YOHANES 18
18
Yesus Ara ObnobaĘľ Aboka Henga Goubek Yuba
(Mat. 26:47-56; Mrk. 14:43-50; Luk. 22:47-53)
1Yesus adya ban nidyaĘľ seleb wenyaboka molobgogomok dara, alak diriga ban nang eb, neikaĘľ Kidron mek gemek sam gobuka bilimek. Dara, bilimekaĘľ ak sam ara, ara gal damok nauba ulumok. Dara, al anyagan neikaĘľ wekel biniboka ulumek. 2Yesus ak obnelum aboka yuba dil binimoknya Yudas bera oro wenyek, Yesus ab, alak diriga ban nang eb, anyagan sobaĘľ longolomekaĘľ anasa, ban soko ella ulumok. 3Dara, Yudas bera orowek ella ulumok bok adya, Yahudi yuba wa gakaĘľ dub nang eb, Parisi nang eb dadya, orugusik Imik Neyung e diri ulumek nang eb, Romawi yin bonaĘľ nang eb dara, yin ab, wesaĘľ ab, doluknaĘľ gamaĘľ ab, boboka Yudas be we mengelemok pik yeilimek.
4Dara, Yesus ara alak yokaʾ-yokaʾ nidyaʾ unuwanamekaʾ ara nidyaʾ orowek ella ulumok bok adya, alak obnobaʾ aboka we yanggek nang sik berem yeiniboka, ”Ugunda heknya ek el yabalelum do?” husuk. 5”Nunda Yesus Nazaretnya benyek elemab,” hyek. Dara, Yesus adya dara, ”Bera nara alan,” hyok. Wera, Yudas bera Yesus ak yuba dil bilimoknya beneba neikaʾ anyagan ulumek. 6Yesus adya, ”Nara bera alan,” aldalamok enyek, obnobaʾ aboka we yeilimek nang era ban kemek dara, glaka sokok malyinggilimek.
7Dara onoʾ, Yesus adya saaboka hnon, ”Ugunda heknya ek obnobaʾ aboka elelum do?” aboka heibsuk dara, ”Nunda Nazaretnya Yesus benyek elemab,” hyek dara, 8”Nara alan seleb wenyasinaʾ anasa, aldib nasamba elenumun bok dara, yok nang bululum hululum,” hyok. 9Yesus adya ban wenhyoknya nera, alja orowek lemok yub era, ”Neyung o, anja nak doboka elegenulum nang era, hnon weiningdanggunumak,” amoknya nenesa gigiwolulaʾ aboka lebok.
10Dara, Simon Petrus bedya parang gabo bomok ara doboka, Yahudi yuba wa gakaʾ dub nang edya oruknanya, si Malkhus bek alja o meklaʾ leboka emok. 11#Mat. 26:39; Mrk. 14:36; Luk. 22:42Dara, Yesus adya Petrus bek, ”Anja parang era men suʾ lomok onsok boblom. Anja dara, nara Neyung bedya oka gweknelam aboka elegenyok mek era denggunumso senenelem de?” hyok.
Yesus Ara Hanas Bek Bo Byik Yuba
12Dara, Romawi yin bonaʾ nang eb sikjaʾ dubnya beneba, Yahudi nim edya Imik Neyung yub ek pe keeboka bo ulumek nang eb, Yesus ak soruka salawoka henga goumek. 13Henga goubekaʾ seleb dara, Kayafas bedya aljaʾ yamal bek, ban salek era, Yahudi nim edya yuba wa gakaʾ dubnya Hanas ulumokaʾ ak bo byik. 14#Yoh. 11:49-50Kayafas bedya orowek Yahudi nim ek, ”Nunja soko malya dang-danga balamlaʾ anasa, ben hnonok nidyaʾ pelesululaʾ aboka somoganamso dara, perob,” aboka wenelesuknya bera alan.
