GENESIS 22
22
Hatalla manyoho Abraham maluput Isaak akan parapah
1 #
Ibr. 11:17-19
Limbah te Hatalla mariksa kaketep Abraham. Hatalla mantehau, “Abraham!” Palus Abraham tombah, “Toh aku.”
2 #
2 Kro. 3:1
Koan Hatalla, “Keleh haguet akan tanah Moria dengan Isaak, anakm je tunggal, je paham inyintam. Intu hete, intu bukit je kareh handak ininjok-Ku akam, keleh maluput anakm akan indu parapah je ingehu akang-Ku.”
3Andau jewue, hanjewu, Abraham manyila kayu akan parapah je ingehu te tuntang mameteng kayu te intu hunjun kalidaie. Ie haguet dengan Isaak tuntang due biti pelayae akan eka je insanan Hatalla akae. 4Hong andau je kateloe Abraham mite eka te bara kejau. 5Palus ie hamauh dengan kadadue pelayae, “Melai keton intu hetoh dengan kalidai toh. Aku tuntang anakku toh handak haguet akan kanih manyembah Tuhan, kareh ikei haluli tinai manalih keton.”
6Abraham mina kayu je ihapan akan mangehu parapah te intu hunjun bahan Isaak. Ie kabuat mimbit pisau tuntang barah apui hapan mantokan apui. Metoh ewen mananjong haya-hayak, Isaak hamauh, 7“Bapa.”
Abraham tombah, “Narai anakku.”
Isaak misek, “Itah jari mimbit apui tuntang kayu, tapi kueh anak tabiri je iluput akan parapah je ingehu te?”
8Abraham tombah, “Hatalla kabuat kareh je manatap anak tabiri te.” Palus ewen due marajur tanjonge.
9 #
Yak. 2:21
Metoh ewen sampai eka je insanan Hatalla akan Abraham, ie mampendeng ije mesbeh tuntang manyusun kayu te intu hunjue. Palus mameteng anake tuntang impetere intu mesbeh, intu hunjun kayu te. 10Limbah te, ie manduan pisau handak mampatei anake. 11Tapi malekat Tuhan mantehau ie bara langit, “Abraham, Abraham!”
Tombah Abraham, “Yoh Tuhan!”
12“Ela mangapehe anak te atawa mawi taloh en-en dengae,” koan Tuhan hajamban malekat te. “Toh katawangku je ikau mahormat tuntang baketep manumon auh-Ku, karana ikau dia babehat ateim manyarah anakm je tonggal te akang-Ku.”
13Palus Abraham manampayah hakalilinge tuntang gitae ije kongan tabiri hatue je tandoke sangkawit intu rowut. Abraham manduan tabiri te balalu mahapae jadi parapah akan Tuhan kilau parapah je ingehu gantin anake. 14Abraham manampa aran eka te, “Tuhan manatap #22:14: manatap (manyadia) atawa mite. taloh je imerlu”. #22:14: taloh je imerlu atawa Tuhan gitan. Tuntang sampai toh oloh hamauh “Intu hunjun bukit ayue Tuhan manatap taloh je imerlu.”
15Sinde tinai bara langit malekat Tuhan mantehau Abraham, 16#Ibr. 6:13-14 “Tuhan hamauh: Aku sumpah tagal arang-Ku kabuat, karana ikau jari malalus taloh toh, tuntang dia babehat ateim manyarah anakm je tonggal te akang-Ku, 17#Ibr. 11:12 Aku handak mamberkat ikau dengan berkat je are, tuntang Aku mawi turonam sama kilau kare bintang hong langit tuntang sama kilau kare baras hong saran tasik. Anak esom kareh mampakalah kare musoh ewen. 18#Gaw. Ras. 3:25 Kakare bangsa hong kalunen kareh balaku dengang-Ku mangat Aku mamberkat ewen kilau Aku jari mamberkat turonam awi ikau jari manumon parentah-Ku.” 19Limbah te Abraham haluli manalih kadadue pelayae, balalu ewen haya-hayak haguet akan Berseba, tuntang Abraham melai intu hete.
Turonan Nahor
20Abraham aton kakae je bagare Nahor. Limbah taloh je manjadi intu bukit Moria te, Abraham mahining je Milka, sawan Nahor jari bara anak hanya biti hatue, iete 21Us je tambakase, Bus, andie; Kemuel, je rahian tinai manjadi bapa Aram; 22Kesed, Haso, Pildas, Yidlap, tuntang Betuel, 23je rahian tinai manjadi bapa Rebeka. Jete ie kahanya anak je inakan Milka akan Nahor, paharin Abraham. 24Nahor aton gundike je bagare Reuma. Ie manak Tebah, Gaham, Tahas tuntang Maakha.
Currently Selected:
GENESIS 22: NIJ
Highlight
Share
Copy
Want to have your highlights saved across all your devices? Sign up or sign in
