LUKAS 6

Mompokilawa mongkona sinaa nu Sabat

(Mat. 12:1-8, Mrk. 2:23-28)

1 # Ul. 23:25 Daagi' ko sansinaan nu Sabat, tempo'nyo i Yesus nosahak i sa'angu' na ale' nu gandum, anu saja' mombatuki Ia nontipu gandum. Piniopos nu aha na gandum aijo' nu lima ka' kinaan. 2To pia-piangkuka na mian nu Farisi notatae, “Kadaka' komiu molanggai atu-atulan nu agamanto, mombaumo anu o tewa' i sinaa nu Sabat?”

3 # 1Sam. 21:1-6 I Yesus nontaami, “Ma'isa toho' komiu nombasa' mongkona anu binau i Daud, tempo'nyo ia ka' to mia-miannyo no'ohop? 4#Im. 24:9 Ia ninsoop i uno nu Laigan nu Tumpu, ka' nongala roti anu sinombahkonmo hi Tumpu ka' kinaannyo. Lantas binee'nyo mule' na roti aijo' hi to mia-miannyo. Padahan koonyo nu hukum nu agamanto, ola to ima-imam na anu timbali mongkaan roti aijo'.”

5Lantas i Yesus notatae, “Anak nu Mian mongkuasai sinaa nu Sabat!”

Mian anu limanyo lupe na sambiha'

(Mat. 12:9-14, Mrk. 3:1-6)

6Daagi' ko sansinaan nu Sabat sangga'at, i Yesus namba nongajan i laigan pogalejaan. I kiijo' daagi' ko samian na limanyo lupe na sambiha'. 7To pia-piangkuka na gulu' agama mian nu Farisi mongka'oho' molio kasala'an i Yesus, da timbali mongkalaak Ia. Jadi, aha saja' mompotamatakon pa' Ia nompa'alinmo mian masakit i sinaa nu Sabat. 8Panyo nusumbu' i Yesus na tanga'an nu aha. Sahingga Ia notatae hi mian anu limanyo lupe aijo', “Imbo' tinjo aiya i ahop!” Mian aijo' nobula, ka' tinuminjo i kiijo'. 9Lapas aijo' i Yesus nompokilawa hi to mia-mian anu daagi' i kiijo'. “De koonyo nu agama, apaa na timbali obaunto i sinaa nu Sabat? Mombau anu ma'ima' kabai mombau anu ma'idek? Momposalamat mian kabai monsilakai?” 10I Yesus nontoa aha iwi-iwi' anu montikubi, lantas notatae hi mian aijo', “Tajuakon mae na limaum.” Tinajuakon nu mian aijo' na limanyo, sahingga limanyo na'alin.

11Panyo to gulu-gulu' agama tiba to mia-mian nu Farisi pinusamo hondo, ka' mulai binasale' pa' apaa na anu timbali nubau nu aha hi Yesus.

I Yesus nompile'i sampulu' ka' ohua' na rasul

(Mat. 10:1-4, Mrk. 3:13-19)

12Tempo'nyo aitu i Yesus nindako i sa'angu' na bungkutnyo da balado'a. I kiijo' Ia binalado'a hi Tumpu sinampahu. 13Salatan sinaa majingkamo, ilaganyomo na anu saja' mombatuki Ia, ka' nompile'i sampulu' ohua' na mian anu kiijo' hi aha, sinanggohannyo na aha anu sampulu' ka' ohua' aijo' to rasul-rasul. Aha aitumo: 14I Simon (anu sinanggohan i Petrus), tiba i Andreas utus i Simon; i Yakobus ka' i Yohanes, i Filipus ka' i Bartolomeus, 15i Matius ka' i Tomas, i Yakobus anak i Alfeus ka' i Simon (anu osa-osanggohi i Patriot), 16i Yudas anak i Yakobus ka' i Yudas Iskariot anu saidi' mae tinimbali anu palangues.

