YOHANES 13

Yesus edu men logodeh merohora

1Lona hom dau sug leng Yahudi lougwan ared debin lona sug Allah esga len merjemouwer dau cinogo Mesir sug nosa, kaba, Yesus en ecinaga dag men lona ebeij deinyorohob naugb sug en ededau cinogo gini aud en Mena ucugb dangga. Dara en medoc emarges men logodeh debero. Doba en medoc gororougb len dau lona sug en ouci lenohob terimda edebeij lona sug en omom dau len toua.

2Dangga sug Yesus dara men logodeh len letara se loba, kaba, Bilis en outi se Simon meisi, moho Yudas dau cinogo Keriod, en medoc mes naugb en edehin magan Yesus dou leng Yahudi meren mougtir toua. 3Doba Yesus en medoc momogo an ginero. Anai en ecinaga dag en Mena eic goubesa mougb naugb augwan dou enohob. Dara en ecinaga dau sug en en dau Allah enohob, kaba, dag en emecicugb aud en toues. 4Dangga sug len letara, kaba, Yesus en eisa besa. Sug en eisa besohob, kaba, en eg men sansun gouji deb. Hanoba en eic minc hom naugb ahud meiyo maga. 5Sug en eic minc bahud meiyo magohob, kaba, en eir duhu deisa igdebir gouji hom. Hanoba en edu men logodeh merohora toua. Sug en edu len merohorohob, kaba, en eic minc graga dau meiyo maga naugb en agun duhu mohu dau len merohora toua.

6Doba sug Yesus edebeij irir Simon Petrus naugb en edu en mohora toua, kaba, Simon Petrus en dougwo en, endagai: Adehsud, banin eng bedu dan indohora ginei?

7Doba Yesus enara bauni en mer ucugb, endagai: Indan geicara dou yen gini, kaba, ban bemecinaga meijouhw augwan asesa touebma. Doba se lona daiyamo gacin, kaba, ban bemecinaga meijouhw eisaugb gin augwan dag misen toues.

8Doba Petrus oungben dougwo Yesus, endagai: Dan demouwan naugb ban bedu dan indohora namcirero.

Dangga Yesus auni ucugb dou en deit, endagai: Sug dan demedu ban abohora ginero, kaba, emedeinyum naugb ban bemedag indan logodeh touwero.

9Sug Simon Petrus ouman Yesus mer an dag gini, kaba, en enara dou en, endagai: Adehsud, gedangga, kaba, ban bemedu dan indohora dousero. Doba ban bedu dan insira dara dan indugt toua.

10Doba Yesus enara bauwun Petrus mer, endagai: Gareg en omceduhu ginohob, kaba, en emedu en maga dedemeda deitero. Doba en edu en mohora gini ucucugb dous, anai en maga gus augwan, kaba, ecabeci namcirohob. Dangga hang, iteitogin, kaba, sud hom dau yen enin dous eng ogoraba. Yeng gus, kaba, yen yaugwan gecabecohob. 11Yesus enara dag graga dou len, anai enin ecinaga sud hom gohw en dou len gus en moho dag misenohob. Hang en enara dou len dag sud hom dous eng ogoraba. Doba len gus laugwan lecabecohob.

