PA'JARIANG 35

A'lampai Yakub siagang rombonganna mange ri Betel

1 # Pa'j. 28:11-17 Ri se'reang allo Nakanamo Allata'ala ri Yakub, “INakkemi Allata'ala le'baka ampappicinikangi KalengKu mae ri kau ri wattunnu lari battu ri daennu Esau. A'lampamako mange ri Betel. Ammantang mako anjoreng, siagang ambangung mako tampa' pakkoro'bangngang untu' iNakke.”

2-3Nakanamo Yakub mae ri kaluargana siagang sikontu tau naaganga, “La'lampaki' anrinni nampa mangeki' ri Betel. Lambangunga' anjoreng tampa' pakkoro'bangngang untu' Allata'ala, Ia le'baka antulunga' ri wattungku lalang kasukkarang siagang le'baka anjagaia' manna kemae lampaku. Jari pela' ngasengi sikontu patung-patung maraenga ia niaka ri kau. Tangkasi ngasengi kalennu siagang pakei pakeang tangkasa'nu.” 4Nampa napassareammo ke'nanga sikamma patung niaka ri ke'nanga mae ri Yakub, iamintu patung rewata tumaraenga. Kammayatompa anting-antinna ke'nanga napassareang ngaseng tommi. Yangasenna anjo barang-barang kammaya nalamungammi Yakub ri rawanganna poko' kayu lompoa ri ampi'na kota Sikhem.

5Ri wattu a'lampana Yakub siagang rombonganna, nipibattuimi malla' ri Allata'ala sikontu tau niaka ri anjo kotaya, sa'genna tena nabarani ke'nanga angngondangi Yakub siagang rombonganna. 6Nampa battumo ke'nanga mange ri butta Kanaan, ri kota Betel ia niarenga Lus riolo. 7Ambangummi Yakub anjoreng se're tampa' pakkoro'bangngang nampa naareng anjo tampaka “El-Betel”, lanri le'ba'na Napappicinikang KalenNa Allata'ala ri ia anjoreng, ri wattu larina battu ri daenna. 8Anjoreng tommi mate Debora, iamintu baine angngurusukai Ribka. Nitarawammi ri rawanganna poko' kayu lompoa ri bageang timboranna anjo kotaya. Iaminjo saba'na naniareng anjo poko' kayua “Poko' Pangngarrukang”.

Allata'ala Nabarakkaki Yakub ri Betel

9Ammotere'na Yakub battu ri Mesopotamia, Napappicinikammi pole KalenNa Allata'ala ri ia siagang nibarakkakimi. 10#Pa'j. 32:28 Nakanamo Allata'ala ri ia, “Tenamo nanuniareng Yakub, mingka Israel.” Kammaminjo naniaremmo Israel ri Allata'ala. 11#Pa'j. 17:4-8 Nampa Nakana pole Allata'ala, “INakkemi Allata'ala Kaminang Koasaya. Ammana'-mana' mako siagang accucu-cucu mako jai. Ikaumi lanakabattui bansa-bansa siagang la'jari boena sikamma karaenga. 12Pa'rasangang le'baka Kupassareang mae ri Abraham siagang Ishak, laKupassareangi mae ri turungannu.” 13Le'baki anjo Nabokoimi Allata'ala anjo Yakub. 14#Pa'j. 28:18-19 Ambangummi se're batu pangngu'rangi Yakub ri anjo tampa'Na Allata'ala a'bicara mae ri Yakub. Nampa napassareang anjo batua mae ri Allata'ala siagang natirikimi anggoro' na minynya' zaitun mabau' irateanna. 15Naaremmi anjo tampaka “Betel”.

Matei Rahel

16Le'baki anjo a'lampami Yakub siagang rombonganna ambokoi Betel. Ri wattu bellana ija sike'de' battu ri Efrata, narapi'mi wattunna Rahel ammana'. Mingka sukkaraki kalassukanna anjo ana'na. 17Nalanri sanna' sessana ri wattu ammana'na, nakanamo sanroa ri ia, “Pakajarreki nyawanu, Rahel, bura'ne pole ana'nu.” 18Mingka a'birimmi narapi' a'jala'na Rahel. Na ri wattu ero'namo tappu nyawana, naaremmi anjo anaka Ben-Oni,#Ben-Oni: Lalang bicara Ibrani battuanna, “ana' bura'ne kasessangku”. mingka niarengi ri manggena Benyamin.#Benyamin: Lalang bicara Ibrani battuanna, “ana' bura'ne laupaka”.

19Matenamo Rahel, nitarawammi ri biring agang mangea ri Efrata, ia niarenga kamma-kamma anne Betlehem. 20Appaentemmi Yakub se're batu pangngu'rangi anjoreng, na sa'genna kamma-kamma anne anjo kuburu'na Rahel tuli nibatei ri anjo batua. 21Le'baki anjo napannarrusu'mi jappana Yakub, nampa appaenteng kema ri se'reang tampa' allaloa ri menara niarenga Eder. 22#Pa'j. 49:4 Lalang nia'na ke'nanga ri anjo tampaka, assikatinroammi Bilha siagang Ruben, anjo baine piarana manggena. Anne passalaka nalangngereki Yakub, siagang sanna'mi larrona napakamma.

Sikamma ana'na Yakub

(1Pat. 2:1-2)

Nia' sampulo anrua ana' bura'nena Yakub. 23Ia ana' battua ri Lea iamintu Ruben (ana' bungasa'na Yakub), Simeon, Lewi, Yehuda, Isakhar, siagang Zebulon. 24Ana'-ana' battua ri Rahel iamintu Yusuf siagang Benyamin. 25Ana'-ana' battua ri Bilha, surona Rahel, iamintu Dan siagang Naftali. 26Ana'-ana' battua ri Zilpa, surona Lea, iamintu Gad siagang Asyer. Anjo anaka anjorengi ri Mesopotamia nilassukang.

Matei Ishak

27 # Pa'j. 13:18 Nampa battumi Yakub mange ri manggena, iamintu Ishak, ri tampa' pammantanganna ri Mamre ri ampi'na Hebron. (Toana, iamintu Abraham, anjoreng tongi riolo ammantang.) 28-29Lalang umuru' sannakamo toana, iamintu sibilangngang assagantujupulo taung, matemi Ishak. Nampa nitarawammo ri Esau siagang Yakub, siagang sikamma ana'na ke'nanga.

Currently Selected:

PA'JARIANG 35: MAK

Highlight

Copy