LUKAS 22
22
Nipassikongkolangi Isa
(Mat. 26:1-5; Mrk. 14:1-2; Yoh. 11:45-53)
1 #
Kal. 12:1-27
Anjo wattua a'reppese'mi allo Passua'-suarranna Roti Tenaya Nammake Pa'gambang, iamintu niarenga allo Paska. 2Na anjo wattua a'boyami akkala' imang-imang kapalaya siagang guru-guru agamaya, antekamma nakkulle nabuno Isa. Mingka eroki nabuno cokko-cokko, lanri mallaki ke'nanga ri tau jaia.
Amminawangi sikongkolo' Yudas
(Mat. 26:14-16; Mrk. 14:10-11)
3Antama'mi Billisika ri kalenna Yudas Iskariot, iamintu kalase'renna anjo sampuloa anrua ana' gurunNa Isa. 4Jari a'lampami Yudas mange sipa'bicara siagang imang-imang kapalaya kammayatompa sikamma kapala pangawalaka ri Balla'Na Batara. Nabicarami ke'nanga angkanaya antekamma batena Yudas ampassareangi Isa mae ri ke'nanga. 5Teaimi sipato' rannuna ke'nanga, siagang nijanjimi lanisare doe' Yudas ri ke'nanga. 6Ammiomi Yudas. Appakkaramulami a'boya wattu baji' untu' ampassareangi Isa mae ri ke'nanga, mingka tanaassengai tau jaia.
Appasadia kanre Paska
(Mat. 26:17-25; Mrk. 14:12-21; Yoh. 13:21-30)
7Narapi'mi allonna nisamballe gimbala' lanikanrea ri allo Paskaya, lalang ri Passua'-suarrang Roti Tenaya Nammake Pa'gambang. 8Jari Nakanamo Isa ri Petrus siagang Yohanes, “A'lampa mako ampasadiai kanre Paska lanikanrea.”
9Akkuta'nammi ke'nanga angkana, “Kemae Kikellai lanipasadia?”
10Appialimi Isa Nakana, “Punna antamakko ri kotaya, nia' sitau bura'ne lanuagang assibuntulu', sitabanga angngerang je'ne' lalang bongki. Pinawammi mange ri balla' lanapantamakkia. 11Nampa nupauang patanna anjo ballaka angkana: Nakana Gurua, ‘Kemae tampa' eroka Kupake angnganre Paska siagang ana'-ana' gurungKu?’ 12Lanapicinikiangko sallang anjo patanna balla', se're kamara' lompo irate ri lotenga, sukkuka pakkakasa'na. Pasadia ngasemmi niparalluanga anjoreng.”
13A'lampami Petrus siagang Yohanes, nanagappa tojemmo anjo tampaka, sicoco' sikali sangkamma le'baka Napau Isa. Napasadiami ke'nanga anjo kanre Paskaya.
ParjamuanNa Batara
(Mat. 26:26-30; Mrk. 14:22-26; 1Kor. 11:23-25)
14Ri wattunna narapi'mo wattunna lanikanre anjo kanre Paskaya, ammempomi Isa siagang ana'-ana' gurunNa ri mejang parjamuanga. 15Nampa Nakana ri ana'-ana' gurunNa, “Ero' duduA' angnganre kanre Paska siagang ikau ngaseng ri tenanapa Kupisa'ringi passessaya! 16Nasaba', patappa'mi angkanaya: Tenamo nalaKukanre pole anne kanre Paskaya sa'genna nipa'nyata battuanna ri Lino Beruna Allata'ala.”
17Le'baki anjo Naangka'mi Isa piala anggoroka, nampa appala' sukkuru' ri Allata'ala. Nampa Nakana, “Allemi anne, nanubage-bage; 18nasaba' parallui nuasseng angkanaya: appakkaramula ri kamma-kammaya anne, tenamo nalaKuinung pole anne anggoroka, sa'genna Napa'nyata tojeng-tojemmo koasaNa Allata'ala.”
