YOHANES 12
12
Ki Yesus kon Betania
(Mat. 26:6-13; Mrk. 14:3-9)
1Onompa nosinggai kon poramean kon Singgai Moḷoben in Paska, ki Yesus in minayá in Betania. Ḻipú inta pinogutunan i Lazarus, inta ain biniag bui i Yesus nongkon kinopatoiannea. 2Kon tua, ki Yesus inoḷudan monia, ki Marta in nogoḷud kon kaanon tatua. Ki Lazarus bo mokokiangoi mita in iḻimitú nongaan noyotakin i Yesus. 3#Luk. 7:37-38 Noiduduimai kon tua, ki Maria in namangoi takin kodia-dia in ḷana mobondu narwastu inta totok in momahaḷ in boḻinea degá tobotakmai in liter. Pinopobutaknea in ḷana tatua kon sioḷ i Yesus, onda intua iradatannea bui in buoknea. Dá tombonu in baḷoi tatua nobondudon in bo ḷana tatua. 4Táe ki Yudas Iskariot, tobatú murí i Tuhan Yesus – inta kon singgai noiduduimai nomaḻidawan kon i Yesus – noguman, 5“Nongonu sin ḷana mobondu tanion diábí inta pinotaḷui toḷu nogatut doit saḷaka,#12:5: doit saḷaka: Indoiai 6:7. bo doit boḻinea in ogoidon kon intau bogá?” 6Ki Yudas noguman natua, deemanbí popisí sia moibog monarukira kon intau bogá táe popisíbí in sia mononakow. Sia mokakitdon in mogamá kon doit nongkon kas in doit inta pinoki kadai kon inia.
7Táe ki Yesus in noguman, “Pomayádon mako in pogaidan bobay tatua kon natua! Sia in nogaid kon natua sin moposadia kon poḷobongan kon i-Nakó. 8#Ul. 15:11 Intau bogá in umuranpabí kotaki-takin monimu, táe Akuoi in diábí.”
Komplotan inta monomayá moḻimod kon i Lazarus
9Nobayong intau Yahudi in nokodongog kon ki Yesus in kon Betania, dá mosia minayá intua. Mosia in minayá deemanbí tongá popisí in ki Yesus, táe popisíbí doman in mosia moibog moindoi kon i Lazarus inta ain biniag bui i Yesus nongkon kinopatoiannea. 10Tuamai imang mita itoi in moibog doman moḻimod kon i Lazarus. 11Sin siadon in nokopopisí kon nobayongdon in intau Yahudi in nonaḷámai kon i monia bo nopirisayadon kon i Yesus.
Ki Yesus sinontomu takin pia in gina kon Yerusalem
(Mat. 21:1-11; Mrk. 1:1-11; Luk. 19:28-40)
12Nopoikoḷomai kon singgai intau moantó inta ain namangoi sin morame kon Singgai Moḷoben Paska in nokodongogdon kon ki Yesus niondon kon daḷan mopoangoi in Yerusalem. 13#Mzm. 118:26 Dá mosia nogamádon kon daun mita in palem bo minayá nonontomu kon i Yesus. Takin sanang in gina mosia in noguman, “Dayowdon in ki Allah! Binarakatandon in Sia inta namangoi kon bonu in tangoi Tuhan, Datu Israel!”
14Ki Yesus in nokodungkuḷ kon tobatú keledai inta noguodpa, bo sinumakoi in Sia kon keledai tatua. Dá nobaḻídon onu inta ain pinais kon bonu in Buk Motusi:
15 #
Za. 9:9
“Donaai moondok, mongodeaga mita in Sion!
Indoiaika Datumu in namangoi,
Sia in sinumakoi kon tobatú keledai inta noguodpa!”
16Dodai intua diápa nodait kinomangaḻean in murí mita i Yesus intua. Táe naonda in ki Yesus pinomulia, bain tua bo kinotoropan monia in onu inta ain pinomia in intau mita kon i Yesus, ain bidon pinais kon bonu in Buk Motusi.
