YOHANES 10

Rarapisan neu babiri anri pakatikni

1“Himat tuu eauku yiti: Ulun sa masuk mawuang kandang babiri nangkah pagar, nelang puang mitah wanawang, kude mambai mitah lalan lain, ulun yiru pangalat nelang parampok. 2Kude ulun sa masuk teka wanawang, hanyeyiru pakatik babiri. 3Panyaga kandang nguka wanawang ma hanye balalu kawan babiri ngapung lenganni tawuk hanye nerau here anri ngantuh ngaran here isa mangisa nelang ngendei here ma luar. 4Udi kawan babiri yiru nainsing ma luar, pakatik yiru takia hang hadapan nelang kawan babiri yiru naharak hanye daya here kataru lenganni. 5Here puang hakun umba ulun lain, likan here nempat teka ulun yiru daya here puang kataru lenganni.”

6Yesus nyarita rarapisan yiru, kude here puang kataru inun sa nabahumni.

Yesus, pakatik sa maeh

7Hinra lagi Yesus kaeau, “Himat tuu eauku yiti: Aku yiti wanawang ma kawan babiri. 8Katuluh sa hawi kapihuan aku, hanyeyiru maling nelang parampok, kude kawan babiri puang nyanrengei lengan here. 9Aku yiti wanawang. Hie masuk mitah aku sagar salamat; hanye kaluar masuk nelang kaiyuh kutaen. 10Maling hawi ekat lepuh ngalat, lepuh munu nelang nanrusak. Kude aku hawi nampan murunsia kaiyuh pamelum-welum diwian.

11Aku yiti pakatik sa maeh. Pakatik sa maeh nyarah hewukni ma kawan babirini. 12Ulun upaan sa puang pakatik nelang puang pada ampun kawan babiri yiru, sagar nempat nanan kawan babiri amun hanye kadinung sarigala hawi. Balalu kawan babiri napapah nelang pasai-pau daya sarigala. 13Ulun upaan yiru nempat, daya hanye bagawi ekat ngaiyuh upa. Hanye puang paduli ma kawan babiri yiru. 14-15Aku yiti pakatik sa maeh. Sameh kala Ambah kataru aku nelang aku kataru Ambah, kalayiru pada aku kataru kawan babiriku nelang here pada kataru aku. Aku nyarah hewukku gana here. 16Magun naan babiri lain sa pada watku, kude puang tamasuk hang sawayan babiri yiti. Here pada harus insingku nelang here sagar nyarengei lenganku. Here katuluh sagar jari isa sawayan nelang isa pakatik.

17Ambah sinta aku daya aku nyarah hewukku, nampan narimeni kamulek. 18Puang uweng sunah erang kaulun kaiyuh ngalapni teka aku. Aku nyarah hewukku manyu kabahumenku raerai. Aku bakuasa nyarahni nelang bakuasa ngalapni lagi. Yiru tugas sa natarimeku teka Ambahku.”

19Daya Yesus kaeau kala yiru, kawan ulun Yahudi mulai basual. 20Rama sa kaeau, “Hanye karasukan setan! Hanye rapui! Ma inun naun nyanrengei hanye?”

21Kude naan pada sa kaeau, “Ulun sa karasukan setan puang bapaner kalayiru! Inun setan kaiyuh ngulah ulun pehe tau kadinung?”

Ulun Yahudi puang hamen narime Yesus

22Hang Yerusalem ulun rama rahat maraya anrau Parasmian Lewu Tuhan. Tawuk yiru ganjah musim dingin. 23Yesus rahat takia hang sarambi Salomo hawuang Lewu Tuhan, 24tawuk kawan ulun Yahudi hawi bakumpul nunung Yesus. Here kaeau, “Hampe awe hanyu maladar kami ragu-ragu? Wara tarang tarus, amun hanyu tuu-tuu Raja Panyalamat.”

25Yesus nuing, “Haut waraku ma naun, kude naun puang parisaya. Kawan pagawian sa naulahku makai ngaran Ambahku, ngami bukti neu aku. 26Naun puang parisaya daya naun puang tamasuk kawan babiriku. 27Kawan babiriku nyarengei lenganku. Aku kataru here, nelang here naharak aku. 28Aku ngami ma here pamelum sajati palus kalalawah, nelang hampe kalalawahni here puang sagar binasa. Puang sunah erang kaulun kaiyuh hanrampas here teka tanganku. 29Ambahku haut ngami here ma aku malabihi teka ala katantuluh. Nelang puang uweng sunah erang kaulun kaiyuh hanrampas here teka tangan Ambah. 30Aku anri Ambah samula isa.”

31Balalu kawan ulun Yahudi ngutik watu lagi ngunu medak Yesus. 32Kude Yesus kaeau ma here, “Naun haut kadinung aku nampalus wahai pagawian sa maeh sa natugas Ambah ma aku. Teka katuluh pagawian yiru, saawe sa ngulah naun yiti ngunu medak aku makai watu?”

33Kawan ulun Yahudi yiru nuing, “Puang daya pagawiannu sa maeh yiru kami ngunu medak hanyu makai watu, kude daya hanyu nangkurun Alatalla. Hanyu erang kaulun murunsia, hamen nyanyari dirinu jari Alatalla.”

34Balalu Yesus kaeau, “Angneh hawuang Buku Hukum naun nasurat: Alatalla kaeau, ‘Naun yiti alatalla?’ 35Takam karasa inun sa nasurat hawuang Surat Barasis palus ma kalalawahni. Jari, amun Alatalla ngantuh ‘alatalla’ ma kawan ulun sa narime lenganni, 36wuah inun naun kaeau aku mahina Alatalla daya aku kaeau aku Anak Alatalla? Padahal aku napidi daya Ambah nelang nautus ma dunia. 37Amun aku puang nampalus pagawian sa natugas Ambah, ada parisaya ma aku. 38Kude daya aku nampalusni, parisayaleh inun sa naulahku, biar naun puang hamen parisaya ma aku. Anri kalayiru naun karasa nelang kataru Ambah tatap mira anri aku, nelang aku tatap mira anri Ambah.”

39Here ngakali lagi nyamba Yesus, kude hanye bakilah teka here.

40Yesus mulek ma sabarang Hungei Yordan, hang unengan Yohanes hantek hie mambaptis, balalu muneng hang yaru. 41Rama ulun hawi nunung hanye. Here kaeau, “Hi Yohanes puang ngulah kawan kaajaiban, kude katuluh inun sa naeauni neu ulun yiti bujur.” 42Balalu rama ulun hang yaru parisaya ma Yesus.

Currently Selected:

YOHANES 10: MHY

Highlight

Copy