Matius 10

Puang Yesus ummangka' sapulo dua rasulna

Mrk. 3:13-19, 6:6b-13; Luk. 6:12-16, 9:1-6

1Umpopa'mesmi sapulo dua passikolana Punga Yesus anna beenni kakuasaan la urrambai setang, umpomalapu' tau dio mai ma'rupa-rupa saki anna rammun.

2-4Indemi sapulo dua rasulnae:

Bunga'na disanga Simon, sidikuaan duka' Petrus;

anna sirondongna disanga Andreas;

Yakobus anna sirondongna disanga Yohanes anakna

Zebedeus;

Filipus;

Bartolomeus;

Tomas;

Matius tuang passima;

Yakobus anakna Alfeus;

Tadeus;

Simon to nakala' kombongan Zelot;#10:2-4 kombongan Zelot:Kombonganna to umbali kaparentaanna Roma.

anna Yudas Iskariot to la umpa'perososan Puang Yesus.

5Ussuami inde sapulo dua rasulna Puang Yesus-e, anna pakari'di'i nakua: “Daua' lu lako tondokna to tangngia to Yahudi, battu lako mesa tondokna to Samaria. 6Sapo la laokoa' umpellambi'i to Israel, to umpemboko'imo Puang Allata'alla sirapan domba pa'de. 7Palandasanni lako kumua madappi'mi kasaeanna kaparentaanna Puang Allata'alla. 8Pomalapu'koa' to masaki, patuokoa' sule to mate, pomalapu'koa' to dolengan, ammu rambaia' lao setang illalan mai kalena tau. Inde kakuasaanne dibeen babangkoa', iamo too la mupebeen babang duka'.

9Daua' umbaa doi', susi doi' bulawan, doi' pera', battu' doi' gallang. 10Daua' umbaa kinallo illalan penonosammu, tae'koa' la umbaa bayu pessondaan, sandala', anna tekken. Annu angganna to mengkarang innang la sipato' diitaan kaparalluanna.

11Ianna saekoa' lako mesa tondok, peangngia' to la ungkarimbai manappakoa', ammu pamesa angngenammu dio sae lako attunna la untampekoa' tondok iatoo. 12Ianna la tamakoa' mesa banua, la mukuaa': ‘Anna tamba'morokoa' Dewata.’ 13Ianna nakarimbai manappakoa' to ma'banua, la ullolongan pa'tamba'mua. Sapo ianna tae'koa' nakarimbai, la sule lako kalemua' pa'tamba'mu. 14Anggaria, ke dengan to ma'banua battu mesa tondok tae' untarimakoa', pelleia' lao ammu tambakkia' soyokna dio mai lentekmu, la tandana kumua mutumpu pala'mia'. 15Annu kutulasangkoa' sitonganna, ianna nalambi'mo allo nangei umbisara ma'rupa tau Puang Allata'alla, marru la mabanda' ia perambinna puang Allata'alla lako to illalan itin tondokko anna la to dio kota Sodom anna Gomora.”#10:15 Sodom anna Gomora:Kej. 19:24-28.

Kamasussaan anna pandarraan la ditingngayo

Mrk. 13:9-13; Luk. 21:12-19, 12:2-9

16Pengkilalai manappaia', la sirapangkoa' domba la kusua tama alla'-alla'na serigala. La matangkingkoa' susi ula' anna la malenna' penawakoa' sirapan dangan-dangan. 17Matangkingkoa' lako angganna tau annu la dengan umpopengngolokoa' lako pa'bisara aluk, anna la nakambeikoa' illalan banua pa'sambayanganna. 18La dibaakoa' lako tingngayona to ma'parenta anna tomaraya annu muturu'na'. Attu iamo too la mungeia' umpa'pesa'bianna' lako to ma'parenta sola tomaraya anna lako to salianna to Yahudi battu dikua to tangngummissanan Puang Allata'alla. 19Ianna la dibisaramokoa', daua' pomasussa penawammu umpikki' aka la mutula' annu angganna la mupokadanna la nabengangkoa' Puang Allata'alla ke diomokoa' olona pa'bisara. 20Annu sitonganna tangngikoa' la mantula', sapo Penawa Maserona Ambemu yao suruga illalan kalemua'.

