RASUL 2

Geisinya Be Yinggyuk Sum Yuba

1 # Im. 23:15-21; Ul. 16:9-11 Wera, Yahudi nim perob sum Pentakosta seleb oka yenemok dara, nimi nidyaʾ yuba dib senewoka men domek nim era neikaʾ ak mamagomek. 2Dara, al wene sab-sab enyek, nimi nidyaʾ longomek nim era, sikenek imik ab sam uu aboka senenggom kaboʾ dorogol yabanaʾ anasoʾ ak kemek. Dara, sik ulumek ek anaba, uu anaʾ yub ok kemek. 3Dara, uk bokaʾ lolong-lolong aboka nimi nidyaʾ ellaʾ gigiro singiro buru yabalesukaʾ ak, eiyimek. 4Wera dara, sikda nidyaʾ Imik Neyung ganya adya deknesuk dara, Imik Neyung Geisinya adya anyek sabnok senewoka elegesukaʾ adya, sikda yok-yok yuba nidyaʾ saro yabalamek.

5Ban sum era, Yahudi nimi nauba, nidyaʾ yok-yok mok eb yeilimek nim era, Yerusalem heikek ulumek. Ban nimi dara, sikda Imik Neyung ak lok ganya bomek nim ulumek. 6Wera kaboʾ uu anaʾ yuba kemek dara, nimi nauba longowoka aknel ganagal yeilimek. Wera onoʾ yuba salamek nim edya, nimi nidyaʾ ara sikjinya yokaʾ yuba hnon kemek dara, loka dasuk. 7Dara, nimi nidyaʾ hyak loka daboka, ”Sikda ban nidyaʾ yok-yok yuba salamak nang era Galilea sokok nim gom de?” aboka lelemek. 8”Ban dara, hek adya nunja yok-yok mok ab yub enebabya Galilea nim edya salamakaʾ kelemab do?” aboka lelemek. 9”Nunda nidyaʾ ara, hnonda Partia nang, Media nanga hnon, Elam nanga hnon, Mesopotamia nimi hnon, Yudea nimi hnon, Kapadokia nimi hnon, Pontus nimi hnon, Asia nimi hnon, 10Frigia nimi hnon, Pamfilia nimi hnon, Mesir nimi hnon, Kirene berem Libia nimi hnon, hnonda Roma heik ab ara, 11Yahudi nimi yokaʾ ab, hnonda Yahudi nimi gom bok, Yahudi nimi yuba domek nang eb, hnon Kreta nim ab, hnonda Arab nim ab bok, Imik Neyung adya alja senenggom migib unulamla anyek, nunja yuba yokaʾ-yokaʾ sunuwoka lelesak adya nunda pe kelemab,” aboka lelemek.

12Dara, sikda nimi nidyaʾ hyak ganya loka daboka ganya eboka, sik moumen, ”Hekasa ban anaso damok ulumla do?” aboka heibdangdo balamek. 13Bok, hnon nang edya dara, ”Sikda yu meka demakaʾ adya serema salalesil adya ganya uu aboka lelemak,” aboka waboka oksel golulumek.

Petrus Bedya Yuba Lebok Yuba

14Dara Petrus beb, yok goklombadya Imik Neyung yuba len nang sekoka, Petrus bedya yuba nauba bii aboka nimi nauba longomek nim ak lesuk, ”Hemyab o, ugunda Yahudi nim, ugun yok mok nimi Yerusalem heikek ululum nim eb, ban nidyaʾ unulamla ara ugunuk anadya unulamla aboka lebnesin anasa, ugunda pe keblulum,” aboka lelemok. 15”Wera, lugunaʾ jam sembilan ok anasa, ban nang era ugunja dara, sikda yu meka demakaʾ adya serema salasil senelum sok unuwanggusil. 16Bok ban eiyilumaʾ unuwanamokaʾ amba dara, orowek ununumnaʾ lelemoknya si Yoel bedya lebokja,

17 # Yl. 2:28-32 Imik Neyung adya lebok ara, Sidyaʾ daknamla sum enyek, nadya geisa ganya ara nimi nidyaʾ sik dubuk yeklingganamna. Ugunja mabo nengmab ab, ugunja gelmab ab, nadya sikenek ununumnaʾ lelemnesak. Ugunja gobenya nim edya yokaʾ unuwanasin ara ken so eilimnemak. Ugunja nauba nang era, maboka lendara eilimnemak.

