MATEUS 9

Yesus mampakeleh ije biti oloh lumpuh

(Mrk. 2:1-12; Luk. 5:17-26)

1Yesus lumpat akan arut, palus dimpah danau, buli akan lewu-human Ayue. #9:1: lewu-human Ayue: Kapernaum (Ite 4:13). 2Intu hete oloh mimbit manalih Ie ije biti oloh lumpuh, je menter hong ekae batiroh. Katika Yesus mite ampin kapercayan oloh te, Ie hamauh dengan oloh je lumpuh te, “O anak, keleh ikau tanggar ateim! Kare dosam jari iampun.”

3Pire-pire guru agama je aton hete hamauh huang ateie, “Oloh toh mamapa Hatalla!”

4Yesus katawan tirok ewen, palus Ie hamauh, “Mbuhen tirok keton papa kalote? 5Je kueh je labih murah: manyewut ‘Dosam jari iampun’, atawa manyewut, ‘Hingkat tuntang mananjong’? 6Tapi toh Aku handak mambukti akan keton je Anak Olon aton barakuasa hong hunjun petak toh uka mampun dosa.” Palus Yesus hamauh dengan oloh lumpuh te, “Hingkat, gatang ekam batiroh, tuntang buli!”

7Oloh lumpuh te palus hingkat tuntang buli akan humae. 8Metoh kare oloh mite kajadian te, ewen takikeh tuntang manara Hatalla, basa Hatalla jari manenga kuasa je kalote kahai akan olon.

Yesus mantehau Mateus

(Mrk. 2:13-17; Luk. 5:27-32)

9Limbah te Yesus malihi eka te. Pandehan mananjong, Ie mite ije biti oloh panagih pajak, arae Mateus, metohe mondok hong kantor pajak. Yesus hamauh dengae, “Kantoh, omba Aku!”

Maka Mateus mendeng palus omba Yesus.

10 # Luk. 15:1-2 Metoh Yesus kuman hong human Mateus,#9:10: hong human Mateus: atawa huang humae (iete human Yesus). maka dumah kare panagih pajak tuntang kare oloh je ianggap dia bahalap awi kare oloh, omba kuman haya-hayak dengan Yesus tuntang kare murid Ayue. 11Kare oloh Parisi aton mite hal te. Tuntang ewen misek dengan kare murid Yesus, “En sababe gurun keton kuman haya-hayak dengan panagih pajak tuntang kare oloh je dia bahalap?”

12Yesus mahining auh paisek ewen balalu Ie tombah, “Oloh je barigas dia perlu dokter, baya oloh je haban bewei. 13#Hos. 6:6; Mat. 12:7 Riksa narai rimae auh Surat Barasih toh: ‘Aku mangahandak asi, tuntang dia mangahandak meto akan parapah’. Basa Aku dumah dia uka mantehau oloh je manyangka arepe jari bahalap, tapi oloh je ianggap papa.”

Hal tahiu puasa

(Mrk. 2:18-22; Luk. 5:33-39)

14Limbah te kare murid Yohanes Pampandoi dumah manalih Yesus. Palus ewen misek, “Mbuhen ikei tuntang kare oloh Parisi puasa tapi kare murid Bapa dia?”

15Yesus tombah, “Kilen angat tirok keton? En tau kare oloh maja hong pesta kawin kapehe ateie amon panganten hatue magon hinje ewen? Batantu dia! Tapi kareh akan dumah katikae panganten hatue te induan bara ewen. Katika te harue ewen puasa.

16Jaton aton oloh manumpang baju je jari kupit mahapan tantanan benang je magon taheta. Karana tantanan benang te kareh kanjorot tuntang marantat baju te, sampai kajariae mawi rabite paham hai. 17Jaton kea oloh manyuang anggor je taheta akan huang kambut upak meto je usang. Karana kambut te kareh babindai tuntang rusak, palus anggor te nihau mananya. Anggor je taheta musti inyuang akan huang kambut je taheta kea, uka kadaduee te tetep bahalap.”

