Luka 22

Mũbango wa kũũraga Jesũ

(Mat 26.1-5; Mar 14.1-2; Joh 11.45-53)

1Rĩu, kĩrugo kĩa Mambura ma Mĩgate ĩrĩa ĩtĩmĩkĩre ndawa ya kwimbia, kĩrĩa gĩtagwa Pasaka, kĩarĩ akuĩ gũkinya. 2Athĩnjĩri Ngai barĩa anene na arutani ba Watho nĩbacũaga bũrĩa bankĩũraga Jesũ na withũ, nĩ tontũ nĩbakĩraga antũ.

Judasi gwĩtĩkĩra gũkunyanĩra Jesũ

(Mat 26.14-16; Mar 14.10-11)

3Rĩu Nkoma nĩ aatonyire Judasi, ũrĩa wetagwa Isikarioti, ũmwe wa arutwa barĩa ĩkũmi na baĩrĩ. 4Judasi nĩ athiire akĩrĩkanĩra na athĩnjĩri Ngai barĩa anene na anene ba arangĩri Hekarũ, bũrĩa ankĩbatetheria kũgwata Jesũ. 5Nabo bagĩkena na bakĩrĩkanĩra bakamũrĩĩa mbeca. 6Judasi agĩtĩkĩra, na akĩambĩĩria gũcũa kanya ka gũkunyanĩra Jesũ antũ batĩkũmenya.

Jesũ kwĩarĩria kũrĩa irio jia Pasaka

(Mat 26.17-25; Mar 14.12-21; Joh 13.21-30)

7Ntukũ ya Mambura ma Mĩgate ĩrĩa ĩtĩ mĩkĩre ndawa ya kwimbia, na no yo ntukũ ĩrĩa gatũrũme ka Pasaka kathĩnjagwa, nĩ yakinyire. 8Kwogu Jesũ agĩtũma Petero na Johana, akĩbeera, “Thini bũtũbangabangĩre irio jia Pasaka twĩje tũrĩe.”

9Nabo bakĩmũũria, “Nĩkũ ũkwenda tũmĩbangĩra?”

10Akĩbeera atĩrĩ, “Bwatonya ntũũrani bũkona mũntũ akamatĩte mũtũngi wa rũjĩ. Mũthingateni nkinya nyomba ĩrĩa agatonya. 11Bwatonya ku bwĩre mwene nyomba atĩrĩ, ‘Mũrutani arĩkwĩra ũtwonie nyomba ĩrĩa we na arutwa bae bakarĩĩra irio jia Pasaka.’ 12Akabwonia nyomba nene ngorobani ĩgũrũ ĩrĩ mbange wega na into jionde. Bangĩrani Pasaka ku.”

13Bakĩthi, bakĩthĩra gũkari o ta bũrĩa aberĩĩte. Bakĩbangabanga irio jia Pasaka.

Irio jia Mwathani

(Mat 26.26-30; Mar 14.22-26; 1Akor 11.23-25)

14Na rĩrĩa thaa jia kũrĩa jiakinyire Jesũ agĩkara ndĩ kũrĩa, arĩ amwe na atũmwa bae. 15Akĩbeera atĩrĩ, “Nĩnderirĩrĩtie mũno kũrĩjanĩra nabwi irio jia Pasaka ĩno ntanathĩnua. 16Ndĩbwĩra na ma ntĩkarĩa irio jia Pasaka ĩngĩ nkinya rĩrĩa gĩtũmi kĩa mambura ma Pasaka gĩkamenyeka wega Ũnene bwa Ngai bweja.”

17Jesũ agĩcoka akĩjũkia gĩkombe, na rĩrĩa arĩkirie gũcokeria Ngai nkatho akĩuga, “Keni gĩkombe gĩkĩ bũnyue bwinde. 18Ndĩbwĩra na ma atĩ, kuuma rĩu ntĩkanyua ndibei kaĩrĩ nkinya rĩrĩa Ũnene bwa Ngai bũkeja.”