I Yesus nongajan ka' nompa'alin mian

(Mat. 4:23-25)

17Lapas aijo' i Yesus nintudunmo lengkat mae i bungkutnyo aijo' hingga-hinggat tiba to rasul-rasul aijo', lantas nilawe ka' tinuminjo i sa'angu' na tampat anu mahata. I kiijo' suele daagi' ko mian da'isan sangga'at anu saja' mombatuki Ia, tinoka lengkat iyayamae i songko-songko na Yudea, Yerusalem, ka' to kota-kota Tirus ka' Sidon anu i biwi nu ambai. 18Aha tinoka da mohongo i Yesus, ka' mule' da opa'alin na to panya-panyakit nu aha. Apaa aha anu sinoku'on nu Roh ma'idek tinoka suele ka' pina'alinakon. 19Iwi-iwi' na mian binala usaha mompanya i Yesus, kalana daagi' ko kuasa anu lubat lengkat i butong-Nyo anu nompa'alinmo aha iwi-iwi'.

Kalame'an ka' kasusa'an

(Mat. 5:1-12)

20I Yesus nontoa anu saja' mombatuki Ia, lantas notatae,

“Bila-bilahi na komiu to mia-mian kasiasi,

kalana komiu minsoop mian anu palesayamo hi Tumpu!

21Bila-bilahi na komiu anu mo'ohop uuka aiya;

komiu opobosuje!

Bila-bilahi na komiu anu humaang uuka aiya;

komiu kumojoje!

22 # 1Ptr. 4:14 Bila-bilahi de komiu oka'ideki, madi' otalima, o alu, ka' opitana'i kalana Anak nu Mian! 23#2Taw. 36:16, Kis. 7:52 To nabi-nabi tempo'nyo u'utu mae binau suele sumo aitu. De han aijo' jadi, posanangmo na kinyonyoa miu, ka' mosalele lame-lame', kalana daka' na tamboonyo pinosadiamo bau bagi miu i suluga'.

24Panyo silaka na komiu anu kaya uuka aiya;

kalana komiu nongoa'imo kasanangan!

25Silaka na komiu anu mobosu uuka aiya;

kalana komiu saidi' mae mo'ohopmo!

Silaka na komiu anu kumojo uuka aiya;

kalana komiu saidi' mae susa' na kinyonyoa ka' humaang!

26Silaka na komiu de iwi-iwi' mompuji' belemiu; kalana sumo aitu suele na mompolee' nu aha nompuji'mo to nabi-nabi anu baleko' tempo'nyo u'utu mae.”

Liibos hi sampo bali'

(Mat. 5:38-48, 7:12a)

27“Panyo hi komiu anu mohongo Aku tempo' uuka, Ku potuun sumo uuka: Kalibosi na sampo bali'um, ka' bau na anu ma'ima' hi mian anu mongka'ideki beleyum. 28Balakati na mian anu mongkutuki beleyum, ka' odo'akon na mian anu mombau ma'idek hi beleyum. 29De nuhapa' nu mian na gagisingum sambiha', pojohok da nuhapa' na gagisingum sambiha' mule'. De juba'um ingagoan, bee' mule' na baju'um. 30De mian mompoita apa-apaa hi beleyum, bee'mo na aijo' hi ia, ka' de anu miu o agoi bolimo po'ule' opoita. 31#Mat. 7:12 Obau na kalakuan hi mian sangga'at sumo anu oka'ima'i miu, nubau nu aha hi komiu.

32De komiu mongkalibosi to mia-mian ola anu saja' mongkalibosi komiu, apaa na gunanyo? Mian anu baladosa' pe'e mongkalibosimo to mia-mian anu mongkalibosi aha! 33Ka' de komiu ola mombau anu ma'ima' hi to mia-mian anu saja' mombau ma'ima' hi komiu, apaa na gunanyo? Mian baladosa' pe'e mombaumo sumo aitu! 34Ka' de komiu momposabolaakon doi hi to mia-mian anu moko ala monsule'akon, apaa na gunanyo? Mian baladosa' pe'e monsabolakanmo doi hi mian baladosa', lantas po'ule' nu poita! 35Sepantasnyo misa' sumo aijo'! Komiu ola ahi' mongkalibosi sampo bali'um, ka' mombau anu ma'ima' hi aha. Komiu tionyo momposabon ka' boli montaha'imani po'ule' osule'akon. Desumo aitu tamboum daka' ka' komiu timbali to ana-anak nu Tumpu Anu Matangkas na Kuasanyo. Kalana Tumpu manonong na kinyonyoanyo hi mian anu madi' monsumbu' momoita talima kaseh, ka' suele hi anu ma'idek. 36Tionyo komiu ko kalibosan susumo Tuumaum suele ko kalibosan!”

