GENESIS 30
30
1Tapi Rahel hindai kea dinon anak. Awi te ie bahiri dengan kakae, palus koae dengan Yakob, “Tenga anak akangku, amon dia, aku kareh matei.”
2Yakob malait Rahel tuntang hamauh, “Aku toh dia Hatalla. Ie je tau mawi ikau dinon anak.”
3Palus koan Rahel, “Toh rewarku Bilha; keleh marantep ie mangat ie manak. Kalote aku tau jadi indu tagal ie.” 4Palus ie manenga Bilha akan banae. Yakob marantep reware te. 5Bilha batihi palus manak ije anak hatue. 6Koan Bilha, “Hatalla jari mamutus akan gunan itah. Keleh hining lakudoangku tuntang keleh nenga ije biti anak hatue akangku.” Palus inampae aran anak te Dan.#30:6: Dan: Aran toh auh sewute sama kilau auh kotak Ibrani je rimae “mamutus pakara”. 7Bilha batihi tinai tuntang manak ije biti anak hatue. 8Koan Rahel, “Aku jari bahimat malawan kakaku, toh aku manang.” Awi te inampae aran anak te Naptali.#30:8: Naptali: Aran toh auh sewute sama kilau auh kotak Ibrani je rimae “berjuang”. 9Metoh Lea mangkeme arepe je ie dia tau dinon anak hindai, inengae reware, iete Silpa akan Yakob mangat jadi sawae. 10Silpa manak ije biti anak hatue. 11Koan Lea, “Aku ontong,” palus inampae aran anak te Gad.#30:11: Gad: Huang basa Ibrani aran toh rimae “ontong”. 12Silpa manak ije biti anak hatue tinai, 13tuntang Lea hamauh, “Hai kasanangku! Toh uras oloh bawi kareh manyewut aku sanang.” Balalu ie manampa aran anak te Aser. #30:13: Aser: Aran toh auh sewute sama kilau auh kotak Ibrani je rimae “sanang”.
14Hong wayah getem, Ruben haguet akan janah; intu hete ie sondau taloh tumbo intu petak je tau jadi ramon tatamba,#30:14: ramon tatamba: Huang basa Ibrani inyewut “dodayim”. Taloh imbul macam jetoh ianggap tau ihapan manyubur paranakan oloh bawi. palus iimbite akan indue, Lea. Rahel hamauh dengan Lea, “Tenga akangku isut ramon tatamba je inyondau awi anakm te.”
15Tombah Lea, “En hindai sukop ikau manduan banangku? Toh ikau mahin handak kea manduan ramon tatamba je inyondau anakku.”
Koan Rahel, “Amon ikau maku manenga ramon tatamba anakm te akangku, ikau tau marantep Yakob alem toh.”
16Metoh Yakob buli akan huma bara janah halemei te, Lea manambange hayak hamauh, “Keleh marentap aku alem toh awi aku jari mambayar te hapan ramon tatamba bara anakku.” Palus Yakob marantep ie alem te.
17Hatalla mahining auh Lea; ie batihi palus luas anak je kalime. 18Koan Lea, “Hatalla jari manenga akangku upah awi aku jari manyarah Silpa akan banangku.” Awi te inampae aran anak te Isaskar.#30:18: Isaskar: Aran toh auh sewute sama kilau auh kotak Ibrani je rimae “rewar je inyewa”, “aton upah”. 19Lea batihi tinai tuntang manak anake je kajahawen. 20Koae, “Hatalla jari manenga akangku panenga je bahalap toto. Toh banangku kareh marega aku, awi te aku manak jahawen biti anak hatue,” awi te ie manampa aran anak te Sebulon.#30:20: Sebulon: Aran toh auh sewute sama kilau auh kotak Ibrani je rimae “marega” dan “panenga”. 21Limbah te Lea manak ije biti anak bawi je inampae arae Dina.