12Sug Yesus edu men logodeh merohora dauwohob, kaba, en eg men sansun gouji ucugb. Hanoba en edeigtou se en mohw deit. Sug en edeigtouohob, kaba, en eijidougwo len, endagai: Yen meigdoc obgesa indan geicara dou yen gini men meijouhwohobei? Era anambei? 13Anai sug yen yenara dou dan, kaba, yen yeija dan indoho dag Guru. Dara yen yeigdoumesa dan indoho dag meijen Adehsud touohob. Areg yen yeija dan dag gin, kaba, augwan asesa dag misen namcir. Anai dan dedag sud hom gens meijouhw asesa dou yen. Dara dan dedag meijen mougt mera medam naugb dan darougb yen an ara ara gin touohob. 14Dangga hang, sug yen yeiya, doba meijen Guru, dara meijen Adehsud, en owun enin medoc mes arjaga anim naugb en edu yen meijohora dag ginohob, kaba, eigouhw naugb yen toua yowun yenin meigdoc mes arjaga naugb yen yedu yenin meijohora ucucugb toua. 15Anai indan geicara gin, kaba, dag ansins dou yen, dauntoba yen yesogwa deisa dan indohotimei mohw anim dag gin toua terimda. 16Anai sud hom gedag sogougb, kaba, en moho emedreg dau men mougtero. Dara sud hom gesai moro, kaba, en moho emedreg dau sud hom garougb en an touwero. Doba en moho eb tainya dous. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob. 17Dangga hang, sug yen yecinaga areg graga dag misenohob, kaba, eigouhw naugb yen yaimo augwan gini anim ucucugb terimda. Anai sug yen yeicara dag gin, kaba, Allah eic geigouhw dou yen toua namcir.

18Areg dan den dou yen gin, kaba, dan demen eisaugb yen yaugwanero. Anai sug dan douci yen sug nosa, kaba, dan decinaga areg geb se yen meigdoc mes augwan debohob. Hang dan decinaga dag sud hom dau yen, kaba, en eineg mohotimei an dan toua. Doba dan douci en, dauntoba esogwa deisa areg Daud en eiyagarij an se Surad Ugwaremer deb sug nosa touohob, endagai: Dan insi hom gedig en et ared dara dan, kaba, en eineg en mohotimei an dan ucugwohob.

19Dan dens dau gin augwan deb dou yen nosahabi. Dauntoba sug aremer augwan gini agunya ainyesohob, kaba, yen yod meijina debsa dan dag dan dedag Adehsud Geis Huhugb Sugraga gini. 20Dangga gareg en ebin sud hom gedig dan desa en aud en naugb en esai dan induro dou en, kaba, en ebin dan touohob. Dara gareg en ebin dan, kaba, en ebin sud hom gesa dan aud en gin touohob. Yen youman dan indir an areg dan den dou yen gin deigeigouhwahabi, anai augwan gini asesa dag misen namcirohob.

Yesus ens dau sug sud hom gehin magan en moho ainyes dou men logodeh gus

(Mat. 26:20-25; Mrk. 14:17-21; Luk. 22:21-23)

21Sug Yesus enara dag graga bouwa dou men logodehohob, kaba, en medoc momogo medam an gin deit. Hanoba en emenara dag aimeh dou len deitero. Doba en enara moho ainyes dou len namcir, endagai: Yen youman deigeigouhw deitahabi. Cum, kaba, sud hom dau yen en emohw dan dou len gus toues. Augwan gini asesa dag misen namcir.

22Sug men logodeh len louman dau gin, kaba, len leineg lauweilem ucucugb namcir. Anai len leija meruwesa dag gareg dau len en eineg mohotimei an Yesus gina?

23-24Dangga Simon Petrus en mesira bainyen dou godeh hom gedig en eigtou desij Yesus dig en mesira misen. Hanoba en enara dou en, endagai: Ban beijidougwo Yesus dag gareng dau maman en eineg mohotimei an en gina? En acgeij godeh hom gini naugb en eijidougwo Yesus an dangga, anai Yesus medoc gororougb godeh hom gin namcirohob.

25Dangga godeh hom gin, kaba, en ocuc desij Yesus. Sug en ocuc desij enohob, kaba, en eijidougwo en, endagai: Adehsud, gareg dau emen en eineg mohotimei an ban gina?

26Doba Yesus auni dou en, endagai: Ban beiya dau sug dan dogun roti mogo hom se mohu. Hanoba dan deic dou sud hom, kaba, sud hom, inggang, emeineg mohotimei an dans. Sug Yesus auni dag gin dou en dauwohob, kaba, en ekris roti naugb en ogun se mohu. Hanoba en eic an dou Simon meisi, moho Yudas dau cinogo Keriod, en toua.

