EKSODUS 7

1 Tuhan hamauh dengan Moses, “Aku handak manjadian ikau sama kilau Hatalla intu taharep raja. Tuntang paharim Aron kareh hakotak dengae kilau nabim. 2Nyampai akan Aron kakare taloh je irentah-Ku akam. Soho Aron manyampai akan raja je ie patut manyoho oloh Israel malihi tanah Misir. 3#Gaw. Ras. 7:36 Tapi aku akan manjadian raja batekang ateie. Ie dia handak paduli auhm, aloh aku mampamohon are calaka intu Misir. 4Tagal te aku handak mahukum Misir hapan kare hukuman je babehat, limbah te aku mimbit hapus bangsa Israel, ungkup ayung-Ku, balua bara tanah te. 5Palus oloh Misir kareh katawan je Aku toh Tuhan, metoh Aku mahukum ewen tuntang mimbit Israel balua bara tanah ewen.” 6Moses tuntang Aron malalus taloh je irentah Tuhan. 7Umur Moses 80 nyelo tuntang Aron 83 nyelo metoh ewen manaharep raja Misir.

Sukah Aron

8 Tuhan hamauh dengan Moses tuntang Aron, 9“Amon raja balaku keton mawi taloh heran kilau bukti, keleh nyoho Aron manduan sukahe tuntang manjakahe akan petak intu taharep raja. Tongkeh te kareh hobah jadi handipe.” 10Moses dengan Aron balalu haguet manaharep raja; Ewen malalus taloh je irentah Hatalla. Aron manjakah sokahe akan petak intu taharep raja tuntang kare oloh ayue, palus sukah te hobah jadi handipe. 11Tagal te raja mantehau kare oloh ayue je pintar tuntang kare tabit ayue, balalu ewen malaluse tumon te kea hapan seher ewen. 12Ewen manjakah sukahe akan petak, tuntang kare sukah te hobah jadi handipe. Tapi sukah Aron manelen sukah ewen te. 13Aloh kalote, raja tetep manekang ateie tuntang dia paduli auh Moses tuntang Aron, sama kilau je jari insanan Tuhan.

Misir buah calaka

Calaka je solake: danum jadi daha

14Limbah te Tuhan hamauh dengan Moses, “Raja te paham katekang ateie ie dia maku manyoho bangsa Israel haguet. 15Tagal te lius manyondau ie hayak hanjewu, metoh ie dumah akan Sungei Nil. Imbit sukah je tau hobah jadi handipe te tuntang nunggu ie intu saran sungei. 16Sanan akan raja te: Tuhan, Hatallan oloh Ibrani, manyoho aku manyampai akan Tuangku uka manyoho ungkup Ayue haguet mangat manyembah Ie intu padang pasir. Tapi sampai toh Tuangku dia maku mahining. 17#Pang. 16:4 Tagal te Tuhan hamauh kalotoh, ‘Bara taloh je iawi-Ku kareh ikau akan katawan je Aku toh Tuhan. Hapan sukah toh aku toh kareh mahewes hunjun danum sungei, tuntang danum kareh hobah jadi daha. 18Kare lauk kareh matei, tuntang sungei toh kareh ewau maram, sampai oloh Misir dia tau mihop danume.’ ”

19 Tuhan hamauh dengan Moses, “Soho Aron manduan sokahe tuntang mantajoke akan hunjun kare sungei, kare anjir tuntang kare talekong danum intu Misir. Danume kareh hobah jadi daha, tuntang intu hapus tanah kareh aton daha, tuntang kea intu kare sarangan danum tuntang balanai.”

20Moses tuntang Aron malalus taloh je irentah Tuhan. Intu taharep raja tuntang oloh ayue, Aron manggatang sokahe tuntang mahewes danum sungei Nil, palus danume hobah jadi daha. 21Kare lauk huang sungei te matei, tuntang ewaue papa toto, sampai oloh Misir dia tau mihop danum te. Intu hapus tanah Misir aton daha. 22Tapi kare tukang seher Misir mawi kalote kea hapan seher ewen, sampai raja tetep badungil, kilau je jari insanan Tuhan, raja dia maku mahining auh Moses tuntang Aron. 23Ie buli haream akan Istana hayak isut mahin dia ie maku paduli taloh je manjadi te. 24Uras oloh Misir mangali petak manyaroroi saran sungei hapan manggau danum, awi danum sungei te dia tau iihop.

25Uju andau jari mahalau limbah Tuhan manyapa Sungei Nil.

Currently Selected:

EKSODUS 7: NIJ

Highlight

Copy