19Le'baki anjo angngallemi roti Isa. Na le'ba'na appala' sukkuru', Napue-puemi anjo rotia siagang limanNa, nampa Napassareang mae ri ke'nanga, na Nakana, “Iaminne batangkalengKu [nipassareanga untu' ikau ngaseng. Gaukammi anne kammaya, untu' a'jari pangngu'rangi mae ri Nakke.” 20#Yer. 31:31-34 Kamma tomminjo, ri le'ba'na nakanre ke'nanga anjo rotia, Napassareammi anjo piala anggoroka mae ri ana'-ana' gurunNa, na Nakana, “Anne pialaya iami a'jari pammatei parjanjiang beruNa Allata'ala, nipa'jari assaya siagang cerakKu, iamintu cera' nipasolonga untu' ikau ngaseng.”]
21 #
Pam. 41:10
“Mingka ciniki! Anjo tau eroka ambalukangA' niaki anrinni siagang iNakke! 22Lamate memangi Ana' Ma'rupataua situru' le'baka Napattantu Allata'ala; mingka cilakami anjo tau ambalukangai KalengKu!”
23Jari appakkaramulami assikuta'-kuta'nang ke'nanga, ero' naasseng angkanaya inaimi kalase'renna ke'nanga langgaukangi anjo panggaukang kammaya.
Assigea'-geaki ana'-ana' gurunNa Isa angkana nai kaminang lompo
24 #
Mat. 18:1; Mrk. 9:34; Luk. 9:46 A'gea'-gea'mi ana'-ana' gurunNa Isa, passabakkang inai ri ke'nanga lanipa'jari kaminang nipakala'biri' sallang. 25#Mat. 20:25-27; Mrk. 10:42-44 Nakanamo Isa ri ke'nanga, “Sikamma karaenna bansa kapereka najallakkangi ra'ya'na, na sikamma tukoasana nigallaraki ‘Pajaga Ra'ya'’. 26#Mat. 23:11; Mrk. 9:35 Mingka ikau ngaseng, takkulleako kamma anjo. Passangalinna, inai-nai ero' kaminang nipakala'biri' ri kau musti napa'jari kalenna kaminang tuna. Siagang inai-nai la'jari pamimping, musti a'jari sangkammai palayang. 27#Yoh. 13:12-15 Kereanga la'bi la'biri'?: tau ammempoa angnganre ri mejanga, yareka tau a'jari palayanga mae ri anjo tau angnganrea? Tantu anjo tau ammempoa angnganre. Mingka nia'Ma' ri tangnga-tangnganu a'jari palayang.
28Nuagang ngasemMa' ilalang sikontu kasusaangKu. 29Sangkamma nasareMa' pangngellai ManggeKu ammarenta, sangkamma tommi anjo, laKusare tongko pangngellai kammaya. 30#Mat. 19:28 Lanri kammana, akkulle tommako amminawang a'rannu-rannu siagang iNakke ri wattungKu a'jari Karaeng. Siagang lammempo ngaseng tommako irate ri sampuloa anrua empoang kala'birang, untu' ammarenta ri sampuloa anrua bansa Israel.”
Lanisassali Isa ri Petrus
(Mat. 26:31-35; Mrk. 14:27-31; Yoh. 13:36-38)
31Nakanamo Isa mae ri Simon, “O Simon, o Simon, pilangngeri sai! Nikellaimi Billisika anso'ri ngasengko. Sangkamma punna nipasisa'la' asea siagang awanna, kamma tomminjo lanipasisa'laki bajika siagang kodia. 32Mingka le'ba' mako Kupappala' doangang Simon, sollanna jarre' tappa'nu. Na punna ammotere' mako pole mae ri Nakke, musti nupakajarreki tappa'na sikamma sari'battannu.”
33Appialimi Petrus nakana, “O, Batara, sadiama' antama' ri tarungkua siagang assikamateang siagang iKatte!”
34Mingka Nakanamo Isa, “Tappa' mako Petrus, angkanaya tenapa nattingkoko janganga, nanupintallummo ansassaliA'.”
