Luka 11
11
Jesũ kũrutana arutwa bae kũromba
(Mat 6.9-13; 7.7-11)
1Ntukũ ĩmwe Jesũ nĩ arombaga arĩ antũ ana. Akũthiria kũromba ũmwe wa arutwa bae akĩmwĩra, “Mwathani, tũrutane kũromba ta bũrĩa Johana arutanire arutwa bae.” 2Nawe Jesũ akĩbeera atĩrĩ, “Rĩrĩa bũkũromba, ugagani ũũ.
“Baba, riĩtwa rĩaku rĩtheru rĩrokumwa. Ũnene bwaku bwĩje. 3Tũejage o ntukũ irio jia gũtwĩgana; 4na ũtũrekagĩre meyia metũ, nĩũntũ o natwi nĩ tũrekagĩra barĩa batwĩtagĩria; ũtĩkareke tũgwa magerioni.”
5Agĩcoka akĩbeera, “Nũũ wa jienu ankĩthi kĩrĩ mũcoore wae ũtukũ gatagatĩ amwĩra, ‘Mũcoore, mpa mĩgate ĩthatũ, 6nĩũntũ kũrĩ mũcoore wararĩĩra gwakwa, arĩ rũgendoni, na ntĩ na gĩntũ ndĩnkĩmũrũmia gĩa kũrĩa.’ 7Nawe mũcoore ũu arĩ kũu nyomba ndanĩ amũcokerie, ‘Tiga gũntanga; Nĩmpingire mũrango na niũ na aana bakwa nitũmamire. Ntĩũmba gũũkĩra nkũnenkeria no mbi’. 8Ndĩbwĩra atĩrĩ, o na akarega gũũkĩra amũnenkera kĩrĩa akwenda nĩũntũ bwa ũcoore bwao, agaũkĩra amũnenkere kĩrĩa kĩonde akwenda nĩũntũ bwa bũrĩa nawe agekara akĩmũringaringagĩra. 9Naani ndĩbwĩra atĩrĩ, Rombani na bũkaewa; cũani, na bũkona; ringaringani mũrango, na bũkarugũrĩrwa. 10Tontũ muntũ wonde ũrĩa ũrombaga nĩ aejagwa, na ũrĩa ũcũaga nĩ onaga, na ũrĩa ũringaringaga mũrango nĩ arugũragĩrwa. 11Nĩ mũjiari ũrĩkũ gatagatĩ kenu ũngĩĩtua samaki ya kũrĩa nĩ mwana wae amũnenkera njoka; 12kana eetue ĩtumbĩ amũnenkera kang'ariũ? 13Kethĩrwa bwiũ, bũnarĩ athũku ũgu nĩbwijĩ kũa jiana jienu into irĩa mbega rĩ, nĩ bwĩgana Baba wetũ ũrĩa ũrĩ ĩgũrũ akabũa Roho Mũtheru bwamũromba we!”
Jesũ na Beelizebuli
(Mat 12.22-30; Mar 3.20-27)
14Rĩu Jesũ nĩ engaga nkoma kuuma kĩrĩ muntũ ũtaragia. Nkoma ĩu ĩkuuma muntũ ũu akĩambĩria kwaria, na antũ bakĩrigara mũno. 15Ĩndĩ antũ bamwe bakĩambĩria kwaria bakiugaga, “Aetwe inya ya kwĩnga nkoma nĩ mũnene wa nkoma ũrĩa wĩtagwa Beelizebuli.” 16Bangĩ bakĩenda kũgeria Jesũ; kwogu bakĩmwĩra aringe kiama gĩa kwonania arĩtũmĩra inya kuuma ĩgũrũ kĩrĩ Ngai. 17Ĩndĩ nĩũntũ Jesũ nĩ amenyire bũrĩa beciragia akĩbeera, “Ũnene unde ũragaũkana nĩka ũthiraga, na mũjiĩ ũragaũkana nĩka waraganaga. 18Kwogu, kethĩrwa ũnene bwa Saitanĩ bwĩgaanĩtie rĩ, bũkaũmba kwĩrũngamia atĩa? Biũ bũriuga mbĩngaga nkoma ngĩtũmagĩra inya kuuma kĩrĩ Beelizebuli. 19Kethĩrwa mbĩngaga nkoma ngĩtũmagĩra inya kuuma kĩrĩ Beelizebuli rĩ, athingati benu nabo bengaga nkoma bagĩtũmagĩra inya kuuma kĩrĩ ũ? Kwogu bau nĩbo bakabũtuĩra. 20Ĩndĩ kethĩrwa mbĩngaga nkoma ngĩtũmagĩra inya kuuma kĩrĩ Ngai rĩ, Ũnene wa Ngai ũgũkinya kĩrĩ bwi. 21Rĩrĩa muntũ nchamba ekundĩkaga into jia ndũa akarangĩra mũjiĩ wae rĩ, ũtonga bwae bwĩthagĩrwa bũrĩ bũmenyeere. 22Ĩndĩ muntũ ũngĩ ũrĩ na inya kĩrĩ we akamwithũkĩra na amũkĩrie inya, amũtunyaga into jiae jia ndũa, agataa into jiae na akaigaĩra antũ bae. 23Muntũ ũrĩa ũtĩ amwe naani nĩ mũnthũ wakwa, na muntũ ũrĩa utĩngwatagia gũcokanĩĩria ndĩthia nĩka amĩnyagaragia.”
