KORINTUS 1 16
16
Sumbangan kon intau mita Keresten inta kon Yerusalem
1 #
Rm. 15:25-26
Moiduduimai naa, soaḷ doit inta ogoi monimu posumbang kon intau mita Keresten. Anjuronku sinbá aidan monimu podudui in totundú inta pinogumanku kon jamaat mita inta kon Galatia. 2Kon singgai dungkuḷ pomuḷoi in diminggu, moiko in munadon monondí kon doit inta posumbang tua podudui onu in mouḻí monimu tontaní. Tagú intua modapot in moiangoi in akuoi, sinbá diá bain mamangoi in akuoi bodongka mulai mosipun in moiko. 3Aka akuoi mamangoidon yo potabákudon mayá in Yerusalem in intau mita inta kinoibog monimu mayá. Mosia tua in pokidiaankubí in surat saḷaku ḷouna in singog. 4Bo aka paraḷuon monimu kon bá takinankupa in mosia, dá takinankubí doman.
Tomayá i Paulus
5 #
Rsl. 19:21
Akuoi in mamangoibí mokipodungkuḷ kon i monimu naonda in moitaḻib kon Makedonia, sin tomayáku in mongintuapa. 6Moyotaḷá mako kon Korintus akuoi in mogutunpa moḻin onggot takin monimu, degá kon dodai in sempo in tumping. Onda intua akuoi mokituḷungpa kon i monimu mongingguput kon bobayáanku. 7Akuoi in doíbí mokipodungkuḷ kon i monimu tongá sakadar mongandup mako natua. Aka ogoian i Tuhan in kasampatan, yo mogutunpabí moḻin onggot in akuoi takin i monimu.
8 #
Im. 23:15-21; Ul. 16:9-11 Táe akuoi in mogutunpa kon Epesus modapot kon singgai Moḷoben Pentakosta. #Rsl. 19:8-10 9Sin moantó in kasampatanku kon naa in mogaid kon oaidan mita inta baraguna, umpaka mobayong doman in intau momayow.
10 #
Kor.1. 4:17
Aka ki Timotius mamangoi yo kopiaanbí in motomu, sinbá diá moondok in sia bo mopia in ginanea kon yua-yuak monimu, sin sia tua in notongkaikubí, tumpaḷa mogogaid kon oaidan i Tuhan. 11Ḷukadai sinbá diá in kon sigad monimu in mopoompámai kon inia. Bo tuḷungai in sia sinbá motaaupa bui mamangoi kon inakó takin mosaḷamat, sin akuoi in mogoḷat mako kon koangoiannea takin i utat mita naton ibanea.
12Aka soaḷ ki utat naton ki Apolos, yo ain binui-buikumai inanjur sinbá sia bo takin utat mita ibanea mamangoipa mokipodungkuḷ kon i monimu. Táe doípa in sia tanaa mako#16:12: táe doípa in sia tanaa mako: ande totokpabí in deeman ibog i Allah. tongá aka oyúon in kasampatan mopia yo tantú sia in mamangoibí mokipodungkuḷ kon i monimu.
Tonggina Pangabisan
13Umuran mokopoingat! Sindog kotorindog kon bonu in pirisayamu saḷaku intau Keresten. Mokopobarani bo mokoporopot! 14Bo onu in aidan monimu aidai takin tabi.
15 #
Kor.1. 1:16
Tantú kinotaauan bidon monimu in ki Stepanus bo motoḷuadínea; mosia tua inta muna-munamai nobaḻí Keresten kon Akhaya. Mosia tua in totu-totuudon nogaid nobantung kon umat i Allah. 16Manangka intua duduiaibí in intau natua takin intau mita ibanea inta nogaid bo nobantung noyotakin monia tua.
17Nosanang totok in ginaku in kino angoian i Stepanus, i Portunatus bo i Akhaikus, sin mosia tua in nonoḻiu kon i monimu namangoi kon inakó. 18Mosia tua in noposanangdon in ginaku, bo noposanang doman in gina monimu. Intau mita natua in musti hargaan.
19 #
Rsl. 18:2
Jamaat mita kon Asia in nokidia in salam kon i monimu. Ná doman tua, ki Akwila bo ki Priskila takin jamaat mita inta noyosipun kon baḷoi monia, nokidia doman in salam inta totok in mopia saḷaku intau in Keresten. 20Bayongan utat kon naa nokipoyaput doman in salam kon i monimu.
Posisalaman kopiaan totok in moiko saḷaku tumpaḷa utat Keresten.
21Akuoi tontaní in nomais doman kon salamku tanaa: Salamku, ki Paulus.
22Intau inta diá motabi kon i Tuhan, pomayádon mako baḷáan!
Maranatha – Tuhan nami, angoidon!
23Poigumon mako ki Tuhan Yesus in momarakat kon i monimu.
24Tabiku in umuran kotaki-takin monimu komintan inta notobatú i Kristus Yesus.
Horomat nami, Ki Paulus
Currently Selected:
KORINTUS 1 16: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
