MARKUS 3

Yesus eic geigouhw dou sud hom mesira nagama omom

(Mat. 12:9-14; Luk. 6:6-11)

1Se lona hom, kaba, Yesus einesa leng Yahudi meren tuari deit. Doba se tuari mes ingga, kaba, sud hom en mesira nagama omomohob, en toua moongga. 2Dara sug len loucimdeb gini, kaba, lusud merug aibibra dau leng Yahudi, len toua merugwengga se tuari mes naugb len lauweila dougwo Yesus an men geicara dag en eicara edreg dau Musa men gomnomna deitei? Era naroei? Dangga hang, len lemocigei en terimda. Dauntoba sug len leiya, doba en eic geigouhw dou sud hom ingga se Lona Gemeicaresero gin deit, kaba, len ledoho ledas en dou meren mougtir toua namcir.

3Doba Yesus eic mos naugb en eija sud hom graga, endagai: Ban bin naugb bidesa ainyes sugini.

4Sug Yesus eija enohob, kaba, en eijidougwo leng Yahudi an Musa men gomnomna eisaugb lona gini, endagai: Maman gomnomna enara dagiro dou maman eisaugb lona gina? Maic geigouhw, era maic gecgu anirei? Era maic len merna agau, era maic gogom dou len dousei? Doba len lodinanir namcir.

5Sug Yesus eiya, doba lodinanir namcir, kaba, en medoc momogo an len. Anai len laiyan merdocesem dougwo areg asesa Allah enin medoc mes namcirohob. Dangga sug en ei maires dareg medoc esrougb an lenohob, kaba, en arougb sud hom ingga naugb en ou mesira. Sug en ou mesirohob, kaba, en mesira eigouhw se mohw ucugb deit. 6Sug leng Parisi, len leiya gin, kaba, len lagunya dau tuari mes. Sug len lagunya dau tuari inegohob, kaba, len ledehilon mougt mera medam, moho Herodes, men lusud toua deit. Sug len ledeiya lenohob, kaba, len loucimdeb naugb lococ len, dauntoba len lehilon ucina naugb sug len leic gomom dou Yesus namcir toua.

Yesus eic geigouhw dou leng areber leinyana se Galilea mebera

7-8Sug len lehilon ucina naugb leic gomom dou Yesus dag gini, kaba, eni dara men logodeh, len leisa ij dau cinogo ingga dig Galilea mebera deit. Dangga lusud leinyana gougwa dau leng Galilea meren hancob, len toua laimo en. Dara lusud leinyana dau leng Yudea meren hancob, dara cinogo Yerusalem, dara leng dau Idumea meren hancob, dara leng dau Yordan nagama dau sug igda eisaugb, dara leng dau cinogo Tirus, dara Sidon, kaba, len laugwan len len naugb louma debin Yesus sungga toua. Anai len louman dau men geicara dag en eic geigouhw dou lusud leinyanohob. 9Doba sug Yesus eic geigouhw dou leng leinyanohob, kaba, leng areber gus len lebedbedim aud en naugb los en, dauntoba len toua leigouhw dedemeda.

10Dangga hang, Yesus en en dou men logodeh naugb len lesedeb ij hom naugb en. Anai lusud leinyana lesa lohudebes en namcirdaha.

11Dara astesda sug lusud gedig merna mog mog leinesa len merdoc mesohob len leiya Yesus, kaba, len leijeboho lamuhumlo deseino en. Hanoba len leijara dou en, lendagai: Emen emecinaga bani Allah Meisi mohora hom misen namcir.

12Doba Yesus etaha len dougwo, endagai: Yen yemeija dan indoho gini dou lusud naugb len lemecinagero.

Yesus ouci men logodeh merug sisa hobjerai naugb sug len lesai Allah moro

(Mat. 10:1-4; Luk. 6:12-16)

13Sug Yesus eic geigouhw dou leng areber leinyana dag gragohob, kaba, en ouci men lusud merug aibibra gedig en ouwan naugb len laimo en dig menmod hom. Sug en ouci lenohob, kaba, en einoisa len naugb len leisaugb se menmod hom gin toua. 14Sug len ledebeij menmodohob, kaba, en ouci merug sisa hobjerai dau len ingga naugb len laimo en. Dara en eigdoumesa len meroho naugb len lesai Allah moro dou lusud sungga sungga. 15Hanoba en eic goubesa dou len naugb len locirma merna mog mog dau lusud toua.

