NAHUM 2
2
Niniwe gaggar
1He, Niniwe, mara edhingngagi!
Se arosaga ba'na la dhateng!
Jaga teng-binteng partahanan!
Abassagi rong-lorongnga!
Mara asadhiya se aperranga.
(2Onggu, PANGERAN pajat mabaliya kajaja'anna Isra'il, sopaja daddiya akantha lamba'na, sabellunna erampok bi' so-mosona.)
3Tantarana moso ngangguy tameng mera,
saragamma barnana akantha dhara.
Moso la sadhiya se nyargebba.
Karetana akantha apoy rap-galiraban.
Jaranna padha ngalengsang.
4E lorong, ta-karetana maju ce' santa'na,
saleng serser e lapangan.
Katonna akantha obur se rabbang,
arebbu' adha', jang ceppeddan akantha kelap.
5Para parwira esoro maju;
e bakto nyerbu dhung-tatandhung.
Ru-kaburu berka' ka geddhungnga kottha,
pakakas se eangguya arosak epamanjeng bakto jareya keya.
6Bang-labangnga aeng e sakabbinna songay la abukka',
laju baridhu karaton saessena.
7Rato ekenneng pega',
para emban padha nanges abukbuk dhadha,
serrona akantha mano' dara.
8Ra'yat Niniwe padha buru,
akantha aeng se ngalowa dhari tanggul se robbu.
Badha se ra'-era'an, “Ambu! Ambu!” –
tape tadha' settonga se endha' abali.
9Rampas emmas ban salakana!
Kottha reya possa' ban arta!
10Niniwe la ancor, seppe ban kajal.
Dhari tako'na ate daddi tabar.
To'ot daddi lemmes sarta ngetter.
Mowana oreng kabbi padha pocet.
11E dhimma kottha jareya sateya?
Kottha se akantha guwa kennengnganna lebunna macan?
Kennengnganna dhu'-budhu'na macan epakane,
kennengngan tojjuwanna macan lake' ban bine',
kennengngan se aman monggu ka na'-ana'na?
12Lamba' e dhissa' macan nyeppa' mangsana,
se pas ebit-sebbit menangka kakanna ana' binena.
Macan jareya mossa'e rongkangnga
ban bit-sebbidanna dagingnga.
13“Sengko' reya mosona ba'na,” dhabuna PANGERAN Se Mahakobasa. “Ta-karetana ba'na bi' Sengko' eobbara epatadha'a karena. Rit-parjuridda ba'na bakal mateya e paperrangan, ban Sengko' ngala'a sabarang andhi'na ba'na ollena ngala' dhari oreng laen. Parmenta'an-parmenta'anna para otosanna ba'na se maksa bakal ta' ekaedhinga oreng pole.”
Currently Selected:
NAHUM 2: MAD
Highlight
Share
Copy
Want to have your highlights saved across all your devices? Sign up or sign in