17Intau mita inta nokoontong tontaní wakutu in ki Yesus nogoiní kon i Lazarus iḷumuai nongkon poḷoḷobongan bo nomiag bui kon inia nongkon kinopatoiannea, umuran mongonguman magí-mako kon soaḷ tatua. 18Tuamai in nobayong intau in namangoi nonontomu kon i Yesus sin dinongogdon monia kon Sia tua inta nogaid kon inta mokoherang tatua. 19Dá intau mita in Parisi mulaidon nosigumanan, “Diá mokopongonu in kita! Indoiaika bayongan in intau kon dunia naa mayá dumudui kon i-Nia!”
Tongonumai Intau in Yunani Notayak kon i Yesus
20Kon sigad in intau mita inta minayá in Yerusalem sin moibada kon porayaan tatua oyúon doman in tongonumai intau in Yunani. 21Mosia in namangoi kon i Pilipus bo noguman, “Utat, aka motaau, dá kami in moibog moyodungkuḷ i Yesus.” (Ki Pilipus naa nongkon Betsaida kon Galilea.)
22Dá binayá i Pilipus pinotaau kon i Andreas in soaḷ tatua, bo onda intua taya duadon in minayá kon i Yesus bo nopotaau. 23Ki Yesus in noguman kon i monia, “Wakutuneadon Adí Intau pomuliaan. 24Naadon in poguman-Ku kon i monimu: Aka batoḷ in gandum diá ḷobongon kon butá bo matoi, yo sia in tongábí umuran tougat. Táe aka batoḷ in gandum tatua matoi, bain tuata bo sia in mopomungai in gandum mobayong. 25#Mat. 10:39, 16:25; Mrk. 8:35; Luk. 9:24, 17:33 Intau inta motabi kon kobiagannea, yo kobuḻian sia in kobiagannea tatua. Táe intau inta diá motabi kon kobiagannea kon dunia naa, yo sia tua in moḷukadbí kon kobiagannea inta mononoi. 26Intau inta moibog mogaid kon oaidan-Ku musti dumudui kon i-Nakó kon ondakabí in bayáan-Ku; sinbá kon onda in bayáan-Ku yo kon tua doman in sia. Intau inta mogaid kon oaidan-Ku horomatonbí i Amá-Ku.”
Ki Yesus noguman kon soaḷ kopopatoi-Nea
27“Moḻia-ḻiaw totok in gina-Ku; onu degá in musti singogon-Ku in tanaa? Musti degá in Akuoi moguman, ‘Amá, potaḻibdon kon i-Nakó in roriga tanaa mako’? Diá! Sin tuabí in mangaḻe in inangoian-Ku. 28Amá, pomuliadon in tangoi-Mu!” Dá kinodongogandon in singog nongkon soroga in noguman, “Aindon pinomulia-Ku, bo buipabí doman pomuliaan-Ku.”
29Intau mobayong kon tua in nokodongog doman kon singog tatua. Mosia in noguman, “Gotup intua!” Táe oyúon doman in noguman, “Deeman! Malaekatbí nosingog kon i-Nia!”
30Bo ki Yesus in noguman kon i monia, “Singog tatua kinodongogan, deemanbí popisí kopontingan-Ku, táe kopontinganmubí. 31Tanaa in wakutuneadon dunia hakimon; bo tanaadon mako in mongongawasa kon dunia naa pogarabdon kon ḷuai. 32Táe Akuoi naa, aka Akuoi aindon poḷantudon kon dunia naa, yo daiton-Kudon diaan in intau inta mamangoi kon i-Nakó.” 33Sia in noguman natua sin mopotaau kon naonda in kopopatoi-Nea.
34 #
Mzm. 110:4; Yes. 9:6; Yeh. 37:25; Dan. 7:14 Intau mobayong kon tua noguman kon i-Nia, “Podudui kon Buk Hukum in agama nami, Datu Mopoposaḷamat tua in mobiagbí mononoi. Yo nongonu sin Iko in mogumanbí kon ki Adí Intau in poḷantudonbí kon dunia naa? Ki inebí in ki Adí Intau tatua?”
