KADADDIYAN 13

Abram ban Lud tapesa

1Abram ngalle dhari Messer meyos ka dhaja ka Tana Negeb e bagiyan lao'na Kana'an asareng ban rajina sarta abakta dhi'-andhi'na, Lud noro' ngalle keya. 2Abram ce' sogina; bannya' dumba ban embi'na, sape, emmas ban salaka. 3Abram alomampa dhari kennengngan se settong ka kennengngan laenna, dhari Tana Negeb sampe' ka Betel; pas ambu e antarana Betel ban Ai, se sabellunna jareya bi' salerana tao ekennengnge maddek kemahna, 4ban ebadhiyagi mezba. E jadhiya Abram abakte ka PANGERAN.

5Lud se abareng ban Abram jareya andhi' dumba, sape ban kemah keya. 6Tape tana jareya ta' cokop mon ekadhuwai, sabab ebinna se kadhuwa jareya talebat bannya'na. 7Daddi oreng se ngowan ebinna Abram seggut atokar ban oreng se ngowan ebinna Lud. (E bakto jareya tana jareya gi' ekennengnge bangsa Kana'an ban bangsa Feris.)

8Daddi Abram adhabu ka Lud, “Sengko' ban ba'na reya sabala'an, daddi ta' becce' mon reng-oreng se alako ka sengko' atokaran ban reng-oreng se alako ka ba'na. 9Daddi lebbi becce' mara ba'na ban sengko' apesa bai. Mara ba'na se mele. Mon ba'na ngennengngana bagiyan kacer, sengko' ennengnga e bagiyan kangan, mon ba'na ngennengngana bagiyan kangan, sengko' ennengnga e kacer.”

10 # Kad. 2:10 Lud ngabas ka sakalenglengnga laju nangale'e ja' Cora Yordan, sampe' ka kottha Zowar bannya' aengnga kabbi, padha ban Bun-kebbunanna PANGERAN,#13:10 Bun-kebbunanna PANGERAN: noduwagi Bun-kebbunan Eden. padha ban tana Messer. (Kantha jareya kabadha'anna sabellunna PANGERAN mamosna Sodom ban Gomora.) 11Daddi Lud mele sakabbinna Cora Yordan, pas ngalle ka temor. Se kadhuwa jareya laju apesa. 12Abram paggun alenggi e Kana'an, dineng Lud paggun neng e antarana tha-kottha e Cora Yordan jareya, akemah e seddi'anna Sodom. 13Dineng kottha Sodom reya ekennengnge reng-oreng se talebat jahadda ban bannya' dusana ka PANGERAN.

Abram ngalle ka Hebron

14Saellana Lud ngalle apesa ban Abram, PANGERAN adhabu ka Abram, “Kodda' ba'na ngabas ka sakalenglengnga, dhari kennengnganna ba'na se manjeng jareya. 15#Car. 7:5 Nagara se etangale'e ba'na jareya bi' Sengko' ebagiya kabbi ka ba'na ban ka na' potona ba'na sopaja daddiya andhi'na ba'na ban na' potona saterrossa. 16Bi' Sengko' ba'na eberri'ana na' poto se talebat bannya'na, sampe' ta' ekenneng bitong. Akantha bannya'na abu e bume se ta' ekenneng bitong oreng, kantha jareya bannya'na na' potona ba'na. 17Sateya kassa' entare bagiyanna nagara reya kabbi, sabab tana jareya bi' Sengko' ebagiya ka ba'na.” 18Daddi Abram laju ngalle parkemahanna, pas neptep e seddi'anna ka'-bungka'an se karamat kennengnganna kabakteyan e Mamre e seddi'na Hebron; e jadhiya Abram abadhi mezba se eatorragi ka PANGERAN.

Currently Selected:

KADADDIYAN 13: MAD

Highlight

Copy