KINOBAḺIAN 5
5
Buí i Adam
(Taw.1. 1:1-4)
1Naadon in buí mita i Adam. [Kon tungkuḷ in ki Allah nomia kon intau, pinomia-Nea in mosia notombatangan-Nea tontaní. 2#Kḻn. 1:27-28 Pinomia-Nea in mosia ḷoḷaki bo bobay. Binarakatan-Nea in mosia bo sinangoian “Intau”.] #Mat. 19:4; Mrk. 10:6 3Naonda in ki Adam umurdon mogatut bo toḷu nopuḷú notaong, nokouḻídon in sia kon adí ḷoḷaki inta notombatangannea, bo sinangoiannea ki Set. 4Nopaḷut mako kon tua ki Adam in nobiagpa waḷu nogatut notaong bo buipa doman nokouḻí kon adí mita ibanea. 5Sia in minatoi kon umur siow nogatut bo toḷu nopuḷú notaong.
6Kon tungkuḷ in ki Set umur mogatut bo ḻima notaong, nokouḻí in sia kon adí ḷoḷaki, tangoinea in ki Enos. 7Naonda in ki Set nobiagpa kon bonu in waḷu nogatut bo pitu notaong, nokouḻípa in sia kon adí mita ibanea mako. 8Sia in minatoi tungkuḷ in umurdon siow nogatut bo mopuḷú bodoyowá notaong.
9Kon tungkuḷ in ki Enos umurdon siow nopuḷú notaong, nokouḻí in sia kon adí ḷoḷaki, tangoinea in ki Kenan. 10Nopaḷut mako kon tua ki Enos in nobiagpa waḷu nogatut bo mopuḷú bo ḻima notaong bo nokouḻípa bui kon adí mita ibanea. 11Sia in minatoi tungkuḷ in umurdon siow nogatut bo ḻima notaong.
12Kon tungkuḷ in ki Kenan umurdon pitu nopuḷú notaong, sia in nokouḻí kon adí ḷoḷaki, tangoinea in ki Mahalaleel. 13Ki Kenan in nobiagpa waḷu nogatut bo opat nopuḷú notaong bo nokouḻípa bui kon adí mita ibanea. 14Sia in minatoi tungkuḷ in umurdon siow nogatut bo mopuḷú notaong.
15Kon tungkuḷ in ki Mahalaleel umur onom nopuḷú boḻima notaong, sia in nokouḻí kon adí ḷoḷaki, tangoinea in ki Yared. 16Nopaḷut mako kon tua ki Mahalaleel nobiagpa waḷu nogatut bo toḷu nopuḷú notaong bo nokouḻípa kon adí mita ibanea. 17Sia in minatoi tungkuḷ in umurdon waḷu nogatut bo siow nopuḷú boḻima notaong.
18Kon tungkuḷ in ki Yared umurdon mogatut bo onom nopuḷú bodoyowá notaong, sia in nokouḻí kon adí ḷoḷaki, tangoinea ki in Henokh. 19Nopaḷut mako kon tua ki Yared nobiagpa waḷu nogatut notaong bo nokouḻípa bui kon adí mita ibanea. 20Sia in minatoi kon tungkuḷ in umurdon siow nogatut bo onom nopuḷú bodoyowá notaong.
21Kon tungkuḷ in ki Henokh umurdon onom nopuḷú boḻima notaong, sia in nokouḻí kon adí ḷoḷaki tangoinea in ki Metusalah. 22Onda intua ki Henokh in nobiag notobatú takin i Allah kon bonu in toḷu nogatut notaong. Sia in nokouḻí kon adí ḷoḷaki mita ibanea 23bo umurnea nodapot in toḷu nogatut bo onom nopuḷú boḻima notaong. 24#Ibr. 11:5; Yud. 14 Pinopisí in ki Henokh umuran nobiag modagin kon i Allah, dá diádon in sia kon dunia naa sin diniadon i Allah.
25Kon tungkuḷ in ki Metusalah umurdon mogatut bo waḷu nopuḷú bo pitu notaong, sia in nokouḻí kon adí ḷoḷaki, tangoinea ki Lamekh. 26Onda intua ki Metusalah nobiagpa pitu nogatut bo waḷu nopuḷú bodoyowá notaong, sia in buipa nokouḻí kon adí mita ibanea. 27Sia in minatoi tungkuḷ in umurdon siow nogatut bo onom nopuḷú bo siow notaong.
28Kon tungkuḷ in ki Lamekh umur mogatut bo waḷu nopuḷú bodoyowá notaong, nokouḻí in sia kon adí ḷoḷaki. 29Ki Lamekh in noguman, “Adí tanaa mokogaat kon saged naton kon dodai in kita rumoriga in mogaid mononggobá kon butá inta kinutuk i Tuhan.” Tuamai sinangoian i Lamekh in adí tatua ki Nuh.#5:29: Nuh: Tangoi tanaa kon bonu in bahasa Ibrani kodongogan naonda bo kata inta mangaḻenea “monginggaan”. 30Onda intua ki Lamekh nobiagpa ḻima nogatut bo siow nopuḷú boḻima notaong. Sia in buipa nokouḻí kon adí mita ibanea, 31bo minatoi dodai in umurdon pitu nogatut bo pitu nopuḷú bopitu notaong.
32Naonda in ki Nuh umurdon ḻima nogatut notaong, sia in nokouḻí kon adí ḷoḷaki toḷu, tangoi monia ki Sem, ki Yapet bo ki Ham.
Currently Selected:
KINOBAḺIAN 5: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
