GENESIS 47
47
Yakob manaharep raja Misir
1-2Limbah te Yosep mimbit lime biti bara kare paharie palus manaharep raja. Koae, “Bapa tuntang kare paharingku jari dumah bara Kanaan dengan kawan tabiri, sapi tuntang kare ramon ewen. Toh ewen aton intu tanah Gosen.” Palus mansanan kare paharie te akan raja. 3Raja misek ewen, “Narai gawin keton?”
Ewen tombah, “Ikei toh sakatik kilau tato hiang ikei. 4Ikei dumah handak melai intu lewu toh, awi intu tanah Kanaan lau paham toto, sampai dia aton oru tinai akan kawan tabirin ikei, soho ikei melai intu tanah Gosen.” 5Palus raja hamauh dengan Yosep, “Toh bapam tuntang kare paharim aton intu hetoh. 6Itong lewu Misir kilau lewun ewen kabuat. Keleh ewen melai intu tanah Gosen, tanah je pangkahalape hong lewu toh. Tuntang soho oloh je tau bagawi mahaga metongku.”
7Yosep kea mimbit bapae manaharep raja. Yakob mamberkat raja. 8Palus raja misek ie, “Pire umur bapa?”
9Tombah Yakob, “Aku jari belom seratus telo puluh nyelo kilau oloh perantau. Pambelom ku kontep kasusah, tuntang pandak amon inanding dengan umur tato hiangku je belom kilau oloh perantau.” 10Limbah te lius buli Yakob mansanan handak permisi tuntang manenga berkat salamat hapisah. 11Yosep mandohop bapae tuntang kare paharie melai intu Misir. Inengae akan ewen petak kilau ayun ewen hong eka je pangkahalape intu lewu te, tokep lewu Rameses tumon auh raja. 12Yosep manenga kare panginan akan bapae, kare paharie, tuntang hapus jalahae, sampai je pangka tabelae.
Wayah lau
13Lau te paham toto, sampai intu hete-hete jaton tinai panginan. Oloh Misir tuntang oloh Kanaan balemo tuntang jaton bara kaabas awi balau. 14Genep ewen mamili gandom, Yosep mamumpong duit regan gandom te, palus ingkese intu istana raja. 15Limbah lepah duit intu Misir tuntang intu Kanaan, kare oloh Misir dumah manalih Yosep tuntang hamauh, “Tenga akan ikei panginan! Ela manalua ikei matei. Duit ikei jari lepah.”
16Yosep tombah, “Amon duit keton jari lepah, tenga meto ain keton; aku kareh manenga panginan akan keton.” 17Palus ewen manenga meto ain ewen akan Yosep, tuntang ie manenga panginan akan ewen kilau gantin kuda, tabiri, kambing, sapi tuntang kalidai ewen. Hong nyelo te Yosep manenga panginan akan ewen tuntang ewen mambayar hapan meto.
18Limbah nyelo te ewen dumah tinai talih ie tuntang hamauh, “Ikei dia milim tuan je duit ikei jari ayun tuan. Ikei jaton taloh en-en tinai je tau nenga ikei akan tuan, beken bara bitin ikei tuntang petak ikei. 19Ela manalua ikei matei! Ela nalua tanan ikei jadi bahu lakau. Keleh mamili ikei tuntang petak ikei hapan gandom kilau regae. Ikei tuntang petak ikei kareh ayun raja. Tenga akan ikei gandom hapa manuntong pambelom ikei tuntang kea bawak taloh imbul mangat ikei mimbul intu tanan ikei.”
20Palus Yosep mamili uras petak intu Misir akan raja. Genep oloh Misir tarapaksa manjual petake, tagal wayah lau te paham toto; te uras petak intu Misir jadi ayun raja, 21Yosep manjadian hapus oloh Misir te jadi rewar. 22Tikas petak ayun kare imam ih je dia ie mamilie. Ewen dia usah manjual petak ayun ewen awi raja manenga gajih akan balanjan ewen. 23Yosep hamauh dengan kare oloh te, “Item, keton tuntang petak keton jari imiliku akan raja. Toh binyi je tau keton manawore intu tanan keton. 24Intu wayah getem keton musti manenga ije bara lime bagin hasile akan raja. Kalabiee tau keton mahapae akan binyi tuntang indu panginan akan keton hayak akan anak eson keton.”
25Tombah ewen, “Tuan jari manyalamat ikei, ikei manyewut tarimakasih. Ikei hakon jadi rewar raja.” 26Limbah te Yosep manampa taloh te je jadi atoran intu tanah Misir, iete ije bara lime iete hasil getem jadi ayun raja. Sampai toh atoran te magon ihapan. Baya petak kare imam bewei je dia ayun raja.
Palakun Yakob je pangkalepahe
27Kalote oloh Israel manetep intu Misir, hong tanah Gosen. Ewen jadi oloh tatau tuntang manak meso are hete. 28Yakob magon belom uju walas nyelo intu Misir sampai umure jadi seratus epat puluh uju nyelo. 29#Gen. 49:29-32, 50:6 Metoh ie tokep matei, ie mantehau Yosep anake te balalu hamauh dengae, “Andak lengem intu helat upon sapakku tuntang sumpah je ikau dia handak mangubur aku intu Misir toh. #47:29: Andak lengem …: Ite 24:2. 30Aku handak ingubur intu eka kare tato hiangku; imbit hantungku bara lewu toh palus ngubur intu kubur ewen.”
Balalu tombah Yosep, “Aku handak malalus narai je imeteh bapa te.”
31Koan Yakob, “Keleh sumpah je ikau handak malaluse.” Yosep sumpah, palus Yakob manyewut tarima kasih intu ekae batiroh.
Currently Selected:
GENESIS 47: NIJ
Highlight
Share
Copy
Want to have your highlights saved across all your devices? Sign up or sign in
