KISAH Meijouhw
Meijouhw
Surad Kisah gini dau Yesus men logodeh meren geicara dau sug en ecicugb dig bogo, terimda Paulus edebeij cinogo Roma. Anai sug nosa, kaba, Lukas ens dau Yesus men geicara sug ebiji, terimda sug en eisaugb dig bogo dou mamanohob. Doba se men surad gini, kaba, en aulo eisaugb Yesus men logodeh sug len lesai en moro ogdoc Mena Gogoufu men goubesa dou maman deit, lebiji se Yerusalem, dara Yudea, dara Samaria, terimda edebeij cinogo moc ougdesa toua (1:8). Hang areg en og se men surad gini, kaba, dau sug lusud merdoc ebdebin an Krisdus, ebiji se leng Yahudi meren hancob, terimda edebeij cinogo moc ougdesa naugb len laugwan ladedim se Yesus men uro mes gouji hom gin toua. Dara en ouwan enara bad lusud merdoc mes se men surad gin toua. Dauntoba len lecinaga dag leng Krisden, kaba, lemeic gecgu dou leng Roma touwero. Doba sug len merdoc ebdebin an Yesus gin, kaba, esogwa deisa leng Yahudi meren gomnomna areg len log eisaugb en deb sug nosohob gin dous.
Dangga se surad gin, kaba, maman makeba dag homoi icira. Anai se moucina homoi gin, kaba, maman maiya dau sug Yesus men logodeh lesai Mer Geigouhw eisaugb en audud becinten dou lusud. Dara sug len louci lusud audud debinim toua. Hang aimougtut, kaba, maman maiya dau sug Yesus en eisaugb dig bogo dau men logodehohob, kaba, dag len lesai Mer Geigouhw eisaugb en dou lusud se Yerusalem nosahabi. Gin dauwohob, kaba, maman maiya dau sug len lesai Krisdus en moro gini bagaha becinten dou lusud se leng Palesdina meren hancob augwan. Ucan deit, kaba, maman maiya dau sug len lesai Mer Geigouhw eisaugb Krisdus gin dou leng leb se dum mohu medi dara leng leb acec laugwan, terimda bedebeij leng se cinogo Roma toua.
Dara aremer hom gedig Lukas en eigdoumesa moho agas se men surad gini, kaba, eisaugb Mena Gogoufu sug en einesa leng merdoc ebdebin an Yesus len merdoc mes se Yerusalem naugb en eic goubesa dou len se Lona Pentakosda toua. Dangga areg Lukas en og se men surad gin, kaba, en ens dau sug Mena Gogoufu eic goubesa dou goucimdeb an meren mougtir ucucugb terimda dou maman toua. Dara en ens dau areg lusud merdoc ebdebin an aimougtut gini ogdoc sug en og dau Petrus dara len gus meren gebedbed se men surad gin toua. Hang maman maiya dag areg len lesai gin, kaba, obesa namcir se sud hom yom merdoc dara leng se goucimdeb len laugwan toua.
Hancob Aududi:
Yesus esulou men logodeh mougwa hom deit. 1:1-14
Matias eperwei Yudas en mohw. 1:15-26
Yesus men logodeh lesai en moro se Yerusalem. 2:1—8:3
Yesus men logodeh lesai en moro se leng Yudea dara Samaria meren hancob. 8:4—12:25
Paulus esai Krisdus moro aimougtut. 13:1—14:28
Paulus ens meijouhw dou Majelis se Yerusalem. 15:1-35
Paulus esai Krisdus moro ucan deit. 15:36—18:22
Paulus esai Krisdus moro gedig mougwa homoi. 18:23—21:16
Len lahwan Paulus dig Roma. 21:17—28:31
Currently Selected:
KISAH Meijouhw: INOSOU
Highlight
Share
Copy
Want to have your highlights saved across all your devices? Sign up or sign in
ALLAH MEN GOS DOU MENAU © Indonesian Bible Society 1996, 2016