27Sug Yesus eic roti dou Yudas inegohob, kaba, Setan outi se Yudas en medoc mes toua. Dangga hang, Yesus arougb en, endagai: Areg ban besedeb se ban abdoc mesohob, kaba, ban bemamsoho deitero. Doba ban beicara baimo dedemeda iteitogini an gin namcir.

28Doba areg Yesus arougb Yudas an gini, kaba, men logodeh gus gedig len leigtou desij en naugb letara, kaba, len lemecinaga meijouhw augwan asesero. 29Dangga hang, ligbum, kaba, len loudesa endag Yesus arougb Yudas naugb en edouma ara ara naugb Lona Gohw Bedreg gini. Dara ligbum deit, kaba, len loudesa Yesus arougb en naugb en edohw aregoufu dou leng merunggwereij. Anai Yudas gin eng en edag mougt naugb meren aregoufu augwan.

30Dangga sug Yudas eic roti dau Yesus mesira inegohob, kaba, en arges maga bec an namcir. Doba sug en eihwededau len gin, kaba, loba osunir touohob.

Yesus arougb men logodeh, dauntoba len merdoc gororougwim

31Sug Yudas eihwededau lenohob, kaba, Yesus enara dou men logodeh gus, endagai: Cum, kaba, Allah emeigdoumesa Lusud Meraguna Mebin dan indoho, beb ainyes deseino lusud. Dara dan demeigdoumesa en moho beb ainyes deseino lusud laugwan toues. 32Doba sug dan deigdoumesa Allah en moho beb ainyes deseino lusud dag ginohob, kaba, en emamsoho dan deb touwero. Doba en emeigdoumesa Lusud Meraguna Misen dan indoho beb ainyes ucugb deseino len laugwan dedemeda toues.

33Dan indihirija, dan demeigtou desij yen terberbahabero. Doba cum, kaba, dan deihwededau yenohob. Dangga yen yehilon dougwo dan, doba yen yemdeiya dan deitero. Dara ucina gedig dan deraga gini, kaba, yen yemaimo dan se ucina gin touwero. Gini aninim dag dan den dou leng Yahudi meren mougtir sug nosa touohob.

34Hang iteitogin, kaba, dan deic gomnomna menau dou yen dag gini: Yen meigdoc gororougwim namcir. Dara yen meigdoc gororougwim gin, kaba, aninim dag dan indoc gororougb yen sug nosa touohob. 35Anai sug yen meigdoc gororougwim dag gin ucucugb terimda, kaba, ens dou lusud laugwan dag yen yedag indan logodeh misen touohob.

Yesus ens dou Petrus dag en emaideido ens

(Mat. 26:31-35; Mrk. 14:27-31; Luk. 22:31-34)

36Sug Yesus men logodeh len louman dag Yesus emeigtou desij len terberbahabero, kaba, Simon Petrus eijidougwo en eisaugb gini, endagai: Adehsud, ban beihwedigero?

Doba Yesus auni dou en, endagai: Ucina gedig dan deraga gin, kaba, ban bemaimo dan se ginbuma. Doba se lona daiyamo gacin, kaba, ban beicara baimo dan se ucina gin toua.

37Dangga Petrus auni Yesus mer ucugb, endagai: Adehsud, dagiro, naugwe hang, ban ben dougwo dan naugb dan demaimo ban asa ucina gini iteitoginero. Anai dan desedeb naugb sug dan dohw dan indugt edug naugb banohob, gina?

38Doba Yesus auni en mer ucugb dou en, endagai: Ban bohw ban abugt edug aud gomom naugb danohobei? Naro, anai ban bouman deigeigouhwahabi. Sug berougwu emeba mer mougwa hombuma, kaba, ban baideido dougwo dan mougwa homoi icirohob. Augwan gini asesa dag misen namcir.

Currently Selected:

YOHANES 13: INOSOU

Highlight

Copy