LUKAS 6

Leng Parisi dara Yesus men logodeh laisedim eisaugb meren Lona Gemeicaresero

(Mat. 12:1-8; Mrk. 2:23-28)

1Se lona hom deit sug Yesus ec an men logodeh asa ucina geragasa tramdad meda, kaba, men logodeh len leised tramdad mera. Hanoba len lehin se len merisira, dauntoba mera etrij dau mogahabi, len lemet toua. 2Doba lona sug Yesus men logodeh, len leised tramdad se gin, kaba, leng Yahudi meren lona naugb len lemeicaresero. Dangga merug hosa dau leng Parisi sug len leiya dau gin, kaba, len len dougwo Yesus men logodeh an gini, lendagai: Dagiro, naugwe hang, yen yeic meijus naugb yen yeised tramdad mera se Lona Gemeicaresero gin. Anai lona gin, kaba, Musa men gomnomna en dougwo maman an ginohoba?

3Doba Yesus aisan medagas dau Daud benara dou len, bendagai: Yen yecic dau Daud an men logodeh meren geicara sug nosohobei? Era, ingmebmei? 4Anai sug sirebeni, kaba, en einesa Allah Men Tuari Dau Hugbei naugb en et roti gedig len lauwaharo dou Allah enohob. Dara en eic dou men logodeh naugb len let toua. Dangga len toua ledreg dau Musa men gomnomnohob. Anai roti gin, kaba, emedeinyum naugb leng aibibra len lemetero. Doba naugb gembala gesa taij mogud dous eng len let.

5Sug Yesus enara dag gin dou lenohob, kaba, en enara dou len deit, endagai: Sug Daud an men logodeh, len toua ledreg Musa men gomnomna dag ginohob, kaba, eigouhw naugb indan logodeh leicara laimo dangga toua. Anai Lusud Meraguna Mebin danin dedag mougt mera medam naugb Lona Gemeicaresero gin touohob.

Yesus eic geigouhw dou sud hom mesira omom se Lona Gemeicaresero

(Mat. 12:9-14; Mrk. 3:1-6)

6Se Lona Gemeicaresero hom deit sug Yesus einesa leng Yahudi meren tuari naugb en edidib Allah mer men meijouhw dou lusud, kaba, sud hom mesira misen omom en toua moongga desij len. 7Dara leng meru ouforoho se Musa men gomnomna dara leng Parisi, len toua merugwengga se tuari mes naugb len lauweila dougwo Yesus an men geicara dag en eicara bedreg dau Musa men gomnomna deitei? Era naroei? Anai len louwan lehilon ucina naugb len loho las en deseino meren mougtir. Dangga hang, len lemocigei en terimda. Dauntoba sug len leiya, doba en eic geigouhw dou sud hom ingga se Lona Gemeicaresero gin deit, kaba, len ledoho ledos en namcir.

8Doba Yesus en ecinaga dau areg len lesedeb se len merdoc mes naugb en inggohob. Dangga en enara dou sud hom mesira omom ingga, endagai: Ban beisa besa. Hanoba ban bin naugb bidesa ainyes sugin toua.

9Sug sud hom gini eisa bidesa desij Yesusohob, kaba, Yesus eijidougwo leng leigtou se tuari mes ingga, endagai: Musa men gomnomna enara dagiro dou maman eisaugb lona gina? Maic geigouhw, era maic gecgu anirei? Era maic len merna agau, era maic gomom dou len dousei?

10Sug Yesus eijidougwo len an ginohob, kaba, en ei mairesi dara len laugwan. Hanoba en arougb sud hom mesira omom ingga, endagai: Ban bou absireda. Sug sud hom ingga en aimo Yesus mer naugb en ou mesirohob, kaba, en mesira eigouhw namcir. 11Sug leng meru ouforoho se Musa men gomnomna dara leng Parisi, len leiya dau gin, kaba, len merdoc esrougb an Yesus namcir. Hanoba len lenara doum, lendagai: Maman mab ara dara sud hom gina?

Yesus ouci merug sisa hobjerai dau men logodeh naugb len lesai en moro dou lusud

(Mat. 10:1-4; Mrk. 3:13-19)

12Se lona hom sug Yesus edidib Allah mer men meijouhw dou lusud gini, kaba, Yesus eisaugb dig menmougb hom naugb en edocuncum dou Allah dou enin sungga. Sug en ocuncum dou enin gini, kaba, en emecicugb dedemedero, doba en ocuncum terimda bedebeij lona esga namcir. 13Dangga sug lona esgohob, kaba, en eija men logodeh laugwan, len len aud eni. Sug len ledebeij enohob, kaba, en eijidougwo lusud merug sisa hobjerai dau len ingga len meroho naugb len lesai en moro dou lusud toua.

