DATU MITA IMITÁNEA 10
10
Bokí in Syeba nokipodungkuḷ kon i Salomo
(Taw.2. 9:12)
1Datu bobay kon butá in Syeba nokodongogdon kon habar soaḷ ki Salomo. Dá namangoi in sia kon Yerusalem sin monungkuḷ kon i Salomo takin nobogoi in tangkí mita inta mongobogat raion. 2Namangoi in sia kotaki-takin in intaunea inta mobayong bo unta mita inta dinatogan in touḷut mita inta mongo bo mongobondu, batu permata, bo buḷawan inta mobarong totok. Kon dodai in noyodungkuḷ i Salomo, ki datu bobay tatua in nopoyaput in tangkí inta noyagi-yagimai onu in kotoropannea. 3Bayongan inta iḻibónea tatua kotubagan i Salomo, diábí in tobatúmai in moyoyiganea tubagan. 4Ki Datu bobay tatua in nokoontongdon tontaní kon nádomai tua in kobobijaksana i Salomo. Inontongneadon in komaḻig inta pinosindog i Salomo, 5pogogaid in pogawainea mita kon komaḻignea, bo pakeang moyotakin bo baḷoi mita monia. Inindoiannea doman in kaanon bo oinumon inta inoḷud, pononoḻisí in bobantung mita kon rame, bo kuruban mita inta pinosumba i Salomo kon Baḷoi Tuhan. Bayongan intua nokoherang nodapot in noitongau in ki datu bobay nongkon butá in Syeba tatua. 6Dá nogumandon in sia kon i Datu Salomo, “Bayongan inta dinongogku nongkon butáku soaḷ ki Tuang bo kabijaksanaan i Tuang, in totuubí! 7Koḻipod akuoi in diábí mopirisaya, táe naonda in akuoi namangoi bo nokoontong tontaní kon bayongan intua, baintua bo noyakindon in akuoi. Noniata magí yo bayongan inta ain dinongogku in diápabí noyotombotakmai nongkon onu inta ain inontongku tanaa. Noniata magí yo kabijaksanaan bo kaoyúonan i Tuang in moḷobe-ḷobenbí nongkon onu inta ain pinotaau kon inakó. 8Totuu mountung in ki buḷoi mita i Tuang! Bo totuu momujur in pogawai mita inta umuran mogaid kon i Tuang sin mokodongogdon kon bayongan totundú inta mobijaksana nongkon i Tuang tontaní! 9Dinayo-dayowdon in ki Tuhan, Allah i Tuang! Inta ain noduí kon i Tuang nobaḻí datu in Israel, pinoniata i Tuhan kon totuu mopia in gina-Nea kon i Tuang. Diá modai-dait in tabi-Nea kon bangusa in Israel; tuamai in Sia noduí kon i Tuang nobaḻí datu monia sinbá ki Tuang motaau moposindog in hukum bo koadilan.”
10 #
Mat. 12:42; Luk. 11:31 Onda intua ki datu bobay nongkon butá in Syeba nobogoi kon i Salomo in tombuinag mita inta dinianea, inta noiḻiu kon 4.000 nokilo in buḷawan bo batu permata inta mobarong doman takin touḷut mita inta mongo bo mongobondu. Diá bidon kon dodai in onda in ki Salomo notarima kon touḷut mita mongo bo mongobondu inta námai tua in kobayong ná inta inogoi i datu bobay inta nongkon butá in Syeba tatua kon inia.
(11Kapaḷ mita i Hiram inta nodia kon buḷawan nongkon Opir sin ogoi kon i Salomo, in nodia doman kon nobayong in batu permata bo kayu sondana. 12Kayu tatua in inaidan i Salomo bonoboi mita kon Baḷoi Tuhan bo kon komaḻig in datu; bo inaidan doman kecapi bo gambus kon intau mita mododondong. Kayu mita tatua in kayu mita sondana inta totok in mongopia inta nokoimontandon dinia mangoi kon Israel, diádon kon dodai in onda in intau nokoontong kon kayu ná kopia in kayu tatua.)
13Koḻikud in tombuinag mita inta biasamai ogoi i Salomo, sia in nobogoi doman kon i datu bobay nongkon butá in Syeba tatua in bayongan inta inigumnea. Onda intua nobuidon in ki datu bobay tatua kon butánea noyotakin in intau mita inta noyotakinnea mangoi.