21La dengan attunna dengan tau la umpopepatei sirondongna. Susi toi duka' ambe lako anakna anna anak la umbali to matuanna lambisan napopepatei. 22La nakabassikoa' angganna tau annu muturu'na'. Sapo benna-benna ke'de' matoto' illalan kapangngoreananna sae lako kasuppikanna kamasussaan, tau iatoo la dipasalama'. 23Ianna didarrakoa' dio mesa tondok, alaikoa' kalemu ammu lu lako tondok senga'. Kutulasangkoa' sitonganna, ta'pa la suppik tondok illalan lembangna Israel mulelean, anna saemo sule Anak Mentolino.

24Tae' dengan leleanna mesa passikola la untanda langnganni tuanggurunna, battu mesa sabua' la untondon kamatandeanna puangna. 25Kalandomia ke susimi manarangna tuanggurunna passikola, anna pada angga' puangna sabua'. Ianna to titanan ambemo illalan banua nagente' tau ponggawana setang,#10:25 ponggawana setang:Illalan basa Yunani ‘Beelzebul’ iamo sanga senga'na ponggawana setang. la dapakaia issinna banua.

26Sapo daua' marea' lako itin matin tauo, annu tae' dengan kara-kara membuni tae' la dipa'peissanan anna tae' dengan kara-kara disamboi tae' la dipakawanan. 27Angganna tula'ku lako kalemua' tae'na kupa'perangngian lako tau senga', la mutetteran illalan alla'-alla'na tau kamban, anna mentu'na tula' kubisikkiangkoa' la mupa'peassakan lako angganna ma'rupa tau. 28Daua' marea' lako to angga batang kale naissan napatei sapo tae' ummampui kakuasaan umpatei batang sunga'. Sapo mengkarea' la-ngngangkoa' Puang Allata'alla to ma'kuasa undarra batang sunga' anna batang kale illalan naraka. 29Taissanan kumua dua dena' angga mesa doi' bassi randan barinni' allinna. Sapo moika anna susi too, tae' dengan moi mesamo tokke' la bonno' babang ke tangngia pa'kuanna Ambemu yao suruga. 30La dapakaia ikoa' annu sae lako lamba' beluakmua' mangka nareken. 31Iamo too daua' marea', annu marru keangga'koa' iko anna la messa'bu dena'.

32Benna-benna ummakuina' dio tingngayona ma'rupa tau, la kuakui duka' dio olona Ambeku yao suruga. 33Sapo benna-benna untelangna' dio tingngayona ma'rupa tau, la kutelang duka' dio olona Ambeku yao suruga.”

Kara-kara la naduppa to unturu' Puang Yesus

34Daua' anna kendek illalan penawammu kumua kasaeangku tama lino la umpakendek kasikalinoan. Tae'nakkao sae la umpakendek kasikalinoan sapo kasisala salaan. 35Annu kasaeangku tama lino la umpasibokosan ambe anna anakna muane, baine la sibokosan indona, anna manintu baine la sibokosan matukanna baine, 36battu' dikua to ma'rapu la sisala-sala.

37Benna-benna marru umpakalando to matuanna anna la kaleku, tau iatoo tae' la sipato' mendadi petauangku. Susi duka' to marru umpakalando'anakna anna la kaleku tae' la sipato' mendadi petauangku. 38Benna-benna tae' umpassan kayu pantokesanna#10:38 umpassan kayu pantokesanna:Kalembasanna: sa'bara' untingngayo kamasussaan sae lako nadotaan la dipatei. anna turu'na', tau iatoo tae' la sipato' mendadi petauangku. 39Benna-benna umpa'kadua-duai katuoan illalan lino, tau iatoo la ungkasayu'i katuoan sae lako-lakona. Sapo benna-benna nadotaan mate annu naturu'na', la ullolongan katuoan sae lako-lakona.

40Benna-benna untarimakoa', sirapammi kaleku melolo natarima. Anna benna-benna untarimana', untarima duka' to ussuana'. 41Benna-benna untarima manappa mesa nabi annu naissanan kumua nabi, tau iatoo la untarima sarona nabi. Anna benna-benna untarima manappa mesa to malolo annu naissanan kumua to malolo, tau iatoo la untarima sarana to malolo. 42Anna benna-benna untandoi moi wai kula' babangmo inde to randan wiring rokko annu naissanan kumua passikolakue, manassa anna la untarima sarona.”

Currently Selected:

Matius 10: MQJ

Highlight

Copy