Anak pamimpin huma sombayang tuntang oloh bawi je manigong Yesus

(Mrk. 5:21-43; Luk. 8:40-56)

18Metoh Yesus hakotak dengan kare murid Yohanes Pampandoi, maka dumah ije biti pamimpin huma sombayang. Ie sontop mandeko utute intu taharep Yesus tuntang hamauh, “Anakku je bawi harue nihau, tapi keleh pahias dumah uka mimbing ie mangat ie belom tinai.”

19Yesus harikas tuntang haya-hayak dengan kare murid Ayue haguet dengan oloh te.

20-21Hong benteng jalan, ije biti oloh bawi je jari due walas nyelo katahie buah panyakit baduroh dahae, dumah manokep Yesus bara hila likut. Ie manirok, “Asal aku manigong jubahe bewei, aku palus keleh.” Palus ie manigong lawin jubah Yesus.

22Maka hemben te kea Yesus tampaliau tuntang mite oloh bawi te palus hamauh dengae, “Keleh ikau tanggar ateim, anak-Ku! Awi ikau percaya dengang-Ku, ikau keleh!” Hemben te kea oloh bawi te keleh.

23Limbah te Yesus sampai hong human kapala huma sombayang te. Katika Ie mite kare oloh je main musik hong eka oloh matei tuntang are oloh je ridu-ridu, 24Ie hamauh dengan ewen, “Balua urase keton! Anak toh dia matei; Ie baya batiroh.”

Ewen uras manatawe Yesus. 25Limbah kare oloh te balua, Yesus tame akan huang kamar anak te tuntang mimbing lengee. Balalu anak bawi te hingkat. 26Kabar tahiu hal te tayap akan hapus daerah hete.

Yesus mampakeleh due biti oloh babute

27Yesus haguet bara hete tuntang hong benteng jalan due biti oloh babute manuntut Ie. Ewen mangkariak, “Anak Dawid, pasi ikei!”

28Katika Yesus tame akan huang huma, kadadue oloh babute te dumah manalih Ie. Yesus misek dengan ewen, “En keton percaya je Aku toh tau mampakeleh keton?”

“Percaya Pa!” koan ewen.

29Palus Yesus manggayap matan ewen sambil hamauh, “Awi keton percaya, keleh kare kaharap keton te manjadi.” 30Palus ewen tau mite. Yesus mampingat ewen hapan kapaham auh Aie, uka ela mansanan hal te akan eweh bewei.

31Tapi ewen haguet tuntang manyiar barita tahiu Yesus akan hapus tanah te.

Yesus mampakeleh oloh bisu

32Katika kadadue oloh te haguet, ije biti oloh bisu je inguasa awi setan imbit oloh manalih Yesus. 33Yesus maharak setan te tuntang hong katika te kea oloh bisu te tau hakotak tinai. Oloh are te hengan tuntang hamauh, “Hindai puji itah mite kajadian kilau toh hong Israel!”

34 # Mat. 10:25, 12:24; Mrk. 3:22; Luk. 11:15 Tapi kare oloh Parisi hamauh, “Kapalan kare setan ih je manenga kuasa Akae hapa maharak setan te.”

Yesus masi mite oloh are

35 # Mat. 4:23; Mrk. 1:39; Luk. 4:44 Kalote Yesus haguet mangumbang kare eka bara lewu ije akan lewu je beken tuntang bara dokoh ije akan dokoh je beken. Ie majar hong kare huma sombayang tuntang mangabar Barita Bahalap tahiu ampin Hatalla marentah kilau Raja. Ie mampakeleh kare oloh je kapehe awi buah sepsimpan ampin kare panyakit tuntang karusak biti. 36#Num. 27:17; 1 Ra. 22:17; 2 Kro. 18:16; Es. 34:5; Sak. 10:2; Mrk. 6:34 Katika Yesus mite oloh are te, Ie lembut masi dengan ewen, awi ewen heka toto ampie tuntang jaton katawan en taloh je musti iawi ewen, sama kilau tabiri je jaton bara sakatik. 37#Luk. 10:2 Palus Yesus hamauh dengan kare murid Ayue, “Taloh je inggetem toh are, tapi oloh je manggeteme isut ih. 38Awi te laku ih dengan oloh je tempon kabon te uka mangirim oloh je manggetem akan taloh je inggetem.”

Currently Selected:

MATEUS 9: NIJ

Highlight

Copy