GENESIS 27
27
Isaak mamberkat Yakob
1Sinde andau, metoh Isaak jari bakas tuntang babute, ie mantehau Esau, anake je bakas, palus koae dengae, “Anakku!”
“Toh aku,” tombah Esau.
2Isaak hamauh, “Ikau katawan je aku jari bakas tuntang dia harap tau belom tahi tinai. 3Awi te duan taloh hapan mamanah, lius akan padang mandop ije kongan meto. 4Pakasak manga-mangat kilau ije eka karajingku, balalu agah akangku. Limbah aku kumae, aku handak mamberkat ikau helo bara aku matei.”
5Pander Isaak dengan Esau te ihining awi Rebeka. Maka limbah Esau haguet mandop, 6Rebeka hamauh dengan Yakob, “Aku harun mahining bapam hamauh dengan Esau kalotoh, 7‘Andop ije kongan meto tuntang pakasak manga-mangat akangku. Limbah aku kumae, aku handak mamberkat ikau intu taharep Tuhan, helo bara aku matei.’ 8Awi te, anakku,” koan Rebeka tinai, “hining tuntang lalus taloh je koangku toh. 9Talih eka tabirin itah, intih due anak kambing je basepu-seput, mangat aku mampakasak panginan je eka karajin bapam. 10Limbah te agah akae mangat ie kumae. Tuntang limbah te ie manenga berkate akam helo bara ie matei.”
11Tapi Yakob hamauh dengan indue, “Umai, en diakah bitin Esau habulu, tapi bitingku dia? 12Ela-ela bapa manggayap bitingku palus katawae je aku manipu ie; balalu kareh ie dia akan manenga berkat, tapi manyapa aku.”
13Indue tombah, “Ela mikeh, nak. Nauh aku je mananggong sapae. Lalus taloh je koangku, lius duan kare kambing te.” 14Palus Yakob haguet manduan kare kambing te tuntang mimbite akan indue. Balalu Rebeka mampakasak panginan je eka karajin Isaak. 15Limbah te Rebeka manduan pakaian Esau je pangkahalape, je iingkese intu huma, palus ingkepae intu Yakob. 16Ie mameteng kea upak anak kambing intu lengee tuntang uyat Yakob je dia habulu. 17Balalu inengae akan Yakob panginan je mangat te tuntang rote je jari inampae.
18Limbah te Yakob haguet manalih bapae tuntang hamauh, “Bapa!”
“Narai,” tombah Isaak, “eweh ikau, Esau atawa Yakob?”
19Tombah Yakob, “Esau, anak bapa je bakas; peteh bapa jari ilalusku. Keleh mondok tuntang kinan isin meto dinongku mandop je iimbitku toh, mangat bapa tau mamberkat aku.”
20Isaak hamauh, “Capat toto ikau dinoe, Nak.”
Tombah Yakob, “Awi Tuhan, Hatalla je inyembah bapa jari mandohop aku.”
21Palus koan Isaak dengan Yakob, “Kan hetoh toke-tokep, mangat aku tau manggayap ikau. En ikau toto Esau?” 22Yakob manokep bapae, palus bapae te manggayap ie hayak hamauh, “Auhm kilau auh Yakob, tapi lengem kilau lengen Esau.” 23Isaak dia kasene Yakob karana lengee habulu kilau lengen Esau. 24Tapi metoh ie handak mamberkat Yakob, ie magon misek sinde tinai, “En toto ikau toh Esau?”
“Toto,” tombah Yakob.
25Palus Isaak hamauh, “Tenga akangku isin meto te. Limbah aku kuman aku handak manenga berkatku akam.” Yakob manenga isin meto te akae tuntang anggor isut akan indu ihop. 26Balalu bapae hamauh dengae, “Kan hetoh labih tokep tinai, nak, tuntang nyium aku.” 27#Ibr. 11:20 Metoh Yakob manokep handak manyium ie, Isaak manyingut ewau pakaian Esau, palus ie mamberkat Yakob. Koan Isaak, “Esau anakku je mangat kilau ewau padang je jari imberkat Tuhan. 28Keleh Tuhan manenga akam ambon bara langit, tuntang mawi tanam basiwoh! Keleh ie manenga akam gandom tuntang anggor je malabien karee! 29#Gen. 12:3 Keleh kare bangsa kareh mamenda ikau, tuntang kare suku oloh sontop manyembah ikau. Keleh ikau mahunjun kare tundah kolam, tuntang turonan indum sontop intu taharepm. Tarasapa kakare oloh je manyapa ikau tuntang imberkat kare oloh je mamberkat ikau.”
