YAHYA ATOR MAMOLAN
ATOR MAMOLAN
E dhalem Kabar Bagus karanganna Yahya paneka, Isa ecareta'agi menangka Dhabuna Allah se langgeng se ampon daddi manossa sareng alenggi e antarana sampeyan sareng kaula sadaja. Akadi se esebbuttagi e dhalem ketab paneka, Kabar Bagus etoles kalaban maksod sopaja para maos padha'a parcaja ja' Isa paneka Rato Panyalamet se ejanjiyagi – Salerana gapaneka Pottrana Allah dibi'. Jugan sopaja kalaban parcaja ka Salerana, para maos narema odhi' (20:31).
Saamponna bagiyan mamolan se notorragi ja' Dhabuna Allah se langgeng gapaneka Isa, bagiyan kapeng settongnga ketab paneka nyareta'agi kaajiban se acem-macem se epabadha sareng Salerana. Sadajana kaajiban gapaneka noduwagi ja' Isa gapaneka Rato Panyalamet se ejanjiyagi, Salerana Pottrana Allah. Sabban bagiyan se nyareta'agi parkara kaajiban etoro'e sareng pa-ponapa se ekabu-dhabu Isa sareng reng-oreng. Dhari pa-ponapa se ekabu-dhabu Isa sareng reng-oreng gapaneka laju terrang pa-ponapa se enyata'agi sareng kaajiban-kaajiban gapaneka. E dhalem bagiyan paneka etotorragi ja' badha oreng se parcaja ka Isa sarta pas daddi red-moredda, namong badha jugan se nolak ban ta' poron parcaja ka Salerana. Pasal 13-17 aesse catheddan se lanjang lebar parkara saponapa rapedda Isa sareng red-moredda e baja malem e bakto Salerana etangkebba, jugan kadi ponapa Salerana nyadhiya'agi sarta makoko atena red-moredda e malem gapaneka. Sal-pasal bagiyan aher notorragi parkara kadi ponapa Isa etangkep sareng eadili, kadi ponapa Salerana se esalib, seda sareng pas odhi' pole, jugan kadi ponapa Salerana se ngaton ka red-moredda saamponna odhi' pole.
Caretana babine' se tajuguk teppa'na azina (8:1-11), emaso'agi e antarana tandha korong raja polana bannya' naskah sareng salenan-salenan ka basa laen gi' jaman dhimen se ta' notorragi parkara gapaneka, dineng en-laenna badha jugan se notorragi parkara gapaneka e kennengngan se acem-macem.
E dhalem ketabba paneka Yahya ngotama'agi papareng, enggi paneka odhi' se salerressa sareng langgeng, se eparengngagi Allah kalaban parantara'anna Almasih. Papareng gapaneka ampon emolae e dunnya, sareng bisa ealame reng-oreng se narema Isa menangka jalan ka Allah, menangka se anyata'agi Allah, sareng menangka se apareng odhi'. Ciri kassepon Yahya enggi paneka parompama'an-parompama'an se epondhut dhari kadaddiyan re-saarena kaangguy noduwagi ra-parkara rohani se lerres, ompamaepon: aeng, roti, tera', oreng ngowan sareng dumbana, bungkana anggur sareng buwana.
Essena Ketab
Mamolan 1:1-18
Yahya Pambaptis ban reng-oreng se ngereng Isa dha'-adha' 1:19-51
Pangladinanna Isa e nga'-tengnga'anna masarakat 2:1–12:50
Re-are dhi-budhina e Yerusalim ban e seddi'na Yerusalim 13:1–19:42
Isa odhi' pole ban ngaton ka red-moredda 20:1-31
Panotop: Isa ngaton pole e Galilea 21:1-25
Currently Selected:
YAHYA ATOR MAMOLAN: MAD
Highlight
Share
Copy
Want to have your highlights saved across all your devices? Sign up or sign in