Pammoneang doe', koccikang siagang pa'dang
35 #
Mat. 10:9-10; Mrk. 6:8-9; Luk. 9:3, 10:4 Le'baki anjo Nakanamo Isa ri ke'nanga, “Pirangalloang, ri wattunnu Kusuro a'lampa, tena Kukellaiko angngerang pammoneang doe', kocikang yareka sapatu. Apaka kakurangangko anjo wattua?”
Appialimi ke'nanga angkana, “Tena!”
36Nakanamo pole Isa, “Mingka kamma-kamma anne, inai-nai nia' pammoneang doe'na, yareka kocikanna, musti naerangi; siagang inai-nai tena pa'danna, musti nabalukangi jubana, nammalli pa'dang. 37#Yes. 53:12 Nasaba' patappaki anne nipaua lalang ri Kittaka angkanaya, ‘Lanibilangi tau ja'dala'.’ Iaminne musti lakajariang ri KalengKu. Nasaba' apa tattulisika lalang ri Kittaka passala' ri Nakke, iaminne kajariang ri kamma-kammaya anne.”
38Nakanamo ana'-ana' gurunNa Isa, “O Batara, Kiciniki, anrinni nia' rua pa'dang.”
Appialimi Isa Nakana, “Sikamma monjo.”
Appala' doangi Isa ri Bonto Zaitun
(Mat. 26:36-46; Mrk. 14:32-42)
39Le'baki anjo Nabokoimi Isa anjo kotaya, nampa sangkamma biasa, a'lampami siagang ana'-ana' gurunNa mange ri Bonto Zaitun. 40Ri wattunna battu mange anjoreng, Nakanamo mae ri ana'-ana' gurunNa, “Appala' doang ngasengko, sollanna tena nugaukangi dosaya punna nukasiaki paccobaya.”
41Nampa a'lampa Kale-kalenNa kira-kira nia' sipasambila batu bellana battu ri ke'nanga. 42Battui mange anjoreng, akkulantu'mi nampa appala' doang Nakana, “O Bapa', punna akkulleja, Kipakabellai anne passessa musti Kukasiaka. Mingka teaKi' naerokKu anjari, passangalinna erotTamo bawang anjari.” [43-44Sanna'mi sessana pa'mai'Na Isa. Ammatti'-matti'mi songo'Na naung ri buttaya, sangkamma cera'. Jari pila' attojeng-tojemmi appala' doang. Nampa nia'mo sitau malaeka' battu ampakajarreki.]
45Le'baki appala' doang, ammotere'mi Isa mae ri ana'-ana' gurunNa. Narapikammi ana'-ana' gurunNa attinro ngaseng napakamma sanna' ngaseng mangnganna. 46Nakanamo ri ke'nanga, “Angngapa nuttinro ngaseng? Ambangung ngaseng mako nai' appala' doang, sollanna tena natabako paccoba.”
Nijakkalaki Isa
(Mat. 26:47-56; Mrk. 14:43-50; Yoh. 18:3-11)
47Lalang a'bicarana ija Isa, nia'mo sijaiang tau battu. Anjo tau jaia Yudas ampimpingi, iamintu kalase'renna ana'-ana' gurunNa Isa. Battumi Yudas ambaui Isa. 48Mingka Nakanamo Isa ri ia, “O Yudas, iaminne nubauku nupake ambalukangi Ana' Ma'rupataua?”
49Nacini'na ana'-ana' gurunNa Isa anjo kajarianga, nakanamo ke'nanga, “O Batara, antekamma! Nite'ba'mi pa'dang ke'nanga?” 50Nampa nia'mo kalase'renna ke'nanga ante'baki pa'dang anjo atanna imang lompoa niaka battu, sa'genna kaccili' tolinna ri kananga.
51Mingka Nakanamo Isa, “Sikamma monjo!” Nampa Najama tolinna anjo taua, siagang Naballei na'jari baji' ammotere'.
