GENESIS 44

Sangkir je nihau

1Hemben te kea Yosep manyoho pelayan je mangapala huma seroke, koae, “Suang balasai kare oloh te hapan gandom, tumon kaolih ewen mimbite. Tamean duit gagenep bitin ewen akan balasaie, intu hunjun gandom te. 2Tamean kea sangkir perakku akan huang balasai andi ewen je busu, haya-hayak duit hapan bayar gandome.” Kare pelayan te malalus parentah te. 3Andau jewue, hanjewu toto, Yosep hapisah dengan kare paharie, ewen palus haguet dengan kare kalidai ain ewen. 4Ewen hindai kejau bara lewu te, metoh Yosep hakotak dengan pelayan je mangapala huma seroke, “Golong, goang kare oloh te. Amon jari dinon, suman akan ewen, ‘Mbuhen keton mambaleh kahalap dengan kapapa? 5Mbuhen keton manakau sangkir perak tuangku? #44:5: Ije salinan bara jaman horan manyewut: Mbuhen keton manakau sangkir perak tuangku? Huang basa Ibrani kare auh kotak toh jaton inyurat. Sangkir te hapae mihop tuntang pakakas hapa manujum. Keton jari mawi kapapa hai.’ ”

6Metoh pelayan kapalan huma serok Yosep te majake kare paharin Yosep, insumae taloh je irentah Yosep. 7Tombah ewen koae, “Narai maksud tuan? Ikei sumpah je ikei dia mawi gawi te! 8Tuan kabuat katawan, duit je inyondau ikei huang kare balasai ikei intu hunjun gandom te, jari lian ikei akan tuan. Awi te dia mungkin ikei salenga manakau perak atawa amas bara human gubernur! 9Tuan, amon ramo te aton sondau intu ije biti bara ikei toh, nauhe ie ihukum matei, tuntang ikei je awang beken jadi pelayan Tuan.”

10Pelayan te hamauh, “Buah ih, tapi baya oloh je eka sangkir te sondau, baya iete ih je jadi rewarku, ije beken tau buli akan eka keton.” 11Balalu ewen bajeleng genep bitie mampamohon balasai tuntang mukeie uka iriksa awi pelayan kapalan huma ain Yosep. 12Pelayan kapalan huma serok ain Yosep te mariksa balasai te titip toto, manampara balasai ain ije bakas sampai balasai ain ije busu, tuntang sangkir te tarasondau huang balasai ain Benyamin. 13Kakare kakae uras pehe ateie balalu ewen marabit pakaiae. Ewen mamuat balasai haluli akan hunjun kalidai tuntang ewen haguet haluli akan lewu.

14Metoh Yuda tuntang kare paharie sampai intu human Yosep ie magon aton intu hete, balalu ewen sontop manyembah intu taharep Yosep. 15Balalu Yosep hamauh, “Narai je jari iawi keton te? Dia keton katawan je aku toh olih mangatawan kare gawin keton ije papa mahapan kaharati je basilim?”

16“Kilen auh ikei dengan Tuangku?” koan Yuda, “Kilen ampin ikei tau malawae tuntang mambujur arep ikei? Hatalla jari mamparahan kasalan ikei. Toh ikei uras jadi rewar Tuan, dia baya ie je eka sangkir inyondau.” 17Koan Yosep, “Dia! Aku dia handak malalus gawi kalote. Baya ie je eka sangkir te je inyondau ih je manjadi rewarku. Ije beken tau buli manalih bapa keton.”

Yuda mandohop Benyamin

18Yuda miar manokep Yosep hayak hamauh koae, “Ampun Tuangku, keleh jaka Tuangku handak manyoho rewarm toh hakotak tinai dengan Tuangku. Ela basingi dengan rewarm toh; Tuangku kilau raja Misir kabuat. 19Tuangku jari misek dengan ikei toh, ‘En bapa keton magon belom, tuntang en atonkah paharin keton je beken?’ 20Te koan ikei dengan Tuangku, ‘Bapa lkei jari bakas tuntang andi ikei inakan metoh bapa ikei jari bakas. Kakae je ije indu dengan andi ikei toh jari matei, maka wayah toh baya ie kabuate je magon belom, tuntang bapa ikei paham kaherete dengae.’ 21Tuangku manyoho ikei mimbit ie akan hetoh, mangat Tuangku mite ie, 22balalu ikei mansanan je andi ikei je busu te dia olih hapisah dengan bapae; tuntang amon ie hapisah bara bapae, maka bapa akan matei. 23Limbah te Tuangku hamauh, ‘Keton dia tau manaharep aku tinai amon keton dia mimbit andi keton te.’

24Metoh ikei jari buli manalih bapa ikei, ikei menyampai peteh Tuangku akan bapa ikei. 25Limbah te bapa ikei menyoho ikei haluli akan hetoh uka mamili panginan. 26Tapi ikei hamauh, ‘Ikei dia akan haguet akan kanih, awi ikei dia tau manaharep gubernur amon andi ikei je busu toh dia omba kea.’ 27Limbah te bapa ikei hamauh, ‘Keton katawan Rahel kabalingku te baya due-due ih anake. 28Anake ije solake jari malihi aku. Ie jari imisak meto basiak, awi sampai toh aku jaton mitee tinai. 29Amon keton manduan anak je busu toh bara aku tuntang ie buah calaka, maka kapehen atei je buah aku awi keton, akan mimbit pampatei akangku awi aku puna bakas.’ ”

30-31“Awi te Tuangku,” koan Yuda dengan Yosep, “amon rewarm buli manalih bapa ikei dia dengan andi ikei toh, maka jetoh mimbit pampatei akan bapa ikei. Tahasenge bahapang dengan anak te, tuntang awi ie jari bakas maka kapehen ateie tagal gawin ikei dengae akan mimbit pampateie. 32Tinai rewarm jari hajanji dengan bapa je rewarm toh je mananggong anak toh. 33Jadi rewarm balaku asi, uka Tuangku tau manyoho rewarm toh manjadi rewar Tuangku mangganti andi ikei toh, uka ie tau buli haya-hayak dengan kare kakae. 34Kilen ampie rewarm tau buli manalih bapa ikei, amon anak te dia omba buli kea? Rewarm dia olih mite kapehen atei ije kareh buah bapa ikei.”

Currently Selected:

GENESIS 44: NIJ

Highlight

Copy