Mompisala'i mian

(Mat. 7:1-5)

37“Boli mompisala'i mian sangga'at, da boli komiu suele nu pisala'i nu Tumpu. Boli mohukum mian sangga'at, da boli komiu suele nu hukum nu Tumpu. Ampuniakon na mian sangga'at, da Tumpu suele mongampuni komiu. 38Bee'i na mian sangga'at, da Tumpu suele mombee'i beleyum; komiu montalimaje pombee'i molabi-labi anu tinakanmo ma'i-ma'ima' bau bagi miu. Kalana anu opake pontakanan komiu hi mian sangga'at, aijo'mo suele na opake pontakanan anu miu, nu Tumpu.”

39 # Mat. 15:14 Lapas aijo', i Yesus nonsisikakonmo kantuang hi aha sumo uuka, “De mian mapisok montaka' mian mapisok sangga'at, tantu ua-ua'aha manabu' i uno nu bolo'. 40#Mat. 10:24-25, Yoh. 13:16, 15:20 Madi' ko mulit anu molingkudui gulu'nyo. Panyo mulit anu binala gulu'mo pokakanamo sumo gulu'nyo.

41Ka' kadaka' komiu montoa sangkunyit na kau' i uno nu mata nu utusum, yo aitu balak anu i uno nu posi mataum na madi' otoa miu? 42Mosia na komiu montaloakon hi utusum, ‘Imbo', utus da ku alinakon na kau' sangkunyit atina' i uno nu mataum,’ yo aitu i uno nu posi mataum daagi' ko balak anu madi' otoa miu? O anu baleko'! Alinakon pe'e na balak anu daagi' i posi mataum. Atina'je ka' komiu moko toa mana-manasa, ka' timbali mongalinakon sangkunyit na kau' i mata nu utusum.”

Kau' ka' bua'nyo

(Mat. 7:16-20, 12:33-35)

43“Kau' anu molumba', madi' mimbua' anu ma'idek. Sumo aitu mule' na kau' anu madi' molumba', madi' mimbua' anu ma'ima'. 44#Mat. 12:33 Toto sangahan na kau' osumbu' i bua'nyo. Kuhat mihii' madi' mimbua' bua' nu ara, ka' hemput mihii' madi' mimbua' anggur. 45#Mat. 12:34 Mian anu ma'ima' montaeakon hahan anu ma'ima', kalana kinyonyoanyo buke' nu ka'ima'an. Mian anu ma'idek montaeakon hahan anu ma'idek, kalana kinyonyoanyo buke' nu ka'idekan. Kalana apaa na anu otaeakon nu nganga', aijo' mosabat lengkat i kinyonyoa.”

Mian pande na mompotinjo laigan kabai mian ponga' na mompotinjo laigan

(Mat. 7:24-27)

46“Ka' kadaka' komiu molaga Aku, ‘Tumpu, Tumpu,’ panyo madi' mombau anu Kupoita hi komiu? 47Opokakanakonto hi he na mian anu toka hi beleng-Ku ka' mohongo potataeng-Ku, ka' mombau anu kutaeakon? – Yo ii' da Kupotiju' hi belemiu –. 48Ia sumo mian anu tempo'nyo mompotinjo laigan mongkeke leleeng, lantas mombau mesennyo opokoko i batu. De toka na iyaba' ka' uee nu kaunyo moleetabi laigan aijo', laigan aijo' madi' opoko anjuhakon, kalana pinotinjomo i bawo nu mesen anu madodo. 49Panyo mian anu mohongo potataeng-Ku, ka' madi' mombau sumo samian anu mompotinjo laigan madi' mompake mesen. De iyaba' moleetabi laigan aijo' malia' motua', ka' anu ma'idek manjoo' hondo!”

Currently Selected:

LUKAS 6: LAILOE

Highlight

Copy