18Nadya wa wen nim, nengmab ab, gelewa ab, ban sum enyek, nadya geisa ganya era sikenek yeklingganesin. Sikda ununumnaʾ lelemnasak.

19Nara yokaʾ-yokaʾ hyak lok so anyek imik eini sam unulumnamna. Onoʾ hyak lok so hnon ounu sokok sam an unulumnamna. Eneng ab, uk ab, senenggom solom ab, lanawanamla.

20Imik Neyung adya senenggom hyak perob sum anam yanggumlya salek, heng ara gunaʾ danamla. Walaʾ ara goron uboka eneng anaso danamla.

21Ban salek enyek, nimi nidyaʾ Imik Neyung si sibuka youblenya bera blebnamla,

ara Yoel wenyamok,” aboka Petrus bedya wenyasuk.

22Onoʾ Petrus sikenek wenyasuk, ”Nadya hemyab Israeli nim o, nadya ugunuk ban dib lebnesin anyek keblulum. Yesus Nazaret mok ebnya bera, Imik Neyung adya seleb ugunsamba wa weblul aboka wa doboka elegemok anyek, beknaʾ elegesuk. Beknaʾ ara, Imik Neyung adya Yesus ak ab uboka ugun gangganek sam yokaʾ-yokaʾ lok so migib ununaʾ ab, senenggom lok so ununaʾ ab, yok so beknaʾ ab, unumokaʾ ara seleb eiyilum. Anasa, ugumbeyok ban nidyaʾ ara seleb ella ululum. 23#Mat. 27:35; Mrk. 15:24; Luk. 23:33; Yoh. 19:18Imik Neyung adya al orowek ella unuboka unuwonun senewoka seinimok sok, alja me Yesus ara ugunuk seleb elek losuk. Dara, ugunda malya nang ak elegoka, sikda alak doboka galak glabekaʾ adya, ugunda alak olum. 24#Mat. 28:5-6; Mrk. 16:6; Luk. 24:5Bok Imik Neyung migib adya Yesus ak nimi somoklomakaʾ gangganek ab, suboka embengaʾ bukiyimok. Alda somoknaʾ lomok sam unggulumnamso anasa, somoknaʾ damok adya doboka menegemok bok, Imik Neyung adya henga loboka blebiyimok,” hyok.

25 # Mzm. 16:8-11 Onoʾ hnon, ”Yesus amba Daud bedya lebokaʾ ara ban:

Nadya Wenelenelnya bera, nadya hogunguk sam sobaʾ eillilamna. Alda nab neikaʾ ulunam adya, yokaʾ-yokaʾ adya daldom-daldom henggununel.

26-27Anda nadya ganya ara, nimi somoklomak nimi heikek sam lobnenggununelem. Onoʾ, nak anja perobnya bek nonga bloblulaʾ aboka lobnenggununelem. Anasa leboka, nadya ganya eiya daboka, nadya sibamaʾ adya eiya hlalamna. Dara, nara ganya weboka diri ulumnamna.

28Anda nak nim embengaʾ unaʾ pik seleb doboka amanulum. Anda nablaboka sobaʾ neikaʾ ulumnanam adya, nara nonggo aboka ganya imik weldo-weldo seklemnenel,

ara Daud bedya wenyamok,” hyok.

29”Anasa, hemyab o, wenyek or nunja neyung Daud benesa geklewoka, yuba laga poboka sablul senewananulum. Alda seleb somogok dara, seleb soko lokorob bok, soko lokorob ak ara nun gangganek or ulumla. 30#Mzm. 132:11; 2Sam. 7:12-13Imik Neyung adya orowek seleb poboka, Daud be pik uboka an nang yilaʾ gangganek ab, Imik Neyung adya dubnya hnon sekiyiwanamla aboka leb elegemok. Daud bera alda ununumnaʾ lenya ulumok adya, Imik Neyung adya alak dib unuwanamna amokaʾ ara, eimik era dib unuwanamla senewoka ella uboka diri ulumok. 31Daud bera Imik Neyung adya unuwanamla ara orowek eiyimok. Anasa, al lebok ara, alda nimi sokok nimi somoklomak sok dib somoknaʾ nimi heikek ak lo binggunumla. Dara onoʾ, alja nong soub era bloboka denghenggunumla ak lebok. Ban lebok ara, Kristus eimik somogoka embengaʾ suboka buknamla ak lemok. 32Dara, al ban Yesus benyek, Imik Neyung adya somoknaʾ ak ab suboka embengaʾ bukiyimok. Dara, ban unumok ara nunja okoka ok eiyimouba,” hyok.

