Luk 1

Yó Tyufilus:

1Deng dê ne tau hmotu gel le smulat du yóm deng nmò Jisas lem blóng me. 2Tódô nulit le yóm deng gel tulón le kum yó kem tau tehe mton du lenwóten bè kbuten, yó kem tau deng gel hetngón du yóm tehe kun tolok Jisas. 3Ne ni, Sér, lemwót bè yóm tey kehnagiu du ni kem ni lemwót bè hol kbuten, tódô sentodol snulatu béléem yóm kdéen 4anì gtukulem yóm hol ktahuhen yó kem deng gel tolok le kóm.

Eles kehetngón Dwata yóm ksut Jan

5Tehe hanà kegenen du Hirod ekni, yóm tau hol geta bè Judiya, wen sotu tau gel demsù ebè Dwata boluyen Sekariya. Nim tau ni, semfu gu bè yóm sotu tau tehe gel demsù ebè Dwata boluyen Abidya. Yó boluy yehenen, Ilisabét, libun semfu gu bè yó kem tau gel demsù ebè Dwata snéen kun. 6Tey tedeng kton Dwata kul yóm lewu le, ne tey gulit klolò le du yó kem hlau Dwata. 7Són duen là mngà le, abay se atil yóm Ilisabét, ne bè yóm kdaw yó, deng tey ktuha le yóm lewu le.

8Sotu kdaw bè yó, gbangà bè yóm kdaw kul kmò nmò lem Gónô Dwata le Sekariya. 9Wen atù gel nmò yó kem tau gel demsù ebè Dwata mò lan le mélék yóm tau fen mtem ebè Dwata yóm gel hboo le boluyen insinsu. Bè yóm kdaw yó, matù Sekariya, ne du fen husek elem Gónô Dwata mò fen mtem du. 10Yóm igoen mtem du ditu lemen, fen le mdà bè lewaen kul yó kem tey tau wen. Yó nmò le, fen le mni bè Dwata.

11Yóm igò Sekariya tolo mtem du, tódô wen hegfan béléen lem tum dfél, anì monem hógów Dwata gu bè longit. Tódô tonen mdà bè kwanan yóm lemisa gónó le gel mtem yóm hboo le ebè Dwata. 12Bè yóm kton Sekariya du botong ktut ne tey klikoen. 13Okóm yó mon yóm hógów Dwata mò du, “Béi hlikò, Sekariya. Deng gefet bè Dwata yóm gel knihem béléen. Angat mngà logi yóm tuha libunem. Yó angat boluyem du Jan. 14Angat tey kehligal ye bè yóm ksuten, dalang se yó kem tey dê dumu tau, hligal le se kul. 15Yóm ngaem yó, angat tey kegetahen bè solu Dwata. Ne là kóen hyu kinumen yó kem ninum lemengel. Tódô lemwót bè ksuten yóm tendo ktolunen béléen yóm Tulus Dwata. 16Lemwót bè yóm angat ktoloken, angat tey dê tau Israél bud semfulék ebè Dwata, yóm gónó le mogot. 17Du se tukô gna yóm gónó ye mogot, ne tey kfasangen, hol lómón yóm tehe kfasang Ilaydya yóm sotu tugod Dwata ekni. Lemwót bè yóm ktoloken, bud gónón sulék nawa yó kem tuha ne yó kem ngà le. Kkólen bè yó kem tau là mimón ke Dwata, gotu le bud himón, baling skél kehedem le yó kem tau tedeng knawa le. Lemwót béléen gónó le eles getgama yó kem kun tau Dwata bè yóm angat ksut yóm gónó le mogot.”#1:17 1:17 Malakay 4:5-6.

18Ne mudél Sekariya ebè yóm hógów Dwata yó, monen, “Tedu kmò tô ketngónu du yóm ktahuhen nim tulónem do ni, igou deng tey tuha ne dalang se yóm dou tuha libun?”

19Ne bud mudél ebéléen yóm hógów Dwata, monen, “Ou se Gabrél. Gele mdà bè solu Dwata ne du yóm hógów do mò na a tmulón du kóm nim Tulón Hyu ni. 20Okóm deng mom hendahem igoen angat dohò bè yóm kun buteng du Dwata. Lemwót bè yóm deng kehdahem du, hatani bud gudél he ke deng hto yóm butengen sut nim fasad deng tulónu kóm ni koni?”

21Bong yó kem tau mdà bè lewà yóm Gónô Dwata, tey kessangat le ke Sekariya, tennga le yóm alì gónón ganggà ditu lemen. 22Timbow hewà Sekariya, là kóen bud gudél ebélê le, ne tódô tennef le deng wen hegfan béléen ditu lemen. Yó nmò Sekariya, olon tódô hmingón du yóm tô tulónen kul, là kóen bud gudél.