16Leng merug sisa hobjerai gini, kaba, len meroho dag gini: Hom en moho Simon, doba Yesus en esagai en moho deit dag Petrus, era igdahab moc. 17Lahwai deit, kaba, lan maroho dag Yakobus dara en magto, Yohanes. Lan gin, kaba, Sebedeus meis lani. Doba Yesus esagai lan maroho dag Boanerges, era bagar mougb mehira deit. 18Dara ligbum toua, kaba, len meroho dag Andreas, Pilipus, Bartolomeus en meisi, Matius, Tomas, Alpius meisi moho Yakobus, Tadeus, Simon Selotis. Lusud leija en moho dangga, anai sug nosa, kaba, en aimo lusud gedig len louwan locirma leng Roma dau meren cinogo. 19Dara hom deit, kaba, en moho Yudas Iskariod. Anai eni dau cinogo Keriod. En gini, kaba, en ehin magan Yesus dou leng Yahudi meren mougtir naugb len leic gomom dou en toua.

Leng Yahudi meren mougtir lesbes an Yesus men goubesa dag en dau Bilis dous

(Mat. 12:22-32; Luk. 11:14-23, 12:10)

20Sug Yesus ouci men logodeh merug sisa hobjerai ginohob, kaba, en ecicugb se Kapernaum dig men tu deit. Sug en edebeij tuohob, kaba, lusud leinyana, len len naugb louma debin en namcir. Dangga cumougt ingma emeb naugb sug eni dara men logodeh len lemetara touwero. 21Doba sug men lusud, len louman dag en emehig debin mog hom touwero, doba en ousa lusud terimda, kaba, len len naugb ledahwan en, dauntoba en ehig debin mogahabi. Anai len lenara doum, lendagai: Eni mereiyeba icira ginohob.

22Dara leng meru ouforoho se Musa men gomnomna, kaba, len toua louwaden dau cinogo Yerusalem naugb len ledebeij len sungga toua. Dangga sug len leiya Yesus, doba en ocirma merna mog mog dau lusud leinyana terimda, kaba, len lococ len gus, lendagai: Yen yemeijesan ginlo. Anai meren mougt mera medam, moho Belsebul, en einesa en medoc mes naugb ginohob. Hang en ocirma merna mog mog dau lusud toua.

23Doba sug Yesus ouman len merir an gin, kaba, en eija len naugb len len aud eni. Sug len ledebeij enohob, kaba, en eic gainyenara hwai debin gin dou len naugb agod len merbes dougwo, endagai: Dagiro naugb Setan enin ocirma men logodeh dau lusud merdoc mes, anara? 24Anai sug lusud se hancob hom, lenin lebemocedoum, kaba, cum, len lemedag hom deitero. Doba len laisoboro daum dangga. 25Era sug lusud se tu hom, len lohu merir doum, kaba, cum, len toua dag hom deitero. Doba len laisoboro daum namcir touohob. 26Dangga toua, sug Setan enin ebemoc dou men logodeh, dara len leigdau, kaba, men goiharaga emebsugeb deitero. Doba eij baisoboro ediyebeiya namcir. Dobnaro. Men goiharaga ebsugeb terimda. Dangga hang, en emocirma men logodeh dau lusud merdoc mes touwero.

27Dara lusud lemeinesa sud hom mobisamougb men tu naugb ledeida men aremougb augwougb touwero. Doba len lehilon ucina naugb sug len lohud en mesira nosahabi, len lemeinesa naugb lemedeida men aremougb toua.

28Hang yen youman deigeigouhw. Gareg en ebesesar an Allah, dara eic en moho acecim augwougb, kaba, Allah aigdougwo men sesar ingga dau en toua. 29Doba gareng en esedeb naugb en eic Mena Gogoufu en moho bacecim dag gin, kaba, Allah emaigdougwo men sesar inggaro. Doba men sesar gin, kaba, eb naugb en beb huhugb terimda. Augwan gini asesa dag misen namcir.

(30Yesus enara dag gini, anai merug hosa dau leng meru ouforoho se Musa men gomnomna gin, kaba, len leic Mena Gogoufu en moho bacecim dag en edag mena gogor einesa Yesus medoc mes naugb ginohob.)

Leng ledag Yesus mem dara magtor misen

(Mat. 12:46-50; Luk. 8:19-21)

31Dara Yesus mem an men magtor len ledebeij tu gin toua. Sug len ledebeij tu ginohob, kaba, len leigtou dig medigo. Hanoba len larougb ligbum naugb len leden dou Yesus, dauntoba en edeiya len se medigohabi. 32Dangga leng leigtou acec Yesus ingga, kaba, len lenara dou en, lendagai: Ban abim dara ban abagtor len leigtou se medigo naugb ledeiya ban.

33Doba Yesus auni dou len, endagai: Dan indim dara dan indagtor, gareg lena?

34Sug en enara dag gin dou lenohob, kaba, en auweila men lusud gedig len leigtou acec en ingga. Hanoba en ens len dou len laugwan, endagai: Len gin dous eng dan indim dara indagtor misen. 35Anai gareg en eicara aimo areg asesa Allah enin medoc mes, kaba, en dous eng dag dan indim, dara indagtor, dara indameitor misen.

Currently Selected:

MARKUS 3: INOSOU

Highlight

Copy