33Onoʾ Petrus sikenek moruwoka lemok, ”Wera, Imik Neyung sirik soruk sam Yesus ak seleb imik beiyiboka, Geisinya eleganesin amok ara, elegoka dobok dara, wera, neik geisa ganya anyek nuk eleklesil ara, wera an ugun seleb eillililum kelelum. 34-35#Mzm. 110:1Daud be nong anaba imik heik welewanggumok bok, alda yub adya lebokja,

Wenelesilnya bedya nadya Wenelenelnya bek, Nadya anja isaʾ nang ara an damak namenaʾ gibiyiwanggumnya salek enyek, anda nadya sirik soruk sam bululom,

aboka lebok.

36Anasa wera, Yesus ugunja oboka gal ak glablumnya bera, aldib Imik Neyung adya or ban Yesus anyek, nimi wenesinaʾ ab blebsinaʾ ab, dubnya Kristus jaboka sekiyimok, ara Israeli nimi nidyaʾ pe ella danasom,” hyok. 37Wera nimi nidyaʾ Petrus bedya wenyaboka lelemok anyek kemek dara, nimi nidyaʾ ganya soldowoka obdangamek. Dara, Petrus bek hnon, yok yuba lenaʾ gak nang ek hnon, ”Hemyab o, wera nunda hekaʾ huwanamab do?” aboka heisik. 38Dara, Petrus bedya sikenek, ”Ugunda nidyaʾ ara, ganya dangawoka malya unaʾ meewanasil dara, ganya dangawoka, Yesus Kristus si sibuka mek danaʾ doblulum. Dara, ugunda Imik Neyung adya Geisinya eleganesilaʾ ara dobnelum. 39Anasa, Imik Neyung adya lebsukaʾ ara, ugun nong amba ugunja mab emba hnon, sik mok sam ulumak nim emba hnon, ulumla. Nunja Wenelesilnya Imik Neyung adya yoululum aboka youblesil nim nidyaʾ amba ulumla,” hyok.

40Onoʾ Petrus bedya ban wenyaboka nauba wenewoka lelesuk, ”Ugunda wera Imik Neyung adya eimik obsunun aboka ubsil sokok anyeb orowek blebdangoka ulululum,” aboka sikenek lelesuk.

Men Yuba Donaʾ Nim Edya Unulumek Yuba

41Dara, Petrus bedya lelemok yub ek keboka dib senewoka domek nim ak meka dasik. Dara, nimi nidyaʾ ban sum Imik Neyung ak dib senewoka domek nim era hiboka denga salyeʾ obadya nang anaso, dangamek. 42Dara, hyak pe yeng uboka, nimi nauba yuba lenaʾ gak nang ek ab, yuba nauba doboka, yokaʾ-yokaʾ ara neikaʾ unuwoka, anya neikik deregoka, neikik molowoka ulumek.

43Obadya nang Imik Neyung yuba lenaʾ gak nang edya, yokaʾ-yokaʾ senenggom lok so ununaʾ ab, lok so beknaʾ ab danyek, nauba unulumek dara, nimi nidyaʾ ganya loka daboka ulumek. 44#Kis. 4:32-35Nimi nidyaʾ Imik Neyung ak men dib senewoka domek nim era, neikaʾ ganya hnonok ganya boboka, sikja yokaʾ-yokaʾ bonaʾ ulumok ara, neikaʾ hiboka bolomek. 45Sikja yok-yok bonaʾ bolomek ara, rupiah dekoka dobna dara, nara anyek dobsinya senemna sok ellaʾ gigiro pe lelewoka bokol dalamek. 46Sikda hyak sobaʾ Imik Neyung e eremek longowoka yuba sobaʾ dolomek. Dara sikda ganya sokok nenebdangoka, ei-ei ganya boboka, sikja e pik dero yabalamek. 47Sikda hyak sobaʾ Imik Neyung ak giblemeekanya, nimi nidyaʾ sikenek perob senelesik. Dara, Wenelesilnya bedya yuba don nim ek yok bleblesuk nimi sob-sobaʾ sikenek bo maklesuk.

Currently Selected:

RASUL 2: LAINLC

Highlight

Copy