YOHANES 2

Yesus eperwei duhu dag anggur mohu se cinogo Kana

1-2Lona hwai debin dau sug Yesus eija Pilipus dara Natanielohob, kaba, lusud lougwan ared debin leng leicim se cinogo Kana se leng Galilea meren hancob. Dangga len lesa merir dou Yesus an men logodeh, dauntoba len len naugb ledetara dara len toua. Sug len lougwan ara gin, kaba, Yesus mem en toua moongga desij leni. 3Doba sug len letara, kaba, meren anggur mohu ouwohob. Dangga Yesus mem eisa bedenara dou meisi, endagai: Len gin, kaba, meren anggur mohu augwan ouwa dau lenohob.

4Doba Yesus auni dou en mem, endagai: Daneh, ban bemarougb dan naugb dan demens danin dou lusudlobma. Anai indan lona emedeinyum naugb ginbuma.

5Doba Yesus mem enara dou sogougwir, endagai: Areg dan indisi en arougb yen an, kaba, yen yeicara yaimo en mer an gin dous.

6Doba debecij maga senggem inggeb an duhu desij len ingga naugb len ledu len meraga becabeci deseino Allah dauwahabi, len lemetara. Anai gini aimo dau leng Yahudi meren gaben danggohob. Astesda debecij gin, kaba, oho ampo maga huntun hom an duhu ebsa.

7Dangga, kaba, Yesus arougb sogougwir, endagai: Yen yedagain duhu debsa debecij gin augwan batij namcir. Sug len louman Yesus en mer an dag ginohob, kaba, len laimo en mer naugb len lagain duhu deb se augwan batij namcir toua.

8Sug len lagain duhu debsohob, kaba, Yesus arougb len deit, endagai: Yen yagain duhu ingga ingma naugb yen yodo dou mougt mera gesedougwo gougwanara gini en eg bainyen nosahabi.

Sug len lodo dou enohob, kaba, mougt mera ingga en ainyen duhu gini. Doba eperwei dag anggur mohu gahaufo namcirohob. 9-10Dangga en eija sud hom geic mesouwa graga, hanoba en enara debin en, endagai: Astesda sud hom gougwanara, kaba, en eic anggur mohu gahaufo dou men lusud leg nosahabi. Dangga sug len leg gahaufo bedeinyum dauwohob, kaba, en emeic anggur mohu goubesebesa dou len lemeg ucan deit. Doba ban, kaba, ban bob geigouhw gin debahabi, ban bemeic dou len leg daiyamo gini. (En enara debin en dangga, anai en emecinaga dau sug duhu geperwei dag anggur mohu gin touwero. Doba sogougwir gedig len lagain duhu se dibecij, kaba, len dous eng lecinaga dau gini.)

11Dangga sug Yesus men logodeh leiya dau gin, kaba, len merdoc ebdebin an en dag en en dau bogo naugb eigdoc len dau meren gogom augwanohob. Anai en ens men gogouf cucugb ogdoc ganusbus gin eb ainyes dou lenohob. 12Sug len letara bouwohob, kaba, Yesus, dara mem an magtor, dara men logodeh, len laugwan leihwedig Kapernaum. Hanoba len ledeigtou sungga se lona aibibra toua.

Yesus ocirma lusud gedig len lohwara mera eisaugb dau Allah Men Tuari maga

(Mat. 21:12-13; Mrk. 11:15-17; Luk. 19:45-46)

13Sug leng Yahudi meren Lona Gohw Bedreg ebeij deinyorohob, kaba, Yesus en toua eisaugb dig Yerusalem naugb len lougwan ared debin meren lona gin toua. Anai se lona ingga, kaba, leng Yahudi merna eiseisan lona sug Allah esga len merjemouwer dau cinogo Mesir sug nosohob. 14Dangga sug en einesa Allah Men Tuariohob, kaba, en eiya, doba leng lohw sapi, dara domba, dara bohobei leigtou acec Allah Men Tuari maga naugb lauma aregoufu daum deb gini. Dara en eiya leng leic aregoufu laocagem len toua leigtou se meren boromei acec Allah Men Tuari maga ingga toua. 15Sug en eiya lenohob, kaba, en ecgun aigdaga meida. Hanoba en ocirma aremeta dag sapi dara domba len laugwan dau Allah men igtia gini. Dara en eineg boromei an leng leic aregoufu laocagem augwan etrij baisoboro namcir toua.

16Sug en ocirma leng lohw sapi, dara leng leic aregoufu laocagem dauwohob, kaba, en ocirma len lohw bohobei toua, endagai: Yen yeihwedan meijen bohobei augwan dau sugin namcir toua. Anai dan demouwan naugb yen yesinsin dan Indina Men Tuari gin dag tu gedig lusud lohwaresero.

17Sug Yesus men logodeh len leiya dau gini, kaba, len merdoc eiseisan areg Daud en erba Ugwaremer an deb nosohob, endagai:

Dan indoc gororougb aban Tuari dag smougb gait dan indoc mes an namcir.

18Doba leng Yahudi meren mougtir, kaba, len lenara gouji dou Yesus namcir, lendagai: Ban bens gansins ingma debin gin dou emen, dauntoba emen emecinaga dag ban aboho edeinyum naugb ban bocirma len gin dau Allah Men Tuari gina?

19Dangga Yesus enara bauni len merir ucugb, endagai: Sug yen yot Allah Men Tuari gini baisoboro, doba se lona homoi, kaba, dan dohud se mohw ucugwohob.

20Sug len louman dau gin, kaba, len lesbes an en namcir, lendagai: Dagiro, naugwe hang, ban ben dou emen dag ban bohud Tuari gini ucugb se lona homoi dousa? Anai sug emen emjemouwer lohud Tuari gini sug nosa, kaba, len lohud se arisogomoc sud hwai senggem edeisohob, gina?

21Doba tuari gedig Yesus eic bainyen dou len gin, kaba, en aimeh an enin maga dou len dous. 22Dangga edebeij lona sug Allah eigdoumesa Yesus dau gomom ucugwohob, kaba, men logodeh merdoc eiseisan dag aremer gin, kaba, Yesus en dou len sug nosohob. Hang areg lusud len log deb se Surad Injil Meb Mohon eisaugb en debohob, dara areg Yesus enin enara dou len, kaba, len merdoc ebdebin an gin augwan namcir.

23Dara irir sug Yesus en moongga se Yerusalem naugb Lona Gohw Bedreg gin, kaba, lusud leinyana merdoc ebdebin an en toua. Anai len leiya dau sug en eic ganusbus einyana dou lenohob. 24Doba Yesus, kaba, en medoc emeica lenero. Anai en ecinaga len laugwan merdoc mes asesohob. 25Dangga hang, emedeinyum naugb len gus lemens dau areg geb se lusud merdoc mes dou enero. Anai en eiya areg geb se lusud merdoc mes augwanohob.

Currently Selected:

YOHANES 2: INOSOU

Highlight

Copy