14-15Leng merug sisa hobjerai gin, kaba, len meroho dag gini: Hom, kaba, en moho dag Simon, doba Yesus esagai en moho deit dag Petrus toua. Dara len gus, kaba, len meroho dag Andreas, Simon magto, Yakobus, Yohanes, Pilipus, Bartolomeus, Matius, Tomas, Yakobus, Alpius meisi. Dara Simon Selotis, lusud leija en moho dag gin, anai sug nosa, kaba, en aimo lusud naugb len lebehnehino meren cinogo dougwo leng Romohob. 16Dara hom deit, kaba, en moho Yudas, Yakobus meisi. Dara sud hom deit, kaba, eni sud hom gohw Yesus se leng Yahudi meren mougtir merisira. En moho Yudas, dau cinogo Keriod.

Yesus eic geigouhw dou leng areber leinyana

(Mat. 4:23-25)

17Sug Yesus ouci men lusud merug sisa hobjerai ginohob, kaba, en ouwadan len dig dougweda. Sug len ledebeij dougwohob, kaba, en edebeij usi gedouder hom, kaba, en esa dei sungga. Anai en eiya, doba lusud leinyana gougwa dau men logodeh gus, dara lusud dau leng Yudea meren hancob, dara cinogo Yerusalem, dara cinogo Tirus, dara Sidon geb se dum mebera, len loucimdeb sungga naugb enohob. Anai len louwan naugb sug en esai Allah moro dou len dara naugb sug en eic geigouhw dou len toua. Dangga sug en ebedbed dou lenohob, kaba, en eic geigouhw dou leng areber. 18Dara leng merna mog mog einesa len merdoc mesohob, kaba, en ocirma len dau toua. 19Sug lusud gus leiya Yesus eic geigouhw dou len danggohob, kaba, len laugwan lebedbedim icira naugb len los en maga toua. Anai len leiya, doba Yesus men goubesa agunya dau en naugb en eic geigouhw dou lusud leinyanohob. Dangga gareg dau len sug en os en magohob, kaba, len leigouhw dedemeda iteitongga toua.

Yesus enara ad men logodeh merdoc mes sug len merunggwereij se cinogo gini

(Mat. 5:1-12)

20Sug Yesus eic geigouhw dou lusud laugwan dauwohob, kaba, en auweila men logodeh toutou. Hanoba en enara bad len merdoc mes ucan deit, endagai:

Gareg dau yen en monggwereij se cinogo gin,

kaba, en medoc momogo an ginero.

Doba en agahugouhw an dous,

anai cum, kaba, Allah emoiharaga yen ucugbs.

21Dara yen meigdoc emeijesan sug sireba yen touwero.

Doba yen meigdoc eigouhw an gin terimda,

anai cum, kaba, Allah emeic ared einyana dou yens.

Dara gareg dau yen en medoc momogo, anai aremer einyana eb naugb en terimda, kaba, cum, en emeb deitero.

Doba Allah eic geigouhw dou en naugb en agahugouhw an namcir.

22-23Dara yen meigdoc momogo dau sug lusud merdoc esrougb an yen, dara len lasidged yen, dara len lesmesman yen, dara len leic yen meijoho lacecim icira Lusud Meraguna Mebin dan indoho gin touwero.

Doba yen yagahugouhw dara yen yesogwesa an gin dous.

Anai Allah eised huga medam deb se bogo naugb yenohob.

Hang yen meigdoc momogo dau sug len leic gecgu dag gin dou yenero.

Doba yen meigdoc eigouhw an gin dous.

Anai len merjemouwer leicara dangga dau leng lesai Allah en moro dou len sug nosa touohob.

24Doba ogom medam naugb yeng meijisoho mougb gini.

Anai yen yeic meijisoho mougb se cinogo gini beic yen meigdoc eigouhw dou yen bedeinyumohob.

25Dara ogom medam naugb yeng yet ared se cinogo gin beica yen namcirohob.

Anai cum, kaba, sireba yen beb huhugb terimda.

Dara yen yehilon ucina naugb yen yagahugouhw an terimda,

kaba, cum, yen yemagahugouhw toua deitero.

Doba Allah emeic gogom dou yen naugb yen yeb dara yeiyogoseser terimda.

26Dara ogom medam naugb yen gedig lusud leigdoumesa yen meijoho se cinogo gini.