22Palus Hatalla mingat Rahel; Hatalla mahining lakudoae tuntang mawi ie tau manak. 23Palus Rahel batihi tuntang manak ije biti ahak hatue. Koan Rahel, “Hatalla jari mampanihau katawahku. 24Keleh Tuhan manenga akangku ije biti anak hatue tinai.” Awi te ie manampa aran anak te Yosep. #30:24: Yosep: Aran toh auh sewute sama kilau auh kotak Ibrani je rimae “ie manenga tinai” tuntang “ie mampanihau”.
Panatau ayun Yakob
25Limbah Rahel manak Yosep, Yakob hamauh dengan Laban, “Aku balaku uka tau buli akan lewungku. 26Lapas aku dengan kadadue sawangku hayak kare anakku. Ewen jari dinongku awiku bagawi omba mama. Mama katawan, aku jari bagawi bahimat.”
27Laban misek ie, “Hining helo. Aku mandino tujum je Tuhan jari mamberkat aku tagal ikau. 28Suman wei pire je lakum.”
29Tombah Yakob, “Mama kabuat katawan je aku jari bagawi bahimat, tuntang meto ain mama sasar are awi pahagangku. 30Helo bara aku dumah, ramon mama dia sapire karee. Tapi toh mama jari tatau. Tuhan jari mamberkat mama awi tege aku. #30:30: awi tege aku atawa akan kueh bewei aku haguet. Toh sampai katikae aku bagawi akan keluargaku kabuat.”
31Koan Laban, “Balalu narai je patut inengaku akam?”
Tombah Yakob, “Dia usah manenga narai-narai. Aku handak tetep mahaga meto ayun mama, asal mama maku manumon auhku toh: 32Andau toh aku handak mananjong hong bentok kare kawan tabirin mama; balalu aku manduan genep anak tabiri je babilem,#30:32: Ije salinan je bara jaman horan genep anak tabiri je babilem. Ibrani: gagenep anak tabiri je habelang tuntang habintik tuntang gagenep anak tabiri je babilem. hayak te kea genep anak kambing tabela je habelang atawa harintik. Te ih upah je ilakuku. 33Rahian mangat mama katawan en aku dia bujur. Awi amon mama dumah handak mariksa upahku, hayak mite aton kambing je dia harintik atawa habelang, atawa tabiri je dia babilem, mama kareh mangatawan je meto te jari inakauku.”
34Laban tombah, “Satuju! Itah handak malalus taloh je koam te!” 35Tapi hong andau te Laban mamisah uras kambing hatue je hasuring atawa habelang, harintik, atawa je aton bintik baputie; ie kea mamisah uras tabiri je babilem. Limbah te inyohoe kare anake manantuani kare meto te. 36Ewen balalu haguet dengan kare meto te mangejaue bara Yakob, kekejaue tanjong telo andau.
Tisan kawan tabiri ayun Laban ihaga awi Yakob.
37Palus Yakob manduan kare edan bahijau bara batang kayu parara, kayu kanari, tuntang kayu armon. Ie mangupak belahe bara upake sampai jadi habelang. 38Andake kare endan te intu baun kawan kambing te, intu ekae mihop. Awi kare meto te rajin kawin metoh handak mihop. 39Te amon kare kambing te kawin intu baun kare edan te, anake hasuring atawa habelang atawa harintik.
40Limbah te Yakob manduan kare tabiri palus mampendenge hataharep dengan kare kambing je hasuring tuntang je babilem. Kalote ie mandino kawan metoe kabuat hayak mamisahe bara kawan meto ain Laban.
41Amon kare meto je abas kanjerae kawin, Yakob mingkes kare edan je ingupake te intu taharep ewen, intu eka danum ihope. 42Tapi ie dia mingkes kare edan te intu tahareb meto je balemo. Te uras meto je baputi te balemo, jete ayun Laban. Tapi uras meto je babilem, habelang tuntang harintik je abas, jete ayun Yakob. 43Kalote Yakob jari tatau toto. Ayue are kawan tabiri, onta, kalidai tuntang rewar.
Currently Selected:
GENESIS 30: NIJ
Highlight
Share
Copy
Want to have your highlights saved across all your devices? Sign up or sign in