23Timbow deng yóm kmoen nmò bè Gónô Dwata, ominen yó he mulék ebè gónóen. 24Tikóng kogolen bè yó, tódô mlutut Ilisabét, yóm kun tuha libun. Ne botong limu bulónen tódô nô ta, 25monen, “Deng tey któbóng Dwata do, wen ne ngau. Deng kóhen béléu ne yóm gónóhu myak lem blóng yó kem dumuhu.”

Eles kehetngón Dwata yóm ksut Jisas

26Tikóng deng nem ne bulónen yóm bnutut yehen Sekariya, bud hógów Dwata Gabrél etu bè Galili ebè yóm sotu benwu udì boluyen Nasarit. 27Wen na a htulón Dwata du bè yóm sotu sawang libun bè yó boluyen Midi. Nim Midi ni, deng leninti yóm sotu logi boluyen Jusif, ne són kesgefet le ne duen. Nim Jusif ni, tau semfu gu bè yóm tehe tau hol geta bélê le boluyen Dabid. 28Tódô sut bè Midi yóm hógów Dwata yó koni, ne monen mò du, “Na Midi, tey nawahen kóm Dwata. Tendo gel nô béléem.”

29Bè yóm kungol Midi du yóm udél yóm hógów Dwata ebéléen yó, mom tô tafa nawahen, abay se là kô glileben du kmò klanen. 30Ne bud mudél ebéléen yóm hógów Dwata, monen, “Béi mom tô hlikò, Midi, abay se tey kehyu nawahen ebéléem Dwata. 31Angat wen bnututem, ne mngai logi, ne boluyem du Jisas. 32Tey angat kegetahen, ne boluy le du Ngà yóm Dwata alì geta bè kdéen. Tódô henbaling Dwata tau hol geta, lómón yóm kegeta tehe fuen Dabid ekni. 33Du mò angat gónó le mogot yó kem tau semfu gu bè yóm tehe Jakub, ne laen kô dù sónen yóm kogoten tau.”

34Ne yó mon Midi mò yóm hógów Dwata yó, monen, “Tedu mò hol kmoen de nim ni, blaem hanae tolo ngà libun?” 35Yó bud mon yóm hógów Dwata mò du, monen, “Angat sù Dwata béléem yóm Tulusen, ne yóm kfasang Dwata fen hemlan du béléem. Yó gónóm mon, mólós nim ngà angat sut ni, ne angat boluy le du Ngà Dwata. 36Ngem yóm yê diem Ilisabét, yóm gel mon le atil, wen se kun bnutut balù yóm tey deng ktuhahen. Deng gnemen bulón ni ne keblututen du. 37Abay se yóm Dwata, laen kô dù là gbeken du.”

38Mudél se Midi, monen, “Ou se tóbóng lówó yóm gónóhu mogot. Hol hdohoen etahu yóm deng monem.” Ominen tmagak ke Midi yóm hógów Dwata.

Kauy Midi ke yê dien Ilisabét

39Là legenen bè yó, lemwót Midi nan e kendel nauy yê dien Ilisabét ditu lem bulul bè yóm sotu ngà benwu bè prubinsya Judiya. 40Yóm deng kgefeten bè gónô le, henmung nbalen Ilisabét. 41Timbow gungol Ilisabét yóm udél Midi, tódô sennganen se kemdol yóm ngà bnututen. Ne tódô sut béléen yóm Tulus Dwata,

42tódô hgelen udélen, monen mò ke Midi, “Tey hyu bagiem kóm. Laen kô dù libun te tonok ke gmulit yóm deng kmò Dwata kóm, dalang se yóm angat ngaem, laen kô dù angat gmulit du. 43Ukel kóem nauyem ni dum ou nii, igoen uu se yê yóm gónóhu mogot. 44Ngem yóm kungolu yóm kbalem do koni, tódô kemdol nim ngà bnututu lanen gbót hligal se kun. 45Tey kehligalem kóm, abay se là hendahem du yóm deng mon yóm hógów Dwata mò kóm.”

Kdóyón Midi ke Dwata

46Yó mon Midi se kun,

“Tey bong kdóyónu du yóm gónóhu mogot

47ne tey kehyu nawahu ebè Dwata,

yóm deng lemwà do gu lem hatay.

48Abay se là kô klifóten dou,

sotu tau olon tóbóng lówóhen.

Kbuten du ni ne, kdéen tau angat semsmon du yóm dou kligal

49lemwót bè yóm tey deng nmò Dwata béléu,

yóm Dwata alì mfasang bè kdéen.

Laen kô dù belenen sidek yóm kun gel nmò.

50Tey kkodu Dwata kul yó kem tau hol madat du

kewóten bè yóm tau tanay féken

kkólen bè yóm tau hol són utulen.

51Lemwót bè yóm alì kegbeken, gotu senklahen

yó kem tau hegmón alì dê atul le.

52Gotu kóhen glal yó kem tau hol geta mogot benwu,

ne tles hegetahen yó kem tau glaan.

53Yó kem tau élél, gsengel nawa le du

yóm hyu gel blayen kul.

