LUKAS 4
4
Yesus napurija daya Iblis
(Mat. 4:1-11; Mrk. 1:12-13)
1Yesus mahuang Roh Alatalla hang tawuk hanye nanan Hungei Yordan. Roh Alatalla nganyak hanye ma padang gurun. 2Hang yiru hanye napurija daya Iblis epat pulu anrau lawahni. Salawah yiru, hanye puang uweng nguta inun-inun. Balalu hang akhirni hanye kaingkam kajuju.
3Iblis kaeau ma hanye, “Angneh, hanyu Anak Alatalla? Hayu, huyu watu yiti jari rote.”
4Yesus nuing, “Hawuang Surat Barasis nasurat, ‘Murunsia puang tau welum ekat teka rote.’ ”
5Balalu Iblis nginsing Yesus ma unengan sa ambau, balalu erang kapangitup matei, Iblis nutui ma hanye katuluh karajaan hang dunia. 6“Katuluh kakuasaan anri katatauen, yiti sagar nasarahku ma hanyu,” eau Iblis ma Yesus, “Daya katuluhni haut naami ma aku nelang aku tau ngamini ma hieleh sa aku hamen ngami. 7Katuluh yiru sagar jari miliknu, amun hanyu ijuku nyambah aku.”
8Yesus nuing, “Hawuang Surat Barasis nasurat, ‘sambah Tuhan Alatallanu nelang layanni hanye.’ ”
9Balalu Iblis nginsing Yesus ma Yerusalem palus ngandak hanye hang ambau punsak Lewu Tuhan balalu kaeau ma hanye, “Angneh, hanyu Anak Alatalla? Hayu, itun teka yiti! 10Daya hawuang Surat Barasis nasurat, ‘Alatalla sagar nunyu kawan malekatni nyaga hanyu mamaeh.’ 11Nelang pada, ‘Kawan malekat sagar nyambut hanyu makai tangan here, nampan peenu sika puang pahantuk watu.’ ”
12Yesus nuing, “Hawuang Surat Barasis nasurat, ‘Ada murija Tuhan Alatallanu.’ ”
13Dami udi Iblis taduh murija Yesus makai kawan masam sara, hanye nanan Yesus nelang nganrei tawuk sa maeh.
Yesus nuku pagawianni hang Galilea
(Mat. 4:12-17; Mrk. 1:14-15)
14Udi yiru Yesus miulek ma Galilea; balalu hanye nakuasai daya Roh Alatalla. Kabar neu dirini tasiar ma katuluh daerah yiru. 15Hanye ngajar hang kawan lewu sumbayang, balalu katuluh ulun nawat hanye.
Yesus puang natarime hang Nazaret
(Mat. 13:53-58; Mrk. 6:1-6)
16Yesus tulak kamulek ma Nazaret, unengan nante-ngambau hanye. Hang anrau Sabat, manyu kabiasaanni hanye tulak ma lewu sumbayang. Hanye minri neu mambasa Surat Barasis, 17balalu naami ma hanye buku Nabi Yesaya. Hanye nguka walunan buku yiru, balalu habani ayat yiti,
18“Roh Tuhan naan hang aku,
daya hanye haut mentahbis aku pakai mambarita
Kabar Maeh ma ulun paua.
Hanye ngutus aku pakai iwara
kabebasan ma ulun tawanan
nelang iwara ma ulun pehe here sagar ware;
nampan mambebas ulun tatindas
19nelang iwara haut hampe wayahni Tuhan
nyalamat umatni.”
20Yesus malun buku yiru kamulek, palus ngampudini ma patugas, balalu maharung. Katuluh ulun hawuang lewu ibadat yiru ninung hanye. 21Balalu Yesus mulai pantane ma here, kala yiti, “Kawan ayat Surat Barasis yiti hang anrau yiti haut tulus hang tawuk naun nyanrengeini.”
22Kawan lengan sa naeauni maeh tatuu, hampe here mandam palus ngaruuh hanye. Here kaeau, “Angneh hanye yiti anak Yosef?”