Anai len merjemouwer leicara dangga dou leng lesai Allah moro areibahau dou len sug nosa touohob.

Yesus ens dou men logodeh dag len merdoc gororougb meren moc toua

(Mat. 5:38-48, 7:12a)

27Dangga yeng youman dan indir an gini, kaba, dan desulou yen dag gin toua, dendagai: Yen meigdoc emecgwan meijen moc deitero, doba yen meigdoc gororougb len den den dous. Dara gareg en medoc mog mog an yen, kaba, yen yemauni gecgu dou en touwero. Doba yen yauni areg geigouhw dou en. 28Era sug lusud lesij meijoho se seiseij, kaba, yen yemauni dangga dou len touwero. Doba yen yacgeij Allah naugb en eic geigouhw den den dou len dous. Era sug lusud leicara ecgwan yen, kaba, yen yemeicara ecgwan dou len ucugwero. Doba yen yacgeij Allah naugb en eic geigouhw dou len. 29Era sug sud hom oto ban abumin nagama, kaba, ban beineg an dig nagama dou en deit naugb en oto.

Era sug sud hom esma meijen sansun gouji dau yen, kaba, yen yemagaigeij sansun gin dara meigdocero. Doba yen yeic mogurei geb se meijus yaos dara dou en. 30Sug areg gesij lusud, hanoba len lougb aud yen, kaba, yen meigdoc emagadgeij an lenlo. Doba yen meigdoc eineg an len naugb yen yeic areg len lougb an aud yen ingga dou len toua. Dara sug len lagungun ara ara dau yen, kaba, yen yemacgeij gin ucugb dau len touwero. Doba yen meigdoc obsara dau gin dou len toua terimda.

31Dangga sug yen youwan len gus leicara eigouhw an yen, kaba, yen toua yeicara eigouhw an len nosahabi. 32Anai sug yen meigdoc gororougb leng merdoc gororougb yen aiyei dous, kaba, Allah eigdoumesa yen meijoho an gin dagiro? Anai meijen geicara gini emeb susugb dau leng lebesesar meren geicara touwero, doba aninim dous. 33Era sug yen yeicara eigouhw an leng leicara geigouhw an yen aiyei dous, kaba, Allah eigdoumesa yen meijoho an gin dagiro? Anai meijen geicara gin, kaba, emeb susugb dau leng lebesesar meren geicara touwero, doba aninim dous. 34Era sug yen yohw aremougb yesi leng gus aiyei, dauntoba yen youwan naugb len loc meijen aremougb dara cufu ucugb dou yen dous, kaba, Allah eigdoumesa yen meijoho an gin dagiro? Anai leng lebesesar namcir, kaba, len toua lohw aremougb doum naugb yesi leng gus aiyei dangga terimdohob.

35Dangga yen meigdoc emecgwan meijen mocero. Dara yen meigdoc emagadgeij an len gus touwero. Doba yen meigdoc gororougb meijen moc len laugwan den den dous. Dara yen meigdoc eigouhw an lusud toua. Dara yen Meijina emeiseisan areg yen yohw dou lusud touwero. Doba sug len lougb aud yen, kaba, yen yemeda moro ucugblo. Doba yen yarges yen meisira an len namcir. Anai sug yen yeicara dag gini yen Meijina Adehsud Gen Moho Eb Taiba Augwan se bogo en eic siouwa medam bauni ucugb dou yen. Dara en eigdoumesa yen dag en mogwihi mogo misen toua. Anai en, kaba, en medoc emagadgeij an leng merug mog dara leng merdoc agas naugb len lemen sijo dou en touwero. Doba en medoc eineg an len laugwan naugb en eic ara ara dou len toua. 36Dangga yen meigdoc eineg an lusud terimda, aninim dag yen Meijina se bogo en medoc eineg an lusud laugwan touohob.

Yesus en dougwo lusud naugb len lemowun leng gus meroho an meren geicara augwougblo

(Mat. 7:1-5)

37Dara yen meigdoc emagadgeij an lusud naugb yen yemowun lenlo. Dara yen yemahacugb gogom debin len touwero. Doba yen yaigdougwo meren aremer terimda. Anai sug yen yeicara dag gin, kaba, Allah en toua medoc emagadgeij an yen naugb en emowun yenero. Dara en emahacugb gogom debin yen touwero, doba en aigdougwo meijen sesar augwan toua terimda. 38Dara yen meigdoc emoungmerema an meijen aremougb touwero. Doba yen meigdoc edag liseh naugb yen yagaha yen meisira an meijen aremougb ingma dou lusud gus toua. Anai sug yen yeicara dag gin, kaba, Allah en toua medoc edag liseh an yen naugb en eic ara ara gaiyansa dou yen toua. Dangga sug yen yeic arai meisira geijouhw dou len gus, kaba, Allah eic arai mesira geijouhw dou yen toua. Doba sug yen yeic arai meisira gogom dou len gus, kaba, Allah eicara dangga bauni dou yen toua.