19Akĩjũkia mũgate, na rĩrĩa arĩkirie gũcokeria Ngai nkatho, akĩũng'enyũranga akĩbanenkera akiugaga, “Ũũ nĩ mwĩrĩ wakwa ũrĩa ũnenkanĩrĩtwe nĩũntũ bwenu. Rũthagani ũũ nĩkenda bũkandirikanaga.” 20Ningĩ o ta ũgu, bakũrĩkia kũrĩa nĩ abanenkere gĩkombe akiugaga, “Gĩkombe gĩkĩ nĩ kĩrĩkanĩro kĩerũ kĩrĩa kĩthondeketwe na ndamu yakwa, ĩrĩa ĩgwĩtũrwa nĩũntũ bwenu.

21“Ĩndĩ bũmenye atĩrĩ, o aa methani ĩno tũrĩ na ũrĩa ũkambendia. 22Mwana wa Muntũ agakua o ta bũrĩa Ngai abangĩte, ĩndĩ wũinanũ kĩrĩ mũmwendia!”

23Rĩu bakĩambĩria kũrania nũũ gatagatĩ kao ũkarũtha ũntũ bũu.

Arutwa kũgĩa nkarari jiĩgiĩ ũnene

24Gũgĩcoka gũkĩgĩa nkarari gatagatĩ kao, bakĩenda kũmenya nĩ ũrĩkũ kĩrĩ bo mũnene nkũrũki ya bau bangĩ. 25Nawe Jesũ akĩbeera, “Anene ba antũ barĩa batijĩ Ngai baathaga antũ na njĩra ya kũbainyĩrĩria, bagĩĩtaga aguni antũ. 26Ĩndĩ tĩ bu bwiũ bũbatiĩ gwĩkara. Ũrĩa mũnene gatagatĩ kenu nĩ ekare ta ũrĩa mũnini buru; na mũtongoria nĩ ekare ta ũrĩa ũtungataga barĩa bangĩ. 27Atĩrĩ, nĩ ũrĩkũ wĩthagĩrwa arĩ mũnene kĩrĩ ũrĩa ũngĩ, nĩ ũrĩa ũkũreterwa irio methani kana nĩ ũrĩa ũkũretanĩra? Anga tĩ ũrĩa wĩkarĩte methani areterwa? Ĩndĩ niũ mbĩkaranĩtie naabwi nkari ta ũrĩa ũbũtungataga.

28“Bwiũ nĩbwi bwĩkarĩte amwe naani kagiita ka magerio makwa. 29Kwogu nĩnkũbũnenkera ũnene o ta bũrĩa Baba anenkere bu. 30Bukarĩa na bũnyue amwe nani ũneneni bwakwa, na bwĩkarĩre itĩ jia ũnene bũkĩathaga mĩrĩga ĩkũmi na ĩĩrĩ ya Isiraeli.”

Jesũ kwĩra Petero atĩ akamũkana

(Mat 26.31-35; Mar 14.27-31; Joh 13.36-38)

31Jesũ akĩĩra Petero, “Simoni, Simoni, tathikĩrĩria! Nkoma nĩ arombete rũũtha abũũnge ta bũrĩa ngano iũngagwa. 32Ĩndĩ nĩ nkũromberete, gwe Simoni, nĩkenda wĩtĩkio bwaku butĩkathĩre, na rĩrĩa ũgancokeera, wĩkagĩre arutwa barĩa bangĩ inya.”

33Petero akĩmwĩra, “Mwathani, niũ nĩ ndĩarĩrĩtie kũingĩrwa njera amwe nagwe, o na nkinya kũraganĩrua nagwe.”

34Ĩndĩ Jesũ akĩmwĩra, “Ndĩkwĩra atĩrĩ, Petero, ncamba ya ngũkũ ĩtĩkurura ũtukũ ũũ wa ũmundĩ ũtĩnkanĩte maita mathatũ.”

Kĩbeti, mondo na rũyiũ

35Rĩu Jesũ akĩũria arutwa bae atĩrĩ, “Rĩrĩa ndabũtũmĩte bũtĩ na ibeti jia mbeca kana mondo kana iratũ rĩ, kũrĩ gĩntũ bwagire?”

Nabo bakiuga, “Arĩ, gũtĩ kĩo.”

