Luka 20

Kĩũria kĩgiĩ Wathani bũrĩa Jesũ aatũmagĩra

(Mat 21.23-27; Mar 11.27-33)

1Ntukũ ĩmwe rĩrĩa Jesũ arutanaga antũ Hekarũni na akĩunjagia Nteto Ĩmbega, athĩnjĩri Ngai barĩa anene na arutani ba Watho o amwe na akũrũ bakĩja 2bakĩmũria atĩrĩ, “Ta twĩre ũrũthaga maũntũ mama na wathani bũrĩkũ, kana nũũ wakũere wathani bũu?”

3Nawe Jesũ akĩbacokeria, “O nani nkabũria kĩũria; Ta mbĩrani atĩrĩ, 4Johana rĩ, arutĩte wathani bwa kũbatithania kĩrĩ Ngai kana kĩrĩ antũ?”

5Bakĩaranĩria bo eene bakĩĩrana atĩrĩ, “Tũkeja kuga, ‘waumĩte kĩrĩ Ngai’ agatũũria, ‘Nĩmbi yagiririe bũmwĩtĩkia ĩndĩ?’ 6Na tũkauga, ‘Bwaumĩte kĩrĩ antũ,’ antũ bonde bagatũria na maiga, nĩũntũ betĩkĩtie atĩ Johana aarĩ kĩroria.” 7Kwogu nĩbamũcokerie bakiuga, “Tũtijĩ kũrĩa bwaumĩte.”

8Nawe Jesũ akĩbeera, “O naani ntĩbwĩra ndũthaga maũntũ mama na wathani bũrĩkũ.”

Ngerekano ya akombori mũgũnda wa mĩthabibũ

(Mat 21.33-46; Mar 12.1-12)

9Jesũ agĩcoka akĩa antũ ngerekano ĩno: “Muntũ ũmwe nĩ aandire mĩthabibũ mũgũndani wae na agĩũkomborithia antũ. Agĩcoka akĩthi ndĩ ĩngĩ agĩkara ku kagiita karaja. 10Kagiita ga gũketha ndabibũ gagũkinya mwene mũgũnda agĩtũma ntungata kĩrĩ bau bakomborete mũgũnda ĩmũgĩĩrĩra gĩcuncĩ kĩae kĩa maketha. Ĩndĩ akombori bau bakĩmĩrumia na bakĩmĩnga njara irĩa nderi. 11Mwene mũgũnda agĩtũma ntungata ĩngĩ; na o nayo bakĩmĩrumia, na bakĩmĩrũthĩra maũntũ ma ndoni na bakĩmĩnga njara irĩa nderi. 12Agĩcoka agĩtũma ntungata ya ithatũ. Ĩno bakĩmĩthumũranga na bakĩmĩgera nja ya mũgũnda. 13Mwene mũgũnda akĩũria atĩrĩ, ‘Rĩu nĩ atĩa nkũrũtha? Ndĩtũma mwana wakwa ũrĩa mbendete; baũmba kũmũa gĩtĩo.’ 14Ĩndĩ rĩrĩa akombori bamwonire bakĩĩrana atĩrĩ, ‘Ũũ nĩwe mũrĩa ũkũa; tũmũrageni, nĩkenda ĩgai rĩae rĩtwĩke rĩetũ.’ 15Bakĩmũrutũrũra nja ya mũgũnda, bakĩmũraga.”

Na nĩkĩo Jesũ akĩũria, “Mwene mũgũnda ũu rĩ, akarũtha akombori bau atĩa? 16Akeja athirie akombori bau, acoke akomborithie antũ bangĩ mũgũnda ũu.”

Rĩrĩa antũ beguire ũgu bakiuga, “Kũrorega gwĩkarĩka ũgu!”

17Ĩndĩ Jesũ akĩbaraitha kii, agĩcoka akĩbaũria atĩrĩ, “Nĩbũkũmenya bũrĩa Maandĩko mama mataũkaga:

“‘Ĩiga rĩrĩa aaki baregire

Nĩrĩo rĩtuĩkĩte rĩa kũgwatĩĩra nyomba?’

18Muntũ ũrĩa ũkarĩgwĩra nĩka akaunĩkanga; na ũrĩa rĩkagwĩra nĩka rĩkamũtontomora.”

Kiũria kĩgiĩ kũruta goti

(Mat 22.15-22; Mar 12.13-17)

19Arutani ba Watho na athĩnjĩri Ngai barĩa anene nĩbataũkĩrwe atĩ Jesũ aaragia ĩgũrũ rĩao rĩrĩa aejanaga ngerekano ĩu, nĩkĩo nĩbageririe kũmũgwata o thaa iu, ĩndĩ bagĩkĩra antũ. 20Kwogu nĩbekarire bagĩcũaga kanya ga kũmũgwatithia nĩkenda bamũnenkanĩra kĩrĩ gavana, ũrĩa warĩ mũnene na mũrũngamĩri wa kũu. Nĩbatũmire atuĩria gĩ bathi gĩ ciri betwuĩte antũ barĩa bega, bamũtege na mĩario, nĩkenda arutani ba Watho na athĩnjĩri Ngai batũmĩre mĩario yae wengwa kũmũthitanga. 21Atuĩria bau bakĩĩra Jesũ atĩrĩ, “Mũrutani, nĩtwijĩ waragia na ũkarutana maũntũ bũrĩa kũbatiĩ, na ũtĩendanagĩĩra. Nĩ ma gwe ũrutanaga maũntũ marĩa Ngai endaga. 22Ta twĩre atĩrĩ, Watho bwetũ nĩbwĩtĩkĩrĩtie tũrutagĩre Kaisari goti, kana arĩ?”

