HABAKUK 3
3
Du'ana Habakuk
1Reya du'ana Nabbi Habakuk:
2Adhu GUSTE, abdidalem ampon mereng ponapa se elampa'agi Junandalem
daddi abdidalem arassa khidmat e dhalem ate.
Ngereng olange pole lalakon raja gapaneka,
ngereng nyata'agi samangken e jaman abdidalem paneka.
Kasokana Junandalem apareng kabellasan
sanare Junandalem ce' dukana ka abdidalem sadaja.
3Junandalem Allah Se Mahasocce se rabu dhari Téman,#3:3 Téman padha ban Edom.
Junandalem rabu dhari Pagunongan Paran.
Langnge' katotoban sareng kamolja'annepon Junandalem,
bume possa' sareng pojiyan kaator ka Junandalem.
4Junandalem rabu sareng sonar se talebat tera'na,
dhari astaepon Junandalem kalowar sonar se talebat terrangnga,
e ka'dhissa' pangerrebbannepon kobasana Junandalem.
5Junandalem makon panyaket ajalan e ajunanna
sareng maot e bingkengnga.
6Manabi Junandalem mendel, bume agundhek;
manabi Junandalem ngoladi, sa-bangsa padha ngetter.
Nong-gunong se langgeng padha ka-bengka;
mo'-gumo' se badha salanjangnga jaman pas nyellet sajan ka baba,
e mo'-gumo' gapaneka
Junandalem alomampa ngabidi jaman lamba'na.
7Abdidalem nengale ra'yat Kusyan katako'an,
sareng oreng Midian ter-ketterran.
8Adhu GUSTE, ponapa tase' se andaddiyagi Junandalem duka?
ponapa ngay-songay se daddi lantaranna Junandalem kantos bendu sapaneka?
Junandalem netene ondhem menangka jaran sareng kareta perrang,
e bakto sareng Junandalem ommattepon eparenge kamennangan.
9Junandalem ampon nyadhiya'agi gandhiba,
panaepon Junandalem esadhiya'agi se eocola.
Saamponnepon gapaneka sareng Junandalem bume eseba' ebadhi ngay-songay.
10Nengale Junandalem nong-gunong agundhek sadajana,
dhari langnge' toron ojan akadi se etotta'.
Aeng dhari babana tana agarudhu' sowarana,
omba'na alung-gulung ce' tenggina.
11Sonarrepon panana Junandalem sasat ngabber ce' ceppedda,
tombakkepon arap-galirap,
daddi are sareng bulan padha ambu e kennengnganna, ta' ajalan.
12Junandalem ce' dukana se meyos ka saantero bume;
sa-bangsa sareng Junandalem enyek-enyek dhari panassa ate.
13Junandalem maju mabebasa ommadda
sareng masalamedda rato peleyanna.
Pamimpinna oreng se daraka
sareng Junandalem epokol kantos ajungkelang,
ca-kancana se noro' padha epamosna.
14Pamimpinna pasukanna moso terbas ekenneng na-panana Junandalem,
e bakto tantaraepon dhateng akadi kaleng busbus kowattepon,
sopaja abdidalem sadaja asalebbudan.
Reng-oreng se daraka gapaneka agella'an ce' sennengnga,
akadi oreng se ta' asa'-kasa'
nyeksa oreng se kakorangan.
15Sareng jarannepon Junandalem,
Junandalem nyek-ngenyek tase' raja
sarta sagara se kapo'na ngapote.
16E bakto mereng gapaneka abdidalem ngetter sabadan
bibir abdidalem ngetter katako'an.
Badan abdidalem pas lemmes ta' gadhuwan kakowadan,
soko dhung-tatandhung manabi ajalan.
Kalaban ate ayem abdidalem anante'a
kantos Allah madhateng okoman ka reng-oreng se nyerrang abdina.
17Sanare bungkana ara tadha' buwana
sareng bungkana anggur tadha' anggurra,
sanare tamennan jaitun ta' ngasellagi pa-ponapa
sareng saba ta' ngasellagi gandum sakone'a,
sanare ba-dumba mate sadajana
sareng kandhangnga ebin tadha' essena,
18abdidalem peraga salanjangnga,
sabab Junandalem GUSTE Allah panyalamet abdidalem sadaja.
19 #
2Sam. 22:34; Jab. 18:33 Guste Allah Se Mahatenggi marenge abdidalem kakowadan
akadi sokona manjangan soko abdidalem sareng Junandalem epakoko.
Junandalem nonton abdidalem sopaja aman
e bakto ajalan e pagunongan.
Currently Selected:
HABAKUK 3: MAD
Highlight
Share
Copy
Want to have your highlights saved across all your devices? Sign up or sign in