Gũcoka gwa nkoma
(Mat 12.43-45)
24“Rĩrĩa nkoma yauma kĩrĩ muntũ, ĩgendagĩĩra gũntũ kũrĩa kũmũ, ĩgĩcũa antũ a kũnogoka. Yaga antũ a kũnogoka ĩkeĩra atĩrĩ, ‘Nĩngũcoka nyomba yakwa ĩrĩa ndaumire.’ 25Yacoka ĩkethĩra nyomba ĩatĩtwe na ĩkabangwa wega. 26Nkoma ĩgacoka ĩkathi ĩgacũa nkoma jiĩngĩ mũgwanja ndũku nkũrũki ya yo, ikeja igatonya ndani ya muntũ ũu igekara ku. Mwĩkarĩre wa muntũ ũu ũkathũka nkũrũki ya mbere.”
Kĩtharimo kĩa ma
27Jesũ akĩaragia o ũgu muntũ mũka ũmwe arĩ kũu antũũni akiugĩĩria akĩmwĩra, “Kũtharimwa nĩ mũka ũrĩa wakũjiarire na akũrera!” 28Ĩndĩ Jesũ akĩmũcokeria, “Kũtharimwa nkũrũki nĩ barĩa begujaga kiugo kĩa Ngai nabagakiathĩkĩra.”
Antũ kwĩra Jesũ abaringĩre kĩama
(Mat 12.38-42)
29Rĩrĩa antũ baingĩ bathiire mbere kwĩthĩrana akuĩ na Jesũ nĩ aberire atĩrĩ, “Rujiaro rũrũ nĩ rũjiaro rwaganu. Rũrĩenda kwonua kĩama, ĩndĩ gũtĩ kĩama bũkona o tiga kĩrĩa Jona onanirie. 30Nĩũntũ o ta bũrĩa Jona atuĩkire kĩama kĩrĩ antũ ba Nineve, ũgu no bu Mwana wa Muntũ agatuĩka kĩama kĩrĩ antũ ba rũjiaro rũrũ. 31Ntukũ ya ĩtwĩro, mũnene muntũ mũka wa Sheba akarũngama agambithie antũ ba rũjiaro rũrũ; nĩũntũ nĩ aumire kũraja mũno akĩĩja kwĩgua ũrutani wa ũũgĩ wa Solomoni. Atĩrĩ, aa kũrĩ nawe mũnene nkũrũki ya Solomoni. 32Ntukũ ya ĩtuĩro antũ ba Nineve bakarũngama bagambithie antũ ba rũjiaro rũrũ, nĩũntũ bo nĩberirire rĩrĩa Jona abaunjĩrie. Atĩrĩ, aa kũrĩ nawe mũnene nkũrũki ya Jona.”
Werũ bwa mwĩrĩ
33“Gũtĩ muntũ ũgwatagia taa amiga rungu gũntũ kwĩithanĩtie, kana amĩkunĩkĩra na ndoo#11.33 ndoo Bangĩ baugaga “ndebe.”. Amigaga antũ ĩgũrũ nĩkenda ĩmũrĩkagĩre barĩa bagũtonya nyomba. 34Metho maku nĩmo taa ya mwĩrĩ waku. Ĩndĩ ĩrĩa metho makwona wega mwĩrĩ waku unde wĩthagĩrwa wĩjũrĩte werũ. Ĩndĩ rĩrĩa matĩkwona wega, mwĩrĩ waku wĩthagĩrwa wĩjũrĩte ntuma. 35Kwogu menyerani werũ bũrĩa bũrĩ ndani yenu bũtĩgatuĩke ntuma. 36Kethĩrwa mwĩrĩ waku unde nĩwĩjũrĩte werũ, na gũtĩ antũ ũrĩ na ntuma rĩ, ũkethĩrwa ũkĩmũrĩkaga wega ta bũrĩa taa ĩkũmũrĩkĩrĩte.”
