Luka 7
7
Jesũ kũragithia ntungata ya Mũnene wa athigari Mũroma
(Mat 8.5-13)
1Jesũ akũrĩkia kwĩra antũ maũntũ marĩa monde endaga kuuga akĩthi Kaperinaumu. 2Na kũu nĩ kwarĩ na mũnene ũmwe Mũroma warũngamagĩĩra athigari ĩgana. Mũnene ũu nĩ aarĩ na nkombo endete mũno, nayo ĩkĩrwara mũno o akuĩ gũkua. 3Rĩrĩa mũnene ũu eegwire nteto jiĩgiĩ Jesũ nĩ atũmire akũrũ ba Ayahudi bakamũũrie athi akaragithie nkombo ĩu yae. 4Bagũkinya kĩrĩ Jesũ nĩbamũkaĩre bakĩmwĩraga, “Muntũ ũũ nĩ abatiĩ ũtethio bwaku 5nĩ tontũ nĩendete antũ betũ, na nĩwe watwakĩĩre sĩnagogu.”
6Kwogu Jesũ akĩthi na akũrũ bau kwa mũnene ũu. Bagũkuĩria, mũnene ũu wa athigari ĩgana agĩtũma acoore bae kĩrĩ Jesũ bakamwĩre atĩrĩ, “Mwathani, tiga gwĩtanga nĩ tontũ niũ ntĩ mwagĩru wa gũkũgwata ũgeni gwakwa. 7Na nĩkĩo o naani ntĩũkire kĩrĩ gwe. Ĩndĩ rĩ, ruta kiugo tu, na nkombo yakwa nĩkũragia. 8Nĩ tontũ o naani nĩmbathagwa, na ndĩ na athigari mbathaga. Mbĩraga ũmwe, ‘Thi’, na akathi. Nkera ũngĩ, ‘Njũ,’ na akeja. Na ndera nkombo yakwa, ‘Rũtha ũũ’ ĩkarũtha.”
9Jesũ akwĩgua ũgu nĩ arigarire mũno nĩwe. Akĩgarũkĩra antũ barĩa bamũthingatĩte akĩbeera, “Ka ndĩbwĩreni, niũ ntanona muntũ ũrĩ na wĩtĩkio bũnene ta bũbũ, o na nkinya kĩrĩ Aisiraeli.”
10Na rĩrĩa barĩa batũmĩtwe bacokire nyomba ya mũnene ũu bakĩthĩra nkombo ĩkũragia.
Jesũ kũriũkia mwana wa mũka wa ntigwa
11Nyumani anini#7.11 Nyumani anini: Mandĩko mangĩ ma tene maugaga: “Rũũni.” , Jesũ nĩ acokire akĩthi taũni nene yetagwa Naini, na arutwa bae na antũ baingĩ bakĩthijania nawe. 12Agũkuĩria mpingĩro ya taũni ĩu ya Naini agĩtũngana na mũka wa ntigwa athiĩte kũthika mwana wae ũrĩa arĩ agũkua. Na nĩ kwarĩ na antũ baingĩ mũno ba ntũũra ĩu barĩa bathiĩte mathikoni. Mũka ũu wa ntigwa ataarĩ na mwana ũngĩ. 13Na rĩrĩa Mwathani amwonire akĩmwĩguĩra kĩao, akĩmwĩra atĩrĩ, “Tiga kũrĩra.” 14Jesũ agĩkuĩria ĩthandũkũ rĩrĩa rĩarĩ na mwĩrĩ akĩrĩtonga, na barĩa barĩkamatĩte bakĩrũngama. Jesũ akiuga atĩrĩ, “Mũthaka! ndakwĩra ũkĩra!” 15Na rĩ, muntũ ũu wakuĩte agĩũkĩra agĩkara ndĩ, akĩambĩĩria kwaria. Jesũ agĩcokeria gina mwana wae.
16Antũ bonde bakĩgwatwa nĩ ũkĩri, na bakĩgoca Ngai bakiugaga, “Tũrĩ na kĩroria kĩnene gatagatĩ getũ!” Bagĩcoka bakiuga, “Ngai nĩ ariũngĩrĩte antũ bae!”
17Na nteto ino igĩtamba Judea yonde na ndĩ ĩrĩa yamĩthiũrũkĩrĩtie.