36Nawe Jesũ akĩbeera atĩrĩ, “Ĩndĩ rĩu ũrĩa ũrĩ na kĩbeti na mondo nĩ aikamate, na muntũ ũrĩa ũtĩ na rũyiũ nĩ endie ĩgoti rĩae arũgũre. 37Nĩũntũ ndĩbwĩra atĩ bũrĩa bwandĩkĩtwe bũmbĩgiĩ no mwanka bũingĩke, atĩ ‘Nĩ atuĩrĩrwe bũmwe ta ũmwe wa antũ barĩa eyia.’ Nĩũntũ maũntũ marĩa mandĩke mambĩgiĩ nĩ ĩndĩ mathiĩte kũinga.”

38Arutwa bae bakĩmwĩra, “Teene, Mwathani; tũrĩ na mpiũ jiĩrĩ!” Nawe akĩbacokeria akĩbeera, “Nĩ ũgu rĩu!”

Jesũ kũromba arĩ kĩrĩmani kĩa Mĩtamaiyũ

(Mat 26.36-46; Mar 14.32-42)

39Jesũ nĩ aumire ntũũrani akĩthi kĩrĩmani kĩa Mĩolĩbu, o bũrĩa amenyeretie; nabo arutwa bakĩmuuma nyuma. 40Agũkinya antũ arĩa endaga akĩbeera, “Rombani bũtĩkeje kũgwa magerioni.” 41Akĩbatiga akĩthi antũ gataaria, agĩturia maru akĩromba akiuga, 42“Baba, kethĩrwa nĩ ũkwenda no ũmpererie gĩkombe gĩkĩ; ĩndĩ wendi bwaku nĩ bwĩkarĩke, no tĩ bwakwa.” 43Kagĩita o kau mũraika kuuma ĩgũrũ nĩ amumĩrĩĩre, akĩmwĩkĩra inya. 44Nawe Jesũ akĩromba mũno nkũrũki arĩ na ũrũrũ mwingĩ, nkinya ndigino jiakari ta matanta manene ma ndamu igĩĩtĩka ndĩ.#22.44 Mandĩko mangĩ matĩgwetaga gĩcuncĩ gĩkĩ.

45Akũthiria kũromba agĩũkĩĩra, agĩcoka arĩa atigĩte arutwa, akĩthĩra nĩ bamamire nĩ bũrĩa baũmbĩtwe nĩ kwĩthikĩra. 46Akĩbeera, “Nĩmbi ĩgũtũma bũmaama? Ũkĩrani bũrombe nĩkenda bũtĩkagwe magerioni.”

Jesũ kũgwatwa

(Mat 26.36-46; Mar 14.32-42)

47Akĩaragia o ũgu, gũkĩja antũ gĩtutu, batongoretue nĩ Judasi, ũmwe wa arutwa barĩa ĩkũmi na baĩrĩ. Judasi akĩthi akuĩ na Jesũ nĩkenda amũmumunya, 48Ĩndĩ Jesũ akĩmũria atĩrĩ, “Judasi, anga no ũmumunye Mwana wa Muntũ rĩrĩa ũkũmwendia kĩrĩ anthũ bae?”

49Rĩrĩa arutwa barĩa baarĩ na Jesũ bonire bũrĩa kwathiĩte gwĩkara bakĩũria Jesũ atĩrĩ, “Mwathani, tũbatemange na mpiũ?” 50Ũmwe wao agĩtema nkombo ya Mũthĩnjĩri Ngai ũrĩa mũnene, akĩmĩrenga gũtũ kwa ũrĩo.

51Ĩndĩ Jesũ akiuga, “Tiganĩ ndũa!” Agĩtongithia gũtũ gwa nkombo akĩmĩragithia.

52Agĩcoka akĩĩra athĩnjĩri Ngai barĩa anene na anene ba arangĩri ba Hekarũ na akũrũ barĩa bejĩte kũmũgwata atĩrĩ, “Nĩka bwĩjĩte na mpiũ na nchũgũma ta mwamba bwĩjĩte kũgwata? 53Ndaratindanagia nabwi Hekarũni o ntukũ o ntukũ, na bũtangwataga. Ĩndĩ rĩ, gaka nĩ kagiita kenu, na kagiita ga ntuma kwathana.”

