KORINTUS 1 9

Hak bo kowajiban mita in rasul

1Akuoi naa intaubí nobebas? Rasul i Tuhan? Inta ain nokoontong kon i Yesus, Tuhan naton? Bo inta nopoyaput in Habar Mopia kon i monimu dá nopirisayadon kon i Tuhan in moiko? 2Umpaka intau ibanea in diá mopirisaya kon akuoi in rasul, táe moiko in nopirisayabí. Sin buktinea moiko in nobaḻídon intau Keresten.

3Aka diá pirisayaan monia kon rasul in akuoi, yo nanaa in potubagku: 4Degá diá motaau in kami in mokaan ande monginum kon onu inta nouḻíku nongkon pinogaidan tanaa? 5Eta degá diá motaau in akuoi in modia kon i buḷoiku inta mopirisaya kon i Kristus saḷaku takinku kon baya-bayáan mako, ná inta inaidan i utat mita i Tuhan Yesus bo in rasul mita ibanea ná tai Petrus? 6Andeka degá tongá ki Barnabas bo akuoi in musti motayak kon kaanon tontaní? 7Diábí in tontara in mayá moparang bo umongkos tontaní! Bo diábí doman in monononggobá inta nomuḷa kon anggur táe diá mosipú kon bungainea! Bo diábí doman in intau inta nomiag kon domba bo diá monginum kon susu nongkon domba inta piniaranea tatua!

8Bo onu in pogumanku tanaa, deemanbí tongá ibo-ibog, sin singogku naa in ain bidon pinais kon buk i Musa. 9#Ul. 25:4; Tim.1. 5:18 Kon buk i Musa pinais nanaa, “Donaaibí pomponan monimu bibig in sapi inta koyogot in moritak kon gandum sin moripú kon batoḷnea.” Eta degá sapibí tatua in umuran tarukiraan mako i Allah? 10Andeka tua pinopomakusudbí kon i naton? Oo totuubí intua kon pinais bá kobacaan naton. Sin intau inta nogaid kon gobá bo inta nondarit kon gandumnea in tumpaḷabí moibog motarima kon boḻi inaidannea tatua. 11#Rm. 15:27 Kami ain nopotaau kon i monimu in Habar Mopia nongkon i Tuhan. Tuamai kami in nokouḻí kon barakat moantó nongkon i monimu. Yo degá noiḻiudon antó in inigum nami kon i monimu? 12Ka intaupa ibanea in motaau moigum kon onukadon kon i monimu, yo apa doman in kami naa, táe doíbí in akuoi?

Maníka bo tanggungonkudon tontaní in yagi-yagi dika in oyúon in mobaḻí ḷabot kon popoyaputanku in Habar Mopia soaḷ ki Kristus. 13#Ul. 18:1 Kinotaauanbí monimu kon intau inta mogaid kon bonu in Baḷoi i Allah, motarimabí in mosia kon kaanon kon bonu in Baḷoi i Allah doman tatua. Bo intau inta monompiamai kon tampat pororataan kon kuruban sosumba, mokouḻíbí doman in sia kon silainea nongkon kuruban inta pinosumba tatua. 14#Mat. 10:10; Luk. 10:7 Ná doman tua ain bidon sinantú i Tuhan kon intau inta mopoyaput in Habar Mopia nongkon i Tuhan, in musti mokouḻí kon barakat nongkon oaidannea tatua.

15Táe akuoi in doíbí. Bo akuoi in nomais kon surat tanaa deemanbí makusud sinbá pomiaan monimu natua in akuoi. Sin aka kon i nakó, yo maníkabí matoi in akuoi dika in kobuḻian in onu inta totok in kino sanang in ginaku. 16Sin akuoi in mopoyaput in Habar Mopia, deemanbí tongá mokikoontong kon intau. Táe ki Allahbí in nopotabá kon i nakó. Tuamai baradosaanbí in akuoi aka diá popoyaputku in Habar Mopia tatua! 17Aka kuma bo tongábí ibogku tontaní in mogaid kon oaidan tatua, yo tantú mogoḷatbí mako in akuoi kon boḻi in oaidanku tatua. Táe naa bo parentabí i Allah, dá mustibí aidanku. 18Dá aka natua yo onu in mouḻíku? Naa in mouḻíku: akuoi in motaau mopoyaput in Habar Mopia bo diábí mokoyoyiga kon intau in mogongkos sin diábí in akuoi moigum kon rupa-rupa.

19Akuoi naa in deemanbí totabá in tumpaḷa intau, táe noibogbí in akuoi nobaḻí ata kon i monimu komintan, sinbá moantó in intau in mopirisaya kon i Kristus. 20Aka kon tayowon intau mita in Yahudi, yo akuoi in ná bí doman onda bo intau in Yahudi, sinbá moidudui kon i nakó in mosia. Bo aka kon tayowon in intau mita inta nokadai kon hukum i Musa, akuoi in ná bí doman onda bo mosia, umpaka sabanarnea deemanbí natua. Tua komintan in inaidanku sinbá moidudui kon inakó in mosia bo mobaḻídon komintan dumodudui i Kristus. 21Aka kon tayowon intau mita inta deeman Yahudi, akuoi in ná bí doman onda bo mosia, inta diá motoindudui kon hukum i Musa. Tua komintan inaidanku sinbá moidudui kon inakó in mosia bo mobaḻí komintan dumodudui i Kristus. Táe deemanbí makusudku moḷawang kon i Allah; sin parentabí mita i Kristus in nongawasa kon inakó. 22Aka kon yuak in intau mita inta diápa noguyang in pirisaya, yo akuoi in ná bí doman onda bo mosia, sinbá moidudui kon inakó in mosia bo mobaḻí komintan dumodudui i Kristus. Simpodon mako kon singog, norupa-rupamaidon in akaḷ inaidanku kon yuak in bayongan intau sinbá oyúon in mopirisaya kon i Kristus bo posaḷamaton.

23Tongábí bá moiyaput in Habar Mopia nongkon i Allah kon bayongan intau, dá inaidanku intua komintan, sinbá moitakin doman mokouḻí kon barakat in akuoi. 24Kinotaauanbí monimu kon aka kon poyotandingan, yo bayongan mototanding in komintanbí moribatuk, táe tongábí tobatú in mokouḻí kon tombuinag. Tuamai in koḻikat totok in moribatuk sinbá moiko in mokouḻí kon tombuinag tatua. 25Pomuḷoi intau inta mobasadia tumakin kon poyotandingan, musti monahang kon yagi-yagi, sinbá mokouḻí kon tombuinag inta diá mononoi kon dunia naa, táe kita in monahang kon yagi-yagi sinbá mokouḻí kon tombuinag inta mononoi. 26Tuamai moribatuk in akuoi, táe oyúonbí in tujuanku motantú. Naonda bo kon poyotandingan in tinju, diábí in akuoi tongá kinokoyu-koyungkumnea. 27Táe ain bidon muna ilatihku in awakku bo nodaitku bidon kinawasa. Sinbá aka akuoi in modia kon intau tumakin kon poyotandingan tatua, yo akuoi in tantúbí doman tarimaan.

Currently Selected:

KORINTUS 1 9: INOMOG

Highlight

Copy