23Ĩndĩ Jesũ akĩona wara wao, akĩbeera, 24“Ta mboniani mbeca#20.24 mbeca Kĩngiriki kiugaga “dinari.” Raitha Mat. 20.2. Iringĩtwe mbica ya ũ na riĩtwa nĩ rĩa ũ?”

Nabo bakĩmwĩra, “Nĩ jia Kaisari.”

25Jesũ akĩbeera atĩrĩ, “Kwogu, nenkagĩrani Kaisari into irĩa irĩ jiae, na ningĩ bũnenkagĩre Ngai irĩa irĩ jiae.”

26Bakĩremwa kugwata Jesũ na mĩario ĩrĩa aaragia mbere ya antũ. Bakĩrigarua nĩ bũrĩa Jesũ aberire nkinya bakĩaga bwa kuuga.

Kĩũria kĩgiĩ kũriũka kwa akuũ

(Mat 22.23-33; Mar 12.18-27)

27Bamwe ba Asadukai, barĩa baugaga atĩ antũ barĩa bakuũ batĩriũkaga, bakĩthi kĩrĩ Jesũ, 28bakĩmũũria atĩrĩ, “Mũrutani, Musa atwathĩte atĩrĩ na Mandiko, ‘Muntũ ũgũrene akeja gũkua atĩ na jiana rĩ, mũruagina wa muntũ ũu no mwanka agũre mũka ũu nĩkenda ajiarĩre mũruagina ũu mũkuũ jiana.’ 29Rĩu nĩ kwarĩ na ndaka mũgwanja jia muntũ ũmwe. Ũrĩa warĩ mũkũrũ nĩagũranire, ĩndĩ agĩkua agĩtiga mũka atĩ na jiana. 30Mũthaka wa baĩrĩ akĩgũra mũka ũu, nawe agĩkua agĩtiga mũka atĩ jiana. 31Mũthaka wa bathatũ o ta bu, nkinya bonde mũgwanja bagĩkua bagĩtiga mũka ũu atĩ na mwana. 32Mũthiani mũka ũu o nawe agĩkua. 33Rĩu ta twĩre atĩrĩ, rĩrĩa antũ barĩa akuũ bakariũka muntũ mũka ũu akethĩrwa arĩ mũka wa ũ, na bonde mũgwanja nĩbamũgũrĩte?”

34Jesũ akĩbacokeria akĩbeera atĩrĩ, “Antũ ba rĩu nĩbagũranaga na bakagũrũa. 35Ĩndĩ rĩ, barĩa Ngai akona barĩ bagĩru ba kũriũkua kuuma kĩrĩ akuũ batĩkagũrũa kana bagũrana. 36Bakethĩrwa bakari ta araika, na batĩkarokua. Bakethĩrwa barĩ aana ba Ngai, tontũ bakethĩrwa bariũkĩte kuuma kĩrĩ akuũ. 37Musa o nawe nĩonanirie wega nteto ya kũriũka kwa akuũ, rĩrĩa aaragia nteto jia kĩthaka gĩgĩakana mwanki; eetire Mwathani, ‘Ngai wa Aburahamu, Isaka na Jakubu.’ 38Kwogu we tĩ Ngai wa barĩa akuũ, nĩ Ngai wa barĩa barĩ mwoyo, nĩ tontũ nĩwe ũtũmĩte bethĩrwa barĩ mwoyo.”

39Nabo bamwe ba arutani ba Watho bagĩcokia bakiuga, “Mũrutani, ũkwaria wega.” 40Nĩũntũ batĩnkĩaũmĩrĩrie kũmũũria kĩũria kĩngĩ.

Kĩũria kĩgiĩ Mesia

(Mat 22.41-46; Mar 12.35-37)

41Jesũ nĩacokire akĩbaũria atĩrĩ, “Nĩmbi ĩtũmaga antũ bauga Kristũ nĩ mwana wa Daudi? 42Daudi wengwa augĩte mbukuni ya Thaburi atĩrĩ,

“‘Mwathani nĩ erire Mwathani wakwa atĩrĩ,

Ĩkara ndĩ, rũteere rwa njara yakwa ya ũrĩo,

43nkinya rĩrĩa ngatuĩkithia anthũ baku gĩkinyo gĩa kwigĩĩra magũrũ makwa.’

44Kethĩrwa Daudi amwĩtire ‘Mwathani’ rĩ, nĩ atĩa angĩtuĩka mwana wae?”

Jesũ kwĩra antũ bemenyeere arutani ba Watho

(Mat 23.1-36; Mar 12.38-40)

45Jesũ akĩĩra arutwa bae antũ bonde bakĩgujaga, 46“Ĩmenyereni arutani ba Watho. Bendete gũcangacanga bekĩrĩte ndwambambio na gũkethagua na gĩtĩo barĩ thokoni. Bethuragĩra itĩ jia mbere sinagoguni na kũejagwa gĩtĩo irugoni. 47Batunyaga aka ba ntigwa into jiao, na kũromba maromba maraja mũno nĩkenda beonithania kĩrĩ antũ. Kĩerithio kĩao gĩkethĩrwa kĩrĩ kĩnene nkũrũki ya kĩa barĩa bangĩ.”

Currently Selected:

Luka 20: LUKA

Highlight

Copy