya Simon o, yok danara mek so bok, anak dara, nak hyak nauba wanaʾ ulunelem do?” aboka heibuk. Dara, Petrus bedya Yesus ak, ”Aldib e, Wenelesilimnya o, nara anak wanaʾ ulunggenaʾ ara anda ella ulunelem e,” hyok dara, Yesus adya Petrus bek, ”Wera anasa, nadya domba memab anyek, pe geregoka bo ulunelom,” hyok.
16Dara onoʾ, hnon sounuwoka penenya sum Yesus adya Petrus bek, ”Wei, anda Yohanes mamnya Simon o, anda nak wanaʾ nauba ulunelem gom?” aboka heibuk dara, Petrus bedya Yesus ak, ”Aldib e, Wenelesilimnya o, nara anak wanaʾ ulunggenaʾ ara anda ella ulunelem e,” wenhyok dara, Yesus adya Petrus bek, ”Wera anasa, nadya domba pama danyek pe geregoka bo ulumnenelem e,” hyok.
17Dara, Yesus adya Petrus bek, alja onsok saaboka neiknya nenyek li winilinya sum, ”Anda Simon Yohanes mamnya, nak nauba wanaʾ ulunelem de?” aboka heibuk dara, wera Petrus bedya ganya angoo senewoka, Yesus ak, ”Wenelesilimnya o, anda yokaʾ-yokaʾ nidyaʾ ella ululamaʾ anasa, wera anasa, nadya anak nauba wanaʾ ulunggenaʾ ara anda ella ululam,” hyok dara, Yesus adya onoʾ Petrus bek, ”Wera anasa, nadya domba pam enyek pe geregoka bo ulunelom,” hyok.
18Dara, ban nidyaʾ Yesus ab, Petrus beb wenyab danggogorekaʾ seleb dara, onoʾ Yesus adya Petrus bek, ”Nara anak dib lebgen. Anda wen anam goubenya ululam danara, goukwa noronaʾ ara an damnya norobdangoka, anja nara anyagan bisinya senemnaʾ ak sam balalam bok, eimik anda nauba damen dara, anda soruk ok okmenekanya, yok nim edya anak noroyiboka, anya ban mok enyek an banaʾ lek senemen ak sam bo bininjak.” 19Yesus adya ban nidyaʾ Petrus bek wenhyokaʾ damok ara, Imik Neyung si imik nenen danasa, Petrus benyek hekaʾ huboka somoganamokaʾ damok anasa lemok. Ban nidyaʾ wenyabgogomokaʾ seleb dara, Yesus adya Petrus bek, ”Anda nak diriga yalanelom,” hyok.
Yesus Ab Alja WanaĘľ Ulumok Yuba Donya Beb Yuba
20 #
Yoh. 13:25
Wera, Petrus bera kemel samalemok dara, Yesus adya wanaʾ nauba ulumokaʾ yuba doro diriga bannya bera, eimik dobol balasukaʾ eiyimok. Yesus obnemekaʾ anasa, neikaʾ sidyaʾ deldaklemek sum enyek, Yesus berem bukoka delemoknya bedya, Yesus ak, ”Wenelesilimnya o, anak heknedya oblulum aboka yuba dil bilinggel do?” aboka heimoknya benyek okoka eiyimok. 21Petrus bedya, bera eimik balamokaʾ eibuk dara, Yesus ak, ”Wenelesilimnya o, ban benyek anara, hekaʾ danamla do?” hyok. 22Dara, Yesus adya Petrus bek, ”Nadya alda or embengaʾ ululul senemnya dara, alda or moruwoka ulumlyaʾ ara na eimik yanamna. Anasa nera, anjinya gomaʾ, loblom. Bok, anda nak diriga yalanelom,” hyok. 23Dara wera, ban diriga bannya bera, alda somoganggunumla an yub era, Yesus yuba don nang gangganek nidyaʾ oboka lelemok. Yesus adya, alda eimik somoganggunumla anaʾ ara orok bok, alda Yesus adya dara, nadya embengaʾ ululul senesinya dara, alda or embengaʾ ulumnamso, nera ugunja gomaʾ, amoknya nenesa lelemek.
SidyaĘľ Lebok Yuba
24Dara ban benyek ara, Yesus adya unulumokaĘľ nidyaĘľ ak laga lelemookanya, ban yuba domokaĘľ momnya doboknya bera alan. Alja nidyaĘľ momnya doboka lebokaĘľ ara, dib nonga lebokaĘľ ara nunda nidyaĘľ ella ulumab. 25Dara, Yesus adya unulumokaĘľ ara yokaĘľ-yokaĘľ hyak nauba hnon unulumok. Ban nidyaĘľ pe yana lelewoka ellaĘľ gigiro momnya doseng dara, nadya dara, wera soko me nidyaĘľ lendeboka oulyang okna danamsoĘľ anasa, hnon darasam buluk loboka momnya dorob.
Currently Selected:
YOHANES 21: LAINLC
Highlight
Share
Copy
Want to have your highlights saved across all your devices? Sign up or sign in