23Balalu Yesus kaeau ma here, “Himat naun sagar makai paribasa yiti nadap aku, ‘Dokter, samare tenga dirinu raerai. Kaajaiban sa rengei kami naulahnu hang Kapernaum, ulah pada hang tumpuk natatnu raerai.’ ” 24Yesus kaeau kamulek, “Itung, puang uweng nabi sa nahormat hang tumpuk natatni raerai. 25Kude rengeileh: hang jaman Elia, tawuk puang uweng uran salawah telu satengah taun, balalu juju-lau tamam tuu hang litar daerah. Hang tawuk yiru rama kawan walu hang Israel. 26Biar kala yiru, Alatalla puang nunyu hi Elia tulak nunung sunah erang kaulun teka kawan walu yiru malengkan ekat nunung erang kaulun walu hang Sarfat hang daerah Sidon. 27Kala yiru pada hang jaman Nabi Elisa naan rama ulun hang Israel sa bakadan, kude puang sunah erang kaulun teka here sa nasamare, ekat hi Naaman ulun Siria yiru.”
28Katuluh ulun hang lewu sumbayang yiru sangit tuu tawuk karengei hal yiru. 29Here minri balalu ngusir Yesus ma luar tumpuk, palus nginsing hanye ma riring gunung, hang unengan tumpuk here nabangun. Here ngunu nyuun hanye mawuang geung. 30Kude Yesus ikalihik hang penah ulun rama yiru balalu tulak.
Ulun sa karasukan roh jahat
(Mrk. 1:21-28)
31Udi yiru Yesus tulak ma tumpuk Kapernaum hang Galilea. Hang yaru hanye ngajar kawan ulun hang anrau Sabat. 32Here mandam kadinung sarani ngajar, daya hanye bapaner anri bapangaruh. 33Hang yiru hang lewu sumbayang naan erang kaulun sa nakuasai daya roh jahat. Ulun yiru ikakehet nerau, 34“U Yesus, ulun Nazaret, inun sa hamen naulahnu ma kami? Hanyu hawi lepuh ngabinasa kami? Aku karasa hie hanyu: hanyu utusan sa barasis teka Alatalla!”
35“Suni!” pisuh Yesus ma roh jahat yiru, “Kaluar teka ulun yiti!” balalu roh jahat yiru manting ulun yiru hang hadapan here katuluh, udi yiru hanye kaluar teka ulun yiru anri puang ngahanangen hanye.
36Katuluh ulun wauh, palus kaeau anri sameh here, “Tuu tamam kawan lenganni. Daya makai pangaruh anri kuasa, hanye marentah kawan roh jahat kaluar, balalu here pada kaluar!” 37Balalu kabar neu Yesus tasiar litar hang wilayah yiru.
Yesus nyamare rama ulun
(Mat. 8:14-17; Mrk. 1:29-34)
38Yesus nanan lewu sumbayang yiru, balalu tulak ma lewu Simon. Kasian Simon sa wawei ganjah mekum, balalu kawan ulun yiru iwara hal yiru ma Yesus. 39Yesus tulak ma unengan paanrean ulun yiru, balalu ngusir ekumni yiru. Ekum yiru wawai, balalu kasian Simon sa wawei yiru palus ambuan balalu malayanni here.
40Tawuk mate anrau haut leteng, katuluh ulun hawi nunung Yesus nginsing kawan pulaksanaini sa ngaret kawan masam panyakit. Yesus hanrapak tanganni hang ambau here tiap tenga here palus nyamare here. 41Kawan roh jahat pada kaluar teka rama ulun, nelang anri lengan mehet kaeau, “Hanyu Anak Alatalla!”
Kude Yesus misuh here nelang puang kalewa here bapaner, daya here karasa samula hanye Raja Panyalamat.
Yesus bakhotbah hawuang kawan lewu sumbayang
(Mrk. 1:35-39)
42Hang tawuk mate anrau mulai hulet Yesus nanan tumpuk yiru balalu tulak ma isa unengan suni. Ulun rama mulai ngantara hanye, balalu here panalu hanye, here ngulah akal nampan hanye puang nanan here. 43Kude Yesus kaeau, “Kabar Maeh neu kala awe Alatalla marentah harus aku iwara pada hang kawan tumpuk lain, daya neu yiru Alatalla ngutus aku ma dunia.”
44Daya sabab yiru Yesus bakhotbah hawuang kawan lewu sumbayang hang litar tane Yudea.
Currently Selected:
LUKAS 4: MHY
Highlight
Share
Copy
Want to have your highlights saved across all your devices? Sign up or sign in
@ LAI 1999 Indonesian Bible Society (Lembaga Alkitab Indonesia)
