Kehewà 1
1
Yóm alì kehlayam le kul bè Idyip yó kem tau Israél
1Bè yóm tehe kógów Jakub ebè Idyip, gotu le mung du yó kem ngaen logi ne yó kem kul fes lówó. Ni se boluy yó kem ngà Jakub tehe mung du. 2Rubén ne Simyun ne Libay ne Juda 3ne Isakar ne Sibulun ne Bindyamin 4ne Dan ne Neftali ne Gad ne Asér. 5Yó kdê deng ból Jakub, hitu folò kwen le gomong lemen Jusif yóm sotu ngaen deng eles nô ditu bè Idyip.
6Ngang le nô bè Idyip le Jusif ne yó kem dumun setwoli efet le gotu matay yóm kdê le, dalang se yó kem yehen le ne yó kem dumu le tmuha bè yóm kdaw yó. 7Okóm yó kem sfu le, yóm bnoluy le kem tau Israél sónmò le mból. Tey kwen le ne tey le kemgis. Botong tô gotu lengeb le yóm benwu Idyip. 8Ngangen ne efet bud wen lomi Faro mogot bè yó. Nim Faro ni, balù udì ke wen tngónen bè yó kem hyu tehe nmò Jusif ekni. 9Yó udélen ebè yó kem tau Idyip nogoten, monen, “Hnénég ye dé yó kem tau Israél, tey deng kwen le ne tey le kemgis. Déke angat wen atul le eta tekuy elem hulin kdaw. 10Ke wen hohon mit sgida bélê tekuy, tódô le mung bélê le ne gnida le tekuy, omin le yó lemwót hewà bè nim benwu tekuy ni. Yake mebel tekuy lan anì là hol le bud mból ni kem tau ni.”
11Tahu se, yó nmò yó kem tau Idyip, wen tau snigang le mò fen gel dmanda mdók kul yó kem tau Israél, ne tey sidek keblaten yóm gel hmò le kul, anì laen dù bud gónóhen e mefet nawa le. Hefdà le kul yóm syudad Pitum ne syudad Ramisis mò gónóhen gel semtifun ken yó kem tau Faro bè Idyip. 12Okóm balù yóm alì kehlayam le kul yó kem tau Idyip, mom temnù kwen le yó kem tau Israél ne ninuten lamang yóm gónó le nô bè yóm benwu yó. Ne deng mom bud temnù klikò le kul yó kem tau Idyip. 13,14Ya tey kehlayam le kul mlan bè alì kdanda kdók le kul. Hefdà le lu yó kem gónô lembang ne hmò le lu nmò bè yó kem dnadu. Balù udì ke wen kodu le kul.
15Yó nmò yóm Faro bè Idyip, wen lewu bè yó kem libun gel mwa ngà htabahen boluy le Sipra ne Puwa, kem libun gel tmóbóng mwa ngà bè yó kem libun Hibru ke sok sut blutut le. Yó monen mò kul, 16“Ke bud ye tmóbóng mwa ngà bè yó kem libun Hibru, hnatay ye ke logi yóm ngà le. Okóm ke libun, hlowil ye.” 17Okóm ni kem libun mwa ngà ni, wen klikò le ke Dwata. Là kô nimón le du yóm udél Faro ebélê le yó. Mom hlowil le lu yó kem ngà logi lomi sut.
18Omin Faro bud htaba kul yó kem libun gel mwa ngà yó, monen mò kul, “Moen du ke lómón ni nmò ye? Moen du ke mom hlowil ye lu yó kem ngà le logi?” 19Okóm mom yó balà le du, mon le, “Yóm kul ksut ngà yó kem libun Hibru, tey mahil, stólóng bè yó kem libun Idyip. Gu laan me là deng kól bélê le, deng sana sut yóm kul ngà.”
20,21Lemwót bè yóm klikò le ke Dwata ni kem libun gel mwa ngà ni, ya tey kehyu nawa Dwata ebélê le, benlayen se lu ngà. Ne yó kem tau Israél, sónmò le ninut mból ne kemgis.
22Ngangen bud wen udin nmò Faro bè yó kem tau Idyip, yó udin nmoen, monen, “Kdéen ngà logi Hibru lomi sut, gotu bot ye lu elem él Nayl. Okóm yó kem ngà libun, fen hlowil ye lu.”
Currently Selected:
Kehewà 1: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