Esau balaku berkat bara Isaak
30Sana limbah manenga berkate tuntang Yakob jari haguet, Esau, kakae, buli mandop. 31Ie kea mumpakasak panginan je mangat palus mimbite akan bapae. Koae, “Mondok bapa, kinan isin meto je iimbitku akan bapa, mangat bapa tau mamberkat aku.”
32“Eweh ikau?” koan Isaak.
“Esau anak bapa je bakas,” tombah ie.
33Isaak nampara hagenjeh hapus bitie. Palus ie misek, “Amon kalote eweh je jari mandop meto tuntang mimbite akangku endau? Aku jari kumae helo bara ikau dumah. Aku jari manenga berkatku je pangkalepahe akae. Maka toh berkat te je jadi ayue palus katatahie.”
34Limbah Esau mahining auh te, ie manangis hai auhe hayak kapehen ateie, palus koae, “Berkat aku kea bapa!”
35Isaak hamauh, “Andim jari dumah akan hetoh tuntang manipu aku. Ie jari manduan berkat je sapunae handak inengaku akam.”
36 #
Gen. 25:29-34
Esau hamauh, “Toh tingkat ije kaduee ie manipu aku. Badai arae Yakob.#27:36: Yakob: Aran toh sama auh sewute kilau kotak Ibrani je rimae “tipu” atawa “tanjaro”. Ie jari manduan pangkat kabakasku. Toh ie manduan kea berkat je akangku. En bapa puna jaton tempon berkat je beken akangku?”
37Isaak tombah, “Aku jari mawi ie jadi pamimpin akam, tuntang kare tundah paharie iawiku jadi reware. Aku jari manenga akae gandom tuntang anggor. Toh jaton en-en tinai je tau ilalusku akam, nak!”
38 #
Ibr. 12:17
Esau dia maku terai balaku dengan bapae. “En bapa baya aton tempon ije berkat bewei? Berkat kea aku bapa!” palus ie nampara manangis tinai.
39 #
Ibr. 11:20
Limbah te Isaak hamauh dengae,
“Dia baka aton ambon bara langit akam,
dia baka aton tana je basiwoh akam.
40 #
Gen. 36:8; 2 Ra. 8:20 Ikau kareh belom mahapan padangm,
aloh kalote ikau manjadi rewar andim,
tapi amon ikau malawan, #27:40: malawan atawa mandarhaka atawa manjadi balisah.
ikau kareh liwus bara kuasae.”
41Palus Esau manyingi Yakob tagal bapae jari manenga berkat akan andie te. Tiroke, “Dia tahi tinai bapa akan matei, tuntang limbah itah manatume, Yakob kareh impateiku!”
Isaak manyoho Yakob haguet manalih Laban
42Metoh Rebeka mahining tahiu tirok Esau te, ie manyoho oloh mantehau Yakob tuntang hamauh, “Kakam Esau handak mambaleh tuntang mampatei ikau. 43Tagal te, lalus taloh je insanangku akam toh. Lius jeleng talih kakaku Laban intu Haran, 44balalu melai dengae pire-pire katahie, sampai kasangit kakam terai, 45tuntang ie mangalapean taloh je jari iawim dengae. Limbah te aku kareh manyoho oloh mimbit ikau buli akan hetoh. Aku dia handak nihau kadadue anakku hong andau je sama.”
46Rebeka hamauh dengan Isaak, “Aku peda mite kare sawan Esau bara bangsa beken te. Amon Yakob kawin kea dengan bawin oloh Het, labih bahalap aku matei ih.”
Currently Selected:
GENESIS 27: NIJ
Highlight
Share
Copy
Want to have your highlights saved across all your devices? Sign up or sign in