Bong yó du kem tau wen kendengen le,

tódô huléken lu laen dù nit.

54Là kô klifóten du yóm tehe fasaden

bè yó kem tehe fù tekuy ekni,

ne ni deng bang ksuten yóm tóbóngen tekuy kem kun tau Israél.

55Deng tey kkoduhen ke Abraham

ne yó kem semfu gu béléen,

ne laen kô dù sónen yóm kkoduhen tekuy.”

56Wen dô tlu bulónen kegen Midi nô bè le Ilisabét, ominen mulék ebè kem tuhahen.

Ksut yóm Jan gel mabtays

57Ne hto ne yóm butengen sut yóm bnutut Ilisabét, ne logi yóm ngà. 58Gungol yó kem dumuhen sebét kkólen bè yó kem dumuhen setwoli yóm tey nawahen ebéléen yóm gónón mogot ne gotu le gbót hligal se kul.

59Timbow deng sotu fedyanen sut yóm ngà yó, omin le tmulì du.#1:59 1:59 Yóm tmulì mon le yó, kul adat yó kem Ju mò ilô yóm kfun Dwata kul. Ne yó tô boluy le du Sekariya, tô boluy le du boluy maen. 60Okóm mon yéen, “Sundu yó du boluyen. Jan dé.”

61Mon le se, “Okóm là sadénen ebè kem dumu ye setwoli nim tô boluyem du ni.” 62Omin le hmingón du bè maen ke tedu kun kóyô boluy du yóm ngà le. 63Ne hningón Sekariya anì nogu le mò gónóhen smulat, ne yó snulaten, monen, “Jan boluyen.” Bè yóm ksulaten du yó, tey ketnga le du. 64Tódô sen-gengen se gudél Sekariya, ne tey kdóyónen ke Dwata.

65Ya tey ketnga yó kem tau dumuhen sebét bè yóm kungol le du nim ni, lel le likò. Tey kestulón le du, tódô lenngeben kdê yó kem tau lem bulul bè klamangen prubinsya Judiya. 66Tódô gotu sù le lem nawa le yóm kdê yóm deng gungol le, mon le, “Tedu angat mò hol kmoen nim ngà ni ke deng bong?” Abay se eles tódô dilô le yóm kfasang Dwata béléen.

Yóm eles htugod Dwata ke Sekariya

67Sut bè Sekariya yóm kun Tulus Dwata, ne yó htugod Dwata du, monen,

68“Hol dóyón tekuy Dwata,

yóm gónó tekuy mogot yóm kdê tekuy kem tau Israél.

Yakà deng bud tnóbóngen tekuy kem kun tau,

ne deng lenwaen tekuy.

69Wen tau alì mfasang hógówen elem blóng tekuy

mò lemwà tekuy, yóm tau semfu gu

bè yóm sotu tehe tóbóng lówóhen boluyen Dabid.

70Wen tehe fasad Dwata ekni

hlanen bè yó kem tehe gna tugoden.

71Yó fasaden yóm angat kehewaen tekuy

lem blóng yó kem hohon tekuy,

ne lem tdok yó kem tau kmutó nawa tekuy.

72Tehe tulónen yóm kkoduhen kul yó kem tehe fù tekuy,

là kô nan e klifót du yóm tehe deng fasaden kul.

73,74Tey mget yóm fasad Dwata ebè yóm tehe fù tekuy Abraham ekni.

Yó fasaden du, duhen yóm angat kehewaen tekuy

gu lem tdok yó kem hohon tekuy

anì laen dù knikò tekuy bè yóm klolò tekuy du,

75ne anì mólós yóm kmò ktonen tekuy,

ne tedeng kmò tekuy efet kól bè kukol towok tekuy.”

76Ne omin Sekariya mudél ebè yóm ngaen, monen,

“Ne uu, ngà, angat boluy le kóm kun tugod yóm Dwata alì geta bè kdéen.

Uu se yóm fen eles tukô gna yóm gónó tekuy mogot

mò fen hemtifes yóm lan angat loloen.

77Yakà uu du yóm fen hetngón du bè yó kem tau

yóm lan le gewà gu lem hatay

ke heflifót le ke Dwata yó kem salà le.

78Tey kkoduhen tekuy Dwata.

Angat heknasen yóm kifu

anì ton tekuy yóm lan tekuy gewà gu lem hatay.

79Angat heknasen yóm kifu lem blóng tekuy

anì là hlós yóm kgolu tekuy elem hatay.

Du semgalak tekuy bè yóm lan

mò gónón hlós menek nawa kuy.”

80Yóm ngà le Sekariya yó, sónmoen minut lemnok, ne mtétél se yóm kehtahuhen. Timbow deng bong logi, tódô tólóng sónen du bè yóm benwu laen dù tauhen. Song hegfan bè gónón wadag tau, deng kól bè yóm kdawen tmolok lem blóng yó kem dumuhen tau Israél.

Currently Selected:

Luk 1: tbl

Highlight

Copy