Petrus Bera SondaĘľ Bobnenewoka Lebok Yuba
(Mat. 26:69-70; Mrk. 14:66-68; Luk. 22:55-57)
15Simon Petrus beb, yoknya diriga balamoknya ben hnon, Yesus ak eimik dobgiga balarek. Ban salek Yesus ak diriga balameknya alja Yahudi yuba wa gakaʾ dubnya bedya ella ulumokaʾ anasa, wera alja eremek Yesus ab neikaʾ wekerek. 16Bok, Petrus bera beiyik e sindamak sekemok. Dara onoʾ, yuba wa gakaʾ dubnya ella ulumoknya bera, saaboka yeilimookanya, beiyik goboka pikek diri seklemok ek wa gel geb yuba sabdeekanya, Petrus bek eboka e lomok bo wekemok. 17Dara onoʾ, pikek diri seklemok ek wa gel gedya Petrus bek, ”Anda Yesus bedya alja yuba neklenggelnya ululam,” aboka lel yabok dara, Petrus bedya, ”Na gomaʾ, nara orok,” hyok. 18Ban sum era saragenaʾ anasa, ek wa welemek nim eb, Imik Neyung ek pe keeboka bo diri ulumek nang ab, sikja uka lolomekaʾ ak sekoka lekeldalamek dara, Petrus beneba neikaʾ lekeldalamek.
Senenggom Yuba Wa Gaknya Bedya Yesus Ak Heibuk Yuba
(Mat. 26:59-66; Mrk. 14:55-64; Luk. 22:66-71)
19Dara wene salek, Yahudi yuba wa gakaʾ dubnya bera Yesus ak alja diriga ban nang emba hnon, alja neklesukaʾ amba hnon, heilimok. 20Dara, Yesus adya alak lebokaʾ ara, ”Nara sokok an hyak nidyaʾ lelewoka laga lelemsa. Nara Yahudi nim edya yuba don ek hnon, Imik Neyung ek sam Yahudi nimi nauba longomnaʾ ak hnon, nara gunuwoka lenaʾ ara orok, nidyaʾ laga poboka lelemsa. 21Wei, anda hekasa nak heinelem do? Nak heinenaʾ ara loboka, alda nadya sikenek yokaʾ-yokaʾ nidyaʾ leboka lelemnaʾ ara, hyak dib pe ella ulumakaʾ anasa, nadya yuba kemek nim ek heibnesilim,” hyok. 22Yesus adya Yahudi yuba wa gakaʾ dubnya bek wenyaboka laga lelemok enyek, yin bonaʾanya hnon, ok berem seklemokaʾ ara, yuba wa gakaʾ dubnya bek anaso wenyanaʾ ara mem aboka, Yesus ak waboka omok. 23Dara, Yesus adya yin bonaʾanya bek, ”Nara malya lemnya dara, nera malya lelam aboka laga leblom. Dib lemnya bok dara, wera hekasa nak waboka olenelem do?” hyok. 24Wera Yahudi yuba wa gakaʾ dubnya Hanas bedya, Yesus ara gasa heng gebman, Yahudi Imik Neyung yuba wa gakaʾ dubnya Kayafas bek bo bululum aboka orugosuk.
Petrus Bera Yesus Ak SondaĘľ Lebok Yuba
(Mat. 26:71-75; Mrk. 14:69-72; Luk. 22:58-62)
25Simon Petrus bera or anam ukuk lekdangdo seklemok. Dara, anyagan seklemek nim edya, Petrus bek, ”Anda Yesus adya yuba dololamnya bera an hnon,” aboka lelemek. Bok, Petrus bedya dara, bobnenewoka, ”Nara orok,” aboka lebok. 26Yuba wa gakaʾ dubnya bek arawoka welemoknya o meklaʾ garamoknya benyek, al nang yilaʾ adya, Petrus bek, ”Nara anak Getsemani wak onoʾ Yesus ab neikaʾ ulmoulumaʾ ara eibnenggubmagen do?” hyok. 27Dara, Petrus bedya bobnenewoka, ”Nara orok,” aboka lel yabok dara, al wene sab-sab ayam wining yuba ngobumok.