Kaoyúonan mita i Datu Salomo
(Taw.2. 9:13-29)
14Pomuḷoi in taong ki Datu Salomo motarima kon gogió bo 23.000 nokilo in buḷawan, 15diápabí pinoyoiap in kauntungan mita nongkon podagangan bo pajak mita nongkon intau mita inta mododagang, datu mita in Arab bo gubernur mita in Israel.
16Ki Salomo in nokiaid doman in 200 in kaḻeaw moḷoben nongkon buḷawan inta sinontaḷ. Buḷawan inta pinaké kon batúan in kaḻeaw#10:16: kaḻeaw: Bayongan in kaḻeaw tanaa tongábí pinomia sin pakéon kon Baḷoi Tuhan. tua in pitumai nokilo. 17Sia in nokiaid doman in 300 in kaḻeaw buḷawan inta ona-onag intua in koḷobennea. Buḷawan inta pinaké kon batúan in kaḻeaw mointok tatua in doyowamai nokilo, komintan buḷawan sinontaḷ. Bayongan kaḻeaw tatua inukatnea kon baḷoi inta sinangoian Baḷoi Kayuon in Libanon.#10:17: Baḷoi Kayuon in Libanon: Indoiai 7:2-3.
18Sia in nogaid doman in kadera in dodatuan inta moḷoben inta inaipan in gading bo iḷambáan in buḷawan taakan. 19Kadera tatua oyúon in ḻimanea bo kon dotá in posiḷosi oyúon in patong in singa. Kon tumi in kadera tatua oyúon in patong uḷu in sapi. Kadera tatua in oyúon doman in tukad mointok onom. 20Kon popodnea koḷoigi bo kon popodnea koḷanan kon batúan in tukad mointok tatua oyúon in patong in singa – kobayongnea komintan in mopuḷú bodoyowá. Diábí kon dodai in onda oyúon in kadera in dodatuan in ná tatua in kon dodatuan kon ondakabí.
21Komintan pakakat pongonginuman i Salomo in pinomia nongkon buḷawan, bo bayongan in pakakat kon Baḷoi Kayuon in Libanon in pinomiabí doman nongkon buḷawan taakan. Diábí in pinomia nongkon saḷaka, sin kon tungkuḷ i Salomo saḷaka tua in anggaponbí in intau diá in mangaḻenea. 22Mobayong doman in kapaḷ moḷoben i Salomo inta ḷumeag moyotakin in kapaḷ mita i Datu Hiram. Toḷu notaong in komintan kapaḷ mita tatua mobui modia kon buḷawan, saḷaka, gading, boḷai bo ḷagapan merak.
23Ki Datu Salomobí in mooyu-oyúon bo mobija-bijaksana nongkon bayongan in datu kon ondakabí kon dunia naa. 24Bayongan in intau kon dunia naa in moḷongasibí mokipodungkuḷ kon i Salomo sin mokidongog kon totundú inta mobijaksana inta inogoi i Allah kon inia. 25Mosia kon batúannea in mamangoi takin kodia-dia in tombuinag kon i Salomo. Mosia mobogoi in pakakat mita saḷaka, buḷawan, ḷambung, ḷoḷutam, touḷut mita mongo bo mongobondu, kabaḷo bo bagal. Natuata in nobaḻí muḷoi in taong.
26 #
Dat.1. 4:26
Ki Salomo in nogoiní kon intau mita binaḻí tontara in parang inta ná tanaa: 1.400 in kereta in parang bo 12.000 in tontara tumotakoi kon kabaḷo. Ibanea in pinobayánea kon Yerusalem bo ibanea doman in kon bayongan in kotá ibanea. 27#Ul. 17:17 Kon bonu in pinomarentaan i Salomo, saḷaka in nobaḻíbí pakakat inta biasamai tongádon naonda bo batu, bo kayu ḷokuyú in mobarong doman totok naonda bo kayu ara biasa. 28#Ul. 17:16 Pinongin pongusaha mita i datu, kabaḷo pinoangoi nongkon Mesir bo Kilikia, 29bo kereta mita in parang in dinia mangoi nongkon Mesir. Boḻi in kabaḷo tobatú in 150 in doit saḷaka, bo boḻi in kereta in parang tobatú in onom nogatut in doit in saḷaka. Onda intua pinongin pongusaha mita tatua doman kabaḷo mita bo kereta mita in parang tatua pinotaḷui bui kon datu mita in Het bo datu mita in Siria.
Currently Selected:
DATU MITA IMITÁNEA 10: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