52Le'baki anjo Nakanamo ri imang-imang kapalaya siagang perwira-perwira pangawala'na Balla'Na Batara, kammayatompa ri pamimping-pamimpinna tu Yahudi battua ero' anjakkalaki, “Apa nucini' tau ja'dalakKa', sa'gennu battu ngaseng angngerang pa'dang siagang palu-palu ero' anjakkalakKa'? 53#Luk. 19:47, 21:37 Allo-alloKu nia' siagang ikau ngaseng lalang ri Balla'Na Batara, natena nujakkalaKa'. Mingka iaminne wattunnu lappanggaukang ngaseng. Iaminne wattunna tau koasaya ri sassanga lappanggaukang.”
Nisassali Isa ri Petrus
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54Nijakkala'mi Isa ri ke'nanga nampa nierang mange ri balla'na imang lompoa. Amminawang bokomi Petrus battu bella. 55Ri tangnga-tangngana paranglakkenga niparinrami pepeka. Mange tommi anjoreng Petrus; ammempomi siagang tau jaia ri ampi'na anjo pepeka. 56Nia'mo sitau baine palayang anciniki Petrus ammempo ri birinna anjo pepeka; nijanjammi Petrus ri anjo baine palayanga. Nampa nakana anjo baine palayanga, “Anne taua siagang tongi Isa sumpaeng!”
57Mingka assassala'mi Petrus. Nakana, “Tena sikali nakuassengi anjo taua!”
58Tena nasallo, nia'mo pole tau maraeng anciniki Petrus, siagang nakana, “Ikau pole, kalase'rennako ke'nanga!”
Mingka appialimi Petrus nakana, “Tena, teai inakke!”
59Kira-kira sijang ribokoanganna, nia'mo pole tau maraengang anjo'joki tojengi nakana, “Memang! Ana' gurunNa Isa anne taua, nasaba' tu battu tongi ri Galilea!”
60Mingka appialimi Petrus nakana, “Apa nukana? Tena nakupahangi antu nupakkanaya!”
Anjo wattua, sitabanna a'bicara ija Petrus, attingkokomi janganga. 61Assailemi Isa mae ri Petrus. Nau'rangimi Petrus apa le'baka Napau Isa ri ia angkanaya, “Ri tenanapa nattingkoko janganga, pintallumMa' nusassali.” 62Jari assulukammi Petrus, nangngarru'-arru' tassunge'nge'.
Nipare' karek-karenangi siagang niba'ji Isa
(Mat. 26:67-68; Mrk. 14:65)
63Nipare' karek-karenammi siagang niba'jimi Isa ri sikamma tau anjagaiyai. 64Nitongkokangi matanNa, nampa nikuta'nang, angkana, “Coba sai tappu, inai amba'jiKo?” 65Jai pole kana-kana maraeng napau ke'nanga anghina-hinai Isa.
Nierangi Isa mange ri Pangadelang Agamaya
(Mat. 26:59-66; Mrk. 14:55-64; Yoh. 18:19-24)
66Ri bari'basa'na, a'rappungammi pamimping-pamimpinna tu Yahudia, imang-imang kapalaya, siagang guru-guru agamaya, nampa naerang Isa mange ri dallekanna Pangadelang Agamaya. 67Nakanamo ke'nanga ri Ia, “Pau sai bedeng, maka iKaumi Karaeng Mappasalamaka?”
Appialimi Isa Nakana, “Manna Kupauangko tena ngaseng tonja nulatappa'. 68Siagang manna akkuta'nangA' ri kau ngaseng tena ngaseng tonja nulappiali. 69Mingka appakkaramula ri kamma-kammaya anne lammempomi Ana' Ma'rupataua ri sa'ri kananNa#Manuru' pangngadakkanna tu Yahudia, tau ammempoa ri sa'ri kanang nisarei kala'birang siagang kakoasang. Allata'ala Kaminang Koasaya.”
70Nakana ngasemmo ke'nanga, “Jari punna kamma Ana'NaKo Allata'ala?”
Appialimi Isa Nakana, “Kammaminjo kanannu ngaseng.”
71Jari nakanamo ke'nanga, “Tenamo naparallu sa'bi! Nilangngere'mi KalenNa ampaui!”
Currently Selected:
LUKAS 22: MAK
Highlight
Share
Copy
Want to have your highlights saved across all your devices? Sign up or sign in
@LAI, 1999