Yesus Ara Pilatus Bek Bo Byik Yuba
(Mat. 27:1-2, 11-14; Mrk. 15:1-5; Luk. 23:1-5)
28Wera hyak lugunaʾ nong anam gwelegel yabok dara, Yesus ak doboka yuba dubnya bek ara mok soko damnya Pilatus bedya senenggom ek bo byik. Yahudi nim era, sikja perob sum denaʾ denemek bok anasa, nimigumaʾ blekibyek aboka, nimi henga gereksin dub ek ara Yesus al neikaʾ weknenggumek. 29Anasa, Pilatus bera beiyik goboka yibiniboka, ”Ugunda hekasa benyek hek damok emba yana kiboka bo yeililum do?” aboka heibsuk. 30Dara sikja, ”Alda malya unaʾ orok dara, alak unuwoka anda mok soko dubnya bek bo yanggunusibya,” hyek. 31Pilatus bedya Yahudi nim ek, ”Wera doboka bobmunukanya, ugunja unuwanalum an yuba lelemlaʾ sunuwoka yana lelel bululum,” hyok. Bok, Yahudi nim edya, ”Nuk dara, nim onaʾ anyek, mem alasak,” hyek. 32#Yoh. 3:14, 12:32Ban unumoknya nera, Yesus adya alak somoganamokaʾ anasa, orowek al damnya unuwanenel aboka leldalamokaʾ anyek, gigiwolulaʾ aboka lebek.
33Dara, Pilatus bera saaboka senenggom ek wekoka, Yesus ak youboka, ”Anda aldib Yahudi nimi dubnya ululam de?” aboka heibok. 34Wera Yesus adya Pilatus bek, ”Neyung o, ban leblamnya nera, anja ok ganya doboka seiniwoka leblam gom, yok nim edya anak wenyaboka Yesus ak heiblom amakaʾ anasa, heibnelem gom?” hyok. 35Dara, Pilatus bedya Yesus ak, ”Alda Yahudi nang ulumla senelenelem de? Anak doboka nak bo yeilinjak nang era, anja meneng sokok nang eb, Yahudi yuba wa gakaʾ dub nang eb dadya unjak. Dara, hekaʾ men unuwolumaʾ anasa unjak goma?” aboka heibok. 36Anasa, Yesus adya lebokaʾ ara, ”Nadya dub unaʾ danenelaʾ ara sokok anyebnya gomaʾ. Nadya heik era dub unaʾ danenel an ulumso dara, wera nadya mab edya Yahudi dub nang ek henga geregoka bo banggom aboka nak blebneneseng. Bok ununenaʾ orok ara, nadya dub unaʾ danenel era sokok an unggulumla adya umla,” hyok. 37Dara, Pilatus bedya Yesus ak, ”Wera anasa, anda aldib dubnya ululam de?” aboka heibok. Dara, Yesus adya Pilatus bek, ”Nara dubnya henelem ara dib lelam. Nara sokok an yeilimsa dara, beiyinyekaʾ ara, nimi yok nim ek dib yub ak laga lebsununaʾ aboka yeilimsa. Anasa, dib yub ak wanaʾ ulumak nim era, nadya yuba kelemak,” hyok. 38Dara, Pilatus bedya Yesus ak, ”Hek yub ek dib nong ulumla do?” aboka heibok.
Dara, Pilatus bera ek gouboka beiyik yibiniboka Yahudi nim ek, ”Nara Yesus ak alja malya unaʾ hnon eibnenggumna. 39Bok, ugunja sob unululumaʾ ara, nunja Yahudi nim edya perob sum yenewan dara, nimi ben hnon henga geregamnaʾ ara, nunsamba loblamlaʾ anasa, ugunja or ban Yahudi nimi dubnya benyek henga loblul senelelum de?” aboka heibsuk. 40Dara, sikda yeiriwoka ebngalagoka, ”Alak lobnaʾ ara hyak mem loblom. Barabas benyek loboka elegeisilom,” aboka lelemek. (Ban Barabas bera, hoka donanya ulumok.)
Currently Selected:
YOHANES 18: LAINLC
Highlight
Share
Copy
Want to have your highlights saved across all your devices? Sign up or sign in