Jesũ Kũnegenia Afarisai na Arutani ba Watho
(Mat 23.1-36; Mar 12.38-40)
37Jesũ akũthiria kwaria, Mũfarisai ũmwe nĩ amũririe athi kwae bakarie irio. Jesũ akĩthi, agĩkara ndĩ kũrĩa. 38Mũfarisai ũu akĩrigara mũno akwona atĩ Jesũ atathambire njara mbere ya kũrĩa irio. 39Mwathani akĩmwĩra atĩrĩ, “Bwiũ Afarisai bũthambagia ikombe na thani mwena wa nja, ĩndĩ ndani bwĩjũrĩte ũtunyani na waganu. 40Jiaa ino! Anga ũrĩa waũmbire mwena wa nja to we waũmbire wa ndani? 41Atĩrĩ, ejagani nkĩa kĩrĩa kĩrĩ thanini na ikombeni jienu, na into jionde igatuĩka irĩa nderu kĩrĩ bwi. 42Ũinanũ kĩrĩ bwi Afarisai. Bũrutagĩra Ngai gĩcuncĩ gĩa ĩkũmi kĩa mbicarĩ, ndania na manyoni ma mĩthemba yonde, ĩndĩ bũkaaga gĩoto na wendo wa Ngai. Nĩ bũbatiĩ kũrũtha maũntũ mama, bũtĩgũtiganĩria mau mangĩ. 43Ũinanũ bwiũ Afarisai! Bwendete gwĩkarĩra itĩ jia mbere sinagoguni na gũkethagua na gĩtĩo thokoni. 44Ũinanũ bwi! Tontũ bũkari ta mbĩrĩra irĩa itĩ rwano, irĩa antũ bakinyangaga batĩkũmenya.”
45Ũmwe wa arutani ba Watho akĩmwĩra, “Mũrutani, rĩrĩa wauga ũgu nĩka ũgũtũcenga o natwi.” 46Jesũ akĩmũcokeria, “Ũinanũ kĩrĩ o nabwi arutani ba Watho! Nĩ tontũ bũkamatithagia antũ mĩrigo ĩtĩgũkamatĩka na bũtĩtambũrũkia o na kĩara kĩmwe bũbatethia kũmĩkamata. 47Ũinanũ kĩrĩ bwi! Tontũ bũgemagia mbĩrĩra jia iroria, o iroria irĩa bethe benu baũragire. 48Kwogu bũrĩ aira, na nĩbũkũgwata mbaru jiĩko jia bethe benu; nĩũntũ nĩbaũragire iroria, nabwi bũkagemia mbĩrĩra jiao. 49Nĩũntũ nau Ũũgĩ wa Ngai nĩ waugire atĩrĩ, ‘Nkabatũmĩra iroria na atũmwa; bakaũraga bamwe bao na banyarire barĩa bangĩ.’ 50Kwogu rũjiaro rũrũ no rũkaerithĩrua iroria irĩa jionde jianaũragwa kuuma ndĩ ĩkũmbwa, 51kuuma kũũragwa kwa Abili nkinya kũũragwa kwa Zakaria, ũrĩa waũragĩĩrwe gatagatĩ ka antũ arĩa kĩgongoana kĩrutagĩrwa na antũ arĩa atheru a Ngai. Ndabwĩra na ma rũjiaro rũrũ rũkaerithĩrua maũntũ mau monde. 52Ũinanũ kĩrĩ bwi arutani ba Watho! Nĩ tontũ nĩbwithĩte rũbungũro rwa kũrugũra mũrango wa nyomba ya ũmenyo. Bwiũ bwingwa gũtonya, na nĩbũrigĩrĩtie barĩa bakwenda gũtonya ku.”
53Na rĩrĩa Jesũ aumĩte antũ au, arutani ba Watho na Afarisai bakĩambĩĩria kũmũthũkĩra mũno, bakĩmũũragia jiũria ĩgũrũ rĩa maũntũ maingĩ mũno. 54Bageragia kũmũtega begua kana no auge na kanyua kae ũntũ bũrĩa bankĩmũthitangĩra.
Currently Selected:
Luka 11: LUKA
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2021