35Ki Yesus in notubag: “Tongábí samantara in bayag tatua kon yua-yuak monimu. Tuamai bayádon kon dodai in bayag tatua kon yua-yuakpa monimu, sinbá moiko in diá kokawasaan in sindip, sin intau inta mayá kon bonu in sindip in diábí kotaauannea in bayáannea. 36aPopirisayadon kon bayag tatua, kon dodai in bayag tatua oyúonpa kon inimu, sinbá moiko in mobaḻí ki adí mita in bayag.”
Intau mita in Yahudi diá mopirisaya
36bNopaḷut mako in ki Yesus nosingog natua, minayádon in Sia nongkon tua bo diádon nokipogontong kon i monia. 37Umpaka nobayongdon in soaḷ mita inta mokoherang in pinomia i Yesus kon tayowon monia tua, táe mosia in diábí mopirisaya kon i-Nia. 38#Yes. 53:1 Dá nobaḻídon onu inta pinoguman i Nabi Yesaya, nanaa:
“Tuhan, ki inebí in mopirisaya kon habar inta pinoyaput nami?
Kon i ine in popoontongan in kawasa i Tuhan tatua?”
39Tuamai mosia in diá mopirisaya, sin ki Yesaya ain noguman doman,
40 #
Yes. 6:10
“Ki Allah in noguman,
‘Binilogan-Kudon in mata monia,
binaḻí-Kudon in mosia motogat in gina;
sinbá mosia in diá mokoontong,
bo raian monia in diá momangaḻe.
Simbá mosia in diá mamangoi bui kon i-Nakó,
bodongka undaman-Ku in mosia.’ ”
41Ki Yesaya noguman natua sin sia ain nokoontong kon kamuliaan i Yesus, bo nongongumandon soaḷ Sia.
42Umpaka natua, nobayongbí in intau, nodapot in oyúon in itoi mita in Yahudi in nopirisayadon kon i Yesus. Táe mosia in diá mokobaḻí in mongaku taran-tarangan, sin moondok dikabo diádon ogoi intau in Parisi in mosia tumuot kon baḷoi pososambayangan. 43Sin mosia in moibo-ibogbí in kahoromatan intau dika in kahoromatan i Allah.
Singog i Yesus in mohakimbí
44Bo ki Yesus in nobaḷú, “Intau inta mopirisaya kon i-Nakó, sia tua in deemanbí mopirisaya kon i-Nakó, táe mopirisayabí kon i-Nia inta nopotabá kon i-Nakó. 45Bo intau inta nokoontong kon i-Nakó, nokoontong kon i-Nia inta nopotabá mangoi kon i-Nakó. 46Akuoi in namangoi in dunia naa saḷaku bayag, sinbá bayongan intau inta mopirisaya kon i-Nakó diá mogutun kon bonu in sindip. 47Intau inta nokodongog kon totundú-Ku, táe diá mopoaid, yo deemanbí Akuoi in mohakim kon inia. Sin Akuoi in namangoi deemanbí mohakim kon dunia naa, táe moposaḷamatbí kon dunia naa. 48Intau inta doí motarima kon i-Nakó, bo doí mokidongog kon singog-Ku, oyúonbí in mohakim kon inia. Singogbí inta ain pinoyaput-Ku tua in mohakim kon inia kon Singgai Ponantúan. 49Sin Akuoi in mosingog deemanbí podudui in ibog-Ku tontaní; Táe ibogbí i Amá inta nopotabá kon i-Nakó. Siabí tua in nomarenta kon i-Nakó kon onu i musti singogon-Ku bo potaau-Ku. 50Bo kinotaauan-Kubí kon parenta-Nea tatua in mobogoibí in kobiagan mopia bo mononoi. Dá Akuoi in mopotaau kon ná inta sinundú i Amá kon i-Nakó.”
Currently Selected:
YOHANES 12: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