Petero gũkana Jesũ

(Mat 26.57-58,69-75; Mar 14.53-54,66-72; Joh 18.12-18,25-27)

54Bakĩgwata Jesũ bakĩmwira nyomba ya Mũthĩnjĩri Ngai ũrĩa mũnene. Petero akĩbauma nyuma arĩ gataaria. 55Rĩrĩa antũ baakirie mwanki gatagatĩ ka rwirigo rwa kaja na nyomba ĩu ya Mũthĩnjĩri Ngai na bagĩĩkara ndĩ kũwota, Petero agĩĩkara amwe nabo. 56Rĩu, mwarĩ ũmwe ũrĩa warĩ ntungata akĩona Petero ekarĩte akuĩ na mwanki, akĩmũraitha wega agĩcoka akiuga, “Muntũ ũũ o nawe ararĩ amwe na Jesũ.”

57Ĩndĩ Petero agĩkaana, akiuga, “Arĩ mwarĩ, niũ ntĩmwijĩ!”

58Nyuma ya kagiita kanini muntũ ũngĩ akĩona Petero, akiuga, “O nagwe ũrĩ ũmwe wa bo.” Ĩndĩ Petero akĩmwĩra, “Arĩ muntũ ũrĩa, ni ntĩ ũmwe wa bo.”

59Ningĩ nyuma ya kagiita ta ka ĩthaa rĩmwe muntũ ũngĩ nĩ agĩkinyĩĩria ũntũ bũu, akiuga, “Nĩ ma muntũ ũũ o nawe ararĩ amwe na Jesũ, nĩũntũ o nawe nĩ Mũgalili!”

60Ĩndĩ Petero akiuga atĩrĩ, “Tiga muntũ ũũ; o na ntiijĩ nĩmbi ũkuga.”

O rĩo Petero akĩaragia o ũgu, nchamba ya ngũkũ ĩgĩkurura. 61Mwathani akĩũgũra, akĩraitha Petero. Petero akĩririkana jiugo irĩa Mwathani amwĩrire, atĩrĩ, “Mbere ya nchamba ya ngũkũ ĩkurura ũtukũ wa ũmundĩ, ũgankana maita mathatũ.” 62Petero akiuma nja ya rwirigo akĩrĩra, arĩ na marũrũ maingĩ mũno.

Jesũ kũmarua na kũriwa

(Mat 26.67-68; Mar 14.65)

63Antũ barĩa baarangĩrĩte Jesũ nĩbamũmaragia na kũmũria. 64Ningĩ nĩ bamũkunĩkaga metho na gĩtambaa, bakamũũria, “Ta roria, ũtwĩre nũũ ũu wakũringa?” 65Bakĩmũgera jiugo jiĩngĩ nyingĩ mũno jia ncengo.

Jesũ kwirwa mbere ya kĩama

(Mat 26.59-66; Mar 14.55-64; Joh 18.19-24)

66Rũkĩrĩ gwakĩa, kĩama gĩa akũrũ#22.66 akũrũ: Baarĩ atongoria ba mwingi , athĩnjĩri Ngai barĩa anene na arutani ba Watho gĩgĩkara ndĩ, nawe Jesũ akĩretwa kĩamani. Bakĩmũũria atĩrĩ, 67“Ta twĩre, gwe nĩgwe Mesia?” Jesũ akĩbacokeria akĩbeera, “O na nkabwĩra nĩni we bũtĩtĩkia. 68Ningĩ nkabũũria kĩũria bũtĩncokeria. 69Ĩndĩ kuuma rĩu Mwana wa Muntũ akethĩrwa ekarĩte mwena wa ũrio wa Ngai Mwene Inya Yonde.” 70Akĩama bonde bakĩmũũria, “Kwogu gwe ũrĩ Mwana wa Ngai?” Nawe akĩbacokeria, “Bwiũ nĩ bũkuga atĩ ndĩ we.” 71Akĩama bau bakĩĩrana atĩrĩ, “Nĩ ũira bũrĩkũ bũngĩ tũkwenda? Tũkwĩĩguĩra na matũ metũ bũrĩa auga.”

Currently Selected:

Luka 22: LUKA

Highlight

Copy