DATU MITA IMITÁNEA 4
4
Pogawai mita i Salomo
1Ki Salomo ain nobaḻí datu kon bayongan butá in Israel. 2-6Naa in intau mita moḷoben inta dinuí i Salomo:
Imang mita: Ki Zadok, ki Azarya adí i Zadok, ki Abyatar
Momomais in negara: Ki Elihorep bo ki Ahia, inta ki adí mita i Sisia
Bendahara in negara: ki Yosapat adí Ahilud
Tongguḷu totok in tontara: Ki Benaya adí i Yoyada
Pongawas in bupati mita: Ki Azaria, adí i Natan
Monononggina i datu: ki Imang Zabud, adí i Natan
Tongguḷu kon bonu in komaḻig: ki Ahisar
Tongguḷu in mogogaid mita: ki Adoniram, adí i Abda.
7Ki Salomo in noduí kon mopuḷú bodoyowá in bupati kon bayongan butá in Israel. Oaidan monia tua in mosipun nongkon butá monia in bayongan kokaanon inta ogoi kon i datu bo tombonu in komaḻignea. Batúan in bupati moyoḷuan mopooyúon kon bayongan tua tumongo buḷan muḷoi in taong. 8-19Bupati mopuḷú bodoyowá tatua tongguḷu monia in gubernur tobatú. Naa in tangoi in bupati mita tatua bo butá kawasa monia:
Ki Ben-Hur: kon butá inta kon buḷud in Epraim
Ki Ben-Deker: kon kotá in Makas, Saalbim, Bet-Semes, Elon, Bet-Hanan
Ki Ben-Hesed: kotá in Arubot, Sokho, bo bayongan butá in Heper
Ki Ben-Abinadab, ki buḷoi i Tapat adí bobay i Salomo: bayongan butá in Dor.
Ki Baana adí Ahilud: kotá in Taanakh, Megido, bo bayongan butá kon diug in Bet-Sean, kon diug in kotá in Sartan kon dotá in toḷatan kotá in Yizreel nodapot in kinoyoyayú in kotá in Abel-Mehola bo kotá in Yokmeam.
Ki Ben-Geber: kotá in Ramot kon Gilead, ḻipú mita kon Gilead kapunyaan in inanakan i Yair buí i Manasye, butá in Argob kon Basan; tua komintan 60 in kotá moḷoben inta iniropotan in benteng bonoboi mita bitú kon ngaranea mita,
Ki Ahinadab adí i Ido: butá in Mahanaim
Ki Ahimaas, ki buḷoi i Basmat adí bobay i Salomo: butá in Naptali
Ki Baana adí i Husai: butá in Asyer, kotá in Alot
Ki Yosapat adí i Paruah: butá i Isakhar
Ki Simei adí i Ela: butá in Benyamin
Ki Geber adí i Uri: butá in Gilead, inta koḻipod kinawasa i Sihon datu in Amori, bo i Og datu in Basan.
Kinoḷoḷoben in pomarentaan i Salomo
20Rayat in Yohuda bo in Israel kobayongnea in naonda bo bungaion kon pintad. Kon i monia tua oyúonbí in kaanon bo inumon inta tugat pakéon bo nobiag doman nosanang. 21-25#Kḻn. 15:18; Taw.2. 9:26 Batúan in motoḷuadí oyúonbí in gobá in anggur bo gobá in ara. Kinoouputbí in kinobiagan i Salomo rayat kon bayongan in Yohuda bo Israel nongkon Dan nodapot in Bersyeba nobiag noaman bo notompia. Sin, bayongan in datu kon dotá in toyopan in Eprat notoguondok kon inia, bo bayongan in bangusa nongkon negara mita inta kon diugmai in dodatuan nea noyobayat takinnea.
Butá kon dotá in toyopan kon Ongkag in Eprat nongkon Tipsah kon bingkí in Ongkag in Eprat minayá in toyopan ná kotá in Gaza kon Pilistin nodapot kon pinosigadan in Mesir, komintan kinawasa i Salomo. Bangusa mita kon butá tatua notoguondok kon inia bo moguboḻi kon iba.
Bahan mita in kaanon inta paraḷuon i Salomo muḷoi in singgai in 5.000 noliter in topong inta moyimok, 10.000 noliter in topong inta nogoros, 10 in sapi kinobang, 20 in sapi kon popokaannea, bo 100 in domba. Koḻikud intua, rusa doman, rusa koḷakian, menjangan bo biag ḷumoḷayug.
26 #
Dat.1. 10:26; Taw.2. 1:14, 9:25 Ki Salomo kotontara tumotakoi kon kabaḷo#4:26: tontara tumotakoi kon kabaḷo: Tontara tumotakoi kon kabaḷo andeka kabaḷo. 12.000 bo 40.000 in ḷantung in kabaḷo mita inta mogogugut kon keretanea mita. 27Moyo-moyoḷuan, kon bonu in tobuḷan, batúan in bupati mogatod kon bahan kokaanon kon i Datu Salomo bo kon bayongan intau inta nokouḻí kon kaanon nongkon komaḻig, dá mosia in diábí kogaatan in onukabí. 28Komintan bupati in mobogoi doman in makeang bo bonok sin pokaan kon bayongan kabaḷo i Salomo, pinomayá kabaḷo totakoian andeka mogogugut kon kereta. Kaanon in biag mita tatua diaan pobayá in ḷantung mita in kabaḷo kinobobayongbí inta paraḷuon.
29Ki Allah in nobogoi kon i Salomo in kabijaksanaan, bo pandoi inta diá in poḻiu, bo pongortian inta totok in moako. 30Kon butá mita kon dotá in pomukaan bo kon Mesir diábí in intau inta mopando-pandoi kon inia. 31#Mzm. 89:1 Sia in totu-totuubí kon totok in mopandoi noiḻiu kon bayongan in intau. Sia in noiḻiubí kon i Etan intau in Ezrahi, ki Heman, ki Kalkol bo ki Darda adí mita i Mahol. Tangoi i Salomo ponangoi-nangoiandon totok kon ondakabí kon butá mita kon diugmai in dodatuan nea. 32#Ams. 1:1, 10:1, 25:1; Ddg. 1:1 Toḷu noribu in tango-tangoion bo noiḻiu kon toribu in dondong inta pinomianea tontaní. 33Sia in mokosanggupbí in mosingog soaḷ pangkoi mita in kayu bo pinomuḷa mita – nongkon pangkoi in ḷokuyú in Libanon nodapot kon bonok hisop inta nobiag kon dinding mita in batu. Sia in nongonguman doman kon soaḷ bobiagon kon toba bo bobiagon ḷumoḷayug, bobiagon ḷumandai bo toyá. 34Datu mita kon bayongan in dunia naa nokodongogdon kon kopopandoi i Salomo dá mosia in nopotabá in intau monia momangoi sin mokidongog kon inia.
Currently Selected:
DATU MITA IMITÁNEA 4: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