39Sug Yesus ens aremer gin augwan dou men logodeh dauwohob, kaba, en eic gainyenara hosa debin gin dou len deit, endagai: Yen yemedag len merires mougwero, doba yen yecinaga meijouhw augwan asesa nosahabi. Anai sug sud hom en mairesmougb, kaba, en einoisa en mesi mairesmougb toua, kaba, cum, lahwas laobsara se cigaha namcir. 40Dara yen yemeigdoumesa yenin meijoho dag yen yecinaga augwan dag meijen guru touwero. Doba yen yowun yenin meigdoc mes arjaga naugb yen yaimo areg en ens dou yen dousahabi, kaba, yen yemedag en toua.

41Dangga dagiro, naugwe hang, yen yemauweila len gus an meren aremoslos geb se len merires, doba yen yemauweila sogo meb mehir medam geb dougwo yenin meijires habero, anara? 42Era dagiro, naugwe hang, yen yenara dou yen meisir len gus an meren aremoslos geb se len meriresi naugb yen yeic dau lena? Doba yen yemeiya sogo meb mehir medam geb dougwo yenin meijires habero, anara? Dangga, isnaro. Doba esloulougb naugb yen yeic sogo meb mehir geb dougwo yen meijires nosahabi, yen yemasid aremoslos geb se len gus merires toua. Anai sug yen yemeicara danggero, kaba, yen yedag lusud gedig len leicara larerei lusud merires dous.

Yesus esulou men logodeh naugb lehigdecin lusud an meren geicara

(Mat. 7:16-20, 12:33-35)

43Sug Yesus eic gainyenara gus graga dou men logodeh bouwohob, kaba, en eic gainyenara hom dau sug len lehigdecin lusud an meren geicara ucan dou len deit, endagai: Sug sud hom en edag sogo maga geigouhw, kaba, en emera mera gecgwero, doba en era mera geigouhw mogud dous. Dangga toua, sug sud hom en edag sogo maga gecgu, kaba, en emera mera geigouhw touwero, doba en era mera gecgu mogud dous. 44Anai astesda sogo mera, kaba, maman mahigdecin maga toua. Dangga sug leng ledag imbrei, kaba, lusud lemec sogo ara mera dau lenero. Doba len lec imbrei mera dau len dous. Dangga toua, leng ledag lisug maga, kaba, lusud lemec anggur mera dau en touwero, doba len lec lisug mog dau en dous. 45Hang sud hom gecabeci, kaba, ara geigouhw mogud agunya dau en medoc mes dous. Doba sud hom gedag mog mog, kaba, areg mog mog mogud agunya dau len toua. Anai areg agunya dau lusud merirs, kaba, aimo dau areg geb se len merdoc mes touohob.

Gainyenara eisaugb lusud lahwai sug lan lahud maran tu

(Mat. 7:24-27)

46Sug Yesus eic gainyenara dag graga dou men logodeh bouwohob, kaba, en eic gainyenara hom dau sug len laimo en mer dous ucan dou len deit, endagai: Sug yen yeigdoumesa dan indoho dag meijen mougt mera medamohob, kaba, yen yaimo dan indir an areg dan darougb yen an gin toua. Anai sug yen yemaimoro, kaba, yen yeigdoumesa dan dag meijen mougt mera medam naugb ara? 47-48Dangga gareg en en aud dan naugb en ouman dan indir dousero, doba eicara baimo areg dan darougb en an gini, besesa terimda, kaba, dan deic ainyen dag sud hom gohud men tu, doba ogo doc moc an namcir. Hang sug duhu eh medam bougwan, doba men tu gin emeijero, anai en ogo doc moc an namcirohob. 49Doba gareg en en aud dan naugb en ouman dous. Hanoba en emeicara bemaimo areg dan darougb en an ginero, kaba, eni aninim dag sud hom gemogo doc moc an men tuero. Doba en ohud men tu dag obreikei dous. Dangga sug duhu eh medam gohwan, kaba, eij dedemeda baisoboro namcir.

Currently Selected:

LUKAS 6: INOSOU

Highlight

Copy