Johana Mũbatithania gũtũma antũ kĩrĩ Jesũ
(Mat 11.2-19)
18Rĩrĩa Johana erirwe nĩ arutwa bae bũrĩa bunde Jesũ arũthaga 19nĩ etire arutwa bae baĩrĩ akĩbatũma kĩrĩ Mwathani nĩkenda bathi kũmũũria atĩrĩ, “Gwe nĩgwe ũrĩa twerirwe akeja, kana tũthi mbere gweteera ũngĩ?”
20Bagũkinya kĩrĩ Jesũ bakĩmwĩra, “Johana Mũbatithania atũtũma kĩrĩ gwe tũkũũrie atĩrĩ, ‘Gwe nĩgwe ũrĩa twerirwe akeeja, kana tũthi mbere gweteera ũngĩ?’”
21O thaa iu Jesũ nĩaragithiirie antũ baingĩ mĩrimũ na ndwari, o na nkoma. Ningĩ agĩtũma atumuumu baingĩ bacoke kwona. 22Jesũ agĩcoka akĩĩra atũmwa bau batũmĩtwe atĩrĩ, “Thini bwĩre Johana bũrĩa bwona na bwegua: atumumu nĩbacokete kwona, ithua rĩu nĩ ikũthi, antũ ba mũtigiri nĩ atherie, itaigua nĩ ikwĩgua, akuũ nĩ bariũku na nkĩa nĩikũunjĩrua nteto irĩa mbega. 23Gũkena nĩ muntũ ũrĩa ũtĩ na nkanja ũntũni bũmbĩgiĩ.”
24Arutwa ba Johana bakũthi, Jesũ akĩambĩria kwarĩria antũ maũntũ megiĩ Johana, akĩbeera atĩrĩ, “Nĩmbi bwathiĩte kwona rwanda? Nĩ ĩthanje rĩkinainua nĩ rũkũngi? 25Nĩmbi obu bwathiĩte kũona? Muntũ arĩ na nguo irĩa mbega? Atĩrĩ, barĩa bekagĩra nguo irĩa mbega na bagatũũra mĩtũrĩre mĩega bonekanaga nyomba jia anene. 26Nĩmbi ĩndĩ bwathiĩte kwona? Nĩ kĩroria? Ĩĩ! Ĩndĩ ũrĩa bwonire nĩ akũrũkĩte kĩroria. 27Johana nĩwe mandĩko maaragia bwae rĩrĩa maugaga, ‘Atĩrĩ, nĩngũtũma mũtũmwa wakwa mbere ya wĩĩja, Ũrĩa ũgagũtemera njĩra.’ 28Ndĩbwĩra atĩrĩ, kĩrĩ bonde barĩa banajiarwa nĩ mũka gũtĩ we mũnene ta Johana. Ĩndĩ rĩ, ũrĩa mũnini buru Ũneneni bwa Ngai nĩ mũnene kũmũkĩra.”
29(Na rĩrĩa antũ bonde na arutithia goti begwire ũgu bagĩtĩkĩa Ngai nĩ wa gĩoto, nĩũntũ nĩbabatithĩtue na kĩbatithio kĩa Johana.) 30Ĩndĩ Afarisai na arutani ba Watho nĩbaregire bũrĩa Ngai ababangĩrĩte, nĩ tontũ bo batabatithĩtue nĩ Johana.
31Jesũ akiuga, “Ndĩgerekania antũ ba ntukũ ino na mbi? Bakari ta mbi? 32Bakari ta twana twĩkari thokoni tũkiugaga, ‘Twabũringĩĩre mĩtũrirũ bwarega kwina, 1 Twacoka twabwinĩra nyĩmbo jia kwĩthikĩra bwarega kũrĩra.’ 33Rĩrĩa Johana Mũbatithania ejire atarĩĩjaga kana anyua ndibei; naabwi bũkiuga, ‘Arĩ na nkoma.’ 34Mwana wa Muntũ akwĩja akĩrĩjaga na akĩnyunyaga bũriuga, ‘Eneni ũũ mũkoroku na mũrebi; mũcoore wa arutithia goti na eyia!’ 35Ĩndĩ rĩ, ũgĩ bwa Ngai bwĩtĩkĩrĩkaga nĩ bwagĩru kumania na barĩa babũthingataga.”
