KORINTUS 1 6
6
Soaḷ mopongadu in utat
1Nongonu sin oyúonbí in kon sigad monimu in mobarani mayá kon hakim inta diá nonotaau kon i Allah, bo mopongadu kon i utat monimu inta notobatú kon pirisaya, aka moyogenggeng i utatnea tatua? Nongonu sin diábí mayá kon intau inta mopirisaya kon i Allah bo paḷuton in pelekara tatua? 2Andeka degá diábí kinotaauan monimu kon intaubí inta mopirisaya kon i Allah in mohakim kon bayongan intau kon dunia naa? Dá aka moiko bo motaau mohakim kon dunia naa, yo nongonu sin diábí paḷuton monimu in pelekara mita pongadilan inta diá in mangaḻenea tua? 3Andeka degá diá kinotaauan monimu kon kita naa in mohakimbí kon malaekat mita? Apapa doman bo tongá pelekara inta mobaḻí pomuḷoi in singgai tua! 4Dá aka momuká in pelekara mita natua, umpaka yo pongaduon doman monimu kon intau mita inta diá nonotaau in yagi-yagi kon bonu in jamaat? 5Totok mokooyá uḻe! Umpaka yo beresidon diá in intau mobijaksana kon sigad monimu inta motaau mopoyotutui in soaḷ inta tongá natua mita inta mobaḻí kon sigad monimu intau in Keresten! 6Nongonubí sin aka oyúon in yogenggeng kon sigad monimu intau in Keresten, yo bayáanbí monimu pongaduon kon intau inta deeman Keresten!
7Naaibí in tongá soaḷ mopongadu in pelekara kon intau inta deeman Keresten; sedangkan kon sigad monimu bo momuká in yogenggeng, yo mangaḻenea kon tua in tobatú bidon kelemahan monimu. Sin maníka bo tombogaan andeka porugion in tumpaḷa intau! 8Táe naaibí moiko in monombogá kon intau ibanea. Moikobí in mokorugi kon i monia. Bo modugangdon totok in diá mopia sin intau inta ain notobatú kon pirisaya pinopoaidan doman monimu! 9Diábí kotaauan monimu kon intau mita inta diá motoindudui kon i Allah in diábí mobaḻí umat i Allah? Dika koakaḷan! Sin bayongan intau inta mogaidmai kon mokotor, bayongan intau inta umuran dumudui kon parenta in berhala, monuaḻing bo mokituaḻing, inta moibog kon tumpaḷa ḷoḷaki ande tumpaḷa bobay, 10mononakow, motamaa, inta moibo-ibog monginum kon inta mokoḷoḷangu, inta moibog moporomúmai kon tangoi intau, bo inta tongá moharap mako kon totayak in intau ibanea – mosia tua in diábí motaau mobaḻí umat i Allah. 11Koḻipod oyúon in kon sigad monimu in umuran mogaid kon natua mita. Táe tanaa in poniatadon kon nodaritdon in moiko nongkon bayongan oaid inta diá mopia. Moiko in nobaḻídon umat i Allah inta piniḻí-Nea. Moiko buidon noyobayat i Allah, sin nopirisayadon kon i Tuhan Yesus Kristus bo popisí kawasa doman in Roho inta nongkon i Allah naton.
Tonggina sinbá diá mogaid kon inta diá mopia
12 #
Kor.1. 10:23
Oyúon in mosingog kon bayongan intau motaaubí mogaid kon onukadon. Tongá aka kon inakó, tua mita in diábí komintan baraguna. Sin umpaka motaau mogaid in akuoi kon onukadon, táe akuoi in doíbí mobaḻí ki ata in onu inta aidanku tatua. 13Oyúon doman in nosingog kon kaanon tua in pinobonubí kon sian, sin sianbí in sinantú tampatnea. Táe sian bo kaanon tumpaḷabí diá in baraguna kon i Allah. Tuamai pakébí in awakmu mogaid kon onu inta kinoibog i Tuhan, deemanbí mogaid kon inta kinodoí-Nea sahingga in umuran-Neabí ḷukadan in awakmu. 14Sin ki Allah inta nomiag kon i Tuhan Yesus nongkon kinopatoian-Nea. Siabí doman tua in momiag kon i naton takin kawasa-Nea.
15Kinotaauan bidon monimu uḻe utatku mita, kon awak monimu nion in notobatúbí i Kristus. Dá umpaka yo motaau gamáan in tobonsig bo pakéon mogaid kon inta diá mopia? Tantú diábí motaau! 16#Kḻn. 2:24 Ande degá diápa kinotaauan monimu kon aka intau bo nosiugdon noyotakin in tobatú bobay monakaḷ, yo intau tatua in notobatúbí domandon takin bobay tatua! Sin kon Buk Motusi ain pinais nanaa, “Taya dua in notobatúdon.” 17Táe intau inta moibog motobatú i Tuhan, tantú rohonea in notobatúbí doman in Roho i Tuhan.
18Manangka intua poyayúdon oaid mita inta diá mopia. Sin bayongan in oaid diá mopia inta inaidan intau tatua in komintanbí nobaḻí kon ḷuai in awak intau. Táe intau inta umuran mogaid kon inta diá mopia kon intau ibanea, tua in ná bí doman onda bo nopoaid in diá mopia kon awaknea tontaní. 19#Kor.1. 3:16; Kor.2. 6:16 Mustibí kotaauan monimu, kon awak monimu nion tampatbí in Roho i Allah. Roho i Allah tua in nogutunbí mako kon awak monimu. Awak monimu nion in deemanbí moiko in kitogi, táe ki Allahbí in kitogi. 20Sin moiko nion in sinaḷui bidon i Allah, bo nodait-Nea bidon inuboḻian. Tuamai umurandon paké kopiraan sahingga in ki Allah in pomuliaan.
Currently Selected:
KORINTUS 1 6: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.