Jesũ kũgwatwa ũgeni kwa Mũfarisai wetagwa Simoni.
36Mũfarisai ũmwe nĩ etire Jesũ kwae bakarĩjanĩre. Jesũ agĩtĩkĩra, akĩthi kwa Mũfarisai ũu agĩkara ndĩ kũrĩa. 37Na rĩ, nĩ kwarĩ muntũ mũka ntũũrani ĩu watũũrĩte mũtũrĩre wa wĩyia. Akũmenya atĩ Jesũ nĩ aarĩ kwa Mũfarisai ũu, Mũka ũu akĩthi nao akamatĩte cuuba yaarĩ na maguta manunkaga wega. 38Akĩthi akuĩ na magũrũ ma Jesũ akĩrĩraga, methori mae magetĩkagĩra magũrũ ma Jesũ. Agĩturia, akĩgiria magũrũ ma Jesũ methori na njuĩrĩ jiae jia kĩongo, akĩmamumunya, agĩcoka akĩmaaka maguta mau manunkaga wega. 39Rĩrĩa Mũfarisai ũrĩa etĩĩte Jesũ onire ũgu akĩĩra na nkoro atĩrĩ, “Kethĩrwa muntũ ũũ nĩ kĩroria nĩ ankĩamenya muntũ mũka ũũ ũkũmũtonga nĩ muntũ ũkari, nĩũntũ nĩ mwĩyia.”
40O au Jesũ akĩĩra Mũfarisai ũu, “Simoni, ndĩ na ũntũ nkwenda gũkwĩra.”
Simoni akiuga, “Ĩĩ Mũrutani, mbĩra.”
41Jesũ akĩmwĩra atĩrĩ, “Muntũ ũmwe nĩ akobithĩtie antũ baĩrĩ mbeca. Ũmwe akobithĩtue dinari#7.41 dinari: Kiugo gĩkĩ nĩ Kĩngiriki: warĩ mũcara wa ntukũ ĩmwe wa mũruti wĩra wa kĩbarũa magana matano na ũu ũngĩ agĩkobithua mĩrongo ĩtano. 42Rĩrĩa baremirwe nĩ kũmũrĩa randũ akĩbarekera bo baĩrĩ. Nĩ ũrĩkũ wabo ũkenda muntũ ũu nkũrũki?”
43Simoni akĩmũcokeria, “Mbuga nĩ ũrĩa arekeerwe ĩrandũ rĩnene.”
Jesũ akĩmwĩra atĩrĩ, “Ũgu wauga nĩbu.” 44Akĩgarũkĩra muntũ mũka ũu, akĩĩra Simoni atĩrĩ, “Nĩ ũkwona muntũ mũka ũũ? Ngũtonya nyomba ĩno yaku ũtĩnenkeere rũjĩ rwa kũthamba magũrũ. Ĩndĩ muntũ mũka ũũ akũndambia magũrũ na methori mae na angiria na njuĩrĩ jiae. 45Gweũ ũtĩmumunyire, ĩndĩ muntũ mũka ũũ atĩtigĩte kũmumunya magũrũ makwa kuuma rĩrĩa mbĩjire. 46Ũtĩmbakire maguta kĩongo, ĩndĩ muntũ mũka ũũ agwaka magũrũ makwa maguta marĩa makũnunka wega. 47Kwogu ndĩkwĩra atĩrĩ, akũrekerwa meyia mae marĩa mararĩ maingĩ, nĩũntũ bwa wendo bũnene bũrĩa onania. Ĩndĩ rĩ, ũrĩa wonanagia wendo bũnini arekagĩrwa meyia o manini.”
48Jesũ agĩcoka akĩĩra muntũ mũka ũu atĩrĩ, “Ũkũrekerwa meyia maku.”
49Barĩa baarĩ gĩĩkaroni kĩu amwe na Jesũ bakĩambĩĩria kwĩũria, “Nĩka arĩ ũ ũũ ũkũmba kũrekanĩra meyia?”
50Jesũ agĩcoka akĩĩra muntũ mũka ũu, “Wĩtĩkio bwaku bũgũkwonokia; thi na ũkiri.”
Currently Selected:
Luka 7: LUKA
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2021
